عاجل لخبراء اجهزة اللاب توب فى مصر .. ادخل وقول شد حيلك يابلد!

[emgi]

السلام عليكم ياشباب ..

اولا لازم ارفع القبعة على المجهود والشغل العالى المبذول فى المنتدى .. ومحتاج بقى الخبراء وخصوصا المصريين يشدوا معايا فى مشوار بخصوص اختيار لاب محترم يسد قدام الشغل بتاعى، لانى فعلا محتار بين كام حتة كده جامدة وعاوز أخد و أدى معاكم لحد مااظبط الليلة دى وارسى على حاجة صح تجيب من الآخر .. فهمنى طبعا!

بصوا بقى يا اخوانى ..

علشان نبقى ناس بتفكر صح وابقى معاكم فلة شمعة منورة! هحددلكم بالظبط أنا محتاج ايه فى الجهاز؟ وهرسيكم على الدنيا كلها وكمان هديلكم مواصفات جهازين او تلاتة عينى عليهم وكمان أسعارهم فى السوق اليومين دول علشان تقولوا الخلاصة .. وهل ينفعوا ولا فى افضل عندكم؟! وكمان اسعارهم فى التحتانى ولا المفروض اكسر فى السعر وافاصل لحد كام .. وهكذا!

نبدأ بالأهم وهو الميزانية .. وعلشان اكون صريح وجايب من الآخر! انا عامل حسابى على لاب بحد اقصى 3500 جنيه وحاطط هامش 200 جنيه زيادة فوقيهم فى حالة الطوارىء يعنى لو كان فى حتة حلوة وتستاهل اشد فيها. يعنى بالميت خالص 3700 جنيه واقضيها بقى لآخر الشهر كلمنى شكرا ..

أما بالنسبة للإستخدام فهيكون بنسبة 90% استخدام يومى بإذن الله، واحتمال كبير يكون عليه سيستم فيستا او سفن وطبعا هيكون الشغل اللى عليه برامج التصميم وتحرير الفيديو والصوتيات بالاضافة لشغل الانترنت والابلود والدونلود واف تى بى. ده كله هيحتاج جهاز يشد معايا ببروسيسور وكاشات محترمة ورامات ماتقولشى لا .. واعيين طبعا للامر ده!

وبخصوص الماركات اللى عينى عليها واعتقد ان اغلبكم هيوافقنى فى الرأى HP أو Dell مواصفات جامدة وسعر فى اللذيذ ولكن لو وقع قدامى حتة Lenovo أو Acer تجيب من الآخر! مش بعيد أفكر .. خصوصا ان كتير اوى بيشكر فى اللينوفو بالنسبة لإمكانياته وأسعاره الكويسة فى السوق.

نيجى بقى للسؤال المهم! هو انا محتاج ايه بالظبط بالنسبة لمواصفات الجهاز .. هرسيكم على دماغى!

البروسيسور Intel Core2Duo لأنه الأفضل حاليا بصراحة، وياسلام لو كان Series T7xxx/T8xxx بكاشات 3 ميجا وباس FSB على العالى، برغم انى عارف ان الميزانية مش هتشد معايا فى الفئة دى! بس اهو برضه افترض معاكم .. جايز حد فيكم يقدر يدعك الفانوس ويجيبه ويحقق المعجرة لشعب مصر. ولكن لو مفيس السيريز ده .. فخلينا نلعب فى T5xxx/T6xxx بكاشات 2 ميجا وباس FSB عالى.

الرامات بكتيره 2 او 3 جيجا بس تكون DDR2 أو 1 جيجا بس DDR3 .. وظبطوا بقى فى الباسات من 800 لفوق يعنى 1066 او 1333 يبقى كتر خيركم اوى.

الهارديسك 250 او 320 جيجا مش هتفرق، بس الأهم ان يكون معدل اللفة فى الدقيقة RPM مابين 5400/7200 لفوق، يعنى لو قدامكم هارديسك 320 بس RPM عامل 5400 وهارديسك 250 والـ RPM بتاعه عامل 7200 .. فأكيد عينى هتكون على الهارديسك 250 جيجا أبو RPM أعلى.

الفيجا VGA سواء كارت مدمج او منفصل .. مش هتفرق! بس لا يقل عن 128 ويدعم الابعاد الثلاثية 3D.

