لينوفو ولا سامسونج ولا ايسر ولا ايه
السلام عليكم
أنا مهندس برمجيات وعايز أجيب لاب توب جديد بس محتار أجيب ايه والسوق فيه حاجات كتير (أنا معايا فوجتسو سيمنز اشتريته من 6 سنين)
عايزه أهم حاجه عندي مريح للعين علشان شغلي كله كتابة أكواد
وعايز كيبورد مريحه في الكتابه علشان بكتب أكواد كتير خالص
ولازم يكون آداء عالي علشان شغل البرمجه بتاعي تقيل خالص
ويستحمل شغل فترات لا تقل عن 8 ساعات يوميا بدون ما يسخن
وعايز خاماته ممتازه ومش عايز وزن تقيل
وأهم شئ يكون نادر الأعطال لأني مينفعش أقعد من غير اللاب ساعه واحده
مع العلم اني لا ألعب أي ألعاب نهائيا ولا أشاهد أي أفلام ولا أي حاجه ليها علاقه بالجرافيكس اطلاقا أنا بشتغل برمجه وبس
مش عايز لا توشيبا ولا ديل ولا اتش بي نهائيا
حاسس اني مرتاح للينوفو كخامات بس مش عارف الآداء عامل ايه لأن اللينوفو معروف خاماته حلوه لكن زمان كان آداؤه مش حلو فهل الاصدارات الجديده قويه في الآداء؟ هل شاشته مريحه للعين وأنا شغال عليه.
السامسونج معرفش عنه حاجه خالص؟ بس مش الآداء بتاعه كويس ولا لأ
الايسر مش مرتاح نفسيا له علشان زمان كانت سمعته مش حلوه
الأسوس معرفش عنه حاجه خالص.
بغض النظر عن مواصفات الأجهزه اللي في السوق ايه رأيكم بالنسبه للماركات مين يناسبني أكتر بالنسبه للحاجات اللي عايزها في اللاب؟
رد: لينوفو ولا سامسونج ولا ايسر ولا ايه
هو مبدئيا محتاج اعرف المزانية وثانيا شغل البرمجة محتاج بس بروسيسور قوي وممكن اي كارت شاشة يقضي المهمة ومتقلقش كل اللابات دلوقتي الشاشات كلها يا اما TFT او LCD او LED و مافيش حد بيشتكي من الشاشة اطلاقا
معلومة صغيرة ليك لو عاوزة عشان شغل من الاخر ال Dell معروف انو حمار شغل وكنت هرشحلك واحد
السامسونج والاسوس ممتازين
وانا شخصيا مش بفكر اشتري لينوفو في يوم من الايام نهائيا
Acer اصبح دلوقتي علامة مميزة بس يوم متفكر تشتري لاب اول حاجة شوف الصيانة بتاعتو دي مهمة جدا وقبليها طبعاً شوف توكيلها فى الشرق الاوسط عموما
رد: لينوفو ولا سامسونج ولا ايسر ولا ايه
لازم تقول الميزانيه عشان نفيدك
بالنسبه للشغل فأكتر حاجه بتستحمل الديل فعلا
بس الجهاز ده هينفعك برده lenovo z580 a سواء i5 او i7
رد: لينوفو ولا سامسونج ولا ايسر ولا ايه
الميزانيه المتاحه حاليا 5000 جنيه.
Mr.Fito
ليه لينوفو لأ؟
هل السامسونج مش بيستحمل شغل فعلا وخاماته رقيقه فعلا؟
وايه المميز في الايسر حاليا ومين أحسن ايسر ولا لينوفو؟
رد: لينوفو ولا سامسونج ولا ايسر ولا ايه
السامسونج كويس بس خاماته مش اوى ضعيف حبه
عموما ميزانيتك تجيب lenovo z580 a i5
رد: لينوفو ولا سامسونج ولا ايسر ولا ايه
اقتباس:
المشاركة الأصلية كتبت بواسطة hazzoom
الميزانيه المتاحه حاليا 5000 جنيه.
