اريد شراء شاشة 24 بوصة ليد "استيراد" للكمبيوتر لمشاهدة الافلام والالعاب ايضاً

ياريت افادة مش عاوز اتخم فيها او يكون فيها عيوب كبيرة وكم يكون سعرها استيراد وكارت الشاشة تبعى sapphire 6750

بالنسبة للسعر فالشاشات الـ 24 الاستيراد رينج سعرها من 1100 لـ 1600 حسب الموديل والأبعاد والتقنيات المتوفرة فيها والفرزة والحالة العامة.
وطبعًا الصورة في مشاهدة الأفلام هتكون ممتازة لو الشاشة FHD ولو الأبعاد أقل متقلقش مش هتحس بفرق في جودة الصورة مع المقاس دا.
أما الألعاب فبتعتمد على أمور كتير زي الأبعاد وقوة المعالج الرسومي ومعدل تحديث الشاشة ومعدل زمن الاستجابة وغيرهم،
وهنا لازم تعرف موديل الشاشة قبل الشراء وتشوف كامل مواصفتها على موقعها الرسمي عشان تقدر تعرف أدئها في الألعاب هيكون ازاي.
الحاجة الأخيرة بخصوص موضوع إنك قلقان تتخم فيها أو يكون فيها عيوب كبيرة فدا شيء راجع للمعاينة على أرض الواقع،
يعني اللي هيعاين هو اللي يقدر يحكم لكن هقولك بعض النصائح العامة اللي تخلي بالك منها وقت الشراء
- أولًا لازم تعرف موديل الشاشة وتشوف مواصفاتها كاملة على موقعها الرسمي عشان تقدر تتوقع الأداء اللي هتاخده منها.
- ثانيًا اختبر الشاشة ببرنامج Dead Pixel Tester عشان تشوف فيها ديد بيكسل ولا لا " وتقدر تبقى تاخده معاك على فلاشة".
- ثالثًا إتأكد إن الشاشة مفيهاش مشكلة تسريب الإضاة.
- رابعًا شوف الحالة العامة للشاشة هل فيها خربشات في الفريم أو في الاسكرينة نفسها ولا لا لأن لو فيها بشكل ملحوظ معناها إنها اتعرضت لصدمات كتير في الشحن من الخارج ودا أكيد ممكن يأثر على العمر الافتراضي.
موفق

شكرا جدا للمعلومات القيمة كنت عايز اعرف استخدم البرنامج ازاى انا حملته ولما شغلته جابلى الشكل دة
https://3.top4top.net/p_1332qyioq1.jpg

العفو
البرنامج فيه خيارات كتير لكن يكفيك بعد ما تفتحه ويجيلك الشكل اللي في الصورة تضغط على علامة X اللي فوق ع اليمين وهتلاقي الشاشة بقت قدامك بلون واحد
ومع كل كليك بالماوس اللون هيتغير ومع كل لون تبص كويس ع الشاشة وتشوف لو في بيكسل ميتة ولا لا
ولما تحب تقفل البرنامج هتضغط على زر ESC في لوحة المفاتيح وبعدين تختار من البرنامج Exit وبعدين No.

تمام انا جربتة على الشاشة الى بستعملها حاليا مكنش فيه ولا نقطة بيضاء ظاهرة "البيكسل الميت" مش هى بردة البكسلات الميتة بتظهر على شكل نقط بيضاء وسط اللون الازرق او الاسود الكامل .. لو الامر كدة تمام جدا وهجرب الاداة دى على الشاشة الجديدة الى هاجبها . استفسار صغير اخير هل ابتعد تماماً عن شراءها من الانترنت خاصة انى عاوزها استيراد ؟ وشكرا

اخى عذراً انا قررت اشتريها جديدة وشوفت الشاشة دى على سوق عاوز رأيك فيها لو سمحت هى 22 انش وهى FHD صح ؟ بس فى تقريباً تعلقين فقط من ضمن التعليقات الكتيرة بيقول انها مش جيدة جدا فى مشاهدة الافلام هى سعرها جيد جدا ياريت رأيك وشكرا جزيلاً
https://egypt.souq.com/eg-ar/%D8%B4%...hm-10859051/i/

