عودة الكنيفي الضال

[crypt76]

الساعة العاشرة صباحاً (احنا لسة في تومبوكتو، متنسوش)

سؤال خطر في بالي كتير جداً، كل ما بشوف حال الناس في أرض الكَنافة (فتحة على الكاف يا عم الحاج)
كل لما أشوف واحد ماشي في الشارع عكسي ومنور النور العالي في عيني بكل بجاحة
أو سواق ميكروباص يكاد أن يلقي بي من على الكوبري ولو قربت منه يمطرني بأحلى موشح من الألفاظ
الناس في الشارع وشوشها كالحة وحزينة وظاهر في عيونهم هم الدنيا كله
وبلاوي كتير جداً تانية مالهاش حصر

السؤال الي أنا عن نفسي مش قادر ألاقيله إجابة،
أو بالمعنى الأصح إجابته Elusive أوي ومطاطة جداً
ومتقدرش تجد لها حدود معينة يمكن من خلالها بلورتها
في صورة كلمات مفهومة ونقاط محددة توصلك في الآخر
لخظوات للحل هو:

"إيه العمل؟"

ببساطة شديدة عايزك تتكلم، تعالى هنا قولي
إيه الي غايظك بشكل عام، أو تعالى احكيلنا ايه الي حرق دمك النهاردة، تعالى قولى لو كان الأمر بيدك
كنت هتحل المشكلة دي ازاي، ولو انت كبير القعدة وشايل الكنيف
على كتافك ممكن تعمل ايه علشان تحل مشاكله...
تعالى فضفض شوية وارغي، يمكن في الآخر نقدر نلاقي إجابة للسؤال ده مع بعض.

[شلاع العتر]

الناس في الشارع وشوشها كالحة وحزينة وظاهر في عيونهم هم الدنيا كله

:comp21:

[spidermohmd1]

الأجابة = مفيش حل

[crypt76]

الأجابة = مفيش حل

ناخدها من قاصرها ونولع في نفسنا وخلاص

لا طبعاً، الحل يكمن في الCollective thoughts الي ممكن توصلها مجموعة من الناس الي بتفكر صح بعد تحليل كل منهم للمواقف المرتبطة بمجاله أو مستواه الفكري أو التعليمي أو العملي أو غيره للوصول إلى فكرة يمكن تطبيقها، ودي تعتبر لبنات بناء الحل.

مالاقيش عندك زلطين بقى يا سيدي العزيز؟ :D

[muslim girl]

اظن الحل فى قوانين يتم تطبيقها فعليا مش موجودة عشان الناس تقول عندنا قانون وعملناة عشان نكسرة

وعشان تعمل كدة هتحتاج تلغى المحسوبية والكوسة المقشرة
وتلغى كمان حكاية بابا عميد امن دولة
ولا ماما سكرتيرة الوزير
يعنى مثلا حكاية عربية ماشية فى المعاكس بنور عالى دقق كدة فى العربية دى و خصوصا لو فى شارع رئيسى اكيد هتلاقى عليها نسر كبير كدة جنب رقم السيارة دة ان وجد اساسا
او تلاقى ملصق هيئة قضائية مثلا تبقى محظوظ
اما الشوارع الجانبية فدة لانها مش فيها عساكر مرور كتير يعنى مافيش رخص هتتسحب

[crypt76]

إذن الفكرة الأولى هي القضاء على المحسوبية

هل عندك أية آليات لتحقيق ذلك؟

[SNAKE180592]

أظن أن المشاكل اللي بتحصل في مصر كلها بسبب الفساد و سوء الإدارة.

[crypt76]

أظن أن المشاكل اللي بتحصل في مصر كلها بسبب الفساد و سوء الإدارة.

جميل جداً، مين المسؤول عن الفساد ده؟ ومين هما عملاؤه ومطبقيه في نظرك؟

[SNAKE180592]

اظن الحل فى قوانين يتم تطبيقها فعليا مش موجودة عشان الناس تقول عندنا قانون وعملناة عشان نكسرة

وعشان تعمل كدة هتحتاج تلغى المحسوبية والكوسة المقشرة
وتلغى كمان حكاية بابا عميد امن دولة
ولا ماما سكرتيرة الوزير
يعنى مثلا حكاية عربية ماشية فى المعاكس بنور عالى دقق كدة فى العربية دى و خصوصا لو فى شارع رئيسى اكيد هتلاقى عليها نسر كبير كدة جنب رقم السيارة دة ان وجد اساسا
او تلاقى ملصق هيئة قضائية مثلا تبقى محظوظ
اما الشوارع الجانبية فدة لانها مش فيها عساكر مرور كتير يعنى مافيش رخص هتتسحب

المحسوبية مش هي السبب من وجهة نظري لأن من واقع إقامتي في السعودية لقيت أن المحسوبية و الواسطة اللي فيها أكثر من الموجودة في مصر مليون مرة و مع ذلك الناس عايشين مرتاحين و مبسوطين.

