مبارك يكتب خطاب اعتذار للشعب

[Cursed Pistol]

أفادت مصادر مصرية وعربية رسمية أن أحد كبار الصحفيين المصريين الذين سبق لهم التعامل مع الرئيس السابق حسنى مبارك يعكف هذه الأيام على إعداد خطاب اعتذار من الرئيس السابق مبارك عن نفسه وعن أسرته،

خاصة حرمه سوزان ثابت عما يكون قد بدر منه من إساءة للشعب المصرى بسبب سوء تصرف ناجم عن نصيحة بعض مستشاريه، أو معلومات خاطئة تم رفعها إليه.

وأشارت تلك المصادر وفق ما أوردته جريدة الشروق بصفحتها الأولى بعدد صباح الغد إلى أن مبارك سيقوم بتسجيل الخطاب قريباً ليتم بثه صوتياً عبر قنوات مصرية وعربية، وأن الصحفى المشارك فى إعداده سبق وأن أعد الخطاب العاطفى الذى تلاه مبارك على مسامع الشعب المصريين مساء الأول من فبراير وهو المعروف تاريخياً بـ"ليلة موقعة الجمل".

ومن المتوقع أن يشمل الخطاب إبداء الرئيس السابق وزوجته الرغبة الأكيدة فى التنازل عن كل ممتلكاتهما لصالح الشعب المصرى، والرغبة فى أن يتذكر هذا الشعب "أن مبارك كان يوماً جندياً محارباً فى صفوف القوات المسلحة للدفاع عن الوطن وأنه لم يكن يسعى أو يتوقع منصب الرئاسة وأنه سعى قدر استطاعته إلى تحمل أعباء هذا المنصب كما سعت زوجته إلى الإسهام فى الأعمال الخيرية برغبة منها فى خدمة المواطنين المصريين".

:mad:هو فيه ايه النهارده ؟؟

[Cursed Pistol]

صحيفة مصرية: مبارك سيطلب عفو المصريين عنه وعائلته

[abdomadeer]

^^^^^
أخى الكريم من فضلك تأكد من اللينك

[Hassan.Ali]

بروفه للخطاب :D

يا شعبيا العزيز...الاخوه المواطنون...انى اسف على كل خازوق صدر منى ولم يصيب الهدف فى مقتل.

انى اسف لاننى تركتكم احياء ترزقون من حشاش الارض ..دون ان اجرفها تمام حتى لا يبقى بها

حشاش.. لقد حاولت مرارا وتكرارا ان اجعل كل مصرى لا يرى...لا يسمع...لا يتكلم...ولكننى فشلت.

لم اكن انتوى التنازل عن مليما واحدا فكل هذه الثروه من دمائكم ودماء ابنائكم جميعا انها من

دماء مصر ..لقد قررت ان اتنازل عن بعض الفتات..واقنعت زوجتى ان تتنازل ايضا عن بعض الفتات

فان الكفن بلا جيوب و حتى لا يحقد حاقد او يحسد حاسد... والسلام عليكم ورحمه الله وبركاته

[spidermohmd1]

أرجو من القوات المسلحة منع أي خطاب للحرامي ده عشان مش ناقصين مواجهات بين معارضين و مؤيدين عشان كدة مش هنخلص ...

و بعدين نسامح أيه ؟ ده أحنا لو سامحناه نبقي نستاهل اللي حصل فينا و نستاهل ضرب الجزم و يبقي حلال فينا لو واحد أوحش من مبارك يحكمنا تاني و يدينا بالجزمة و بعد كدة يقولنا .... سوري مقصدش !

[moriatte]

و الله يا اخوة أنا نفسى أشوف الراجل دا و أقوله حاجة مهمة جدا جدا هو ناسيها تماما
هو لما حصلت كل الأحداث دى قال لجمال و سوزان انتو ضيعتوا شرفى العسكرى
و كان دايما لما يطلع بخطاب كان واضح ان كل مشكلته فى الحياة انه عاوز يتذكر فى التاريخ بشكل أفضل من هذا !!!!
و لكنه ناسى تمااااااااااما
انه المطلوب منه فى أيامه الأخيرة ان يصلح علاقته بالله
و أن يجتهد فى طلب الصفح ممن ظلمهم
دى أهم من أى تاريخ هيتكتب
كم من أناس ظلمهم التاريخ و لكن ميزانهم عند الله عظيم
هو هيموت و احنا هنموت والكون كله هيموت
لكن كل واحد سيخلد بميزان أعماله اما فى جنة أو نار
يا ريته يفتكر دى و يرمى التاريخ ورا ضهره و يفكر صح