بالنسبة للشاشة فخلينا نلعب فى مقاس 15 وكسر يعنى 15.4 او 15.6 وتكون عريضة Wide Screen وبدقة WXGA 1280x800 .. وياسلام لو حد فيكم يكمل جميله ويعطرلى على شاشة Glossy بتدعم المشاهدة بجودة فائقة الدقة HD .. ماهو برضه لو بطلنا نحلم نموت!

نيجى لحوار البطارية .. بتمنى تكون ليثوم Lithium أو أفضل! بـ 9 خلايا أو اعلى .. يعنى تشتغل لـ 5 أو 6 أو 8 ساعات حسب المتوفر قدامكم فى حدود الميزانية .. وماتنسوش يكون عمرها الافتراضى لا يقل عن 3 سنوات بالميت.

أما بخصوص الملحقات الأخرى اللى موجودة فى أغلب الأجهزة زى DVD-RW وكروت الشبكة والفاكس مودم والبلوتوث والكاميرا ومنافذ USB وقارىء البطاقات المتعددة Card Reader وما الى ذلك .. فطبعا هتكون فى الحسبان .. وهى عموما متوفرة فى أغلب الاجهزة .. بس بتختلف اوقات تلاقى نوع او موديل مسقط حاجة منهم.

أعتقد أنا كفيت ووفيت ورسيتكم على دماغى زى مابيقول الكتاب! عاوزكم بقى تمخمخوا كده وتوقعولى حتة صح تشد معايا تمام التمام من غير تسقيط ولا غيار زيت ههههههههه!

قدامى دلوقتى 3 حتت على جديده معروضين عند موزع مشهور لا داعى لذكر أسمه .. والحقيقة محتار مابينهم وقولت اخد و أدى معاكم علشان نشوف الاشد فيهم من حيث المواصفات والماركة ده من جهة والسعر نشوف آخره أيه فى السوق للتلت حتت دول .. علشان اقدر اكسر معاه فى السعر وما تحدفشى على سعر فى العالى ويقلبنى فى الفلوس ههههههههههه!

ماتنسوش برضه انى يهمنى الديزاين بتاع الجهاز وشكله الخارجى ويكون برستيج مع المواصفات القوية طبعا .. علشان كده عاوزكم تنصحونى بأنه الافضل بين 3 حتت دول من حيث الشكل الخارجى والمواصفات والماركة والضمان وقوة الاستحمال وهكذا .. مع انى عموما بحافظ واهتم جدا بالالكترونيات كأنها عيل من عيالى !

HP ProBook 4510s
Intel Core2Duo (2.2GHz, 2M Cash)
HDD 320GB, RAM 2G DDR2, 15.6 Wide Crystal
DVD-RW, WebCam, Lan/Fax, Wireless, Bluetooth, Mouse HP
الجهاز معروض بـ 3850 جنيه/جديد .. بضمان سنة

Dell Vostro 1015
Intel Core2Duo (2GHz, 2M Cash)
HDD 250GB, RAM 2G DDR2, 15.6 WXGA
DVD-RW, Camera, Lan/Fax, Wireless, Bluetooth, Reader
الجهاز معروض بـ 3550 جنيه/جديد .. بضمان سنتين

Lenovo G550
Intel Core2Duo (2.2GHz, 2M Cash)
HDD 320GB, RAM 4G DDR2, 15.6 WXGA
DVD-RW, Camera, Lan/Fax, Wireless, Bluetooth, Reader
الجهاز معروض بـ 3800 جنيه/جديد .. بضمان سنة

فى حتة Acer رابعة الحقيقة محتار ادخلها مع التلت حتت اللى فوق .. لان سعرها Over شوية وكمان البروسيسور AMD مع انى بحترم الماركة دى اوى .. بس الكل بيقولى انتل افضل وقطع غيارها مرمية فى السوق .. عموما هحطها برضه واشوف رأيكم؟!

Acer Aspire 5536G
AMD Turion X2 (2.2GHz, HDD 320GB
RAM 3G DDR3, 15.6 WXGA, DVD+/-RW, Fax/Lan
Wireless, Bluetooth, Webcam 1.3m, Reader 5in1, VGA ATI
الجهاز معروض بـ 3999 جنيه/جديد .. بضمان سنة

حاسس الصراحة ان الحتة الآيسر دى محترمة بس مقلق علشان البروسيسور مش لاقيله شعبية عندنا و فيد باك محترم اقدر احكم عليه .. لان الكل شغال على انتل كور2ديو دلوقتى!

