السلام عليكم ورحمة الله وبركاته
وكل عام والجميع بخير ان شاء الله بمناسبة عيد الفطر السعيد اعاده الله على الجميع باليمن والخير والبركات ...
تحية طيبة وبعد ...
احنا ف الايام المباركة دي شفنا التورنت ليتش فتح التسجيل ..
طبعا تورنت ليتش هو حلم كل شخص ف عالم التورنت ... وكأنه اقوى موقع تورنت ف العالم ... بل وكأنه موقع التورنت الوحيد ف العالم ... واي مبتدئ جديد ماتلاقيش على لسانه غير ليتش ليتش ليتش ليتش كانه المكان المقدس ف عالم التورنت .... طبعا اغلب الناس هتعتقد ان دا بسبب قوته الا محدودة وامكانية انك تحمل الملفات قبل ما تتصور وقبل ما تنزل ع اي موقع تاني ف الشبكة ب6 شهور والادهى والادهى من كدا بقى سرعته المهولة .. حيث ان لو سرعة خطك 512 ومشترك مع عشر انفار او واحد ميجا ولوحدك هيمكنك من انك تحمل بسرعة 1 ميجابايت للثانية ....

انا واثق من كلامي دا في ناس ما كانتش تعرفه .. وحبته ... او كان عندها ودلوقتي علي ف نظرها ... ليه ؟
لاني ضحكت عليهم وونقلتهم وجهة نظري ... والاهم من دا ... انهم ما يعرفوش ايه هو التورنت ليتش ... او جايز اساسا ما يعرفوش ايه اسم التراكر ... ولا نوع موقع التورنت دا ايه وفاكرينه حاجة ماحصلتش ... مع انه امثاله كتير جدا ...
انا هفصل الموضوع ف حوار بين شخصين .... شخص بقاله ف التورنت 4 سنين او يزيد ... ومعاه جميع انواع المواقع .. وبيتناقش مع شخص لسه اول اسبوع ليه فالتورنت .. وبعد كدا هحط فقرتين تانين عن موضوع غير الليتش ..

المبتدئ : السلام عليكم ، كل سنة وانت طيب ، لو سمحت كنت طالب منك دعوة تورنت ليتش علشان محتاجه جدا جدا جدا والله والموضوع بالنسبالي مسألة حياة او موت ...

المحترف :: حاضر من عنيا .. بس حضرتك محتاجه ف ايه . ؟

المبتدئ : ما انا قلت لحضرتك محتاجه جدا والله والمسئلة مسئلة موت

المحترف : حاضر من عنيا والله بس اقنعني انك محتاجه وهتعرف تستخدمه . !

المبتدئ : معلش والله حضرتك انا لسه داخل جديد ف عالم التورنت وكنت عايز ابتدي بداية قوية علشان واحد صاحبي قالي انه اقوى موقع والي عايز يبتدي لازم يبتدي قوي بعدين ينزل تحت ...

المحترف :: وماله يا حبيبي ابتدي قوي ... بس اتعلم الاول وبعدين ابتدي ... واحنا كلنا كنا ف يوم زيك كدا

المبتدئ : والله ربنا يكرمك يا باشا وانا كنت عايز حضرتك تعلمني ...

( طبعا صاحبنا صابر عليه لحد دلوقتي وما اظنش ان في حد هيصبر لحد دلوقتي اساسا بس مش مشكلة )

المحترف :: ممم .... خلاص ماشي انا هعلمك كل حاجة بس اديني ايملك .. وسبني يومين وانا هبعتلك الدعوة

المبتدئ : اتفضل حضرتك ادي الميل وحضرتك ليه عايز يومين يعنى انت هتطبخ الدعوة ولا ايه . ؟

المحترف : هههه لا مش هطبخها .. بس عبال ما اجبهالك من حد ...

المبتدئ : هو مش حضرتك الي هتبعتلي الدعوة

المحترف : اه انا بس انا ما عنديش اكونت ع الليتش

المبتد ئ : نعم !!!!!!! ازاي :!!!!!!!!!!!!! دا انا سمعتهم بيقولوا انك عندك كل الاكونتات حتى الليفلات العالية خالص ازاي ما يبقاش معاك الليتش :!؟!؟!؟!