Mr.Fito
ليه لينوفو لأ؟
هل السامسونج مش بيستحمل شغل فعلا وخاماته رقيقه فعلا؟
وايه المميز في الايسر حاليا ومين أحسن ايسر ولا لينوفو؟
انا الحقيقة مش بقتنع بلينوفو لاب توب و صارف نظر تماما عن اني اشترية بس كأسم طبعاً IBM Lenovo الرائدة فى فى مجال الكمبيوتر وتالت اكبر شركة فى العالم
مش بقتنع بية لان من الاخر بلاقي مثلاً فى اصدار من اصدارات الشركة مليان عيوب ومشاكل فكل مرة اسمع عن عيب فية تخليني ابعد عنو اكتر
وبعدين اهم حاجة الراحة النفسية لما تشتري اللاب ممكن غيري يحبو ويقتنع بية جداً انا لا
بس مدام انت شايف انو كويس بالنسبالك ومرتاحلو هاتو
يعني انا مثلاً لو هجيب Dell الشعبي اللى الشعب كلو شايلو احسنلي من اني اجيب Lenovo
السامسونج ممتاز طبعاً وبيستحمل شغل وخاماتة ممكن نقول عليها مقبولة نسبيا للسعر بتاعو مع ان بعض الاصدارات سعرها مبالغ فية
انا كنت فى يوم من الايام هجيب سامسونج بس معرفتش لان برضو فكرت فى اني اجيب لاب ميقولش لا فى اى حاجة خصوصا انا هشتغل علية شغل جرافيكس تقيل جداً ورندرة وقرف فممكن ميكملش معايا السنتين تلاتة بتوع مشاريع التخرج بتوعي او حتي فى شغلي ( ده على حسب ما اعتقد يعني وحاول تسأل اي حد مجرب لاب سامسونج مش بيسمع عنو وبس لازم يكون مجرب )
آيسر حاليا بتحاول يصعد على القمة برغم ان لسة مبيعاتة الى حد ما قليلة بالنسبة للشركات المنافسة الكبيرة بس كأداء وشغل و مرمطة ممتاز بس بردو فكر فى كلمة الضمان والتوكيل والصيانة بتاعتو فى مصر لاني معرفش اية نظام الضمان هنا
مش عاوزك تفتكر كلمة التوكيل اوالصيانة دي حاجة سهلة ده فى قمة الاهمية وعاوزك قبل كل حاجة وقبل متشتري اسأل واعرف الضمان والصيانة او حتي عنوان التوكيل او شركات التوكيل بتاعت اللاب هيفيدك جداً والله
بص حاليا انا هرشحلك افضل لاب من وجهة نظري هينفعك فى شغل البرمجة لاني قريب منك فى المجال ده ومش هيقرفك خالص ممكن تشغلو 24 ساعة عادي جداً
ارشحلك فى المقام الاول
Dell Inspiron 15R N5521 i7 حوالي سعره بيتراوح من 5100 الي 5400 لو تقدر تجيبو جيبو بجد جهاز مش هيقولك لا فى اي حاجة وعلى فكرة افضل جهاز من وجهة نظري انا بالنسبة للامكانيات وسعرو بس ممكن يعيبك ان البروسيسور بتاعو ناس بتقول ضعيف عشان بيحتوي على نواتين و 4 خطوط معالجة مع اني شايفة مناسب لكل حاجة
Intel® Core™ i7-3517U Processor (4M Cache, up to 3.00 GHz)
8GB DDR3 RAM 1600MHz
1TB SATA 5400 rpm
Tray-loading DVD+/-RW
15.6" HD LED Display with Truelife (1366 x 768 Pixels)
AMD Radeon HD8750M DDR3 with 2GB
1.0MP Webcam with digital microphone
Wi-Fi - Bluetooth 4.0 - 2 x USB 2.0 - 2 x USB 3.0 - Ethernet 10/100
1 x HDMI - 1 x RJ45
6-cell Li-Ion Battery
FreeDOS
اولا من ناحية البطارية فى العادي بيكون شغل بسيط تصفح وكتابة اكواد فى البرمجة وكدة وشغل يعني هين عليك بيقعد من 5 ال 7 ساعات وده كلام معظم الناس اللى اتشرته
خد عندك بقي اللاب ده ممكن تعمل علية كل حاجة من حيث الالعاب ده لو فكرت تلعب او تعمل علية حاجة تقيلة هديك احلي اداء واسأل بردو قبل متشتري
عموما اللاب ده محقق اعلي مبيعات للشركة وسعرو زاد فى شهر واحد 400 جنية من قبل رمضان تقريبا وعلية اقبال مهول
وعموما بعد الكلام ده كلو مش عاوزك تقتنع بكلامي اسأل غيري يقولك رأيو ويقدر يفيدك اكتر
رد: لينوفو ولا سامسونج ولا ايسر ولا ايه
مفيش حاجه اسمها شركة كزه افضل من كزه .. لكن ممكن نقارن اصدارات لشركه مقابل اصدار معين لشركه اخرى في نفس الميزانيه ..