عاوزكم بقى تقولولى رأيكم أيه؟! بينى وبينكم عينى على الحتة HP كبرستيج بزنس ومواصفات كويسة وفى نفس الوقت اللينوفو بيغرينى بامكانياته وسعره المنافس مقارنة بالماركات التانية .. لكن كبرستيج وعلامة تجارية اظن انه فى الضياع لان ناس كتير لا تفقه عنه شىء والاغلبية فاكرينه جهاز صينى صنع تحت بير السلم مش فاهمين ان لينوفو فى الاساس شركة صينى اه .. بس عملت صفقة مع IBM علشان تتولى خط انتاجها لاجهزة الكمبيوتر المحمول .. واما Dell فالكل الحقيقة بيشكر فيه سواء ماركة او مواصفات او سعر وكمان ضمان ويعتبر هو ارخصهم فى المجموعة اللى عارضها دى .. بس مش عارف مش بحب الديل ليه! جايز المشكلة فيا انا بس فعلا لما بشوف لاب ديل قدامى بحس انى قرفان هههههههه الظاهر محتاج اتعالج!

عموما! عاوز مشورتكم وتنصحونى بأيه؟! .. ومحتاجكم تفطمونى على اسعار الاربع حتت اللى فوق دول فى السوق وأيه السعر التحتانى اللى مقدرش افاصل فيه مع الموزع .. يعنى اقل سعر فى السوق حاليا لكل جهاز منهم! وياريت لو تقولولى فين الوكيل بتاع الضمان لكل ماركة منهم فى مصر وافضل وكيل وضمان لو فى اكتر من واحد زى Dell كده .. وكمان تقولولى ايه المفروض اشيك عليه لما اجى اشترى اللاب زى مثلا: اتأكد ان الشاحن والبطارية اصلى ولا لاء ازاى .. وأعرف منين ان اسطوانات التعريف والويندوز اصلية .. ولو طلع فى المقدر زى اللى شغالين فيه اليومين دول وقالى ان نسخة الويندوز والتعريفات كلها بوت وبيتعملها ريكفرى من الجهاز ومفيش اسطوانات علشان سعر اللاب يرخص .. سعتها اقوله ايه؟! ولا ده امر عادى مفروغ منه والكل شغال بيه.

بالنسبة كمان للفاتورة عند الشراء! هو المفروض يفنط فيها مواصفات الجهاز بالتفصيل ونوعه والسيريال بتاعه علشان اقدر اطالبه بحقوقى لو فى اى حاجة كده ولا كده بعدين .. ولا هو بيدينى الضمان ويقولى تمام على كده .. عاوزكم برضه تفطمونى اوى على حقوقى فى الجزئية دى لانها مهمة جدا. اهو الكل هنا يستفيد برضه من المعلومات دى!

فى انتظار ارائكم ونصائحكم .. وزى ما قولتلكم لو قدام حد فيكم حاجة اشد من الاربع حتت اللى عرضتهم عليكم دول فى حدود الميزانية والمواصفات اللى انا رسيتكم عليها .. قولولى عليها بسعرها التحتانى اللى اتكلم فيه مع الموزع.

فى انتظار خبراتكم ..

[Dr Mohammad]

بسم الله الرحمن الرحيم

بص بقى ياباشا

الحقيقة انت بسم الله ما شاء الله عليك مش محتاج خبير و لا حاجة و فعلا انت اخترت المواصفات اللى تناسب ميزانيتك كويس
بس على فكرة كرت الشاشة لو مدمج آداؤه مش هيبقى حلو زى المنفصل فى الجرافيكس و الألعاب بس طبعا سعر المنفصل أغلى

أما بالنسبة للماركات عامة أنا بحب التوشيبا و الديل عن الإتش بي و ناس كتير بتوافقنى الرأى ده

أما بالنسبة للموديلات اللى حضرتك قايل عليها فانت نسيت تقول حاجة مهمة فى كل موديل و هى رقم البروسيسور Txxx

لأن ال T6xxx أفضل من ال T5xxx و أحدث منه و أفضل فى موضوع الحرارة

فانت لازم تبقى عامل حسابك فى الموضوع ده إن الجهاز اللى تجيبه يكون من T6xxx وانت طالع

تانى حاجة انت نسيت تقول كارت الشاشة بتاع كل واحد و ده طبعا مهم و يفرق فى السعر فلازم حضرتك تقولنا على رقم المعالج و كارت الشاشة

