اخي الغالي اعانك الله .......والله انت بتهب كالنسيم العليل واحنا .....يعني طلابك نستناك على نار هادئة
بالتوفيق ان شاء الله العلي العظيم عليه توكلنا وبه نستعين
السلام عليكم ورحمة الله وبركاته
أحبابي في الله عدت مجدداً
أود أن أقول بداية أني شاكر لكم حسن متابعتكم جميعاً وفعلاً كل ما الهمة تهبط إنتم بمشاركتكم لي تزيدون من همتي وعلى فكرة أبشركم
فالمحاضرة القادمة تحت عنوان فلسفة حاسب
أصل موضوع أساسيات الحاسب والمكونات المادية للحاسب مش موضوع بسيط زي ما كثير من الناس متخيلاه وصدقني أنا مصمم على شرح هذا الجزء لتروا الفرق في الشرح محتاجين نعيش هذا الكلام لا أن نحفظه وبلاش أحرق المحاضرة خليها مفاجأة والله المستعان
أحتاج لدعائكم بصدق
وأخص طبعاً بالشكر الإخوة المباركين
Tiina شكراً أسعدني مرورك
waleedallam أهلاً بصديقي شارك بس بأي شيء أنا موافق المهم أشوفك وأسمع صوتك (إبتسامة)
" ترجمة كتاب quick reference بتاع ال CCNP
انا الحمد لله طلع من نصيبى الجزء بتاع ال ONT ومنتظر مشاركات الجميع ودا رابط الموضوع
https://www.arabhardware.net/forum/sh...d.php?t=110355 "
وبالعكس أنا أشكرك وأشكر الأخ maayoub وأعتبرني يا سيدي أول المتابعين فالموضوع فعلاً جميل ويستحق
محمد مندور جزاك الله خيراً على شكرك ودعائك وفعلاً معاك حق كان المفروض أن يكون اسم المنتدى المبارك هذا في الملف و لكن راحت عن بالي ولعلي لم أتفطن لها علشان كل الناس في المنتدى هنا والله يغفر لي ولك أما بخصوص الإبتسامة فلا أملك إلا أن أقول لك (إبتسامة)
™ ThE GeNiUs أهلاً بالمتابع الجديد والجيد إن شاء الله وعايز أقولك لحضرتك حاجة ألا وهي موضوع السرقة ده ميزة لأنه هو سيأثم وأنا أجري سيزيد لأنه سيكذب ويقول بتاعتي ولكن سيوزعها فيستفيد ناس وأنا أؤجر فكرتني بو قعة حصلت لي أحدهم عمل موضوع زي كده ولما تناقشت معه إتضح إنه مش فاهم وكان شكله وحش الحقيقة وأنا عايز أقول كمان أنه هو الخسران الأول والأخير حتى إحترامه لنفسه مش عارف وكنصيحة للجميع أوعى تكون زي الأغبياء لكن خليك مسلم ذكي أنشرها تؤجر وبلاش يا سيدي تذكر لا أسمي لو مش عايز ولا أسم المنتدى يا سيدي أنا حسبي أن الله يعلمني ويكتب أجري وخليك فكر في الأجر الأخروي وسبك من أمور الدنيا
ثانياً : يا سلام عليك لو تكموا جميلكم معاي وتشرحوا لي إزاي لما أقول رد أضيف فيه صور فعلاً مش عارف ومش عندي وقت أجلس أحاول وأدور لكن تركها لك يا أستاذي الفاضل بارك الله فيك
mmeen96 جزاك الله خيراً جزاك الله خيراً جزاك الله خيراً (إبتسامة)
Super Skyline بارك الله فيك أخي الحبيب وأحيي فيك روح المتابعة وأعلم أنك ستكون أكثر الناس إستفادة إذا قرات مش كما يظن البعض أن الوقت سيضيع لا والله بل المشاركات والردود ثمرة فهم الموضوع وعلى فكرة المسألة مش عبقرية ولا حاجة بل أنا في إعتقادي أن السبب الرئيسي هو أن هذا الأمر لله ففيه توفيق ولله الحمد بفضل الله ثم بفضل دعائكم وأما إن كان للدنيا فلا أعرف هل كان سيكون بهذه الجوده
في النهاية أود التأكيد على موضوع مراسلتي على الخاص يرجي أن يكون وخصوصاً إذا كان الموضوع مناقشة في شيء من المحاضرات أو المادة العلمية أن يكون على الموضوع حتى يستفيد الجميع إلا إذا كان موضوع خاص فعلاً لا يمكن طرحه على العموم بارك الله فيكم ومعلش أستحملوني أنا عارف أن طلباتي كتير لكن ده من عشمي فيكم إخواني وأحبابي في الله
دعائكم
أخوكم
عادل الحميدي
*إذا لم يكن عون من اللّه للفتى**فأوّل ما يجني عليه اجتهاده*
اخي الغالي اعانك الله .......والله انت بتهب كالنسيم العليل واحنا .....يعني طلابك نستناك على نار هادئة
بالتوفيق ان شاء الله العلي العظيم عليه توكلنا وبه نستعين
جزاك الله كل خير
والله يجعل هذا العمل الضخم في ميزان حسناتك....