[Mubarak]

و الله يا اخوة أنا نفسى أشوف الراجل دا و أقوله حاجة مهمة جدا جدا هو ناسيها تماما
هو لما حصلت كل الأحداث دى قال لجمال و سوزان انتو ضيعتوا شرفى العسكرى
و كان دايما لما يطلع بخطاب كان واضح ان كل مشكلته فى الحياة انه عاوز يتذكر فى التاريخ بشكل أفضل من هذا !!!!
و لكنه ناسى تمااااااااااما
انه المطلوب منه فى أيامه الأخيرة ان يصلح علاقته بالله
و أن يجتهد فى طلب الصفح ممن ظلمهم
دى أهم من أى تاريخ هيتكتب
كم من أناس ظلمهم التاريخ و لكن ميزانهم عند الله عظيم
هو هيموت و احنا هنموت والكون كله هيموت
لكن كل واحد سيخلد بميزان أعماله اما فى جنة أو نار
يا ريته يفتكر دى و يرمى التاريخ ورا ضهره و يفكر صح

يقولون أن بن علي بدأ يقرأ في كتاب "لا تحزن" للشيخ عائض القرني وأن زوجته تحجبت.

فعلا، أفضل له أن ينشغل بآخرته، لم يبقى من العمر شيء.
لكن الأفضل من هذا أن يرجع ما استطاع من الحقوق لأهلها، هذا الرجل لم يسمع نصيحة، ليتهم يبعثون له الشيخ محمد حسان يقرع سمعه ببعض الكلمات الإيمانية لعله يحرك شيئا في نفسه تجاه علاقته بربه، لعله يجد في إعادة الأموال المنهوبة التي هربها مع أبناءه فرصة للتوبة.

[EL KING OMAR]

أنا نفسى الخطاب ده يتذاع فى أقرب وقت لسبب واحد فقط:
نفسى اسمع كلمة "الاخوة المواطنون":D:D:D

[crypt76]

إذا أذيع هذا الخطاب (الذي وبكل تأكيد سينضح تذللاً واستعطافاً واستدراراً لدموع المغيبين) فسيؤدي إلى حدوث بلبلة ومشاكل كثيرة بين أبناء الشعب المصري، فهذا خطاب لا يقصد به إلا إشعال الفتنة مرة أخرى كما فعل في خطابه الثاني أثناء الثورة وخطابه المسرب الأخير بعدها.

[GHOSTEID0]

عند يور مازر يا مبارك

[GHOSTEID0]

احنا نقتل جمال ونحرق علاء ونسحل سوزي ونغرق احفاده في عبارة .. ونعتذر له
! لو قبل اعتذارنا .. نقبل احنا كمان اعتذاره ..

[crypt76]

تدوينة رائعة -في نظري- لنوارة نجم (منقول):