أما ال dell vostro 1015 فمعالجه على ما أعتقد T5870 و كارت الشاشة 32M up to 1706M صح الكلام ده ؟ لو كدة يبقى انا أنصح بحاجة بمعالج T6xxxx أحسن و على فكرة سعره كان عندنا فى المنصورة فى شركة بيور من 20 يوم 3500 جنيه

ال hp 4510s مواصفاته شكلها كدة أحسن من الديل فوسترو بس هو رقم المعالج كام ؟ و كارت الشاشة كام ؟ لأنى ماعرفش الموديل ده بصراحة

الlenovo كان قدامى موديل ماعرفش هو ده اللى انت تقصده و للا لأ
lenovo g550 core 2 due
intel core 2 due T6500 2.1/2M
4G RAM
HARD 320 SATA
VGA GEFORCE 512M
WEBCAM
ARABIC KEYBORD
كان من 20 يوم ب 3750 جنيه
لو ده اللى قصدك عليه يبقى جهاز مواصفاته ممتازة بالنسبة لسعره و بالذات عشان كرت الشاشة بس المشكلة إن أنا سمعت إن قطع غيار اللينوفو مش متوفرة و غالية فطبعا لازم تتأكد من النقطة دى

يبقى يا باشا أهم حاجة زى ما قلت لك تقولنا رقم المعالج و كارت الشاشة عشان نعرف الأفضل فيهم

و مبدأيا لأنى ماعرفش كارت الشاشة بتاع الإتش بي كام أقدر أقولك اللينوفو المذكور مواصفاته كويسة بس المشكلة إن الماركة مالهاش اسم فى مصر
و لو الإتش بي كارت الشاشة بتاعه عالى يبقى أفضل
و أنا عن نفسى بافضل الديل عن الإتش بي بس لو هجيب ديل مش هجيب فوسترو ممكن أجيب DELL INSPIRON 1545 CORE 2 DUE
INTEL CORE 2 DUE T6600 2.2/2M
2G RAM
HARD 250 G SATA
VGA INTEL 256
بحوالى 3500-3600 جنيه بس كارت الشاشة بتاعه مدمج مش منفصل بس الجهاز ده ميزته إنه ديل و كمان جهاز مشهور و متجرب كتير لأن سعره حلو و من ديل
أو اجيب ديل استوديو

و كمان فى خيار تانى احسن من كل اللى فات و هو التوشيبا طبعا دى ماركة محترمة و أجهزتها وحوش بس أسعارها أغلى شوية وفى منها أجهزة أسعارها معقولة زى ال
Toshiba Satellite L-series
مثلا
L300
أو
L505

الفئة دى أسعارها أقل من فئة ال A-SERIES
ممكن تلاقى حاجة بالمواصفات المطلوبة فى حدود 3600 إلى 4100 جنيه تقريبا فياريت تشوف التوشيبا و الديل برضه و تاخد فكرة عنهم فى المحلات قبل ما تشترى

و لو تسمح لى أنا لى رأي كدة و هو إن الماركة أهم عندى إلى حد ما من المواصفات بمعنى إنى اجيب مثلا جهاز من توشيبا أو ديل بمواصفات معقولة أحسن ماجيب جهاز بنفس السعر و مواصفاته اعلى بس من ماركة مالهاش اسم كبير زى الإيسر مثلا عشان الجهاز يريحنى قدام و ماتكونش مشاكله كتير و مايتعبنيش فى الصيانة

وكيل توشيبا فى مصر
https://www.toshiba-europe.com/eu/co...subgroup=Egypt


وكيل ديل فى مصر
https://www1.euro.dell.com/content/t...hs1&l=en&s=dhs


أدى كل اللى اقدر أفيدك فيه و أتمنى إن اللى قلته يفيدك
و ما تنساش صلاة الاستخارة

[smasymo]

طيب انا هرد عليك بالكتير على يوم الخميس لأنى بقالى فتره مشترتش بس هنزل ان شاء الله النهرده الاربعاء اشترى

وعلى فكره الميزانيه تقريبا قد بتاعتك وبأذن الله هرجع بفيده حلوه على المنتدى

من جه الاسعار والموديلات ولاكن هضفها ان شاء الله فى الموضوع السابق بتاريخ 12/12 وكان عن اسعار اللاب توب فى مصر

https://www.arabhardware.net/forum/s...d.php?t=148621

[emgi]