أتمنى من إدارة المنتدى تثبيت هذا الموضوع لتعم الفائدة على الجميع......@
ربنا يجبر بخاطرك ويريح بالك انا مقدرش اقولك غير استاذ يا عادل يا حميدى بارك اللة فى وقتك وفى جهدك وانعم عليك من فضلة الواسع تحياتى لك
يلا كمل يا استاذنا الغالي
السلام عليكم ورحمة الله وبركاته
عدت لكم مجدداً
بداية وقبل البداية أرحب بالإخوة الأعضاء الذين شاركوني
onepiece جزاك الله خيراً وأنا والله يا أخي بكون مشتاق أيضاً للكتابة لكم ورؤية ردودكم لكن للأسف مش شايف مناقشات ولكن لعلنا في البداية والكلام مفهوم
Super Skyline جزاك الله خيراً على مرورك ونسأل الدعاء فوالله المحاضرة هذه أرهقتني جداً على ما كتبتها
Super Skyline مش قوي كده الموضوع مش يستحق بارك الله فيك لكن عندنا مثل بيقول مين يشهد للعروسة يعين يشكر فيها قالوا أمها (إبتسامة)
waleedallam أهلاً بالغالي ود الغاليين وإنت فعلاً غالي يا غالي طبعاً عند والدك ووالدتك (إبتسامة)
التورنيدو303 جزاك الله خيراً على مرورك والجديد ها هو آتي
الوحدة التدريبية الأولى : أساسيات الحاسبات
الفصل الأول : المكونات المادية للحاسب
الوحدة الأساسية لبناء أي شبكة هي الكمبيوتر يعني تقدر تقول الشبكة لبنة كمبيوتر ولبنة كمبيوتر زي البناء حتى تكتمل الشبكة ، فلا نستطيع أن نتكلم على أي شبكة خالية من أجهزة الكمبيوتر مع وجود مكونات أخرى للشبكة أجهزة أخرى ، لكن الكمبيوتر هو الذي يلعب دور المرسل والمستقبل في أي عملية تبادل رسائل أو بيانات لذلك لا يمكن إهماله فتعالوا بنا نلقي عليه نظرة على مكوناته
أنا عايزك بس تعرف إن الكمبيوتر هو شبكة (إبتسامة) والله فعلاً شبكة من المكونات المادية موصلة عبر اللوحة الأم ويوضع عليهم المكونات البرمجية فتعمل الشبكة أقصد الكمبيوتر
أنا عايزك تأخذ بالك من الأمثلة التي أضربها لأنها هي دية فلسفة الحاسب التي سبق وأشرت أليها ... فهي شيء جميل يجعلك تعيش مع الشيء
أولاً مش الإنسان مكون من روح وجسد والجسد بدون الروح يكون جثة هامدة كذلك الكمبيوتر مكون من روح (البرامج) وجسد (المكونات المادية أو الصلبة) ومن غير البرامج الكمبيوتر قطع حديدية لا فائدة منها ومن غير المكونات المادية البرامج كود أو كلام مكتوب على الورق
إذن الكمبيوتر بداية مكون من شيئين :
أولاً : البرامج Software
ثانياً : المكونات المادية أو الصلبة Hardware
هاه إيه رأيكم نبدأ بمين السوفت وير ولا الهاردوير
أقولكم تعالوا نبدأ بالهاردوير علشان منتدياتنا هي عرب هاردوير (إبتسامة)
تقدر تقول إن الهاردوير مكون من عدة أشياء :
أولاً : المعالج CPU
ثانياً : الذواكر Memory والتخزين Storage
ثالثاً : الواجهات Interfaces
رابعاً : مصدر التغذية Power Supply
خامساً : المدخلات Input
سادساً : المخرجات Output
سابعاً : اللوحة الأم Motherboard
واحد يقولي ياعم دا كلام قديم ومش مستاهل خش في الثقيل أقوله والله العظيم هذه المحاضرة مفيدة جداً وراح تفيدنا جداً وخصوصاً مثلاً عند دراسة الهاردوير الخاص بالروتر
أنا عايزك بس علشان مش نتكلم كثير تخيل شخصين يتكلمون واحد بيسأل الثاني 5*6 يساوي كام خمسة في ستة أجاب الثاني يساوي 30 ممتاز
بص يا سيدي العملية مش بالبساطة دية لا بالبيانات أو الكلام خرج من شفتي الأول وإنتشر في الهواء حتى وصل لأذن الثاني ثم دخل من الأذن للمخ والمخ حسبها طلع الناتج أو المعلومات 30 فأجاب الثاني بشفتيه 30 (معرفش 5*6=30 زي زمان ولا الدنيا غلية) (إبتسامة) ما أصل كل شيء في الدنيا بيغلى إلا الإنسان بيرخص والله المتسعان المهم
شوف بقى التعريفات التالية
أولاً : المعالج CPU
مخ الجهاز (إبتسامة) ده تعريفه مخ الجهاز بمعنى أنه المسئول عن كل العمليات الحسابية والمنطقية وما إلى ذلك من المهام المتعددة الأخرى الحسابية يعني جمع طرح ضرب ... المنطقية وهي العمليات التي تكون إجابتها بنعم أو لا
وتتميز المعالجات بسرعة معالجتها للمعلومات وسعة ناقلها الداخلي فتصل حالياً سرعة معالجات الأجهزة الشخصية إلى أكثر من ثلاثة آلاف مليون عملية في الثانية الواحدة سبحان من علم الإنسان مالم يعلم
ثانياً : المدخلات Input
