مراجعتي للسماعات الجباره Creative Inspire T6200 5.1 Surround
بسم الله الرحمن الرحيم
Creative Inspire T6200
تتوفر هذه السماعات الجباره عند ماكسيمم هاردوير بسعر 650 جنيه
و هي تاتي في كرتونه بهذا الشكل
و عند فتح الكرتونه تجد صندوق به السماعات الصغيره بهذا الشكل
و تحتها يقع السب ووفر بهذا الشكل
نييجي بقي للمعات نفسها بتتكون من :
- عدد 1 سبووفر بقدرة 22 وات
- عدد 1 سماعه صغيره مركزيه بقدرة 18 وات
-عدد 4 سماعات صغيره 2 اماميه و 2 خلفيه بقدرة 7.5 وات لكل منهم
لتكون كلها مع بعض بهذا الشكل الجميل
السماعات بيجي معاها ستيكر جامد جدا بيتلزق علي الاسلاك بتاعت السماعات عشان لما تيجي توصلهم في السب و دي ميزه حلوه جدا لان الاسلاك كتيره جدا و ممكن تلخبط اثناء التوصيل فبالتالي يبوظ الاداء الصوتي لان توزيع الصوت مش حيبقي مظبوط
نيجي بقي للخلفيه بتاعت السبووفر نفسه
- موجود خمس فتحات لتوصيل السماعات و مكتوب جنب كل واحده انهي سماعه توصل فيها
- زرار بيلف تظبط منه قوة و علو الباس زي ما تحب
- تحت زرار الباس علي طول في زرار من اقوي و امتع مميزات السماعات دي و تقدروا تقولوا ان ده السبب الرئيسي اللي خلاني اشتري السماعات ده و هو الزرار اللي بيخليك تختار بين وضعيتين
1-وضعية 5.1 العاديه للناس اللي عندها مكان و تقدر تحط السماعات الخلفيه وراها
2-وضعية Stack 5.1 للناس اللي معندهاش مكان و مضطره تحط السماعات الخلفيه فوق الاماميه عشان تديك اداء محيطي تخيلي قريب جدا للحقيقي زي الوضعيه اللي في الصوره دي
دلوقت بقي نتكلم عن السماعه المركزيه
و دي سماعه قويه جدا بقدرة 18 وات و ممكن تتحط فوق او تحت الشاشه بس بعد التجربه لقيت ان فوق الشاشه في مستوي الاذن التاثيرات الصوتيه في الانفجارات بالذات كانت جامده جدا لدرجة اني لما كنت معليها و حصل تفجير و انا بلعب باتمان غمضت عيني و رجعت براسي لورا ;) بس ده كان صوت عالي جدا مش للعب لكن مع الافلام حكايه بس و انت قاعد بعيد عشان متنطرش ;)
و انا مثبتها فوق الشاشه بالشكل ده
نيجي بقي للريموت بتاع السماعات دي
- ريموت كبير فيه زرار دوار للتحكم في الصوت
- في مخرجين لتوصيل هيدفون او مايك
-فيه الزرار السحري اللي كان تاني سبب رئيسي اني اشتريت السماعات دي
و ده زرار تشغيل تكنولوجيا CMSS Upmix من كرييتف اللي بتحول الصوت الاستيريو الي صوت محيطي دولبي ديجيتال 5.1 بدون اي مشاكل او قلق او تظبيط سوفتوير !!!
مميزات هذه السماعات (من وجهة نظري):
1-سماعات قويه جدا
2-صوت عالي النقاء حتي مع اعلي مستويات الصوت
3-امكانيت وضع السماعات الخلفيه خلفك او امامك مع صوت محيطي تخيلي
4-اماكانية تحويل اي صوت ستيريو الي صوت محيطي مجسم بضغطة رز فقط
5-خامات عاليه جدا و تصميم جمالي رائع
6-افضل اداء متوفر في مصر في هذه الفئه السعريه
عيوب هذه السماعات (من وجهة نظري):
1-الاسلاك قصيره و كان لازم تبقي اطول من كده كتير خصوصا بتاعت السماعات الخلفيه (طول سلك السماعه الاماميه 1.7 متر و الخلفيه 4 متر و المركزيه زي الاماميه)
2-زرار تعلية الصوت في الريموت مش مدرج بارقام و ده جايز ميكونش عيب عند بعض الناس بس بالنسبالي مشكله جامده
التقييم العام 9 من 10
و ده صوره للسماعات بعد التركيب النهائي و التشغيل
و طبعا السب تحت المكتب
مهم جدا ارجو القراءه
النهارده و انا قاعد فاضي قلت ليه الخنقه اللي انا عاملها دي في نفسي نظام سماعات 5.1 و حاططهم فوق بعض و مشغل صوت محيطي تخيلي ,ايه اللي انا عامله في نفسي ده ؟؟؟؟؟
المهم سخنت رحت داخل علي النت و دورت لحد ملقيت الكابل ده علي موقع راديوشاك
المهم رحت نازل لراديوشاك لقيت عنده اخر 2 و سعر الواحد 22 جنيه مع انه بره ب 6.5 دولار :D و طوله 3.6 متر و في كابل طوله 1.8 متر ب 18 جنيه :mad: المهم جبت الاتنين الكبار و واحد صغير و وزعت السماعات في الاوضه كالتالي
و رجعت زرار ال 5.1 الي وضعه العادي من الصب و شغلت فيلم Transformers الجزء التاني HD و حسيت فعلا بتمن السماعات دي و انها تستاهل كل قرش اندفع فيها
ايه الجمال ده ؟؟؟ ايه الحلاوه دي ؟؟؟
و الموضوع كله اتكلف 60 جنيه و نص ساعه تركيب و تظبيط :D و عيش احلي عيشه بقي يا ناس
انا بس حبيت اشاركم التجربه الجامده دي !!
