مبروك عليك الموبيل
وشكرا على المراجعه
بسم الله الرحم الرحيم
قبل ما ابدا الموضوع ده عاوز الفت نظر الناس لحاجتين مهمين جدا
اولا :
هنا في مصر محلات الشناوي و سيليكت عارضه الموبايل ده للبيع ب 2350 جنيه علي انه النسخه ال 32 جيجا في موقعهم لكن لو اتصلت او رحت سالت حيقولك ده النسخه ال 16 جيجا هي اللي بالسعر ده و ده نصب علني !!
ثانيا :
نوكيا كاتبه في كل مكان علي العلبه و الموبايل نفسه انه Comes with music و لكن بعد البحث تبين ان دي النسخه ال 32 جيجا برضه مش ال 16 و بعض الناس دافعت و قالت ان نوكيا عمرها ما ذكرت ان النسخه ال 16 جيجا بتيجي بالميوزك في موقعهم و ده جميل جدا لكن عاوز منهم تفسير للصور دي بتاعت العلبه
حتي ورقه السيريال مكتوب عليها انه ياتي بالموسيقي و لما تسال يقولك ده النسخه ال 32 طيب ليه طابع كده علي علبه النسخه ال 16 ؟؟ حيله رخيصه من نوكيا للتسويق
نيجي بقي للتقرير نفسه
اولا دي صوره للحاجات اللي جت مع الموبايل
زي ما انتم شايفين دليل المستخدم و اسطوانه صغيره و سماعه و كابل داتا القصير جدا ده الكابل التاني ده كابل قديم عندي مش جاي مع الموبايل لمقارنة الطول في الصوره بس !! و طبعا في معاه البطاريه و الشاحن
اولا البطاريه و الشاحن :
و دول ممتازين جدا الشحن بياخد حوالي ساعتين و بتقعد البطاريه حوالي يومين عملت فيهم كل حاجه ممكن تتعمل بالموبايل من كلام و نت و موسيقي و فيديو و تصوير و ده يعتبر وقت ممتاز جدا
ثانيا السماعه :
و دي من نوعية السماعات اللي بتركب جوه الودان صوتها عالي جدا و واضح و الباس بتاعها ممتاز مشكلتها الوحيده ان السماعه بيضاء اللون مع موبايل كله اسود اللون !!
سلكها ممتاز و لين جدا و الجاك بتاعها مفهوش زوايا عشان تطلع من الموبايل في جيبك مستريحه
و دي علي فكره غير السماعه الرائعه الفخمه اللي بتنزل مع النسخه ال 32 جيجا في اوروبا
ثالثا الكابل :
لا تعليق زي ما شفتم بنفسكم قصير جدا جدا و مش لاقي سبب واضح من نوكيا لده لكن احب اقول ان الكابل خاماته محترمه و قويه جدا و سرعته احسن كتير في نقل البيانات من النوكيا 95 و معرفش ده لان الكابل احسن و لا لان الميموري في الاكس 6 اسرع
الموبايل نفسه
دي صوره للوش بتاعه
و دي صوره للظهر
و دي صوره للثلاث الوان المتوفره من النسخه دي
انا جبت السوداء و هي غالبا فقط المتوفره في مصر
اولا المخارج و الفتحات المتوفره بالموبايل :
- فتحه خارجيه لوضع السيم كارد الخاص بالشبكه و مش عارف هم ليه عملوها من بره !!