أذن الشخص الثاني (إبتسامة) ما هي دية اللي دخلت البيانات زي الكمبيوتر بالضبط فيه اللوحة والماوس والإسكنر اللي بندخل بيه صورنا للكمبيوتر وشاشة اللمس بتاعت الصرافات في البنوك و... كل دية أجزاء صلبه أو مادية تسمى مُدخلات
ثالثاً : المخرجات Output
الشفتين (إبتسامة) ما هي دية اللي خرجت البيانات بعد ما مخ الجهاز أقصد المعالج قام بحسابها والتي تسمى معلومات زي الكمبيوتر فيه الشاشة والطابعة والسماعات و... كل دية أجزاء صلبة تسمى مُخرجات
لكن فيه ملحوظه فيه فرق بين بيانات ومعلومات نعم هناك فرق كبير فالبيانات قبل المعالجة والمعلومات بعد المعالجة
يعني 5*6 هاه صح تمام ماشاء الله عليكم بيانات
و30 معلومات
ممتاز خالص جداً قوي (إبتسامة)
رابعاً : الذواكر Memory والتخزين Storage
شوف يا عم الحج حتة مصري كده معلش (إبتسامة)
يحتوي جهاز الكمبيوتر على عدة أنواع من الذاكرة والكتب تلاقيها مليئة بتعريفات مملة لكن مع فلسفة الكمبيوتر هتلاقي الوضع مختلف تماما فركز معي بارك الله فيك
أ- ذاكرة الوصول العشوائي : RAM (Random Access Memory)
نوع من الذاكرة يتعامل مع المعالج بصفة مؤقتة ، فمثلاً عندما نشغل أي برنامج تحمل الأوامر التي يحتوي عليها البرنامج إلى ذاكرة RAM ، بص إنت عارف لما بتشتغل على برنامج الوورد Word وتجلس تكتب لغاية لما ملئت صفحة هل حفظت شغلك ده لا لسه الله أكبر أما هو فين في الهواء لا في الـ RAM
وتحتاج الذاكرة RAM إلى طاقة كهربائية كي تخزن البيانات أو المعلومات بشكل مؤقت ، وعندما يتوقف الكمبيوتر عن العمل يضيع كل ما عليه حيث تفقد محتوياتها بإنقطاع التيار الكهربائي
ب- ذاكرة القراءة فقط : ROM (Read Only Memory)
دية ذاكرة المصنع اللي صنع اللوحة الأم Motherboard وفيه المعلومات الأساسية التي يحتاجها الجهاز كي يعمل أو يبوت Boot يعني تقدر تقول بيفحص المكونات الصلبة للجهاز ويعرفهم على بعض ويشوف فين نظام التشغيل وكده حتى يعمل الجهاز ولو كان نظام التشغيل اللي بيشغل الجهاز بايظ ينبهك
وبالتالي يستخدم هذا النوع من الذاكرة للقراءة فقط ، ولا نستطيع الكتابة عليها أو تغيير محتوياتها ، صحيح ظهر نوع يمكن لكن خلينا من هذا الكلام ، وتبقى المعلومات الموجودة في الــ ROM بصفة دائمة حتى ولو فشل الجهاز أو توقف عن التشغيل
جـ - محرك القرص الصلب Hard Disk Drive :
أولاً لابد أن تعرف أن الهارد ديسك مقسم لقسمين وغالباً ما يكون الأول وهو الرئيسي C:\ والثاني باقي الأجزاء ممكن D:\ و E:\ وغيره حسب سعة الهارد
القسم الأول سي عليه نظام التشغيل وده هنشوفه مع المكون الثاني من مكونات الكمبيوتر السوفت وير والقسم الثاني عليه تخزن ملفاتك الشخصية وهو مكان لتخزين كميات كبيرة من المعلومات بصفة شبه دائمة
د – Cash Memory :
وهي ذاكرة صغيرة وسريعة جداً هي أسرع أنواع الذواكر لمساعدة المعالج CPU
وعلى فكرة الذاكرة الثانية في السرعة RAM ثم ROM ثم Hard Disk
شوف بقى الفلسفة الجاية دية
بص يا سيدي المفترض تسأل نفسك ليه كل أنواع الذواكر دية ومش كفاية واحدة وخلاص تقوم بكل المهام دية
بص لو واحد ربنا يعافينا وإياكم جاله غيبوبة وفاق بعد ثلاثة أيام هتلاقيه نسي كل حاجة إلا إسمه عارف ليه لإن إسمه مخزن في الـ ROM ما هو من يوم ما إتولد خد بالك ذاكرة الصنع بيقولوا له روح يا بوش تعال يا بوش فتحفر في الـ ROM إن إسمه بوش ربنا ينتقم منه (إبتسامة) ونشوفه كده في غيبوبة
لكن لو سألته إتغديت إيه قبل الغيبوبة بثلاثة أيام سيقول مش فاكر لأن الكلام ده مخزن في الــ RAM
كمان فكرين الشخصين بتاعوت 5*6 لما قال الأول 5 أخذها الثاني وخزنها في الكاش ميموري ولما قال ضرب أخذ علامة الضرب * وخزنها في الكاش أيضاً ولما قال 6 كذلك ثم حسبها طلعت 30 أو تفكر إن الكلام كده بيطير في الهواء لازم يتخزن علشان كده لو قلت له طيب + إجمع على الناتج 5 هيقولك 35 لإن الـ 30 كانت مخزنة في الكاش
فهمت يا بطل وعرفت ليه لازم كل أنواع الذاكرة هذه
وده غير أنواع الذواكر الأخرى المتحركة زي السي دي والفلاش ميموري (يعني الذاكرة المؤقتة) وكل دية ذواكر متنقلة مش كل يعني ما أعوز أجيب معلومات معاي البيت من الشغل آخذ الجهاز على ظهري ، ولو حبيت تتفلسف قول زي النوتة بتاعت التليفونات اللي كنا زمان بنخزن فيها الأرقام ، وعلى فكرة هذه الذواكر لها قارئ زي السي دي روم ...