بمعنى مقدرش اقولك دي سامسونج احسن من ديل مثلاً .. لكن اقدر اقارن بين جهاز Dell 5521 مع جهاز مثلاً Samsung NP300N ..
واقولك مميزات كل جهاز وانت واختيارك ..
بالنسبه لميزانيتك
جهاز Dell 5521 اللي رشحه العضو الكريم Mr.Fito كويس جداً ..
الاصدار ابو 4 جيجا رامات بـ5,100 جنيه .. ويوجد اصدار بـ8 جيجا بـ5,500 جنيه ..
Intel® Core™ i7-3517U Processor (4M Cache, up to 3.00 GHz)
4GB DDR3 RAM 1600MHz
750GB SATA 5400 rpm
Tray-loading DVD+/-RW
15.6" HD LED Display with Truelife (1366 x 768 Pixels)
AMD Radeon HD8750M DDR3 with 2GB
قدامك جهاز Lenovo Z580 .. سعره 5,500 جنيه ..
Intel Core i7-3612QM Processor ((6M Cache, up to 3.10 GHz) BGA
6GB DDR3 RAM 1333MHz
1000GB SATA HDD 5400 rpm
DVD±R/RW drive
15.6" backlit LED HD Display
NVIDIA GeForce GT 630M with 2 GB DDR3 dedicated
البروسيسور افضل لكن كارت الشاشه اضعف من الموجود في الديل ..
رد: لينوفو ولا سامسونج ولا ايسر ولا ايه
بصراحه أنا شاكر جداً ردودكم التفصيليه, وتقريباً هرفع الميزانيه لـ 5500 وهختار اللينوفو Lenovo Z580 (مش عارف ليه.. بس مرتاحله نفسيا :))
طيب ايه أفضل مكان أشتري منه اللاب في القاهره بحيث يكون مضمون يعني مش بيفتح الكرتونه الا قدامي ولأول مره وبيقدم خدمه ما بعد البيع صح؟
رد: لينوفو ولا سامسونج ولا ايسر ولا ايه
اقتباس:
المشاركة الأصلية كتبت بواسطة hazzoom
بصراحه أنا شاكر جداً ردودكم التفصيليه, وتقريباً هرفع الميزانيه لـ 5500 وهختار اللينوفو Lenovo Z580 (مش عارف ليه.. بس مرتاحله نفسيا :))
طيب ايه أفضل مكان أشتري منه اللاب في القاهره بحيث يكون مضمون يعني مش بيفتح الكرتونه الا قدامي ولأول مره وبيقدم خدمه ما بعد البيع صح؟
احسنت الاختيار (y)
الجهاز موجود بكثير من الشركات بمول سوق العصر و السخاوى
منها ايجبت لاب توب و شرق اسيا و كمبيو داتا ...