( الشهادات العلمية ) بين الوهم... وسوء الفهم..!!

السلام عليكم

الذي دعاني لكتابة هذا الموضوع – رغم ضيق وقتي - ، هو ما وجدته من تخبط من بعض إخوني الأفاضل، وخلط عجيب، وسوء فهم لمعنى ( الشهادات العلمية )، وأنها – على حد زعمهم – بوابة علِي بابا ( بس من غير الأربعين حرامي ) !!، أو الفانوس السحري ( بس من غير عفركوش ) وهذا في الحقيقة: سوء فهم ... أو وهم.

أرجو أن يسامحني كل من ذكرت قصته - بدون تعيين اسمه - في الموضوع، فأنا أردت فقط ضرب المثال...

لما بيكلموني ويطلبوا مني شغل – سواء في المنتدى أو غيره - ، والله بيصعبوا عليَّ جدا، وفيهم ناس ممكن تكون تستحق المال أكثر مني؛ علشان ممكن يكون عنده بيت، وعيال عايز يصرف عليهم. فأنا بكون مدايق لهم جدا، ونفسي أساعدهم على قد ما أقدر، وأحيانا – والله العظيم – كنت أفكر في أنا أستقيل من عملي، وأعين هؤلاء الأشخاص بدلا مني، بس أنا كده محلِّتش المشكلة، الباقي دول هعمل فيهم إيه؟

فقلت أكتب هذا الموضوع، لعله أن يكون مُعينا لإخواني، ونورا لهم في دربهم.

تجد الشاب حديث التخرج يسمع من بعض أصدقائه عن شيء اسمه الشهادات العلمية. ويقولون له: بمجرد حصولك عليها، سيكون راتبك - على الأقل – 2000 أو 3000 جنيه، بدون أن تتعب.
أنت فقط احصل على الشهادة – وقد يكون هذا الشاب يكره شيئا اسمه شبكات، كما حدثني البعض بذلك - ، وبعدين هيبقى اسمك مهندس، وتفضل قاعد على جهاز تعمل منه إدارة (management) للأجهزة اللي معك في الشركة، وخلاص خلصت القصة على كده!!

وأنا فعلا أعرف أشخاص يأخذون هذا المبلغ، بل إني أعرف أخاً عرضت عليه بعض الشركات مرتب 6000 جنيه في الشهر، وهو رفض، وقال: هذا قليل علي!!، بل - والله – أحد أصدقائي دخله الشهري يزيد عن 20 ألف جنيه (بدون مبالغة)، وهو يعمل في نفس المجال. لكن هؤلاء الأشخاص خبرتهم على الأقل 10 سنوات.

فيروح الشاب يصرف دم قلبه - وقلب أبوه معاه، - في التدريب في المراكز، أو في الامتحانات، وبعدين ينزل يدور على شغل، ولما يروح الشركات ويقعد يلف لغاية لمّا كعب الجزمة يدوب، وميلقيش شغل، يبتدي يعيد حسباته، ويقول: أنا كان إيه اللي جبرني على شغلانة الشبكات السودة ديه؟

دفعت بس ألفين جنيه تدريب، وحوالي ألفين جنيه زيهم في الامتحانات، وبعدين نأبي طلع على شونة...

لا ياعم سيبك بقى من شغلانة الشبكات ديه وروح شوفلك شغلانة تانية !!

وطبعا بيكون على الأقل ضيّع من عمره سنة، وضيع من ماله – على الأقل – 2000 جنيه.

وهذا من: سوء الفهم...

جاءني شخص مرة وقال لي: أنا عندي 33 سنة ومعنديش مهنة محددة، فقولت أخش مهنة الشبكات، أصلي عرفت إن مرتباتهم حلوة!!، فقالي: انت شايف إن في أمل؟

قولت له: طبعا في أمل، بس انت سنك كبير، وفي ناس أصغر منك وشغالين في شركات كبيرة بمرتبات كبيرة، فهل انت مستعد تعوّض السنين اللي فاتتك ديه، وتذاكر بصفة مستمرة وجادة، وتاكل الكتب أكل؟
قالي: يعني ... هحاول.

فقولت له: بس انت يا أخي كمان معندكش خبرة، والشركات بتحتاج خبرة.
قال لي: هاعمل إيه طيب ما هو أنا مش لاقي شغلانة عِدلة، وعندي بيت بصرف عليه، ومينفعش أنزل أتدرب عند حد بودن فلوس.