خامساً : اللوحة الأم Motherboard
ودية بقى حكاية دية اللي بتوصل جميع المكونات ببعض زي الأم الحانية وهي في الحقيقة مكونة من عدة أشياء ولعلي أرفع لكم برنامج جميل يدربك على الصيانة لوحدك
طيب من أهم مكونات المذربورد
أ- الناقل : BUS
وهو عبارة عن مجموعة من المسارات والتي من خلالها تتنقل البيانات من جهة إلى أخرى في الجهاز تقدر تقول الطرق اللي البيانات بتمشي فيها متنقلة من مكون إلى آخر
ب- الشقق التوسعية Expansion Slots
دية بقى مهمة جداً السلوت بص يا سيدي لما تحب تزيد من إمكانيات جهازك مثلاً بتركيت كرت فاكس للإتصال بالإنترنت أو كرت شبكة لتوصيل الجهاز بالشبكة أو كرت فديو لتحسين الرؤية أو كرت صوت أو .....
فتحتوي اللوحة الأم على الشقق التوسعية أو الفتحات التوسعية هذه لتركب عليها بطاقات ذات مهام معينة
والسلوت أنواع نرتبها من الأقدم فالأحدث كالتالي :
ISA
AGP
PCI
والمستخدم حالياً هو PCI
ومن أهم هذه الكروت التي تركب في السلوت PCI كرت الفاكس وكرت الشبكة عارف الفرق خليني أذكرك الفاكس اللي بتوصله بخط التليفون زمان علشان تدخل إلى الإنترنت والفتحة بتعته صغيرة إسمها RJ-11 سنين لكن كرت الشبكة فتحته كبيرة شوية ثمانية سنون وتسمى RJ-45 وهية دية اللي بيركب فيها السلك المؤدي للسويتش
أنا بس عايز ألفت إنتباهكم لشيء مهم جداً جداً جداً
ألا وهو أن أي مكون في الحاسب لابد له من شيئين كي يعمل مزود بالبيانات والمعلومات ومزود بالطاقة الكهربية لأننا كما سبق قلنا مكونات صلبة تعمل بالكهرباء طيب
إذن لا بد وأن يوصل أي مكون بالـ مزربورد علشان لو عندها بيانات ترميها عليه فتسير في الـ باصات حتى تصل إلى الوجهة
طيب والطاقة الكهربائية هي دية بقى وظيقة المكون التالي
علشان كده دائما نقول للطالب في محاضرات الصيانة لابد عند تركيبك للجهاز لا تنسى تعمل تشك فحص لكل مكون واصل له كهرباء ومتوصل بالــ مزربودر ولا لأ
والقاعدة لها شواذ لكن مش عيزين نفصل كتير
سادساً : مزود الطاقة Power Supply
يستخدم مصدر التغذية لتزويد معظم مكونات الحاسب بالطاقة ، وتكون هذه الطاقة عبارة عن جهد مستمر بقيم ثابتة تحتاجها مختلف الدوائر وشرائح اللوحة الأم وبعض المكونات الأخرى
سابعاً : الواجهات Interfaces
وأنا عايزك تأخذ بالك من الكلمة دية لأنها ستتكرر كثير جداً معاً في هذا الكورس شوفت الصندوق بتاع الكمبيوتر من الخلف فيه فتحات بنسميها منافذ أو بورتات Ports وساعات نسميها واجهات وهي من الأشياء المهمة جداً ويمكن مش هتلاقي كتاب أفرد الواجهات كمكون من المكونات المادية إلا القليل المهم
إذن الواجهات عبارة عن منافذ أو مداخل وخارج يتبادل من خلالها المعالج المعلومات مع الأجهزة الطرفية ، كمنفذ بطاقة الشبكة ومدخل لوحة المفاتيح والماوس والطابعة وغير ذلك