[Soteer]

ان يكون الحكم مثل الحكم ايام الفراعنه
يعني اللي مش هيسمع الكلام -هيتظبط

مش تاخد حته ارض وتبنيها برج سياحي و تكتب عليها مزرعه دواجن

ولا انك تعمل دورات تدريبيه وهميه في الجامعات وتاخد فلوس قد كده عشانها

ومش انك تمشي غلط عشان حاطط نمر سوده
ولا ولا ولا حاجه من دي هتتغير

المره الوحيده اللي حسيت ان احنا ناس ونستاهل اسم بلدنا هي يوم النت وسياسه ام عادل

صحيح الدافع كان حاجه غريبه و هي مش انهم هيغروا النت لا السبب كان ان النت هي المنفذ الوحيد لينا عشان نتكلم و نطلع اللي جوانا

انا بكتب المشاركه دي وانت هتقراها
بس هل هيجي اليوم اللي اقدر اخلي حد من المسئولين يقراها
اليوم ده بس هيبقي فيه امل

بدعي ان اليوم ده يرجع
بدعي ان شبابنا يفوق
بدعي ان بناتنا تعقل
بدعي ان قادتنا يشوفوا
بدعي ان الناس ترجع زي زمان

و .......

كفايه كده قلبتوا علي المواجع

و عـــــــــجـــــبـــــــــي

[spidermohmd1]

جميل جداً، مين المسؤول عن الفساد ده؟ ومين هما عملاؤه ومطبقيه في نظرك؟

كدة أنت هتقفل الموقع و تدخلنا كلنا السجن :D

أحنا مش بلد ديمقراطية ..... رئيس الكنافة الحالي بقالة أكثر من 26 سنة في الحكم عشان الناس بتحبة و الأنتخابات عادلة و كل واحد واخد حقة

الدكتور اللي بقالة 6-7 سنين في الجامعة بيدرس و طلع عينة في الثانوية العامة بيتخرج و يعد علي القهوة أو يشتغل بمرتب ضئيل جدا لا يكفي أنا يعيل أسرة

لأن كيلو اللحمة بقي ب 80 جنية

لأن المياة فاسدة و المحاصيل فاسدة و اللحوم فاسدة

لأننا نطبق قانون ضرائب علي السكن ....

لأننا نعطي جمارك بنسب مهولية ( بالذات علي السيارات )

لأن ......

لأن ......

لأن ......

ألخ .... عشان لو كملت يبقي مش هسكت

[SNAKE180592]

جميل جداً، مين المسؤول عن الفساد ده؟ ومين هما عملاؤه ومطبقيه في نظرك؟

الفساد في مصر استفشى و استفحل لدرجة أنه أصبح من شبه المستحيل استئصاله و وضع حد ليه إلا لو حصلت معجزة، فعندك مثلا الفساد الموجود في الحكومة و الوزراء و المسؤولين اللي همهم مش على مصلحة البلد و مواطنيها و استغلالهم لمناصبهم في تحقيق مصالح شخصية و صفقات مشبوهة على حساب الشعب اللي بيذوق المر من وراهم و كمان فساد موظفي الحكومة و انتشار الرشوة و انعدام الضمير وصولا لقطاع التعليم و انتشار الدروس الخصوصية و المدرسين اللي مش بيشرحوا بضمير في المدرسة عشان الطلاب يأخذوا درس خصوصي عندهم لدرجة أنهم بيعتبروا الدروس من متطلبات وظيفة المعلم -أنا مش ضد فكرة الدروس الخصوصية بس متكونش على حساب تعامل المعلم مع الطلاب في المدرسة- ، و كمان عندك رجال الأعمال اللي بيأخذوا قروض بمليارات الجنيهات بدون ضمانات -طبعا ده بيحصل بالرشوة- و يهربوا بها بره البلد و التجار اللي بيتفقوا مع بعض أنهم يغلوا الأسعار و يخلوها على كيفهم و ده راجع لسوء إدارة الدولة للسوق و إشرافها عليه و كمان الخصخصة. و دي شوية أمثلة بسيطة من مظاهر الفساد في بلدنا الحبيب.
معلش طولت عليك بس حبيت أطلع اللي في داخلي، و أنا من رأيي أن الدولة هي المسؤول الأول عن انتشار الفساد لأنها موضعتش قوانين تحد من انتشاره و طبقت القوانين دي ده غير أن معظم الحكومة فاسدة فإزاي ح تقدر تحارب الفساد؟؟ و على رأي المثل "حاميها حراميها".