(المفروض بعد المشهد دا المبتدئ هيمشي ويسيب المنتدى لان صاحبنا ماعهوش ليش )
المحترف : عادي انا مش محتاجه اخده ليه ؟

المبتدئ : مش محتاجه ازاي حضرتك دا انا محتاجه جدا وانا ماليش ف التورنت

المحترف : اه ما انت محتاجه انا مش محتاجه ايه هو انا كفرت ولا ايه ؟

المبتدئ ( كان ناوي يتعلم بجد ) : طب حضرتك ممكن تقولي انت مش عايزه ليه ...

المحترف .. : ممكن تقولي انت عايزه ليه ؟

المبتدئ : علشان سرعته كبيرة والملفات بتنزل عليه بسرعة قبل كل المواقع التانية والسرعة دايما عليه عالية ...

المحترف : اه تمام جدا .. افهم من كدا ان حضرتك عندك خط 8 ميجا مش كدا ؟

المبتدئ : لا والله دا انا حتى واحد ميجا ولسه جايبه جديد

المحترف : يبقى اكيد الياف ضوئية او بره مصر خالص مش كدا برضه ولا ايه

المبتدئ : لا والله دا انا من ... من قلب مصر يعني ..

المحترف .. : مممممم ... يعني انت اخر سرعة هتحمل بيها يوم ما تكون الخدمة كويس 120 كيوبايت ف الثانية ... ولو قولنا ملف فلم HD ومساحته مثلا 4 جيجا يبقى حضرتك هتحمله ف 16 ساعة على احسن تقدير ...

المبتدئ : يعني ايه HD دي حضرتك ؟ انا ما عرفش الكلام دا انا دايما بحمل من موقع كذا .

المحترف :... يبقى اكيد عندك اكس بوكس او كومبيوتر كويس ومحتاج تلعب عليه العاب حلوة ومش بتقدر تصبر ال5 دقايق بين كل موقع والتاني مش كدا برضه ولا ايه ... انا اعرف ناس زيك كدا برضه ..

المبتدئ : حضرتك يعني ايه اكس بوكس ويعني ايه العاب جديدة ومش بقدر استنى .؟ انا اخر لعبة لعبتها ع الكومبيوتر كانت حرامي العربيات ....

المحترف : امال عايزه ليه ؟

المبتدئ : ما انا قلت لحضرتك علشان ابتدي بداية قوية ..

المحترف كان مزاجه عالي بقى ونوى يعلمه درس محترم : خلاص ماشي اوك انا هبعتلك الدعوة .
وفعلا بعتله الدعوة

بعد 4 ساعات :

المبتدئ :معلش حضرتك انا هدوشك معايا

المحترف : لا عادي اتفضل ولا يهمك

المبتدئ : هو انا احمل منه ازاي واستخدمه ازاي حضرتك ؟

المحترف : تنزل الملف وتحطه ف الكلاينت وتشغل الفيك ابلود ف الاكستريم مود علشان تعرف تحافظ ع الاكونت

المبتدئ : يعني ايه كلاينت دي و ايه الاكستريم مود دا ؟! دا فلم حلو ؟

المحترف : اه .. انت هتنزل ملف التورنت ... وتحطه ف البرنامج بتاع التورنت ... وتسيبه يحمل ...

طبعا صاحبنا هنا قرى موضوع ان البت سبريت دا افضل برنامج ف التورنت ..
حمله ...

وبعد ساعتين .. كلم المحترف تاني بعد ما الملف اشتغل خلاص عادي :

المبتدئ معلش حضرتك انا عارف اني دوشتك جدا وعايز تضربني بس انت الخير والبركة :

المحترف : لا ابدا خير في ايه

المبتدئ حضرتك الموقع مش شغال خالص انا حاطط الملف بقالي ساعتين .. ولسه ما خلصش ..

المحترف : طب تمام ممكن ترفعلي صورة من البرنامج ..
طبعا البرنس هنا كان محمل باك 30 جيجا وكان لسه قدام كتير ف التحميل

المحترف تاني : انت الملف بتاعك لسه ما خلصش يعني لسه فيه وقت تحميل تاني :

المبتدئ : ايوة بس انا سمعت انه بيخلص بسرعة ... يعني استنى .. خلاص ماشي انا هجرب ملف تاني