انا موافقة ان مبارك يعتذر لنا ويرجع الفلوس - اللي هم نص ترليون يا حرامي مش 145 مليون بروح اهلك - شريطة ان كل حرامي في السجن بالذات النشالين وهجامين البيوت والحرامية الغلابة دول، يدفعوا اللي عليهم - واتخن واحد فيهم يعني سارق سبعتلاف تلتمية اتنين وعشرين جنيه - ويكتبوا جواب اعتذار ويخرجوا من السجن حالا، ومش بس كده، والشوية اللي قضوها في السجن تتخصم من الفلوس اللي حيدفعوها
بس ده بالنسبة لقضية السرقة فقط
نمسك بقى المصابين
المصابين يتعالجوا على حساب مبارك الخاص، بعد ما يرجع الفلوس اللي عليه، ومبارك وسوزان على رأي الصحف الاسرائيلية "يتنازلوا عن ايه؟ هي كانت فلوسهم؟" ده اسرائيل اللي بتقول كده، صعبنا على الكافر. بعد ما يتنازلوا لنا عن فلوسنا، يعالجوا بقى المصابين على حسابهم من فلوسهم هم، ويدفعوا لهم تعويضات من فلوسهم هم.
كده خلصنا المصابين
نيجي بقى للقتلا
اااااه... بما ان مبارك فاكر نفسه ربنا، وفاكر نفسه فوق المحاسبة، اوكيه، يثبت لنا انه ربنا وانه فوق المحاسبة.... يحيي اللي ماتوا.
وبما انه صاحب معجزات وابو خطوة.. اكيد حيحيي لنا اللي ماتوا
خلاص كده اللي ماتوا؟
اللي اتسرطنوا بقى
ارتفاع الاصابة بالسرطان بنسبة اربعين في المية في الخمستاشر سنة اللي فاتوا
قدامه الحلول الاتية
يعالج اللي اتصابوا بالسرطان برة مصر على حسابه - زي ما هو كان بيتعالج برة مصر على حسابنا - واللي ماتوا بالسرطان يحييهم - ماهو ربنا بقى
او.. بما انه راجل مبروك، يحط ايده على مرضى السرطان ويرقيهم والرقوة تجيب نتيجة وتشفيهم
وكذلك يحيي لنا اللي ماتوا في العبارة - ايوة... عبارة من اللي بيغرقوا دول
واللي ماتوا تحت صخرة الدويقة
واللي انضربوا في الصعيد بالنار واخدوا بصمات الجثث وفتحوا التحقيق - في التمانينيات والتسعينات عشان قالوا بس انه كان كويس واخر عشر سنين بس اللي عك فيهم.. هع
ويرجع للصعيد نفسه اللي اتكسرت
ويكلم اصحابه اللي باع لهم غازنا ببلاش يرجعوا لنا الفلوس على الاقل وبلاش يرجعوا الغاز
ويرجع لنا العمولات اللي كان بياخدها على كل بير بترول مصري بيتصدر
بالنوسبة للفضيحة بتاعة غزة... فاكرين؟ ايام ما الاطفال كانوا بيتحرقوا والناس اكلت وشنا.. احنا عايزينه يعوضنا عن الفضيحة دي، يدفع لنا فلوس مثلا تعويضات على ان الناس كانت بتتف في وشنا عالميا، ويتظاهروا قدام سفارتنا لما انا شخصيا كنت حاموت كمدا
بالنوسبة لفضيحة الجزائر.. اللي وصلت ان واحد صاحبي بعد موضوع الجزائر ده كان في لبنان وبقى يتكلم لهجة خليجي عشان الناس ما تعرفش انه مصري، وواحد صاحبي تاني كان في المغرب - اللي اساسا متخانقين مع الجزائر - وبقى يتكلم فرنساوي عشان الناس ما تعرفش انه مصري من كتر ماهو مكسوف وخايف الناس تمسح بيه البلاط
ولا هو فاكرنا زي شوية المرتزقة اللي حواليه؟ ولا هو فاكرنا زيه وكل همنا الفلوس ومبدأنا في الحياة زيه لما قالوا له السودانيين بيشتموك قالهم "هي الشتيمة بتلزق"؟
فيه حاجة يبدو ان لا هو ولا دلاديله ولا حتى القوات المسلحة واخدين بالهم منها:
احنا شعب اليط بطبعه، وعريان الـ... ويتأمز تأميز ويقول باب الخمارة فين، واقرع ونزهي... والثورة دي كانت عشان كرامتنا واجعانا... مش عشان جعانين، عادي، الجوع بيتقضى، كرامتنا هي اللي مش بتتقضى
وبمناسبة كرامتنا، حيعمل ايه في اللي دخلوا الاقسام بشرفهم خرجوا متمرطين؟
وبمناسبة السودان، حيعمل ايه في تقسيم السودان اللي لولاه ولولا عمر سليمان ما كانش جرا لها اللي جرالها؟ ولا هو فاكر اننا حلاليف زيه ومش سائلين في اللي حوالينا؟ ولا هو ناسي ان السودان بالنسبة لنا ايه واحساسنا بيها ايه؟