أهلًا أخي
بالنسبة للديد بيكسل بتبقى نقطة سودا مش بيضا وبتظهر أكتر في اللون الأبيض
وبالنسبة للشاشة اللي أنت حطيت لينكها فهي ممتازة على سعرها
تصميم شيك ونحيف وشاشة جميلة وصورتها وألوانها هيعجبوك
لكن خلي بالك هي مش فيها منفذ للسماعات يعني هتعتمد على منفذ اللوحة الأم للكمبيوتر
وفي نفس الوقت أرشحلك الشاشة دي أرخص كتير وممتازة
هي زوايا الرؤيا بتاعتها أقل شوية لكن جيدة بردو ومش فيها منفذ HDMI لكن بتديك نفس جودة الصورة الفل إتش دي على الفيجا
وهي من الخلف مش نفس التصميم النحيف وكل الحاجات دي هي اللي مقلله سعرها
لكن في المجمل هي أفضل وأكتر عملية وسعرها 1600 جنيه بس ومعاها 3 سنين ضمان
ودا اللينك بتاعها ------> Samsung LS22E20KBS/ZN
ولو تقدر تزود عن مبلغ الشاشة اللي أنت حطيت لينكها في حدود 450 جنيه هيبقى عندك خيار ممتاز و24 مش 22
وهي شاشة من ديل وأنا بثق في شاشات ديل أكتر من سامسونج كمان كجودة تصنيع
الشاشة اللي برشحهالك من ديل 24 إنش وفيها منفذ VGA ومنفذ HDMI وزاويا الرؤيا 178/178 وزمن الاستجابة 5MS GTG
وبشكل عام هي شاشة ممتازة وعملية وللعمر إن شاء الله ودا اللينك بتاعها ------> Dell 24 Monitor E2418HN
موفق

تمام انا استقريت على نصيحة حضرتك وهجيب الشاشة Dell 24 Monitor E2418HN ان شاء الله خلال 20 يوم وكنت عايز استفسر بس على حاجات بسيطة اخيرة هل الشاشة ليها منفذ خاص للسماعات ولو شغال على جيمينج لفترات كبيرة مش ضار عليها او هى مهيئة للالعاب بشكل كافى لان فى شاشة كانت مستعملة قبل كدة lcd وباظت منى وانا بلعب لعبة لمدة كبيرة .. وهل زوايا الرؤية جيدة بلفعل بحيث لو بتفرج من زاويا غير مستقيمة مش هلاحظ الوان الشاشة مطفية شوية ؟ واخر استفسار هل الشراء من الانترنت من سوق مضمون ولا اشتريها من البائع مباشرة فيس تو فيس وهل هيكون نفس السعر .. ومعلش لو طولت عليك وشكرا لافاداتك الكريمة

مرحبا أخى الكريم

ردا على رسالتك

فالشاشه التى رشحها لك أستاذ محمد

أفضل من أختيارك السابق من كل النواحى

يكفى أنها ستكون جديده وبضمان

والشاشه ستؤدى معك جيدا بالألعاب وخلافه

لكن عندما تقول شاشه مخصصه للألعاب

فهنا الموضوع يختلف

الشاشه المخصصه للألعاب سعرها مرتفع جدا

وبعضها يتخطى حاجز ال عشرون ألف جنيه

لذلك كل شىء يكون دائماا مناسب لسعره

وموقع سوق وجوميا

مواقع محترمه وجربناها كثيراا

لكن من الممكن عند البحث على منتج معين

تجده بالخارج ( عند المحلات والتجار)

أرخص قليلاا وبنسبه طفيفه من سوق

لكنى شخصيا أقدرها تكاليف المواصلات


ولمزيد من مواصفات الشاشه


https://www.dell.com/si/business/p/d...8hn-monitor/pd


وتستطيع مشاهده فيديوهات عديده

كهذا الفيديو


https://www.youtube.com/watch?v=mSCx3jlCFH4


بالتوفيق دائماا

شكرا اخى . ممكن اعرف الضمان بتاعها قد اية ؟ وهل فيها سماعات خاصة بيها وهل الالعاب بشكل عام بتؤدى لتلف الشاشات هو سؤال غريب بس حابب اعرف وزوايا الرؤيا لو انا قاعد فى زاوية الالوان مش بتقل وتبان مطفية ؟