وهذا الأخ أنفق على بعض الدوارت قُرابة 1500 جنيه، وبعد ذلك ترك المجال بأكلمه، وذلك في غضون ثلاثة أشهر تقريبا. ثم فوجئت بأن هذا الأخ ترك مشوار حياته اللي هو رسمه بأحلامه الوردية.
طب كان نفعك بإيه بقى دخولك في الموضوع أصلا مادام انت معندكش صبر، ومش مستعد تذاكر، وتجتهد. كنت وفّرت على نفسك وعيالك الفلوس، هما كانوا أولى بيها.
وكما فعل بعض الإخوة في المنتدى، كان قد قطع شوطاً لا بأس به في طريق الشبكات ( الشهادات العلمية ) ثم سافر إلى دولة عربية للعمل في مهنة غير ما كان يتوقعها تماما !!، بل هي - في نظري - مهنة حقيرة .

فقلت له: يا أخي لماذا تركت طريق الشبكات، والشهادات العلمية، وذهبت للعمل في مهنة لا تحبها؟

فقال: كنت محتاجا للمال. وهذا الأخ اقترض مال السفر، يعني قرابة 10 آلاف، أو 15 ألف جنيه !! يعني لو هو عايز يحوش الفلوس ديه بس ... هيعد على الأقل في هذه الدولة قُرَابة سنة، وهذا على الأقل.

يعني هو ضيع سنة من عمره – على الأقل - في شيء غير مفيد، لو صبر، وبحث عن عمل في المجال الذي يحبه ( وهو الشبكات )، ولو حتى بمرتب قليل أو حتى بدون، لكان دلوقتي – أي بعد تلك السنة – على خبرة لا بأس بها، وذلك بمذاكرته مع نفسه أيضا مع عمله، لكن هو دلوقتي مش عارف حتى يحوش 500 جنيه شهريا، ومش عارف كمان يذاكر، علشان هو شغال من الصبح لغاية بالليل.

وأخ – فاضل – آخر، راسلني على الخاص من قرابة أسبوعين، وقال: أنا تايه، ومش عارف أعمل إيه، ومش لاقي شغل، وعايزك تنصحني.

فقلت له: الأمر يطول شرحه، هات رقمك وأنا هتصل عليك ونتكلم في الموضوع، علشان معنديش وقت أقعد أكتب.

وبعد ما اتكلمنا قال لي: أنا نازل القاهرة للبحث عن عمل، فقلت له: ده شيء كويس جدا، وأنا من ناحيتي سأرسلك لبعض الشركات اللتي أعرفها، لعلك تجد عملا فيها.

فجاء الأخ فعلا من محافظته – والتي لا يوجد فيها فرصة عمل في مهنة الشبكات – فأرسلته لبعض الشركات فعلا، ثم وجدته بعد أسبوع تقريبا، قال لي: سأرجع إلى بلدي!! وهذا الأخ حاصل على شهادة CCNA

فقلت له يافلان: انت لسه ملحقتش تدور على حاجة، جيت في إيه، وهتسافر في إيه؟؟!!
فقال لي: أصلي اتخنقت، ومش لاقي شغل!!

طيب يا عم الحج انت أصلا مرحتش غير أربع ... خمس شركات. إيه ... لحقت زهقت؟! وبعدين لما لقيته مصمم على رجوع لبلده، قلت له: عايز نصيحتي؟ لما تروح بلدكو سيبك من موضوع الشبكات ده، وشوفلك أي مهنة تانية أحسنلك.

فقال لي: ليه؟!

فقلت له: يا أخي لازم تتعب ولازم يطلع عين...( تييييت ) لغاية لما تلاقي شغلانة كويسة. هي الدنيا كده.
فإن زمن المجَّانيات، أو زمن السهل ولّى مدبراً، وأصبحنا نعيش في زمن صعب جدا. إن لم تبحث عن عمل بصفة مستمرة، وأن تصبر وتُصابر، فإنك لن تفلح. وإن لم تطور نفسك بصفة يومية، فإنك لن تكون شخصا متجمداً فقط؛ بل ستكون متخلفاً !!

فالزمن الذي نعيش فيه أصبح سريعا جدا جدا، وبصراحة هو مش هيجي عند حضرتك ويستناك!