اي سوال او استفسار انا تحت امركم
رد: مراجعتي للسماعات الجباره Creative Inspire T6200
ماشاء الله، انا نفسى فى واحدة من دول، هيا وولادها :D:D
سماعات جميلة والله يا أستاذ كلبظ ... مبروك عليك :)
رد: مراجعتي للسماعات الجباره Creative Inspire T6200
ماشاء الله سماعات جميلة .. وشكرا لك على الصور والتقرير المميز .. وربنا يباركلك فيهم ان شاء الله .
رد: مراجعتي للسماعات الجباره Creative Inspire T6200
رد: مراجعتي للسماعات الجباره Creative Inspire T6200
الله يبارك فيكم يا شباب و عقبالكم باذن الله
رد: مراجعتي للسماعات الجباره Creative Inspire T6200
ربنا يباركلك فيها ياكبلظ عقبال لما تخاويه و يبقوا 19 سماعة مع بعض شكرا على التقرير :)
رد: مراجعتي للسماعات الجباره Creative Inspire T6200
بسم الله ما شاء الله .. لا قوه الا بالله
الف مبروك دكتور السماعات الجديده
بس مش المفروض حضرتك توزع السماعات الخلفيه ؟؟
ليه حاططها جنب الشاشه ... المفروض تبقى موجوده ورا الجهاز
علشان تحصل على الصوت المحيطى المطلوب
على فكره .. انا عندى سماعات 5.1 برضه بس Genius
و مش عارف اوزع السماعات صح بسبب المكان
سؤال كمان ... إزاى قدرت تثبت السماعه المركزيه فوق الشاشه
ولا الاستاند بتاعها هو اللى قفل على الشاشه اوتوماتيك ؟؟
تعديــــــل :
خلاص عرفت إجابه السؤال الأول ... :D
رد: مراجعتي للسماعات الجباره Creative Inspire T6200
الف الف مبروك السماعات الجديده ربنا يباركلك فيها
سؤال بسيط كده الماوس والكيبورد دول نوعهم ايه وجبتهم من عند مين؟؟
رد: مراجعتي للسماعات الجباره Creative Inspire T6200
الله يبارك فيكم يا شباب و عقبالكم باذن الله
@ محمد الجوهري اخي و حبيبي
انا قلت في التقرير ان من مميزات السماعات دي ان اللي معندوش مكان يوزع السماعات الخلفيه يحطهم كده و يشغل ميزه الصوت المحيطي التخيلي كانك حاططهم وراك بالظبط
بالنسبه للسماعه المركزيه دي ميزه فيها ان الاستاند بتاعها بيتفتح و يتحول لحاجه زي كليبس كده تقدر تثبتها بيه فوق معظم الشاشان ال LCD
رد: مراجعتي للسماعات الجباره Creative Inspire T6200
ومبروك اول موضوع في القسم :ah4:
رد: مراجعتي للسماعات الجباره Creative Inspire T6200
اقتباس:
المشاركة الأصلية كتبت بواسطة SeeNoEvil
الف الف مبروك السماعات الجديده ربنا يباركلك فيها
سؤال بسيط كده الماوس والكيبورد دول نوعهم ايه وجبتهم من عند مين؟؟
الله يبارك فيك و عقبالك
و ده اول موضوع تقني في القسم
ده كيبورد Aopen kb-600 كنت جايبه من فتره من محل جنب سوق العصر في شارع اللي بعد المول علي طول ب 95 جنيه و كان عليه ضمان 6 شهور
الماوس ماركه اسمها Vodooo و ده ب 40 جنيه من اسيوط هنا بس ماوس جميل و كويس جدا
رد: مراجعتي للسماعات الجباره Creative Inspire T6200
الف مبروك السماعات الجديدة
رد: مراجعتي للسماعات الجباره Creative Inspire T6200
مباركة عليك السماعات و تستمتع بيها يارب كمان و كمان بس ليا سؤال هو مش غلط ان السماعة السنتر تكون على الشاشة علشان مجالها المغنطيسى ميأثرش على الشاشة
ثانى سؤال هو انت جايب كارت صوت و لا الكارت البلت ان
ثالث سؤال الكيبورد دا ما شاء الله لا قوة الا بالله ياريت نوعه و موديله و سعره
رد: مراجعتي للسماعات الجباره Creative Inspire T6200
مبروك >> متهئلي دي اوفر من HOME THREATER SOUND
رد: مراجعتي للسماعات الجباره Creative Inspire T6200
ما شاء الله سماعات قوية وموضوع اقوي :)
شكرا علي المراجعة...تم الـ:)