السلام عليكم يادكتور محمد

شكرا على تفاعلك .. والحقيقة بقى انت اللى طلعت بسم الله ما شاء الله دكتور دكتور يعنى مش أى حاجة! عجبانى دماغى يامنصوراوى ياجارى :cool:

بينى وبينك انا دماغى لفت عالآخر .. ناس تشور عليا بالبرو بوك HP لانها مجرباها من سنين وبتقول انه اثبت جدارته وحمار شغل .. وناس تانية بتحدفنى على الديل وبتقول انه الافضل عالاطلاق ويشد معايا تمام التمام .. ولو جيت للحق يادوك الاتنين جامدين كماركة وكمواصفات بس انهى الافضل من الاخر .. هو ده اللى بدور عليه دلوقتى فى واقع ميزانيتى والمواصفات اللى بتمنى امتلكها طبعا فى اللاب بتاعى!

حوار كرت الفيجا المنفصل طبعا مفيش شك انه افضل بكتير من المدمج .. بس على يدك اغلب الاجهزة دلوقتى اللى فى مصر كروتها مدمجة وبتلعب فى 128 ميجا علشان الاسعار تكون مغرية وتبقى فى التحتانى .. قطعا لو لقيت لاب بالميزانية المسموحة اللى حددتها وفيها كرت فيجا منفصل شديد .. اكيد مش هتردد انى اخده .. بس هو فين يادوك .. رسينى عليه!

اما توشيبا فهو عالى فى امكانياته وجودته وكمان سعرررررررررره حراق اوى علينا .. الجهاز ده ليه ناسه ياكبير .. واكيد لو كانت ميزانيتى تسمح .. مكنتش هفكر!

وبالنسبة للسيريز (الفئة) بتاع البروسيسور فأنا بدور معاكم على اعلى سيريز Txxx موجود فى حدود الميزانية برضه وكمان الكاشات تكون فى العالى علشان تقومنى تمام .. انا حطيت التلت او الاربع حتت اللى فاتوا دول على اساس قائمة الاسعار اللى اخدتها من اكبر موزع عندنا بطنطا .. والحقيقة هو مش موضح السيريز بتاع البروسيسور ولا نوع كارت الشاشه وفئته .. وطبعا لما هروح اشترى هسئله واعرف .. بس اعتقد طالما معانا الموديل بتاع اللاب ومواصفاته فهيكون فى الاغلب السيريز بتاع البروسيسور وكارت الشاشة متعارف عليه عند الكل هنا فى المنتدى .. لان المستورد واحد ولا اتنين اللى فى البلد واكيد الاجهزة اللى موجودة فى البلد متشابهة!

بخصوص DELL INSPIRON 1545 عجبتنى مواصفاته! وهل تنصح به عن الاجهزة الاخرى اللى عرضتها .. وهل هو متوفر حاليا بالمنصورة على كام بضمانه .. وعلى فكرة محتاج منك برضه عالماشى تقولى اسعار الاربع لابات اللى عرضتهم عندكم فى المنصورة (اقل سعر فى السوق)! وكمان ما قولتليش ايه رأيك فى الحتة الآيسر Acer الاخيرة اللى عرضتها فى التوبك .. شديدة ولا تعبانة .. خد و أدى معايا ياراجل! انت كنت بتكلمنى عالطاير ولا أيه؟! .. بس وفيت وكفيت وقمت بالواجب برضه يادوك .. تشكر والله!

منتظر تفاعلك ياكبير من جديد .. وسلامى لكل حبايبنا فى المنصورة .. :D

تحياتى

[Ahmeddesign]

أنا مش خبير إطلاقا زي الأخوة اللي ردوا عليك

بس بما إني كنت أنا بدور علي جهاز حاليا

ففيه معلومة سمعتها أحب أقولهالك رغم إنها مجرد سمع مش أكيدة

إنك تبعد عن الديل فورستو عشان بيقال إن وكيله مش كويس

وكيله شركة اسمها BTR

دي معلومة سمعتها من السوق

و مش متأكد منها

و الكل بينصح بديل انسبيرين من ناحية فئة أعلي و كمان شكله عامة أحلي و يقال توكيله أفضل و اسعاره نزلت لمستوي الفورستو