يستطيع أي صاحب شركة أي يعطيك أي مبلغ أنت تطلبه، لكن سيقول لك كلمة واحدة: ما الذي تستطيع أن تقدمه لي ولشركتي، حتى أعطيك هذا المبلغ؟ ماهو الذي تحسنه، وتتقنه أكثر من غيرك؟

قولتله: يا حبيبي انت لازم تصبر وتتعب، وتلف كتير لغاية لما تلاقي شغلانة مناسبة، انت فاكر أول ما تدخل على الراجل في الشركة ومعاك CCNA هياخدك بالحضن ويقولك : مين؟؟ سي لطفي... انت فينك من زمان يا راجل ده أنا كنت بدور عليك؟؟!. لا طبعا، هما بيبقوا عايزين ناس خبرة.

مرة كنت مع المهندس أحمد سرحان، وراكبين العربية، راح اتصل عليه واحد وقاله: أيوة ياباش مهندس انا في انترفيو، وكنت عايز أعرف رقم البورت بتاع الDNS كام !!

اتفضل ياعم، واحد رايح يشتغل، ومش عارف رقم البورت بتاع ال DNS كام، وعايزنين يشتغلوا قال...

وشخص آخر يحب هذا المجال جدا، لكنه من قرابة سنة – أو أكثر - لا يعمل. هل هو يبحث عن عمل ولم يجد؟
الجواب: لأ.
قلت له: يا أخي، انت ليه مبدورش على شغل بدل ما انت قاعد في البيت ولا شغلة ولا مشغلة، وعامل زي خبيتها؟؟
فقالي: أصل أنا مستني حاجة معينة !!

وهذا من: الوهم ...

هو مستني أي شركة كبيرة – هيرمس مثلا – تتصل عليه، وتقول له: بالله عليك تيجي تشتغل، واحنا مستعدين اننا بنعتلك ال IT Manager يبوس رجلك حضرتك علشان تيجي تشتغل !!

مع إن هذا الأخ قليل الخبرة، فهو في مُقتبل عمره، من أين حصل على الخبرة، وهو لم يعمل؟!

فكل شخص شاهد الفيديوهات التي يقدمها المهندسين الأفاضل ( جزاهم الله خيرا جميعا )، ظن أن عالم أوانه، وفارس زمانه، و كبير مهندسي ميدانه...!!، وفاكر إن الشركات هي اللي هتتصل عليه، وتجيله لغاية البيت..!!

لا يا حبيبي... اصحى، وفوق من الوهم اللي انت عايش فيه.

عايز تبقى مهندش شبكات أد الدنيا... مش عيب ولا حرام، ومحدش هيقولك لأ، وهتلاقي اللي يساعدك على قد ما يقدر.

بس لازم تعرف إن الطريق صعبا جدا جدا، على كل كسلان، قاعد في البيت وبيتفرج على الفيديوهات وهو نايم على السرير، وبعد ربع ساعة من مشاهدة أول فيديو، يقول: ياااه أنا تعبت أوي النهاردة، أكمل بكرة إن شاء الله..!!

ولما ربنا يكرمه في اليوم التاني، ويعد نص ساعة ، يبتدي يقول: ياااااه أنا مصدّع قوي، أنا هقوم أعمل كوباية شاي.

وبعد كوباية الشاي بخمس دقايق، يقول: يااااه ده أنا جعان قوي، لما أقوم آكل علشان أعرف أركِّز !!

ويضييع يوم صاحبنا... وبقية الأسبوع... وبقية الشهر على هذه الحال.

وفوق كده عمال يضيع وقته، شوية مع أصحابه في الخروجات، وشوية في الواقفة على النواصي، وشوية البيه بيحبلي في التليفونات، وشوية مش عارف بيهرش في راسه....
إيه ياعم الحج؟؟ هتفضل كده على طول ولا إيه؟؟

فوق يابني وانتبه لمستقبلك، محدش هيخاف على نفسك أكتر منك، ومحدش هينزل يدورلك عل شغلانة، ويجي يقولك أما أنا لقيتلك حتة شغلانة، روح انت بقى قدم ياعم السيرة الذاتية !!

فلو لاقيت نفسك مستعد إنك تخوض الحرب ديه – هي والله أشد من حرب في زمننا وبلدنا، والله المستعان – يبقى استعين بالله، وتوكل عليه، واجتهد، وهو – سبحانه وتعالى – هيكرمك على الآخر، بس انت ابدأ بس.

ولو لاقيت نفسك كسوووول، وأنت أصلا ضعيف الهمة والإرادة، يبقى اتكل على الله، واشتغل رقاصة أحسنلك.

