بسم الله الرحمن الرحيم
طبعا الواحد مهما كانت الحاجه شيك او حلوه في نظره ساعة ما بيجيبها بيزهق بعد فتره و بيحب يغير لكن ممكن التغير ده يكلفه كتير طيب ليه منعملش حاجه بسيطه و رخيصه و في نفس الوقت تغير شكل الحاجه تماما و ممكن لو اخترت تغيراتك كويس يبقي الشكل احلي من الاول كمان
المود اللي معانا النهارده بسيط جدا و هو عباره عن تغيير لون الاجزاء المعدنيه في واجهة الكيسه هاف 922 من الاسود الي الاحمر
شوية نصائح قبل ما تبدا اي عملية دهان
1-البس جوانتي في ايدك و ماسك علي وشك
2-ادهن في مكان فيه تيار هواء لكن يكون خالي من اي اتربه لان التراب عدو الدهانات الناجحه رقم واحد
3-جهز كل حاجتك قبل ما تبتدي عشان متبوظ الدنيا حواليك خاصه انك ممكن تلقط دهان في ايدك
4-الرش دايما يكون من علي بعد حوالي 30 او 40 سم مع ضغط خفيف يدوب يطلع الرزاز بتاع اللون و الرش يكون في اتجاه واحد يفضل من اليمين للشمال و لازم يكون السطح المدهون في وضع افقي عشان ميسيلش الدهان و يبوظ
5-زي ما التراب عدوك رقم واحد فالماء هو صديق رقم واحد و لازم قبل ما تدهن اي حاجه تغسلها الاول بماء و صابون سائل عادي جدا من بتاع الصحون ده و اهم حاجه تنشفها كويس بقطعة قماش قطنيه نظيفه بعد الغسيل عشان الصدا
نبدأ بسم الله الرحم الرحيم
اولا :
نفك الحاجات المراد دهانها من الكيسه زي الصور دي كده
ثانيا :
عمليه الغسيل بالماء و الصابون السائل و اهم حاجه زي ما قلت انك تنشفها كويس عشان الصدا و في ناس تقول طيب ما انا حادهن اقولهم ان في حاجه اسمها الباروما و دي ممكن تاكل احسن دهان ما لم يكن مخصص للباروما دي و ده طبعا غالي و دي صوره للحاجات في انتظار الجفاف
ثالثا :
عملية الصنفره و دي مهمه جدا عشان الدهان اللي احنا حندهنه يثبت علي المعدن و ميفكش بسهوله و هنا قدامك خيارين
1- معدن مش مدهون قبل كده و ده حنجيبله صنفره خشنه و صنفره ناعمه حنبدا بالصنفره الخشنه و تدعك بالراحه علي كل السطح المراد دهانه و بعدين تبدا بالصنفره الناعمه بنفس الطريقه لحد متلاقي المعدن بيلمع و متخدش خفيف جدا
2- معدن مدهون قبل كده و ده اللي موجود معانا النهارده و ده حتجيبله حاجه اسمها صنفرة ماء و دي بتبلها الاول و بعدين تصنفر بيها بالراحه برضه و النتيجه زي الصوره دي
طبعا بعد عمليه الصنفره بتغسل تاني بالماء و تسيب الحاجه تجف تماما
رابعا :
الدهان و ده حيكون زي ما قلنا في اتجاه واحد من علي بعد 30 او 40 سم و لازم تكون الحاجه اللي حتترش في وضع افقي مش راسي عشان الدهان ميسيلش و يبوظ و تبدا برشه خفيفه و تسيبها حوالي ساعه او اكتر حسب الهواء حواليك تجف تماما و تعرف كده انك حتلاقي ريحة الدهان راحت تماما و بعدين تصنفر بالراحه خالص بصنفره ناعمه و تغسل تاني و تسيبها تنشف تماما
بعد كده تدي وش الدهان الاول و تسيبه من 5 الي 6 ساعات ينشف تماما زي الصوره دي
و بعدين ترش الوش التاني و تسيبه برضه 5 او 6 ساعات زي الصور دي كده
هنا بقي حركه جميله جدا المفروض ان انت في المرحله دي في حاجه اسمها فرن هواء سخن لكن ده طبعا مش موجود عندنا فحنستخدم السشوار العادي علي اعلي حراره فيه و تنفخ الهواء من بعد 30 سم تقريبا لمدة عشر دقائق تقريبا و حتبقي زي الصوره دي
لاحظ ان بعد ده كله لسه الدهان منشفش تماما و ده محتاج 24 ساعه عشان يحصل و تاخد اللون النهائي للدهان و يفضل انك تسيبه في الوضع اللي حيستمر فيه بعدين لو امكن عشان الدهان يجف علي الشكل النهائي للمعدن زي الصوره دي
بعد ال 24 ساعه بيكون الدهان جف تماما و اكتسب اللون و اللمعه النهائيه و دي صور قريبه بتبين مدي جودة الدهان
و دول صورتين للكيسه بعد تثبيت الوش , ايه رايكم بقي ؟؟
بناء علي رغبات قديمه عندي و علي نصيحة الجماهير قمت بتفكيك الكيسه الي قطع و تم طلاء اللون الداخلي بالاسود
و دي صوره لقعر الكيسه في بداية الدهان
و دي صوره للخلفية بتاعت تراي البورده بعد الدهان و بانتظار الجفاف
و دي صوره قريبه لقعر الكيسه لبيان مدي جودة الدهان
و دي صوره تراي البورده شكله بقي اجمد كتير في الاسود
و دي صوره لبداية الكيبل مانجمنت قبل بدء تركيب الجهاز و بعد الجفاف التام للدهان
و دول صورتين بعد تركيب الوجه الامامي من الجنبين لبيان مدي جمال الكيسه في اللون الاسود الجديد
و دي صوره بعد تركيب البورده جوه الكيسه
و دي صوره بعد تركيب الجهاز كله جوه الكيسه طبعا اروع من الاول كتير
نسيت اصورها لكن حارفعهالكم في اقرب وقت باذن الله
تم بحمد الله و ارجو اني اكون افدتكم بحاجه و اي استفسار انا تحت امركم
المشاركة الأصلية كتبت بواسطة hm90memo
المفضلات