أرجو تكون المعلومة وصلت وأوعاك تنسى تحمل الملف من الفور شير الخاص بدورة الصيانة الذاتية وكمان أرفقت ملف كيفية تحميل الويندوز وفورمات الجهاز بالصور وكمان إعدادات الشبكة سنحتاجه بعدين خليه عندك وخليك فاكر حمل الروابط التالية كلها بارك الله فيكم
والرابط التحميل عندي من البيت بطيء لكن لعلي أرفعه لكم بكره من الشغل بوركتم وإن شاء الله لن أتأخر عليكم في الرفع
زهقتم ولا إيه لا بالله عليكم ده أنا متحمس وإنت كنت والله مش عارف أتكلم بحرية بكتب وساعات كثيرة أنسى شيء ولو كانت المحاضرات مسجلة مش عارف كان كيف سيكون الوضع لكن أفضل أن يكون الوضع كده في البداية
*إذا لم يكن عون من اللّه للفتى**فأوّل ما يجني عليه اجتهاده*
ثانياً : المكون الثاني من مكونات الكمبيوتر
البرامج Software
وهي ثلاثة أنواع عموماً
أ- أنظمة التشغيل Operating System وهي دية موضوعنا الــ OS
ب- برامج تطبيقية Application Program زي مايكروسوفت وورد وإكسل وأكسس وبوربوينت والفوتوشوب والأوتوكاد و... وغيرها من البرامج المساعدة لكن ممكن الكمبيوتر يشتغل من غيرها فهي إن إحتجتها حملها وإلا فلا مش زي نظم التشغيل لازم يكون الكمبيوتر عليه نظام تشغيل حتى يعمل وإلا فلا
ت- لغات برمجة Programming Language ودية هي اللي بتعمل لنا نظم التشغيل والبرامج التطبيقية
أنظمة التشغيل :
وحدوا الله وصلوا كده على حبيبكم المصطفى (صلى الله عليه وسلم)
أنظمة التشغيل أنواع :
1- نظام تشغيل عادي OS
2- نظام تشغيل شبكي NOS (Network)
3- نظام تشغيل الشبكات البينية IOS (Internetwork)
طيب خلاص شكلكم زهقتم نخليها المحاضرة القادمة
طيب ما تصحصحوا علشان أقدر أكمل
شوفوا لإنشاء شبكة وربط الأجهزة فيزيائياً مع بعضها نحتاج لمكونات مادية ككرت الشبكة والأسلاك ، ولتشغيل الشبكة وتأمين الإتصال بين الأجهزة نحتاج لعناصر برمجية مختلفة برامج يعني والتي تتمثل في أنظمة التشغيل
أولاً : الشبكات نوعين من حيث التحكم
الشبكات من النوع مجموعة عمل WorkGroup أو بيسموها ساعات Per-to-Per ند لـ ند أو نظير لــ نظير الكمبيوترات زي الطلاب في الفصل كلهم في فصل واحد أو مجموعة عمل وكلهم أنداد لبعض مفيش حد يقدر يجبر أحد على شيء صح كذلك الأجهزة وهذه الأجهزة تحتاج لنظام التشغيل العادي OS
الشبكات من النوع نطاق أو مجال Domain أو بيسموها Server/Client ملقم أو خادم لمجموعة من العملاء (العملاء أنداد لبعض بيشتغلوا بنظام تشغيل عادي) أما الخادم أو الملقم وخلينا بقى نقول السيرفر نظراً لأنه يمثل المدرس في الفصل أو القائد يعني لمجموعة عمل سيحتاج لنظام تشغيل شبكي NOS يحتوي على بعض البرامج أو الخدمات أو الأدوات المساعدة الإضافية المصممة لمهام السيرفر ... والتي تمكنه من قيادة الأجهزة وتسجيل معلومات عنها والتحكم فيها و...