وفي نفس الوقت، هو طريق سهل جدا جدا على الشخص المجتهد، الذي يثق بأن الله سيرزقه عملا جيدا حلالا، وذلك مع بحثه المستمر عن عمل في كل مكان، وفي كل وقت، وتطوير نفسه بصفة يومية، وعدم تضيع الأوقات. وامسك على الشغلانة ديه بأديك وسنانك، حتى لو جتلك شغلانة بمرتب أحسن، ومواعيد أقل، برده متروحش.

مرة واحد قريبي جابلي شغلانة في شركة ( كادبوري )، كنت همسك لهم المخازن، فقلت لقريبي: مش عايز أروح، فقالي: طيب اعرف المرتب الأول، وبعدين اتكلم. قلتله المرتب كام؟ قالي: 2000 جنيه. (وكان وقتها مرتبي تقريبا 1000 جنيه) قلتله: حتى لو 3000 آلاف جنيه، برده مش هروح، أنا عندي إني أشوف كل يوم الراوتر، والكابلات بالدنيا وما فيها :D ( طبعا ممكن ألاقي حد يقول عليَّ مغفل )

أنا سمعت مرة قصة من أحدهم - وبها أختم كلامي - ، وكان لها أكبر التأثير عليَّ في حياتي المهنية...

قال: ذهبت لبعض الشركات، وقلتله من عايزين حد يشتغل عندكوا؟
فالراجل قاله: لأ.
فراح معدي عليه أخينا تاني يوم بالظبط، وقاله: مش عايوين حد يشتغل عندكوا ؟!
فالراجل استغرب وقال: لأ.
فراح معدي عليه أخينا الرخم تالت يوم، وقال: مش عايزين حد يشتغل عندكوا؟!!
فالراجل قاله: مش انت اللي عدّيت علينا امبارح وأول امبارح؟!
فقاله: اه، أنا قولت يمكن في حد مات، أو اترفد، أو استقال!! :D
فراح الراجل قاله: لأ ياعم، مفيش حد مات، ولا حد استقال، ولا حد اترفد، ومش عايزين حد يشتغل..!
فصاحبنا التنح عدّى عليه رابع يوم، وقاله: مش عايزين حد يشتغل عندكو؟!!!
فالراجل التاني كان هيتجنن، وقاله: إيه ياعم مش انت اللي عمال تعدي بقالك تلات أيام؟!
قاله: اه، وبعدين قاله – وده الشاهد –: شغلني عندك شهر بدون مرتب، مش هتخسر حاجة، لو لقيت شغلي عجبك شغلي عندكوا.

أسأل الله أن يرزق شباب المسلمين بعمل طيب حلال بمرتب مجزي، واسأل الله أن يرزقنا العلم النافع والعمل الصالح.

والله من وراء القصد.

أخوكم: Vancouver

بارك اله فيك
كلام ممتاز


"رحم الله امرء عرف قدر نفسه"

معظم هذه الشخصيات لا تكمل الخطوة الاولى حتى ولى رأى لا يجب ان يكون المال و الوظيفة هما الهدف
فبالنسبة لى هدفى هو ان اتفوق على غيرى و اتميز عليهم بعد العمل و الاجتهاد و احاول تحقيق ذلك
عن طريق تعلم الشبكات مثلا وهذا بتوفيق من الله و العمل و الاجتهاد الكثير سيؤدى الى
حياه كريمة

اقتباس:

---

مرة واحد قريبي جابلي شغلانة في شركة ( كادبوري )، كنت همسك لهم المخازن، فقلت لقريبي: مش عايز أروح، فقالي: طيب اعرف المرتب الأول، وبعدين اتكلم. قلتله المرتب كام؟ قالي: 2000 جنيه. (وكان وقتها مرتبي تقريبا 1000 جنيه) قلتله: حتى لو 3000 آلاف جنيه، برده مش هروح، أنا عندي إني أشوف كل يوم الراوتر، والكابلات بالدنيا وما فيها :D ( طبعا ممكن ألاقي حد يقول عليَّ مغفل )

