كل سنه وأنتم طيبين
ويارب رمضان السنه دى يكون مختلف عن كل رمضان
سؤال شائع جدا فى الشارع المصرى والعربى :أيه أخر أخبار مسلسلات رمضان!!
وياترى هنتابع أيه من المسلسلات السنه دى؟؟
ومن باب التغير وبخصوص المسلسلات
برضه هنسأل سؤال جديد
بس قبل ما نسأل السؤال عايزين نقرا الموضوع لأخره ومتخافوش مدته اقل من ربع تتر أى مسلسل
وهستبدل سؤال
هنتابع ايه من المسلسلات السنه دى؟؟
ب
هنتابع ليه مسلسلات السنه دى؟؟؟؟؟؟؟
صحيح هنتابع ليه؟؟
انا بسألك صحيح ليه؟؟
بص انا مش هقولك حلال ولاحرام
بس بالراحه كده جاوبنى على الكام سؤال وجاوب دول اولا بعقلك
وهتتفق على كام حاجه كده وبعدين نرجع نسأل ليه؟؟
[LIST][*]لو عندك امتحان ثانويه عامه وفاضل على الامتحان شهر واحد ياترى هتتفرج فى الشهر ده على مسلسلات؟؟
[/LIST]
[LIST][*]او فرحك بعد شهر وبتجهز للفرح والشقه بتكملها وباقى على الزقاف شهر هتسيب ده وتتفرج على مسلسلات؟؟
[/LIST]
[LIST][*]او دخلت مسابقه من سيربح المليون! ومده السفر شهر وطبعا حضرتك عمال تذاكر كلمتين عشان طمعان فى المليون ممكن تسيب ده وتتفرج على مسلسلات؟؟
[/LIST]
[LIST][*]او لو اتقدملك عرض انك تفرغ نفسك لمده شهر بعد شغلك مقابل مبلغ 10 الاف جنيه او حتى 5 او 3 ساعتها ممكن تضيع العرض وتتفرج على مسلسلات؟؟
[/LIST]
[LIST][*]او لو هتناقش رساله الدكتواره او ...او ......
[/LIST]
خلاصه الكلام ساعتها هتقول اخلص المهمه الى فى ايدى واعدى الشهر والمسلسلات بتتعاد طول السنه مش كده؟؟
1يبقى اتفقنا على اول نقطه : لو فى حاجه مهمه وهدف وعايز احققه فى شهر انا مش هاهتم بالمسلسلات...ولو مدمن مسلسلات برضه هتسيبها وتشوفها فى الاعاده بعد الشهر.. تمام؟؟
طيب هو انت مش لاقى ليك هدف فى رمضان؟؟؟
يعنى العتق من النار لا يساوى 3 الاف جنيه او مسابقه او اى هدف دنيوى أخر؟؟
بص عادى ده اختلاف وجهات نظر وانت حر طبعا....بس ياريت تروح للمطبخ دلوقتى حالا
ايوه حالا
وتولع البوتوجاز وتحط ايدك على النار ربع ساعه ..مفهاش حاجه عادى
ولو الموضوع كان ممتع زود المده على النار ساعه و10 ساعات وبعدين لو عجبك الموضوع اكثر ممكن تخد شاور نار ساخن عشان الموضوع يشمل جسدك كله
وساعتها انا هقولك خلاص كبر دماغك من موضوع العتق من النار لأن انت قدها وقدود!!
انا مش قصدى اتريق ولكن والله أحنا ضعفاء جدا وغلابه وشويه برد بينيمونا فى السرير يومين وناموسه بتقل راحتنا
فبلاش عدم التركيز ده
ورمضان فرصه عظيمه: مغفره للذنوب _استجابه للدعاء(تخيل احلامك الدنيويه وكل ماتتمنى)_وفرصه لتغير حياتك والقرب من الله_وعتق من النار_ومضاعفه الحسنات _و........و............
تانى نقطه: فى قاعده فقهيه بتقول اذا عظم الداعى وامتنع الفعل عظم الاجر واذا ضعف الداعى وتم الفعل عظم الوزر
الكلام ده معناه ايه؟؟
لو واحد الظروف الى حواليه كلها بتهيء له المعصيه ومع كده معملهاش يبقى اجره كبير زى قصه سيدنا يوسف وامراه العزيز
اما لو واحد الظروف الى حواليه بتهيء له الطاعه يعنى مفيش داعى للمعصيه ومع كده عملها يبقى الوزر كبير
2يعنى فى الرمضان الشياطين مصفده وابواب النار مغلقه وابواب الجنه مفتوحه والناس فى تسابق فى الخيرات
واحد بيختم قرءان وواحد بيقيم ليل وواحد بيتصدق و.......و..