- فتحه للشاحن بالاعلي و مكانها بالاعلي سي و يفضل وضعها بالاسفل عشان لو حبيت تتكلم في الموبايل و انت موصل الشاحن السلك ميعملكش مشكله
- فتحه بغطاء لمخرج USB في الاعلي برضه و كان يفضل تبقي في الاسفل لسهولة التعامل
- فتحه لجاك 3.5 ملم في الاعلي و تستخدم لتوصيل السماعه او كابل التليفزيون و مكانها هنا ممتاز عشان لو حابب تسمع حاجه في السماعه و الموبايل في جيبك
- فتحه الميكروفون الخاصه بالهاتف في الاسفل و هي الفتحه الوحيده الموجوده بالاسفل
- فتحتين للسماعات الخارجيه في الناحيه اليسري من الهاتف او السفلي لو انت ماسكه بالعرض و عن نفسي افضل انهم كانوا يبقوا في الناحيه العليا مع المفاتيح اعتقد الصوت كان حيبقي احسن
ثانيا المفاتيح المتوفره بالهاتف :
- في الاعلي لا يوجد الا مفتاح تشغيل و غلق الموبايل
- في الجانب الايمن تجد مفتاح الكاميرا و مفتاح التحكم بعلو الصوت و مفتاح فتح و غلق الشاشه التتش و ده ضعيف جدا و بينكسر بسهوله في معظم موديلات نوكيا التتش لكن الخبر الكويس ان في برامج ممكن تخليك تنقل الوظيفه دي لاي مفتاح تاني و تسيب المفتاح ده في حاله و انا عن نفسي استخدمت برنامج mykeylock سهل و بسيط و خفيف جدا
- في تلات مفاتيح فعليه مش تاتش تحت الشاشه واحد لقبول المكالمات و واحد لرفضها و واحد لفتح قائمة الهاتف
- في مفتاح تتش اعلي الشاشه بيفتحلك قائمه توصلك للاغاني و الصور و الفيديو و النت و المشاركه
ثالثا جسم الهاتف الخارجي و تصميمه :
- عملية الشكل دي طبعا عمليه نسبيه جدا يعني انا مثلا شكل الموبايل عاجبني جدا في حين ان معظم قرايبي و صحابي اللي شافوه واحد بس منهم هو اللي عجبه شكل الموبايل
- الشاشه مصنوعه من زجاج مقاوم للخدش و دي حته كويسه من نوكيا لكنها بتلم البصمات كانها مغناطيس بصمات لكن تنضيفها سهل جدا و لا يترك اي اثر
- جسم الموبايل الخارجي مكون من البلاستيك و ده متوقع طبعا لكن بلاستيك تحس انه مش قوي و كان ممكن يكون احسن من كده كتير
رابعا السماعات الخارجيه للهاتف :
- المقارنه هنا مع سماعات النوكيا 95
- السماعات اعلي و اوضح كتير في تفاصيل الصوت و كانت بنفس جودة سماعات ال 95 قبل السوفتوير الاخير لل 95 اللي خلي الصوت فيه حلو جدا حاليا الصوت في الاكس 6 مش بحلاوة الصوت في ال 95 لكن ده ممكن يتحسن بالسوفت وير من نوكيا زي ما حصل مع ال 95
خامسا السوفتوير الخاص بالموبايل :
- طبعا كلنا عارفين انه السيمبيان و هو نظام جميل جدا و سهل جدا و مش عارف ليه الناس مش بتحبه مقارنة بالندرويد او الاي فون ( علي فكره انا عمري ما جربت غير السيمبيان و الماميو )
- التنقل في القوائم سهل و بسيط جدا و كل حاجه وظيفتها واضحه و في مكانها الصح
- السوفت وير بيجي معاه برنامج Ovi Store و ده كويس جدا و مليان برامج مجانيه ممتازه و في برامج بفلوس برضو
- المشغل الموسيقي ممتاز معنديش تعليق عليه كذلك خمه الخرائط و تشغيل الفيديو اللي عاوز يتحسن شويه في حاجات بسيطه حاصة السكرول في الصفحات الكبيره هو متصفح الانترنت لكن انا عموما بستخدم اوبرا موبايل 10 و التصفح و السكرول في اكتر من ممتاز
- نظام الخرائط و الملاحه المجاني اكتر من ممتاز و سرعه التقاط الاشاره ممتازه خارج المنزل و داخله ايضا و هنا حته جديده و جامده جدا من نوكيا زمان كان نظام تحديد المواقع بيشتغل اما بالقمر الصناعي و ده مجاني او من شريحة موبايلك و ده ممكن يكلفك فلوس الجديد هنا تحديد مكانك عن طريق الواي فاي !! ايون لو انت في مكان في سقف مغلق و عندك اتصال واي فاي بيحدد مكانك في ثواني عن طريق اتصالك بالانترنت !!