---

اى واحد عنده شوية بعد نظر كان هيختار نفس اختيارك
الوظيفة الاولى ليست الا وظيفة جامده حسب ما فهمت ولن تستطيع الارتقاء و التطور بها
اما وظيفتك فى مجالك الذى ىتحبة سيدفعك الى تطوير نفسك و سيقودك الى الافضل
وربما بعض كام سنه مرتبك يكون ثلاث او اربع الاضعاف الوظيفة الاولى و هذا فعلا
يحتاج الى صبر و التزام و ان يكون امام عينك هدف لا تتزعزع عنه

واشكرك مرة ثانية على هذا الموضوع

بارك الله فيك اخي بلال

بلال = Vancouver جديدة على

أخب العزيز ذكرتني باشخاص حامليييييييييييين كومة شهادات وعند سؤالهم في ابسط الأشياء لا تجد عنده اجابة

هناك موضوع حذفه الاخ العزيز ياسر كان ملخصه شراء شهادات مايكروسوفت كل شهادة لها سعر مثال

MCP=400$

تخيلوا معي بل ويتباهو انهم قادرون على الحصول على اعلى الشهادات

حسبي الله ونعم الوكيل فكل من قام بتخريب عالم الشهادات العالمية

طيب الكلام ده في مجال الشبكات والأي تي.

ايه رأيك بأه في اللي دايخ على حد يجي يقعد في التكييف 8 ساعات وياخد 1200 جنيه ومش لاقي؟

أنا دخت من البحث على ناس عايزة تشتغل مش لاقي. الناس مأنتخة عالآخر. والله قربت أتحايل عالناس يا ناس تعالوا اشتغلوا والمرتب اهه كويس وكمان سكنك علينا يعني مش هتصرف حاجة غير أكلك وشربك. وشغلانة مرتاحة ومفيهاش تعب ولا إرهاق. وبردو مفيش. الرجالة خلصوا ، ماتوا في في الحرب.

دي شغلانة ايه دي وانا انزلك من الصبح
ههههههههههههههههه

و ليه من الصبح ؟ أنا ممكن آجى دلوقتى :D

جزاك الله خيرا أخى بلال

اقتباس:

---

المشاركة الأصلية كتبت بواسطة Dr Mohammad

و ليه من الصبح ؟ أنا ممكن آجى دلوقتى :D

جزاك الله خيرا أخى بلال

---

الكلام جد ولا بتهزر بردو ؟!

مشكور أخي بلال دائما يعجبني هذا النوع من المقالات دائما !
لاني شعبنا العربي يفتقر فقرا شديدا إلى الوعي
ولي مداخلة أيضا على الباس 4 شور في العدد القادم من المجلة networkset
ولك مني تقييم

اقتباس:

---

الكلام جد ولا بتهزر بردو ؟!