جزيل الشكر لأخي الكريم عبد الحليم على الإضافات القيمة

وبالنسبة لاستفساراتك أخي
فالشاشة لا تحتوي على منفذ 3.5mm لكن تحتوي على منفذين لتركيب Sound Bar
فأنت لو هتشغلها ع الكمبيوتر هتستخدم منفذ الـ 3.5mm الخاص باللوحة الأم
ولو هتشغلها على ريسيفر فأغلب الريسيفرات فيها منفذ للصوت
فأنت مش محتاج المنفذ في حاجة في الحالتين دول
ولو في وقت من الأوقات وصلتها على جهاز مفيهوش منفذ للصوت ممكن وقتها تبقى تشتري ليها Sound Bar


أما بالنسبة لسؤالك هل الألعاب بشكل عام بتؤدي لتلف الشاشات؟
فهو كما وصفت أنت " سؤال غريب"
الشاشت وأي جهاز إلكتروني أو حتى غير إلكتروني له عمر افتراضي وكل ما تم استهلاكه كل ما عمره الافتراضي بيقل
والألعاب المفترض إنها شيء مسلي وبتسرق الوقت فـ الجيمر وضعه مختلف عن المستخدم العادي في نسبة تشغيل الشاشة في اليوم
يعني لو المستخدم العادي بيشغل الشاشة 7 ساعات يوميًا مثلًا ممكن الجيمر يشغلها 15 ساعة
وبالتالي نفس الشاشة ممكن تقعد مع المستخدم العادي 8 سنين مثلًا على ما يبدأ يظهر فيها مشاكل ومع الجيمر ممكن تبدأ تظهر المشاكل بعد 5 سنين بس
ومع ذلك دا شيء احتمالي بردو لأن فيه عوامل تانية زي سوء الاستخدام مثلًا وعدم الاعنتاء بالشاشة
لكن مش منطق إننا نقول الألعاب تؤدي لتلف الشاشات

وبخصوص زوايا الرؤيا فالشاشة زوايا الرؤيا بتاعتها 178/178 زي ما وضحتلك في الأول ودي درجات ممتازة فمتقلقش.

والنقطة الأخيرة بخصوص الضمان فأنا شوفت ع الموقع الرسمي في اللينك اللي أرفقه أخي عبد الحليم مكتوب إنها بضمان 3 سنين استبدال
وضمان مميز على البانل بتاع الشاشة
لكن طبعًا دا مش هيكون الواقع في مصر
هنا في مصر ممكن يقولك ضمان 3 سنين لكن مش هيجيبلك سيرة استبدال ولا ضمان مميز ع البانل
لكن كدا ممتاز بردو إن يكون ليها ضمان محلي و3 سنين
وبإذن الله شاشات ديل مش هتقصر معاك ومش هتحتاج للضمان

وبالمناسبة الشاشة متوفرة على موقع نون بسعر 2600 والشحن مجاني وفيه كوبون خصم 10% بحد أقصى 150 جنيه
ولو أول مرة تشتري من نون هتلاقي الكوبون متسجل لوحده والخصم نازل وعمومًا الكوبون On52 أو نونها
وكدا الشاشة هتوصلك لحد باب البيت بتكلفة إجمالية 2450 جنيه
والبائع اللي على موقع نون كاتب ملاحظة إنها بضمان الوكيل في مصر
ودا اللينك --------> Dell 24 Monitor E2418HN
واللينك اللي بعتهولك في ردي السابق الخاص بموقع سوق الشحن فيه مجاني بردو والإجمالي 2467 يعني فرق مش كبير.
موفق ومبارك مقدمًا.

عاجز عن شكر حضرتك لتكلفك عناء الرد ووقتك الكريم . متشكر اخى وان شاء الله هجيبها خلال ال20 يوم دوول .تحياتى