شاشة (CRT Flat استعمال خارج انتاج حديث ولا LCD جديدة) 19 بوصة , محتاج رأيكم

الســـلام عليكم و رحمة الله و بركاته

شباب , انا محتاج مساعدة مهمة جدا
¤ انا عاوز اشترى شاشة ¤

و محتار بين انى اجيب شاشة عادية استعمال خارج فلات تكون 19 بوصة , و هاجيبها انتاج حديث
ولا اشترى شاشة جديدة LCD 19 WS

واحدة تمنها 400 تقريبا و التانية 1100 , يعنى فرق 700 جنيه !
مش عارف هل الـ 700 دول حلال ادفعهم فى الـ LCD ولا مميزاتها ما تستاهلش المبلغ دا كله

هو بصراحة شكلها لواحده يستاهل 10 الاف جنيه :D , لكن انا الفلوس معايا مش كتير و عاوز استثمرها صح خصوصا انى لسه هاحدث الجهاز .

يا ريت اعرف آراءكم و تفصيل الرأى و توضيح سبب الاختيار

و برضه بعد اذنكم عاوز اعرف الـ LCD 19 WS بكام اليومين دول و ايه افضل نوع فيها
و الـ CRT 19 اسعارها كام و ادور على نوع ايه و انتاج سنة كام , و ايه الحاجات اللى ممكن آخد بالى منها و انا بشترى .

و برضه سؤال اضافى , الـ 19 بوصة هاتبقى مناسبة و لا كبيرة زيادة عن اللزوم ؟
( طبعا انا بتكلم عن الـ CRT لإن لو LCD لو اطول اجيب بلازما مش هاتأخر ::p

: مــع العلم بإن خطتى المستقبلية كالآتى :
لو وقع الاختيار على الـ CRT , هاتوكل على الله و هانزل اشترى واحدة
لو وقع الاختيار على الـ LCD , هاستلف شاشة من اى حد صاحبى لمدة حوالى 3 شهور لحد ما اكمل ثمن الشاشة و انزل اشتريها .

سؤال اخير : حد هنا بيعرف يصلح شاشات ؟؟
مكثفات الالوان عندى بايظة و عاوز حد يقولى هى شكلها ايه أو الاقيها فين داخل الشاشة علشان اغيرها
يا ريت لو حد يعرف المعلومة دى يكتب هنا فى الموضوع أو يبعتلى رسالة خاصة

و شكـــرا

بصراحة الLCD حاجة تانية خالص في دقة الالوان و كمان الwidescreen رائعة بالنسبة للافلام و الالعاب و الانترنت !!
بس خلي بالك الشاشة ال19 بوصة الwidescreen حتلاقي ان ارتفاعها 25.5 سم يعني اقل من ارتفاع الشاشة ال19 بوصة CRT اللي بيبقي ارتفاعها في الغالب حوالي 30 سم....... يعني ال19 بوصة الwidecreen يدوبك اكبر من ال17 بوصة CRT بحاجة صغيرة .....
افضل الشاشات ال19 بوصة الLCD في مصر هي الفيليبس 190CW و كمان السامسونج 920nw كويسة اوي و فيه موديلات برضه فيليبس ممتازة و التمن بيلعب في حدود 1100 جنيه زي ما انت قلت .......
الشاشات الCRT الجيدة من رايي بتبقي DELL و IBM دي بتبقي الوانها جميلة جدا و طبعا انت حتجربها و تشوفها بنفسك و اشتري الشاشة الFlat السوداء و تاكد ان تاريخ انتاجها حديث شوية يعني 2002 او 2003 علي الاقل و حاول اشتري من محل ثقة بحيث ترجع الشاشة لو ظهر فيهل عيب معاك.......
تشتري ايه CRT ولا LCD ده يبقي قرارك انت يعني الCRT كويسة و تتحمل اما الLCD فهي رائعة بس عاوزة محافظة عليها جامد لانها رقيقة و ممكن اي حاجة تاثر علي الشاشة و كمان ليها طريقة تنظيف معينة علشان ما تبوظش الشاشة و بيبقي ليها عمر افتراضي حوالي 50 الف ساعة تشغيل

بصراحة يا اخى الافضل طبعا ال LCD و كله بيجبها حاليا نادر اوى لما تلاقى حد جاب CRT لو بيجمع جهاز جديد حتى تلاقيها مش منتشرة فى المحلات كثير دلوقتى فلو تقدر تعمل زى ما بتقول كدا تستلف واحده من صاحبك لغاية ما تجمع حقها و تجيبها يبقى كويس اوى افضل من انك تجيب واحده مستعمله CRT ب 400 جنيه و تيجى تبيعها بعد فترة مش هتجيب حتى 100 جنيه لان الشاشات ال CRT على وشك الاندثار خلاص :)

من الافضــل ان تقتني شاشــة حديثــة وشاشة الــ LCD مميزه ورائعــة بشرط تكون من نوعيــة ممتازة
وأنتا دافع دافع فالأفضــل أن تضع الثمن في المكان الصحيح واقتني الشيء الجديــد ..

نصيحه قبل متفكر تشترى الlcd Wide
تشوفها وتقعد تشتغل عليها
لان ى ناس كتير مبتمشيش معها وانا منهم
وبنسبه للموضوع الاستعمال الخارج
متشتريهاش عشان حاجتين
1-انها سعرها ميستحقش كل ده وانهم مغلينها باتفاق مع موردى الشاشات الجديده(لاحظ اسعار الجديد قبل وبعد ارتفاع اسعار الاستعمال الخارج)

2-ان ال19 ديه مش مساحتها الحقيقيه يعنى
ممكن تجيب واحده 17 ولكن مساحه الرؤيه نفسها ممكن تبقى 14 او 15 ودى مش اى حد يعرفها
كذلك ال19 ممكن تبقى 17 فى مساحه الرؤيه Max. Visible Display Size
لكن الLCD بتبقى كامله وساعات بتبقى اكبر فى بعض الانواع واكيد انت هتلاحظ الموضوع ده

وارجو ان اكون افدتك
وشكرا.....

أشكركم جدا يا شباب على مساعتدكم لى
أنا قررت اجيب LCD إن شاء الله

بخصوص موضوع الابعاد ( جزاكم الله خيرا على انكم اشرتم اليها )
انا قولت اشوف الـ samsung و اشوف ابعادها ايه
samsung 920nw
https://i38.tinypic.com/2cdy3vq.jpg

دا كدا حتى ماجابتش 17 بوصة :p !!

هى الشاشات الـ LCD بتبقى نظامها كدا ولا السامسونج استخسروا نص متر قماش يكملوا بيها الفستان ( قصدى الـ inches ;) )

حضرتك لازم تعرف ان مقاس الشاشة بالبوصة بيتقاس بقطر الشاشة و ممكن تحسبه لو انت عندك طول و عرض الجزء المرئي من الشاشة ( يتم الحساب عن طريق قانون فيثاغورس بتاع حساب المثلثات )..........
وال19 بوصة الوايد بتبقي ارتفاع الجزء المرئي من الشاشة حوالي 25.5 سم بينما ارتفاع الشاشة ال17 بوصة CRT بيبقي حوالي 24 سم يعني ال19 بوصة LCD Wide بتبقي اكبر من ناحية الارتفاع بحاجة بسيطة.........
طبعا حضرتك حتقولي فين ال25.5 سم دي ؟ الاجابة ان الابعاد اللي حضرتك جايبها دي ابعاد الشاشة كلها بالاطار بتاعها اما ابعاد الشاشة نفسها فحتلاقي اسمها Visible Area Dimensions