السلام عليكم يا باشمهندس معتز ,
و آسف على التأخر في الرد لأني كنت في الشغل ,
أنا بصراحة ما أعرفش كتير عن الأقسام التانية ,
غنما أنا هكلمك عن قسمي العريق
ميكايكا باور ,
هم قالوا لي قسم صعب و الناس بتنجح بالعافية و كده ,
لكن انا كنت هاوي الموضوع و دخلته , و الحمد لله طلعت من الأوائل و جبت ج ج + مخدة الشرف
لكن كان فيه ناس كتير بتشيل و بتقع ,
كمان تقديرات القسم بحاله كانت أقل من تقديرات الاقسام التانية ,
يعني كان عندنا الاول بيجيب امتياز بالعافية , و ج ج ما كانش بيجيبها إلا 9 أو 10
إنما في كهرباء كان الـ ج ج بيتعبى بالشوال ,
ده بالنسبة للتقديرات و الدرجات ,
بالنسبة لطبيعة الدراسة ,
فأساس مواد القسم هي :
- الديناميكا الحرارية , يعني الطاقة الداخلة و الخارجة من جسم أو نظام , و الطاقة الداخلية و كده
- ديناميكا الموائع : بتدرس حركة الموائع و خواصها و سواء كانت قابلة للانضغاط أو لا ,
- الآلات المروحية : زي المضخات و التوربينات و الضواغط
- انتقال الحرارة
- تبريد و تكييف
- محطات توليد الكهرباء : لأن فيها توربينات و مضخات و خلافه
- محركات و مش سيارات , يعني بتاخد المحرك بس
دي المواد الأساسية في القسم ,
ممكن تكون شايف إنها كل واحدة في وادي و مالهمش دعوة ببعض ,
لكن لما توصل 3 و رابعة ,
و تاخد المواد التطبيقية زي المحركات و محطات التوليد و الآلات التوربينية هتلاقي إن كل الحاجات دي مرتبطة ببعضها .
نيجي بقى لموضوع الشغل
القاعدة الأولى : مافيش حد بيشتغل جنب بيتهم
القاعدة التانية : مافيش مهندس ميكانيكا مالوش شغل
يعني مجال الميكانيكا هتلاقيه داخل في كل حتة ,
في المصانع في المنشآت في الشركات في أي حتة ,
المشكلة إن الحتت دي بتبقى بعيدة شوية ,
يعني بتلاقيها في المدن الجديدة و و ساعات في الصحراء
على عكس التخصصات التانية
إيه تاني ؟؟
مش فاكر بصراحة ,
لو عندك اي استفسار أنا موجود إن شاء الله
ربنا يوفقك و إيانا
المفضلات