اعتقد المعظم بيقول علي ديل انسبيرين 1545 لو مش غلطان في الرقم لأن ده سعره 3400 و كور تو ديو 2.2 و رامات 2 و هارد 250 و معنديش بقية التفصيلات

عموما هيا الماركة اللي عاملة عروض قوية حاليا هيا ديل ،،

أنا شخصيا استخرت الله علي جهاز ديل ستوديو 1440 ب 3900 جنية

لمجرد ان شكله احلي و حجمه أصغر

و متنساش الاستخارة

و بكرر مرة تانية أنا مش خبير إطلاقا بس إحنا أخوات و بنفكر مع بعض بصوت عالي

[emgi]

تشكر يا smasymo ياجامد :D

هو ده الكلام ياكبير .. عاوزك بقى تفصص المول شبر شبر وتطقس على كل الاسعار وتكسر فيها لتحت .. علشان نرسى على اخر سعر ممكن توصل له كل حتة من دول فى السوق!

طبعا لو شديت فى حاجة اجمد من اللى الحتت اللى عرضتها وقريبة من الميزانية بتاعتى .. رسينى عليها وقتى .. علشان نتناقش بخصوصها!

فى انتظارك يازعيم ..

[Dr Mohammad]

متشكر ياباشا على كلامك الجامد ده و حقيقى انا ماعملتش حاجة و مش خبير وللا حاجة و كل اللى أنا عاوزه منك دعوة حلوة بظهر الغيب و لجميع المسلمين

أولا : موضوع الأيسر هاقولك نفس الكلام اللى قلته : الماركة أهم بكتير من المواصفات لأن الماركة المحترمة تعنى جودة و ضمان و قطع غيار موجودة فخليك أحسن فى التوشيبا و الديل و الإتش بى

ثانيا : قبل أى حاجة أنصحك تنزل تشوف التوشيبا ال L300 و ال L505 و صدقنى أسعارهم هتعجبك بس انت انزل و شوف

ثالثا : لو مالقيتش حاجة فى التوشيبا تناسب ميزانيتك (مع إنى حاسس إنك هتلاقى فيها موديلات كتير أسعارها كويسة بس انت دور) يبقى تخليك فى الديل أحسن و سمعته أفضل من الإتش بي

رابعا : جهاز اللينوفو اللى حضرتك قلت عليه مواصفاته جامدة بس أنا ماعرفش ظروفه إيه كماركة لأنه قليل اما بتلاقى حد جايبه عشان تعرف الجهاز عامل إيه مع إن فى بعض الناس بتشكر فيه بس انا كماركة ماقدرش اقولك إنها زى التوشيبا و الديل و ده طبعا من وجهة نظرى الشخصية

خامسا : نرجع تانى لموضوع الديل اللى شكله كدة أنسب خيار لأنه جودة + سعر مناسب و نقول الآتى :
موديل الفوسترو المعروض فعلا مش تمام من ناحية المعالج يبقى أحسن حاجة نستبعده
يبقى قدامك ال INSPIRON و ال STUDIO و الفئتين دول مخصصين للملتيميديا بس طبعا فئة الاستوديو أعلى و أقوى من فئة الأنسبايرون فانا لو مكانك و مالقيتش توشيبا بسعر كويس يبقى هاتوكل على الله و اجيب ديل استوديو و لو ميزانيتى ماسمحتش هاجيب إنسبايرون مع تفضيلى الاستوديو طبعا لأنها أقوى و أحسن و أشيك فى الشكل و فى نفس الوقت فرق السعر بينها و بين الانسبايرون مايجيش 200-400 جنيه يبقى طبعا الاستوديو أحسن صح و للا إيه ؟ يبقى خليك فى الاستوديو أفضل طبعا بعد ماتختار المواصفات اللى تناسبك منه و تعالى على نفسك شوية فى فرق السعر عشان تجيب جهاز تمام

و طبعا ماتنساش صلاة الاستخارة

و آسف على الإطالة

[emgi]

انا بدعيلك والله يادوك .. ربنا يباركلك ويفتح عليك فتحا مبينا

الحقيقة انا ميال اوى لجهاز البرو بوك HP .. لانه بصراحة مواصفات محترمة وكمان تصميم خارجى ببزنس وبرستيج عالى .. انت فاهم بقى العقد اللى بالى بالك ههههههه :D

بس السؤال! هل البرو بوك البروسيسور بتاعه بيسخن بسرعة لو اشتغلت عليه لفترة ولا لا .. وهل فيه عيوب حد يعرفها او سمع عنها من ناس جربوه .. علشان نستفيد برضه :ah2:

وكمان ياريت يادوك لو تقولى اقل سعر للبرو بوك HP عندك فى المنصورة بكام .. علشان ابقى متفطم على اسعاره كلها اللى فى السوق .. واقيم واحلل اقل واعلى سعر .. علشان اقدر اكسر مع الموزع لما اجى اشترى فى السعر .. ومايقلبنيش فى فرق سعر عالى :ah46:

وبالنسبة لتوشيبا فهشوف برضه الموديلات اللى حططتهالى واقيمها واشوف سعرها .. وارد عليك!