لو انت عصيت هيبقى الوزر كبيييييييييييير لان الجو كله جو طاعه
ودى النقطه التانيه
3التالته بقى: مش انت دايما بتقول أنا كويس صحيح انا بعصى ربنا بس من جوايا كويس ...مش كلنا بنقول كده!!
طب اثبت ..شيطانك الى بتتحجج به مش موجود يعنى لو عصيت تبقى انت مش كويس ولا حاجه
طب انت ترضى تبقى من اسوء عباد ربنا ...ترضى كل الناس تطيعه وانت مصر على انك تبقى مع العاصين
انت افضل من كده؟؟ اكيد ان شاء الله افضل... أنت فيك خير أوعى تضيعه..
4وفى الاخر ممكن حد يقول : ليه كل ده أنا بتابع مسلسلات كويسه يعنى مفهاش حاجه ومش هيحصل حاجه لو شويه طاعات وشويه مسلسلات؟؟؟
طب أنا مش هرد ..هسيبك انت ترد على نفسك
المسلسلات المحترمه وانا مش هتكلم عن غيرها
[LIST][*]مش فيها نساء بدون حجاب ورؤيتهم حرام بلا خلاف
[/LIST]
[LIST][*]مش فيها ممثله بتحضن ابنها الى جاى من السفر مثلا وهو اصلا رجل غريب عنها
[/LIST]
[LIST][*]مش فيها اغانى ؟
[/LIST]
[LIST][*]مش فيها قصه صحوبيه؟؟
[/LIST]
[LIST][*]مش فيها غفله والهاء عن ذكر الله؟ مش فيها ان قلبك هيبقى لاه ولن يلين لذكر الله
[/LIST]
[LIST][*]مش فيها انك بتضيع فرصه رمضان بكل ما فيها وانت مكنتش هتعمل كده مع حاجه دنيويه؟؟
[/LIST]وابسطها وجاوب أنت بنفسك
أحنا عارفين ان اى حاجه وكل حاجه أما فى ميزان حسناتنا او ميزان سيئاتنا ؟
والمسلسلات هتبقى فين؟؟؟
اكيد مش ممكن تبقى مع القرءان والصلاه والدعاء والصدقه ...
عرفت هتبقى فين؟
ليه تعمل كده وايه الفايده وارجع اختم كلامى بسؤال بدأت بيه :ليه تتفرج على مسلسلات رمضان السنه دى؟؟
(بالله عليك أنوى بصدق دلوقتى خساره تضيع وقتك فى معصيه والناس بتطيع ربنا ! اوعى تكون بعيد فى وقت الناس كلها بتحاول تقرب
أنت مش سىء قوى كده؟
أنت فيك خير ولا يحرم الرحمه فى رمضان الا محروم شقى ..فلا تكن انت
ولو انت حريص على المعاصى قوى وخايف جدا لسيئاتك تقل..اطمنك كل المسلسلات بتتعاد بعد رمضان فلن يفوتك الوزر ولكن اكرر
أياك ورمضان)
ان شاء الله نكون كلنا مش لاقين احابه لسؤال: هنتفرج على مسلسلات ليه السنه دى؟؟
واليكم اجابه سؤال : مش هنتفرج ليه على مسلسلات السنه دى؟؟
هنقول 30 سبب كل يوم سبب لعدم مشاهده المسلسلات
قال تعالى(فذكر إن الذكرى تنفع المؤمنين)
فاللهم اجعلنا منهم وانفعنا بها
ولازم نخاف قوى قوى اننا نكون من الى قال الله فيهم
(سواء عليهم ءانذرتهم أم لم تنذرهم لا يؤمنون)
أعوذ بالله ان نكون منهم
30 سبب لعدم مشاهده المسلسلات فى رمضان
اضغط على السبب قراءته
السبب الاول:أخلاص النيه لله
السبب التانى:تضيع الوقت
السبب الثالث:سوء الخاتمه
السبب الرابع:محبه الله تعالى
السبب الخامس: قسوه القلب (هام جدا)
السبب السادس:عقوبه الله
السبب السابع: الطاعه بعد الطاعه((الخوف من عدم القبول))
السبب الثامن:حتى لا يضيع أضعف الايمان
السبب التاسع:إتباع الهوى
منقول من منتدى احلى حياة فى طاعة الله
المفضلات