سادسا الكاميرا :
- زي ما انتم شفتم فوق في صور الكرتونه دي صور متخده بالكاميرا بتاعت الموبايل و هي صور ممتازه و واضحه و الوانها كويسه زي بتاعت ال 95 لكن برضه لا تتفوق علي معجزة نوكيا في التصوير ال 82 !!
- تصوير الفيديو جميل جدا و واضح جدا في النور و كويس جدا في الظلام مع تفعيل ميزه video light ( اشكر الاخ hanybasha نبهني ليها مكنتش اعرف انها موجوده )
- الصور العاديه في الظلام التام ممتازه و واضحه جدا و الفيديو كمان كويس جدا و ده راجع للفلاش الدبل القوي المصاحب للكاميرا
- فلاش الكاميرا ممتاز و قوي جدا لدرجه اني بطفيه خالص في معطم الصور اللي الاضاءه فيها مناسبه للتصوير
سابعا و اخيرا الشاشه التتش :
- زي ما قلت قبل كده الشاشه مصنوعه من زجاج مقاوم للخدش
- الشاشه دي اول شاشه تتش capacitive مش resistive من نوكيا و ده بيحسن وظيفة اللمس كتير
- نيجي بقي للتاتش بتاع الشاشه نفسها ناس كتير تقولك لو عاوز تجيب تاتش متجيبش نوكيا و انا بقولك متجيبش نوكيا الا لو كان X6 !!
- تجربتي مع التاتش هنا مقارنة بالتاتش بتاع N97 و N900 دول و لا حاجه جنب ال X6 التاتش ممتاز و سلس جدا و مستجيب جدا و الموبايل نفسه عموما سريع جدا في التعامل
- انا مجربتش التاتش بتاع موبايلات تاني غير اللي ذكرتها عشان محدش يقولي ده في موبايل كذا التاتش بتاعه احس كتير طبعا اكيد في حاجات احسن كتير زي الاي فون لكن تمنه كام ؟؟
- صوره الشاشه في الفيديو ممتازه جدا و نقيه جدا و بعض الناس قالت ان الشاشه وحشه في الشمس و ده صحيح لكن ممكن تتغلب علي كده انك دايما تحط خلفيه غامقه او سوداء و ده اللي جاي في الموبايل فعلا
مميزات الموبايل ( من وجهة نظري )
1- شاشه تاتش ممتازه و سريعه و عاليه الاستجابه7- امكانية تحديد موقعك عن طريق اتصال واي فاي و دي ميزه مهمه جدا و اول مره اشوفها في موبايل
2- صوت قوي و واضح في السماعات الخارجيه
3- كاميرا ممتازه للصور و الفيديو في النور و الظلام ( بشكر الاخ هاني مره تانيه )
4- نظام سهل و سريع
5- ذاكره كبيره 16 جيجا
6- سرعة في الاستجابه و التعامل عموما في كل وظائف الموبايل
عيوب الموبايل ( من وجهة نظري )
1- البنيه الخارجيه ممكن تكون اقوي من كده كتير
2- الصوت في السماعات الخارجيه ممكن يبقي احلي من كده و ده سهل بالسوفتوير من نوكيا
3- المرفقات لازم تبقي احسن من كده و اقصد لون سماعة الاذن و طول كابل الكومبيوتر
4- لازم نوكيا تغير تصميم العلبه الخارجيه و تشيل اي مميزات غير موجوده بالهاتف
التقييم العام 9 من 10 للعيوب السابقه
و لكن معظمه ممكن تلافيه من نوكيا للحصول علي موبايل غايه في الروعه و انا عن نفسي سعيد بالانتقال من ال N95 الي X6
نصيحه مهمه جدا
اي حد بيفكر يشتري الموبايل ده باذن الله او ما يشتريه و قبل ما يعمل اي حاجه فيه يحدثه لاخر سوفتوير لانه ممتاز فعلا
تم التقرير بحمد الله و اي سوال انا معاكم باذن الله
مبروك عليك الموبيل
وشكرا على المراجعه
ألف مبروك الموبايل الجديد يا حمزاوى باشا
مراجعة ممتازة و موبايل ممتاز لكنى للأسف مستحيل أفكر أشتريه لأنى مش بحب السيمبيان
تقبل مرورى و تقييمى
[CENTER][FONT=Palatino Linotype][COLOR=RoyalBlue][SIZE=2][COLOR=Teal][COLOR=Blue][U][B][COLOR=Navy]My PC[/COLOR][/B]
