دي شوية طرائف حقيقية حصلت في اسواق الكمبيوتر .. وبجد دي حقيقية مش نكت .. اتمنى انها تعجبكو زي ما عجبتني وانا بسمعها من الناس اللي في المولات :
الموقف الأول
واحد دخل يتفرج في محل على كيسات كمبيوتر ، وفضل فترة في المحل .. وبعد حوالي عشر دقايق سال الراجل الموجود: الكابينة دي بكام؟:D
الموقف التاني
واحد دخل المول هو وصاحبه ايام ما كان MP4 لسه جديد ، بعد ما دخل المحل سال : انت عندك MP5 ؟؟ الراجل استعجب جدا من السؤال ومعرفش يرد .. فصاحبه غالبا كان دماغه عالية شوية ، فرد على الراجل وقاله : مالك مستغرب اوي كده ، انا عندي في البيت MP 6 !!:D
الموقف التالت
واحد كان لسه مجمع الجهاز من كم يوم عند شركة ... دخل على الراجل هو وابنه وشكله خايف جدا وبيقوله: انا من ساعة ماخدت الجهاز والويندوز مش شغال .. مهندس الصيانة خده وبص عليه .. رجع قاله : الويندوز وقع ، الراجل مسك الواد وضربه قلم وقاله :وقعت الويندوز فين يا حمار ، وقال لمهندس الصيانة :والله انا جاي طول السكة شايل الكيسة كويس ومفيش حاجة وقعت مني:D
الموقف الرابع
واحد دخل على شركة صيانة وقال للمهندس: درج الشاي مكسور .. المهندس قعد ساعة يعرف فين الدرج دا بتاع الشاي اللي في الكمبيوتر ، الراجل قاله: انتو شكلكو شركة مش فاهمة ، وقام فاتحله درج السي دي روم وبيقول لمهندس الصيانة:ها عرفت فين الدرج؟؟،امال بتوع صيانة ازاي؟ بحط الكباية هنا وقفلت فتكسر :D
الموقف الخامس
شركة جمعت جهاز لعميل ، وبعد ما خلصو العميل سأل: في العاب وافلام ولا لا؟ رد المهندس: لا للاسف معنديش ، بس ممكن حضرتك لما توصل النت تقدر تنزل منه افلام والعاب ، والعميل مشي .. بعد 4 ايام رجعلو وقال: جهازكو مش شغال ، سالو المهندس ليه يا فندم ، اهو شغال كويس جدا، قاله من ساعة ماشتريته ووصلت النت دخلت في رابع يوم سايب الكيسة شغالة ومفيش ولا لعبة نزلت!!:D
الموقف السادس
واحد دخل على عرض اجهزة شركة MSI وقعد يتفرج على الاجهزة المعروضة ، وبعدين دخل على الناس الموجودة وسالهم : وعلى كده الكيسة الشفافة دي بكام؟ بس ياريت احسن سعر عشان ملفش كتير..:D
الموقف السابع
واحد اشترى راوتر وايرلس من شركة ، بعد ماقتنع ان الراوتر الوايرلس احسن لانه من غير سلك .. رجعه تاني يوم ولما المهندس ساله : قاله النت مش شغال ، المهندس قعد يساله عن الشركة اللي هو معاها وكده ومش عارف يوصل لسبب .. بعدين ساله ممكن سيادتك تقولي انت وصلته ازاي؟ .. قاله : عادي جدا طلعته من العلبة وحطيته فوق الكيسة ، قاله : من غير اي وصلات خااالص؟ قاله الراجل: اه ولا انت بتكدب، مش انت قايل انه بيبقى من غير اسلاك!!:D
اتمنى تكون المواقف دي عجبتكو زي ما عجبتني .. ولو في حد عنده مواقف زيها حصلت فعلا يا ريت يقولها عشان الضحك يحلو وبدل الضحكة .. ضحكتين ..:D:D
ضوابط المشاركة
المفضلات