أمثلة لأنظمة التشغيل العادية
ويندوز XP
أنظمة التشغيل الشبكية
ويندوز سيرفر 2003
كمان لازم تلاحظ أنه هناك ما يسمى بأنظمة الملفات والتي تعني تنسيق ملفات نظام التشغيل والتي يختارها الشخص الذي يحمل الويندز على الأجهزة وفيه هناك نظامين للملفات
FAT32 الأقدم أمان أقل مشاركة ملفات أضعف إمكانيات محدودة يعني
NTFS الأحدث أمان علي ومشاركة بصلاحيات مختلفة
إذن لازم تكون صاحي عند تحميل إصدار ويندوز فتختار NTFS
طيب كفاية كده ونؤجل الكلام على نظم تشغيل الشبكات البينية والبروتوكولات يعني إيه بروتوكول وأمثلة مع شرحها المحاضرة القادمة لأن كده وقتنا خلص
ولا إيه رأيكم نكمل علشان نعطي بكرة راحة للجميع علشان يذاكر ويقرأ المقال بشكل جيد ومع أني شايف إن المناقشات بسيطة جداً مش عارف ليه لعل الكلام واضح أو الموضوع مش مستاهل الله المستعان أو القراء زاهدين في الموضوع لكن الأجر مكتوب إن شاء الله
بصوا يا جماعة الشبكة مكونة من أجهزة كمبيوتر بس ولا فيه أجهزة تانية ؟
لا طبعاً فيه أجهزة تانية زي السويتشات والروترات ممتاز
طيب إنت عارف إن السويتش والروتر أجهزة كمبيوتر لكن مهمتها هي
إذا كان سويتش Switch : جهاز لوصل أجهزة الكمبيوتر مع بعضها في شبكة
وإذا كان روتر Route : جهاز يربط شبكتين ببعضهما
طيب يعني هاردوير وسوفت وير ولا إيه طيب الهارد وير لسه بدري على ما نأتي له
وكذلك السوفت وير أو نظام التشغيل أيضاً لكن مؤقتاً لازم تعرف إن نظام التشغيل اللي بيشغل السويتشات والروترات هو IOS
الحمد لله قطعنا شوط كبير
لكن أود التنبيه على أن نظم التشغيل OS ، NOS ليست فقط ويندوز زي ما ناس كتير فكره
لا هناك شركات غير مايكروسوفت بتعمل نظم تشغيل وهم كتير ويمكن مشهورين في أمريكا وأوروبا عن الويندوز اللي هو عندنا أشهر نظم التشغيل بل وهناك ما هو منهم أقوى من ويندوز
شوف يا سيدي ويندوز قد يكون أشهر نظم التشغيل وخصوصاً في العالم العربي وأكثر نظم التشغيل برامج خدمية وده يمكن لأن وراءه شركة كبيرة زي مايكروسوفت تعمل عقود مع الناس ودعاية وكمان تعمل له برامج تخدمه
لكن هناك أنظمة أخرى زي :
ماك أو إس عشرة Mac OS 10 من شركة أبل
لينكس الحر مفتوح المصدر. (يمكن تنزيله عبر الانترنت)
يونكس
أو إس/2 المطور من قبل اي بي ام
نوفيل نت وير
أقوى أنظمة التشغيل على فكرة هو Linux لينكس وأنا أتوقع له مكانه عبر السنوات القادمة وده لأنه نظام تشغيل مفتوح المصدر يعني أي مبرمج في الدنيا يقدر يطوره مش زي ويندوز هم بس مبرمجوا مايكروسوفت وده أعطاه قوة أكبر لكن لأن مش وراه شركة وإن كان فيه شركات تبنت بعض إصداراته فدعاياته ضعيفة وبرامجه الخدمية قليلة
خلاص قربت أخلص البروتوكولات
من أهم البرامج الـ Software التي تعمل على أجهزة الكمبيوتر والتي لها دور في تشغيل الشبكات البروتوكولات
شوف الكلمة دية راح تسمعها كثير جداً خلال شرحنا للشبكات لأن الشبكات كلها بروتوكولات
لكن ما هو تعريف البروتوكول
البروتوكول هو مجموعة من القواعد التي تحدد الآلية التي يتم من خلالها اتصال الأجهزة مع بعضها البعض وبدون البروتوكولات لا تستطيع الأجهزة المرسلة والمستقبلة تجهيز البيانات لجعلها قابلة للإرسال عبر الشبكة
شوف مش بتسمع في النشرة قام رئيس دولة كذا بزيارتنا وقام رئيسنا بإستقباله تبعاً للبروتوكولات الدولية يعني القواعد الدولية رئيس يستقبله ريئيس
والبلد لو كانت من غير بروتوكول قانون كان القوي نهب الضعيف
أمثلة :
بروتوكول نقل الملفات FTP : File Transfer Protocol
بروتوكول مصمم ليقوم بعمليات نقل الملفات والمهام الأساسية لإدارة الملفات على الكمبيوترات البعيدة وهو من أشهر البروتوكولات المستخدمة
يعني نقل الملفات بيتم بالقواعد المسماه FTP
بروتوكول نقل النصوص التشعبية HTTP : Hyper Text Transfer Protocol
بروتوكول يمثل القاعدة الأساسية لإتصالات الإنترنت فهو الذي يساعدك على التصفح لصفحات الإنترنت
يعني قراءة صفحات الإنترنت بيتم بالقواعد المسماه HTTP
بروتوكول نقل البريد البسيط SMTP : Simple Mail Transfer Protocol
بروتوكول يستخدم لحمل البريد الإلكتروني بين الملفمات ومن العملاء إلى الملقمات