[/U][/COLOR][COLOR=Teal]Intel Core2Duo E6700 @ 2.66GHz | Gigabyte EP43-US3L | Kingston KVR 667MHz 2x1GB + APOGEE 800MHz 2x2GB | XFX GeForce 9800GTX+ | WD Caviar 1TB 32MB Buffer BLACK (WD1001FALS) - WD Caviar 320GB 8MB Buffer | Creative SoundBlaster X-Fi Titanium SB0880 | Gigabyte 3D Aurora | HEC Zephyr 650Watt | BenQ FP94VW[/COLOR][/COLOR][/SIZE][/COLOR][/FONT][FONT=Arial][SIZE=3][COLOR=DarkRed][B][URL="https://www.arabhardware.net/forum/showthread.php?t=179710"][/URL][/B][/COLOR][/SIZE][/FONT]
[/CENTER]
1000 مبروك يا دوك يارب يباركلك فيه و تقرير فوق الروعه كالعاده
[CENTER][FONT=lucida sans unicode][SIZE=4][B][COLOR=#B22222]>>> كرسى الأعتراف <<<[/COLOR][/B][/SIZE][/FONT]
[/CENTER]
[CENTER][FONT=franklin gothic medium][B][SIZE=3][URL="https://arabhardware.net/forum/showthread.php?t=254978"][COLOR=#008000]الموضوع الموحد للإستفسارات البسيطة للأعضاء حول البطاقات الرسومية.[/COLOR][/URL][/SIZE][/B][/FONT]
[/CENTER] [CENTER][COLOR=#ff0000][SIZE=3][B][FONT=century gothic] -----------------------------------[/FONT][/B][/SIZE][/COLOR][B][FONT=book antiqua][SIZE=3][URL="https://arabhardware.net/forum/showthread.php?t=256185"]
[/URL][/SIZE][/FONT][/B][I][B][FONT=book antiqua][SIZE=3][URL="https://arabhardware.net/forum/showthread.php?t=256185"][COLOR=#0000ff]Acer 27 3D vision ready + Nvidia 3D [/COLOR][COLOR=#008000]wireless[/COLOR][COLOR=#0000FF] & [/COLOR][COLOR=#008000]wired[/COLOR][COLOR=#0000FF] glasses + GTX 570 TWIN FROZR II[/COLOR][/URL][/SIZE][/FONT][/B][/I]
[COLOR=#ff0000][SIZE=3][B][FONT=century gothic]
[/FONT][/B][/SIZE][/COLOR][/CENTER][CENTER][FONT=verdana][B][URL="https://arabhardware.net/forum/showthread.php?t=253989"][COLOR=#0000ff][SIZE=2]Thermal-take Challenger Ultimate gaming keyboard >> REVIEW[/SIZE][/COLOR][/URL][/B][/FONT]
[/CENTER]
[CENTER][COLOR=#4b0082][SIZE=3][B][URL="https://arabhardware.net/forum/showthread.php?t=251564"]ASUS XONAR DX unboxing and small review[/URL][/B][/SIZE][/COLOR][COLOR=#ff0000][SIZE=3][B][FONT=century gothic]
[/FONT][/B][/SIZE][/COLOR][/CENTER][CENTER][SIZE=3][COLOR=#2f4f4f][FONT=times new roman]-----------------------[/FONT][/COLOR][/SIZE][FONT=Palatino Linotype][SIZE=3][B][COLOR=Blue][I]
ربي اسقي أمي الفرح دون اكتفاء - فإني احبها فلا تريني فيها بأسا يبكيني[/I][/COLOR][/B][/SIZE][/FONT]
--------
[/CENTER] [CENTER][FONT=Times New Roman][B][COLOR=Black][I][URL="https://www.arabhardware.net/forum/showthread.php?t=176384"][SIZE=3][COLOR=DarkGreen]طرائف و فكاهات مضحكه:D[/COLOR][/SIZE][/URL][/I][/COLOR][/B][/FONT]
[/CENTER]
اول حاجة مبروك حمزاوى على الهاتف
تانى حاجة تسلم ايدك على التقرير , يارب الحاج سمعة يرضى المره دى
Now Playing : ...