---

هو هزار , لكن لو فيها 1200 ممكن يبقى جد الجد :D:D:D:D:D

شكرا اخى العزيز بلال

و لى تعقيب على الموضوع فيما بعد لانشغالى حاليا

دعواتكم يا شباب

الأخ الكريم بلال بارك الله فيك أخي الكريم على هذا الكلام الرائع
وبجد انت أصبت عين الحقيقة وزي مابنقول احنا المصريين انت جيت ع الجرح
والعجيب اني لما قرأت موضوعك تذكرت شيء أحب أني أقوله علشان يعم النفع وعلشان أبين ان الموضوع اللي بتقول عليه ده انه واحد يفكر ياخد شهادات ويشتغل بيها ده شيء يعتبر إلى حد ما تقدم وخطوة للأمام حتى ولو هو زهق من البحث ولا هو مأنتخ ف البيت زي مانت بتقول وحتفهم معنى كلامي لما أقولك اللي أنا أقصده
انت بتقول شهادات هههههههههههه
والله بجد حاجة تضحك
طب ايه رأيك بقى ف اللي لسة فاكر ان تقدير الكلية هيشغله
ومستني وظيفة تجيله لحد عنده بالمواصفات اللي هو عاوزها
العبد لله خلاص على وشك اني أتخرج من كلية هندسة ولله الحمد
والدفعة اللي أكبر مني بسنتين اللي اتخرجوا أعرف فيها 2 أصحاب قوي
ال 2 دول واحد فيهم جايب جيد والتاني جايب مقبول
ال 2 خريجين شعبة إتصالات وإليكترونيات
اللي جايب مقبول ده طلع عينه ومكانش بيقول لي حاجة لأ اشتغل ف كل حاجة كانت متوفرة قدامه وف نفس الوقت كان بيذاكر مذاكرة جبارة وكان لما بيشم ريحة حاجة فيها اتصالات كان بيقدم فيها وآخر شغلانة أعرف انه كان بيشتغلها كانت شغلانة خاصة بالهندسة المدنية وكانت شغلانة وحشة قوي ولا مرتب ولا تخصص وكان بيطلع عينه لكن صبر سنة ونص وكان بيشتغل جنب بيتنا علشان كدة كنت بشوفه دايما وأنا راجع من الكلية وبعد السنة ونص دي سمع ان في شغلانة ف المصرية للإتصالات قدم فيها وسبحان الله اتقبل بدون أي وسايط ودلوقتي ماشاء الله عليه ربنا كرمه ومرتاح قوي
صاحبنا التاني بقى راجل جايب جيد مش أي شغلانة تليق عليه طبعا
جايب جيد ويشتغل ف بهدلة ياأشتغل مهندس اتصالات يابلاش ولله الحمد أهو لحد اللحظة اللي بتكلم فيها دي قاعد مشتغلش يدوبه اشتغل ف شركة سياحة فترة صغيرة كدة وبعدها سابها لما زهق
ياأخ بلال مع احترامي لموضوعك
لكن ده بالله مش شيء يضحك انك بتتكلم عن ناس بتفكر ف انها تاخد شهادات وتشتغل بيها مش شايف انك طلعت بالزمن لقدام وانت بتحكي ف الشهادات بعد أما حكتلك القصة دي
وانت طبعا مصري وعارف ان اللي أنا بحكي فيه ده لسة موجود والناس لسة عايشة ف أيام الستينات هات تقدير واتعين موظف حكومي قد الدنيا
أما بقى الحاجة التانية اللي أحب أني أعقب عليها ف كلامك انك بجد إنسان محترم جدا جدا لما اتعرضت عليك شغلانة بمرتب أعلى واتمسكت بشغلك اللي انت كنت فيه وبجد حسستني فعلا اني عايش ف الدنيا لأني أنا دايما بقول للناس اللي حواليا اني مستعد أعيش شحات ف مقابل اني اتعلم وبيتريقوا دايما عليا ويقولولي انت عايش ف مثاليات أيام زمان اللي مش هترجع تاني ولما أكلم حد عن أني عاوز أحضر دكتوراة أو أدرس شهادات زي شهادات سيسكو ألاقي اللي يقوللي وهو الكلام ده هيأكلك عيش يعني يبني خليك ف اللي يجيبلك فلوس هتجيب منين فلوس تتجوز و............ وكلكم عارفين الباقي وأبقى مجبر لمدة على الأقل ساعة اني أسمع محاضرة ف ناس عايشة والدوامة واخداهم وعاوزين كل حاجة بدون مايتعبوا
والله العظيم أحييك بجد ع الموضوع الرائع ده
واعذرني إذا كان في أي تهكم مني لكن أنا لا أقصد أبدا التقليل من شأن موضوعك انما إذا كنت تهكمت فأنا كنت بتكلم ع نفس النوعية اللي انت بتتكلم عليها ولا أقصد أبدا إهانة موضوعك أخي
بارك الله فيك وإن شاء الله يكون هذا الموضوع من المواضيع اللي تفوق ناس كتير من اللي هما عايشين فيه
والسلام

اقتباس:

---

المشاركة الأصلية كتبت بواسطة Alaa.Ismael

طيب الكلام ده في مجال الشبكات والأي تي.

ايه رأيك بأه في اللي دايخ على حد يجي يقعد في التكييف 8 ساعات وياخد 1200 جنيه ومش لاقي؟

أنا دخت من البحث على ناس عايزة تشتغل مش لاقي. الناس مأنتخة عالآخر. والله قربت أتحايل عالناس يا ناس تعالوا اشتغلوا والمرتب اهه كويس وكمان سكنك علينا يعني مش هتصرف حاجة غير أكلك وشربك. وشغلانة مرتاحة ومفيهاش تعب ولا إرهاق. وبردو مفيش. الرجالة خلصوا ، ماتوا في في الحرب.

---

ده اسه الشغل ده

تكييف و 8 ساعات و 1200 ج ومش لاقى

طيب المنتدى كله مستعد يجى يشتغل معاك هههههههههههههههههه

(اخى الكريم اكتب طبيعة العمل فى موضوع مستقل مع الطلبات ومواعيد العمل فى موضوع مستقل فى منتدى الوظائف فى المنتدى وهتلاقى بأمر الله اللى يشتغل معاك )