لا تستهين والله السؤال عن SMTP جاني تقريباً مش فاكر في إمتحان Network+
بروتوكول مكتب البريد3 POP3 : Post Office Protocol 3
بروتوكول يستخدمه عملاء البريد الإلكتروني لتحميل الرسائل من ملقمات البريد الإلكتروني
نظام أسماء النطاقات DNS : Domain Name System
شوف يا سيدي إنت علشان تتصل بموقع على الإنترنت لازم تكون عارف العنوان بتاع الجهاز العنوان IP وهو الرقم الذي أعطاه له مزود الخدمة ISP لكن حتى لو عرفته صعب تحفظ 20 عنوان مثلاً لو إنت بتزور 20 موقع لكن من الأسهل أن تحفظ اسم الموقع وتكتبه في صفحة الإنترنت ويقوم البروتوكول DNS بتحويل الأسماء إلى العناوين IP المناظرة لكي تتمكن من الإتصال بالسيرفر اللي عليه الموقع
ملحوظة : لا تقلق بخصوص العناوين IP فسنشرحها بالتفصيل إن شاء الله تعالى
بروتوكول التكوين الديناميكي للمضيف DHCP : Dynamic Host Configuration Protocol
شوف يا عم الحج لو عندك خمسين جهاز لازم تعمل لهم الإعدادات يعني العناوين IP وخلافه علشان يشتغلوا على الشبكة هيكون أمر مرهق طيب إيه رأيك لو أعطيت هذه الإعدادات لجهاز سيرفر يسمى DHCP Server نفعل عليه البروتوكول DHCP ونعطيه الإعدادات وهو يوزعها على الأجهزة وبكده تتجنب الإرهاق أو الأخطاء الناتجة عن خطأك
فهو خدمة تقوم تلقائياً بتكوين إعدادات كمبيوترات الشبكة عن طريق إعطائها عناوين IP فريدة وخلافه
بروتوكول الإدارة البسيطة للشبكات SNMP : Simple Network Management Protocol
بروتوكول ولغة استعلام يستخدم لإرسال معلومات عن حالة مكونات الشبكة إلى مركز إدارة الشبكة
وبكده نكون شرحنا الفصلين الأول والرابع من الوحدة التدريبية الأولى والله أكبر ولله الحمد
أقول لكم في رعاية الله بارك الله فيكم
أخوكم
عادل الحميدي
*إذا لم يكن عون من اللّه للفتى**فأوّل ما يجني عليه اجتهاده*
السلام عليكم ورحمة الله وبركاته
استاذي القدير لقد اطلعت على فصل من المحاضرة فوجدت ان التقديم روعة بما كان جزاك الله بكل خير
استاذي القدير انا اسف على الطلب الذي ساطلبه منك ...........انا لا امثل امامك شيء ولاكن انا ارى ان يكون الشرح باللغة العربية الفصحة لكي يسهل تدوين المحاضرة .
استاذي العزيز عادل الحميدي ادا رأيت كلامي فيه تطاول على الأستاذ ارجوك لا تعره أي أهمية (ابتسامة)
كان الله في عونك مادمت في عون اخوانك
اعتقد يا صديقى انى الشغل الفعلى ابتدا ببداية البرتوكولات بس مش فاهم هل كدة اتشرحت البرتوكولات؟ واية يعنى تم شرح الفصليين الاول والرابع ؟
مش المفروض الاول ثم الثانى وهكذا
شرحك جميل يا صديقى بس انا كنت فاكر انى ال ccna بتبتدى بال topologies اللى هى bus & ring & tokin
نصيحة تانية يا استاذى واعتقد انى فى حد من الشباب الله يباركلهم علق على الموضوع دا
وفر جهدك الغالى للشرح ولا تنتبة للتعليقات غير لو كانت فى صميم الافادة (ليس حجرا على اسلوبك الممتع ولكن توفيرا لطاقتك)
شكرا لك وتحياتى يالغالى
بارك الله فيك جهد جبار
بس فعلا وفر جهدك للشرح
وطبعا انا عارف انك ترد على كل من يعلق لأن هذا من طيب أصلك وأخلاقك الكريمة
ويمكن تشمل التعليقات برد واحد
وترد على التعليقات التي تتحدث في صميم الموضوع كفكرة أو طلب
بارك الله فيك والله يوفقك
اللهم لا سهل إلا ما جعلته سهلا
وأنت تجعل الحزن إن شئت سهلا سهلا
الأستاذ عادل
جزاك الله خيرا
لوسمحت سوأل واحد فقط
هل أستطيع أن أعمل disable لبروتوكولHTTP حتى لا يتمكن المستخدم من استخدام النت وكيف يتم ذلك؟
اللهم نور قلب أستاذي عادل وجميع من في المنتدى
هل أستطيع أن أعمل disable لبروتوكولHTTP حتى لا يتمكن المستخدم من استخدام النت وكيف يتم ذلك؟
نعم اخي الغالي الحضرمي2000 تستطيع ان تحد من فعاليت اي بروتكول تريد وبما اننا هنا ندرس ال ccna فان اجابتي ستكون من هذا المنطلق
نعم اخي فعليك بال (access control list (acl
فانه الحل الامثل لهاذا الموضوع ولاكنه متقدم قليلا انا لا أقول انه صعب ولاكن تطبيقه على ال router يحتاج الى التركيز الشديد
كما ان الاستاذ عادل بالتاكيد سيتطرق لهاذا الموضوع
اخي العزيز اعرف ان اجابتي غير شافية ولاكن اردت ان ابين لمح عن الموضوع فقط لانه كما ذكرت موضوع متقدم قليلا.