مبروك يا كلبظ بيهمفكرتش فى الايفون ؟
بسم الله ما شاء الله، تقرير رائع ومنظم و جهاز أروع يا دكتور..
تم التقييم.
@ ويلا 1000
الله يبارك فيك و عقبالك و شكرا للمرور
@ رامز
شكرا للمرور و التقييم و نردهولك في الافراح باذن الله و عقبالك لما تجيب موبايل من غير سيمبيان !!
@ المرياتشي
الله يبارك فيك و شكرا لمرورك
@ حماده
الله يبارك فيك يا كبير و و جودك وحده كفايه عليا
@ اكس ماستر
الله يبارك فيك و لا مفكرتش لاني مبحبش اتعرض للنصب خصوصا من فودافون و موبينيل !!
@ مستر بوبو
الله يبارك فيك و شكرا للمرور و التقييم
الف مبروك وشكرا علي التقرير انا كنت راح اشتريه بس غيرت رأي واخدت N97 MINI وكانو بنفس السعر
تم التقيم
[CENTER]
[/CENTER]
[CENTER][IMG]https://www.palsharing.com/i/00017/3yusjzyvnkmh.jpg[/IMG][/CENTER]
[CENTER]
[/CENTER]
لا يوجد سمعات بس تم تقيم الموضوع
[CENTER]
[/CENTER]
[CENTER][IMG]https://www.palsharing.com/i/00017/3yusjzyvnkmh.jpg[/IMG][/CENTER]
[CENTER]
[/CENTER]
مبروك الموبايل وشكرا المراجعة
في المجمل تنصح بيه ولا N97
موضوع ممتاز
بس انا شايف انه اخو ال5800 فرق بس الشاشه والمساحه الداخليه غير كده مفيش حاجه زياده قوي يعني
ازاي بنفس السعر ال X6 ارخص حوالي 400 جنيه ؟؟المشاركة الأصلية كتبت بواسطة OMARHA
عموما الله يبارك فيك و مبروك عليك الجهاز الجديد لا يعيبه في رائي الا اللون البني اللي بيفكرني بلون ... القهوه :D
و شكرا للمرور و التقييم اخي و وجودك وحده من غير سمعات كفايه
الله يبارك فيك
سوالك ده انت تجاوب عنه عاوز مساحه اكبر و لا شاشه تاتش احسن بمراحل لو الاولي يبقي ال 97 لو التانيه يبقي الاكس 6 مع مراعاة ان الكاميرا و الجي بي اس فيهم عيوب قاتله في ال 97 و ده اللي خلاني مجيبهوش لكن لو اخترت 97 يبقي هات الميني مفهوش العيوب دي
بالنسبالي فرق الشاشه بس يستاهل فرق السعر بينهم
يا شباب لازم تجربوا التاتش بتاع الموبايل ده فعلا عشان تحسوا بالفرق عن باقي التاتش بتاع نوكيا
و شكرا لمرورك الغالي
ضوابط المشاركة
المفضلات