[crypt76]

(مشاركتي دي أنا متأكد إن نصها تخاريف)

يا جماعة أولاً مش عايزين انهزامية أو سلبية
أنا عارف إن كتير من الأوضاع بتخلي الواحد يقول ربنا يحرق الكنيف باللي فيه ويخرجنا منه
بس مش هو ده الي احنا عايزينه هنا
عايز أفكار للحلول

يعني لو انت مثلا المسؤول عن المرور هتعمل ايه؟
أنا عن نفسي هلم كل سواقين الميكروباص وهحرقهم أحياء
وهجيب ناس مدربين يسوقوا عربياتهم
وفي كل إشارة هوقف جندي من الصاعقة معاه صلاحية إنه لو شاف إي حد بيخالف قواعد المرور (إلي هرجع الكل تاني يتعلموها غصب عنهم) إنه يطلق عليه النار فوراً وبدون نقاش، والجندي ده نفسه هيكون خاضع لرقابة علشان لو غلط هينضرب بالنار هو كمان... هلغي المخالفات تماماً، الخطأ عندي عقابه حاجة مش هتوجع لا، حاجة هتدمر علشان محدش يخطر في باله أو عقليته الكنيفية اللي للأسف أصبحت أعفن من العفن نفسه إنه يخطئ مرة تانية... يعني أقل حاجة سحب السيارة وبيعها وتمويل مشاريع تجديد الطرق ورصفها بالفلوس الي هتطلع من كده، وأقصى عقوبة هيا عقوبة سائقي الميكروباص

ملحوظة بس على فكرة المحسوبية والواسطة والفساد
انت لو ليك مصلحة وعايز تخلصها، وعارف إن عمو محمود أو أنكل تامر ممكن يرفع التليفون ويخلصهالك أو يخليك متقفش في الطابور وتخش تخلص علطول، مش هتكلم ذلك الأنكل او العمو؟ وده أبسط مثال على الواسطة... هل نطبق على أنفسنا المفاهيم التي نطالب بتطبيقها على الآخرين؟ أنا مش بدافع عن حكيمة الكنيف ولا حاجة، بس هل نظر كل منا جدياً إلى نفسه؟

[SNAKE180592]

(مشاركتي دي أنا متأكد إن نصها تخاريف)

يا جماعة أولاً مش عايزين انهزامية أو سلبية
أنا عارف إن كتير من الأوضاع بتخلي الواحد يقول ربنا يحرق الكنيف باللي فيه ويخرجنا منه
بس مش هو ده الي احنا عايزينه هنا
عايز أفكار للحلول

يعني لو انت مثلا المسؤول عن المرور هتعمل ايه؟
أنا عن نفسي هلم كل سواقين الميكروباص وهحرقهم أحياء
وهجيب ناس مدربين يسوقوا عربياتهم
وفي كل إشارة هوقف جندي من الصاعقة معاه صلاحية إنه لو شاف إي حد بيخالف قواعد المرور (إلي هرجع الكل تاني يتعلموها غصب عنهم) إنه يطلق عليه النار فوراً وبدون نقاش، والجندي ده نفسه هيكون خاضع لرقابة علشان لو غلط هينضرب بالنار هو كمان... هلغي المخالفات تماماً، الخطأ عندي عقابه حاجة مش هتوجع لا، حاجة هتدمر علشان محدش يخطر في باله أو عقليته الكنيفية اللي للأسف أصبحت أعفن من العفن نفسه إنه يخطئ مرة تانية... يعني أقل حاجة سحب السيارة وبيعها وتمويل مشاريع تجديد الطرق ورصفها بالفلوس الي هتطلع من كده، وأقصى عقوبة هيا عقوبة سائقي الميكروباص

ملحوظة بس على فكرة المحسوبية والواسطة والفساد
انت لو ليك مصلحة وعايز تخلصها، وعارف إن عمو محمود أو أنكل تامر ممكن يرفع التليفون ويخلصهالك أو يخليك متقفش في الطابور وتخش تخلص علطول، مش هتكلم ذلك الأنكل او العمو؟ وده أبسط مثال على الواسطة... هل نطبق على أنفسنا المفاهيم التي نطالب بتطبيقها على الآخرين؟ أنا مش بدافع عن حكيمة الكنيف ولا حاجة، بس هل نظر كل منا جدياً إلى نفسه؟

معاك حق الشعور باليأس و انعدام الأمل هو الغلط، و بمناسبة الحديث عن الواسطة و الطابور عاوز أقول لك أن الواسطة دي هي نتيجة الأوضاع السيئة بتاعة البلد يعني لو كان مافيش طابور من أساسه أو كان الطابور خفيف مافيهوش زحمة و لو كان كل مواطن عنده مصلحة عاوز يخلصها و موظفي الحكومة اتعاملوا معاه بما يرضي الله ساعتها مش ح يبقى فيه حاجة اسمها واسطة و محسوبية من الأساس.

[crypt76]

يبقى احنا كده دخلنا في فكرة حلوة تانية، الموظف الي مش بيخلص شغل الناس وبينام وبيعطل الى جايين يقضوا مصالحهم بيعمل كده ليه؟
هل علشان مرتبه مش كفاية وحاسس انه مظلوم وبيقولك "يا عم على أد فلوسهم؟"
ولا هو منعدم الضمير بالسليقة؟
ولا سوء اختيار لكوادر لا تستحق المواقع التي تحتلها؟
ولا ايه بالضبط؟