ادا اصبت فمن عند الله وادا اخطأت فمن نفسي
السلام عليكم ورحمة الله وبركاته
الأستاذ الفاضل / عادل الحميدي
نرجو من الله لك دوام الصحة والعافة وبارك الله لك فى مجهودك الراشع وإلى الأمام دائما بإذن الله وشرحك موفق إن شاء
وأنا أحد تلاميذك بإذن الله
ونحية خاصة لكل أعضاء المنتدى الرائع وأخصا بالتحية الأساتذةالأستاذ / لومارك الأستاذ / ياسر رمزى الأستاذ / محمد سمير
وأخى وحبيبي الأستاذ / وليد علام
السلام عليكم ورحمة الله وبركاته
عدت لكم مجدداً أحبابي في الله
رابط ملف الأكروبات ريدر والذي يحتوي على فورمات وضبط الجهاز حتى يعمل على الشبكة بشكل مبسط هو
أو
أو
أما الملف الثاني وهو البرنامج الرائع اللي كان نفسي أرفعه ليكم الظاهر إن حجمه كبير جداً حتى حاولت أجزأه معرفتش لكن لما كتبت إسمه في جوجل وبحثت هل هو متوفر وجدته وبكثرة فحمدت الله تبارك وتعالى
اسم البرنامج وصدقوني راح يعجبكم كثير
en_ITEPC_VA_Desktop_v40
أرجو تدوروا عليه وتقولوا لي النتيجة
أخي onepiece حياك الله وحيا الله الشباب المتحمس أما كلامك " استاذي القدير انا اسف على الطلب الذي ساطلبه منك ...........انا لا امثل امامك شيء ولاكن انا ارى ان يكون الشرح باللغة العربية الفصحة لكي يسهل تدوين المحاضرة .
استاذي العزيز عادل الحميدي ادا رأيت كلامي فيه تطاول على الأستاذ ارجوك لا تعره أي أهمية (ابتسامة)" بالعكس أخويا العزيز أنت غالي وكبير جداً عندنا جميعاً وإنت واحد من فريق موقع عرب هاردوير ولكن كونه باللغة العربية الفصحة خليها مرحلة قادمة لكن خلينا ندردش مع بعض في المنهج حتى لو كان الكتاب بالعامية مبدأياً ده إنجاز بس الهدف هو إن جميع المتابعين يحصل على الشهادة وأن الموضوع يكتمل أرجو من الله ذلك وبالعكس كلامك نصيحة جميلة بارك الله فيك
صديقي waleedallam إزيك يا جميل المحيا عامل إيه وبروتوكولات إيه اللي إتشرحت يا عم الحج ده إحنا لسه بنقول بسم الله الرحمن الرحيم لسه ما أكلناش دا التسخين قبل اللشغل يا جميل وفعلاً لو رجعت للفهرس ستجد أني دخلت الفصل الأول والرابع مع بعض وشرحتهم في محاضرة واحدة متحمس مش عارفين بكرة راح يحصل إيه ولم يبق في العمر بقية كبيرة ربنا يحسن ختامنا يا ابني (إبتسامة)
وفي الحقيقة أنا بشح أساسيات لابد منها زي ما قلت طريقة خاصة بي من تحت الصفر درجة التجمد ولا نسيت
أما بخصوص الرد على الإخوة الأعضاء مش قادر فعلاً بل بالعكس أنا بكون مستمتع وأنا برد على من شرفني بزيارة موضوعي والتعليق عليه بارك الله فيك وشكر الله لك حسن خوفك علي
أخي abdullauyb أنا بالله عليك هأسألك سؤال شوفت لو إنت مكاني وواحد قالك كلام جميل زي الكلام اللي إنت كاتبه لي تحت مش كنت هتتكسف ما ترد عليه حتى بكلمة شكراً شكراً يا حبيبي
أخي الحضرمي2000 نور الله دنياك وآخرتك وقلبك وقبرك بنور الإيمان اللهم آمين وجميع الحاضرين
المهم يا سيدي بخصوص سؤالك " هل أستطيع أن أعمل disable لبروتوكولHTTP حتى لا يتمكن المستخدم من استخدام النت وكيف يتم ذلك؟ " نعم تستطيع وشوف كل الناس تدخل النت إلا من منعته وهم معاه على نفس السويتش تخيل بقى ويكون ذلك زي ما تفضل أخونا onepiece بإجابتك عن طريق قوائم الوصول Access List على الروتر وده عندنا في سيسكو وفيه طرق أخرى عند إخوانا في مايكروسوفت عن طريق السيرفر والأكتف ديركتروي والأيزا سيرفر ومعرفش إيه
أخي onepiece بارك الله فيك والله التعاون ده شيء جميل جداً وإجابتك في الجون (إبتسامة) فقولك " نعم اخي الغالي الحضرمي2000 تستطيع ان تحد من فعاليت اي بروتكول تريد وليس HTTP فقط وبما اننا هنا ندرس ال ccna فان اجابتي ستكون من هذا المنطلق
نعم اخي فعليك بال (access control list (ACL
فانه الحل الامثل لهاذا الموضوع ولاكنه متقدم قليلا انا لا أقول انه صعب ولاكن تطبيقه على ال router يحتاج الى التركيز الشديد
كما ان الاستاذ عادل بالتاكيد سيتطرق لهاذا الموضوع إن شاء الله وبالتفصيل " أنت مصيب فعلاً بارك الله فيك
أخي عصام أبو دوح مرحباً بك معنا وإلى الأمام
بارك الله في الجميع
أخوكم
عادل الحميدي
*إذا لم يكن عون من اللّه للفتى**فأوّل ما يجني عليه اجتهاده*
ضوابط المشاركة
المفضلات