بس ما تنساش ترد عليا بخصوص استفساراتى بخصوص البرو بوك وسعره!!!

تحياتى يادوك :cool:

[emgi]

تسلم يااحمد على ردك اللى نورنى ..

وفعلا كلامك مظبوط بخصوص الديل .. ناس برضه شارت عليا ابعد عن الفيسترو علشان وكيله فى الضياع ههههههههه ربنا يعينه

وبخصوص الديل استديو 1440 فمبارك عليك .. جهاز محترم!!! بس عاوزك تتأكد من اقل سعر له فى السوق .. اسأل كده واطقس لانك ممكن تلاقى اقل من 3900 جنيه

فى انتظارك يابروف

[Dr Mohammad]

و الله ياباشا انا بانصحك تخليك احسن في الديل سمعته احسن بكتير من الاتش بي و كمان الديل معروف عنه انه جودته زي التوشيبا و كمان الديل متجرب و الكل بيشكر فيه و كماركة اعلي من الاتش بي
اما موضوع السخونية فبيتوقف علي نوع المعالج نفسه لو كان t6xxxx فما فوق فإن شاء الله هتبقي حرارته معقولة بس ده طبعا لو كان الجهاز نفسه مابيسخنش لسبب تاني لأن في لاب توبات معروف عنها اتها بتسخن قوي من غير سبب بغض النظر عن نوع المعالج زي بعض موديلات اتش بي بس الحقيقة البرو ماعرفش نظامه ايه في موضوع السخونية ده
اما بالنسبة للاسعار هاحاول اشوفها وارد عليك في اقرب وقت ان شاء ان امكن

[emgi]

فى انتظار اسعارك يادوك !!!

بالتوفيق

[عمر عبد الرحمن]

السلام عليكم ورحمة الله وبركاته .. كيف حالكم يا اخواني ؟

ما شاء الله عليكم ، خلتوني اسجل في المنتدى بمجرد قراءة الموضوع

دكتور محمد قايم بالواجب وزيادة بارك الله فيك ..

اخوكم ناوي برضه على شراء لاب توب وأول مرة اتعامل معاه الحقيقة ومعنديش خبرة عملية فيه ..

عشان كدة الموضوع افادني كتير الحمد لله ..

سبحان الله انا كنت خلاص ناوي على ديل فاسترو 1015 ، وامكانياته عاجباني جدا ، وسعره مناسب لميزانيتي (أقصى حاجة 3500)
بس لقيت المقارنات مش في مصلحته !

اتمنى تفيدوني يا جماعة بحاجة ديل أو توشيبا تكون نفس امكانياته ، ما عدا طبعا انها تكون T 6 طالما T5 بيعمل سخونة وحرارة مفيش داعي !

دي مواصفات فاسترو 1015 اللي كنت ناوي عليه ( الله يرحمه ) :

Processor: Core 2 due T5870 2.0GHz 2MBCash
Ram: 2GB
Hard : 250 GB
Screen: 15.6”Inc
VGA : Intel HD 4500
DVDRW WIFI
Wireless LAN
Bluetooth , reader
Battery: 6-Cell

[dedodode]

انا انصحك تظبط ميزانيتك شويه وتجيب توشيبا لانه بجد تحفة وافضل من الديل واكيد انت عارف كده كويس
وكمان هو فى موديلات فى التوشيبا بحوالى 3800
زى L300
A300
لانى سمعت انهم جهازين كويسين

[Dr Mohammad]

كلام سليم مية المية
مادام أقصى حاجة 3500 جنيه يبقى توكل على الله و اشترى ال dell inspiron 1545
و لو حضرتك زودت الميزانية ل 4000 يبقى خد الtoshiba satellite a300

و ماتنساش صلاة الاستخارة