"ومصر الرياض وسودانها عيون الرياض وخلجانها، وما هو ماء ولكنه وريد الحياة وشريانها، تتمم مصر ينابيعه كما تمم العين إنسانها"
وبمناسبة ينابيعه... حيرجع لنا المية اللي باعها وخلانا دلوقت متوقعين في عرض اثيوبيا ازاي؟ خلاص... المية ترجع لنا من غير ما نتوقع في عرض اثيوبيا واحنا نسامحه.
لما امبارح كنت في الندوة بتاعة القوات المسلحة، عاملين البرزنتيشن وحاطين كل اسباب الثورة... الا السبب الرئيسي: كرامتنا.
طب وربنا.. وربنا.. وربنا كمان مرة، تلاتة بالله العظيم تلاتة بالله العظيم تلاتة بالله العظيم، قسما بأغلظ الايمان، يمين احاسب عليه امام الله، ان السبب الرئيسي اللي قوم الثورة دي هو كرامتنا
واللي مش مصدقني يقول لي ايه تفسير الآتي:
يوم 25 اول ما الناس اتجمعت في الميدان الهتاف الاول قبل الشعب يريد اسقاط النظام كان:
لسه فيكي رجالة يا مصر.. لسه فيكي رجالة يا مصر
بكام دي يا مبارك؟ بكام انك خصيتنا وحسست رجالتنا اللي اهيف واحد فيهم ضفره برقبة عشرة منك انهم مش رجالة، ولما اكتشفوا انهم رجالة قعدوا يعيطوا؟
يوم 28 يناير.. كربلاء المصرية:
بعد ما ضربنا الامن في ميدان الدقي بقينا ماشيين ناحية كوبري قصر النيل والهتاف كان: قنابل على مين ده احنا المصريين.
بكام دي يا مبارك؟ بكام انك كسفتنا من اننا مصريين وبقينا بندور جوة نفسنا على اي حاجة عشان نرجع ثقتنا في نفسنا؟
بكام الشباب اللي كان ماشي صف ناحية الرصاص عشان يثبت للعالم انهم رجالة، ولما الضرب يزيد والشباب غصب عنهم يجروا البنات تتقدم عشان تنغز الشباب في نخوتهم وما كانش ناقص غير يغنوا: يا قوم الام وحتام ان تقبلوا نعانق ونفرش النمارق
واول ما نلاقيهم بيجروا نقف صف وايدينا في ايدين بعض واحنا عمالين نصرخ فيهم: ما تجروووووش ما تجروووووش لو جريتوا احنا حنتقدم... ونروح ماشيين كلنا - كل الستات والبنات، بلا اي اتفاق والله العظيم بنفس الخطوة كأننا فرقة رضا - ناحية الرصاص، يروحوا راجعين الشباب على الرصاص فورا
موتنا رجالتنا الله يخرب بيتك... موتناهم عشان نشوفهم رجالة
كل الدم ده نزف عشان كرامتنا واجعانا وعايزين نثبت لنفسنا اننا عندنا رجالة.. وكان ممكن الشباب يجري وينفد بعمره، بس كرامتهم كانت اهم من حياتهم
يوم 2 فبراير بعد هزيمة بلطجية مبارك كان الهتاف:
ارفع راسك فوووق انت مصري
بكام دي يا مبارك؟ بكام انك نكست راسنا وكسرت نفسنا، ولما اكتشفنا اننا جدعان قوي، شباب وبنات، بقينا نصرخ للعالم ونقولهم: احنا رفعنا راسنا؟
يوم 11 فبراير كان الهتاف:
اهم اهم اهم.. المصريين اهم
ايه يا راجل.. ايه راجل؟ ايه يا راااااااااااااجل؟ يخرب بيت امك يا شيخ
يخرب بيت امككككك... خليت الشباب يموت نفسه عشان عايز يتأكد انه لسه راجل، خليت ستات مصر تزق رجالتها في النار عشان يشوفوهم رجالة... يخرب بيت امك
تسوى كام دي؟
واخدين بالكم يا قواتنا المسلحة؟
واخدين بالكم؟ احنا عملنا اللي انتوا حلفتوا يمين عشان تعملوه وما عملتوهوش.. احنا برينا بقسمكم بدالكم عشان ما يتقالش ان مصر مافيهاش رجالة
واخرتها... مدخلين لمبارك في سجنه مسجل وبتقولوا لنا سامحوه
كتر خيرنا اننا سامحناكم وانتوا بتتفرجوا علينا واحنا بننضرب يوم اتنين فبراير وانتوا ما اتدخلتوش... ما تسكتوا بقى وتبطلوا تحربوا على خرابها؟ هو لوي دراع ولا ايه؟
فتنة طائفية
فلتان امني
ازمة سولار
تهديد بكارثة اقتصادية
والمشهد الاخير: مبارك عايز يعتذر ويرجع الفلوس