فضل صاحبنا هنا يعمل الموقف دا مع 20 ملف كل اما يلاقي ملف يلاقي حجمه كبير والفلم الوحيد لاي نزله طلع بدون ترجمة وماعرفش يحط الترجمة ف الاخر راح حمله من موقع عربي
يومين كدا تاني ودخل الليتش لقى طبعا الاكونت اتعمله بان
بيكلم المحترف بيقوله ايه الي حصل
رد عليه المحترف : انت اتقفل الاكونت بتاعك علشان انت ما استخدمتهوش كويس
المبتدئ : يعني مفيش فايدة ارجعه ...
لا مفيش فايدة ترجعه ...
خلاص ماشي شكرا ...
وراح الليتش فتح التسجيل ..
صاحبنا حب يعمل نفسه ناصح .. وليه ما يعملش كدا ما العرب كلهم كدا ...
اما بقى مسجل كام اكونت ؟
6 اكونتات
ولما المحترف ساله ليه .. قاله اصل انا اتبندت وفي اكونت لصاحبي ..
صاحبنا عدى الحوار دا ..
5 دقايق ولقى موضوع تبادل ...
عايز يبدل الليتش ببت جيمر ...
وواحد تاني برضه كان عمال يدور ع الليتش من 9 سنين وكان محتاجه جدا ودلوقتي عايز يبدل اكونت زيادة معاه ...
ابو بلاش كتر منه ...
طبعا استاف اليتش قفل التسجيل من الوطن العربي ... المحترف فضل محترف ... وزاد احترافه ... لان معاه موقع محجوب عن بلده .. ومفيش زيادة ف الاكونتات عليه ....
وخلصت الحكاية ع كدا .. ....

اتمنى تكون رسالتي وصلت ...
والي ما فهمهاش ... هقولهاله بالبلدي وعلى بلاطة :: :
سين من الناس ... يالي بقالك شهور وشهور بتدور ع الليتش واما جبته ... بقيت عايز تبدله ....
وصاد من الناس ..... يالي كان اكبر حلم حياتك انك تشترك ف " سيرفر" الليتش ...... وحققت الحلم دا
وعين من الناس ..... يالي كان عندك اكونت واتبندت وقررت تأمن نفسك ....
خاء من الناس ..... يالي عملت فيها ناصح .... وقررت انك تبدل اكونت الليتش بموقع تاني انت سمعت انه حلو علشان الاكونت معاك زيادة .....
وانت وانت وانت وانت وهو كمان .... الي مش عارفين يعني ايه ليتش ولا حتى تورنت ولا حتى عارفين تستخدموه ...ز
يالي بتجري ورا شعارات الاغبياء ... الي بيقولك البري تايم فيه حلو .. على اساس ان ساعدتك هتحمل الفلم ف 5 دقايق ... وهتفرق معاك دقيقة او اتنين زيادة ...
ممكن نشوف انتو عملتوا ايه ؟
انت اذيت نفسك ... فحاجة ما تفهمش فيها ....
انت دمرت بلدك وسوءت سمعتها ... مش بالغش ... لا بتعدد العضويات ...
عملت فيها ناصح ... .. ... لا انت ولا غيرك داخلينه تاني ...
والي كانو فيه ... زي ماهما فيه وما انضروش ... انت ضريت نفسك وصحابك .....
فكر قبل ما تعمل ... خلي لنفسك عقلية .... وكيان واحد بعيد عن كيان الكل ....
دور ع الي هتستخدمه .....

طبعا ف النهاية عايز اقول كلمتين ... انا ما اقصدش حد بالكلام دا خالص ..... ودي حالات متعددة انا شفتها ف المنتدى هنا وف منتديات تانية ... ودا مستقبل انا شايفه قرب ... الجفت منع مصر ... البلاك كاتس منع مصر .... ولسه الجاين اكتر .... انا عندي اكونت ف الليتش .... واغلب الناس الي هنا عندها اكونتات ... وبتعرف تستخدمها .... انت مش هتأذي عضو ف الليتش من سنتين ... لانه مش هيخسره ولو خسره هيعرف يرجعه او ع الاقل هيستخدم غيره ...
انت الي هتقعد تحلم بالي مش معاك ... ولما تجيب الليتش هتلاقي غيره ..... تبقى عايز تجيبه ....
لو سمحت ... اوقف هنا وفكر .... ما تعملش نفسك ناصح وتعمل اكتر من اكونت ... لان كله هيتقفل .. محترفين اكتر منك وبيعملوا كدا وبتتقفل كل الاكونتات ... ما تأذيش نفسك والي حوليك ... لانك ف الاخر هترسى معاك على صفر وهترجع تاني للمباشر ...
اتمنى اشوف نقاش ف الموضوع ولو المشرفين شايفن انه مش كويس ياريت يشوله

اتمنى ماحدش يكون زعل مني ... وكل سنة وانتو طيبين ...