لا والنبي؟
لا والنبيييييي
وبعديييييييييييييييين وبعديييييييييييييييييييين... للصبر حدوووووود
يعني احنا جزاتنا اننا عملنا عبط؟ ادي اخرة الدلع، فضلنا نبوس ونطبطب ونحايل ونهشتك والجيش والشعب ايد واحدة، ومعلش، انزلوا لهم في مليونية عشان ترفعوا عنهم الحرج، ومعلش، ما حموناش يوم 2 فبراير ماهم كتر خيرهم جالهم امر يقتلونا وما قتلوناش، ومعلش فضونا بالقوة اصلهم ملبوخين، ومعلش ومعلش ومعلش
وبعدين.. وبعدييييين.. اتقي شر الحليم
هي حصلت؟
دي اخرتها؟ هو فيه كده يا ناس؟ ده انا كنت باكتب للناس في المدونة: احنا نازلين وفيه تهديدات من قناصة انهم يضربوا على قواتنا المسلحة، والعيال يكتبوا لي في التعليق: احنا نحمي قواتنا المسلحة بارواحنا، ونموت كلنا قبل ما حد فيهم يتخدش
ونحل لكم امن الدولة بايدنا وانتوا واقفين تتفرجوا على قناصتهم وهم بيضربونا ونخش نجيب لكم الوثائق ونسلمها لكم
ونأمن لكم البلد بايدينا ونعمل لجان شعبية واللي نظبطه نقبض عليه ونسلمه لكم
ونقف لكم قدام السعودية والامارات واسرائيل بنفسنا وننزل لكم مليونية ودماغنا تتقور في الشمس عشان نرفع عنكم الحرج ونجيب لكم مبارك تحاكموه
ونمسح ونكنس ونطبخ ونغسل ونعصر وننشر ونكوي ونطبق الهدوم ونستفها في الدواليب ونقول لكم: تسلم يا سيد الرجالة.. الله
الله..
جرا ايه بقى؟
جرا ايه؟
ما تلايموها بقى، ده كتييييير.. كتييييييييييييير، كده اووووووووووووووفرررررررررررررر
انا مش عايزة اسمع حس الموكوس ده في اي تسجيل صوتي
مش عايزة اسمع نفسه
والا بقى اللي دخل له التسجيل في سجنه واللي سرب له التسجيل واللي نشر له التسجيل وهو في السجن ومش قانوني انه يسجل اي حاجة ويأثر على مجريات التحقيق كلهم يتجابوا بقى
كلهم يتجابوا... اي واحد متورط في تسريب تسجيل صوتي لمبارك وهو قيد التحقيق للتأثير على مجرى القانون يتجاب مهما علا شأنه، ويتحاكم، والمحاكمة بقى تجيب محاكمة ويتفتح كل اللي احنا عاملين عبط عليه
قلتوا ايه؟
عقلكوا في راسكوا تعرفوا خلاصكوا... انا مستنية تكذيب بقى لموضوع اعتذار مبارك ده، وما عندناش مانع نتخانق مع الشروق ونقول لها يا كدابة يا كدابة يا ثورة مضادة.. وهي مش حتزعل.. هاه؟ فيه اكتر من كده؟
يا تطلقوا مبارك يا تطلقونا... انما تتجوزوا علينا وكمان نصرف عليكم وعليه؟
وبالمناسبة بقى طلعوا لنا الـ186 عيل اللي انتوا عايزين تحبسوهم عشان اسرائيل
ايه يا اخواتي ده؟ ده ولا كأن مبارك لسه بيحكم
القوافل تتمنع
واللي يتظاهر قدام سفارة اسرائيل يتحبس
الله الله الله
هي بقت كده؟
طااااب بقى.. احنا نازلين يوم 27 مايو الجاي، وحناخد في ايدنا الجرحى باهاليهم، واهالي الشهدا كلهم، واصحابهم وقرايبهم وجيرانهم، شوفوا بقى يعملوا كام دول
ان كان شعبك عسل ما تلحسوش كله..
احنا صبرنا عليكوا كتير، حقنا راجع في التحرير

[The Apex Predator]

انا عن نفسى اقبل اعتذار مبارك و لكن بشروط و هى:

أن نسرق جميع امواله و اموال عائلته و نعذب جمال فى غرف عازلة للصوت حتى الموت و نعتقل علاء لانه يتكلم فى السياسة و نقوم بتعذيبه حتى الموت و نضع سوزان و جميع احفاده فى عبارة ثم نقوم باغراقها ثم نعتذر له عن كل شىء فعلناه.

فاذا قبل اعتذارنا سنقبل اعتذاره و اذا لم يقبل فلن نقبل نحن ايضا.

[mohammed_kamal]

الخبر غير صحيح وهو ما نفاه المجلس العسكرى اليوم ونفى ان يكون هناك اى مخطط للعفو عن مبارك

[mohammed_kamal]

ونفى ايضا انه يكتب خطب اعتذرا لانه على ذمه التحقيق وممنوع التكلم مع الناس فى هذه المده