طلب طريقه تفعيل مشترك واحد ليعمل على الإنترنت فى ويندوز 7 - عنوان معدل

[Orphan Naremo]

لدى ويندوز 7 واكثر من يوزر
1* اود ان اجعل النت يعمل لدى مستخدم واحد من بين جميع المستخدمين
2* كيف اجعل المستخدمين الاخرين لا يستطيعون استخدام مواقع الشات مثل الفيس بوك والياهو وغيرهم

[cmas]

انا من زمان كنت عايز اعمل الموضوع ده لكن موفقتش فى حل ليه
بان اجعل النت يعمل على اليوزر الخاص بى
وباقى المستخدمين لا يعمل لديهم النت بس كانت المحاولة على وينوز xp
لكنى لم استطيع الوصول الى حل فى خيارات الويندوز يسمح بهذه الخاصية واعتقد انه لا يوجد خيار فى الويندوز يسمح بتطبيق هذا

لكنى قمت باستخدام خاصية parental control فى برنامج البيت ديفيندر وقمت باغلاق المواقع التى لا اريدهم ان يستخدموها والبرامج ايضا
ولكنها ايضا ليست فعاله 100%

لقد القيت نظرة على البرنامج ولقيت به هذه الخاصية اعتقد انها جيدة

[Goldsmith]

بسيطة، بس مش بسيطة أوي يعني:D

هنعمل كام خطوة كدة مع بعض، بس هتحتاج تعملهم في كل حساب من إللي انت عاوز تقفل عليه النت
الأول لو الحساب limited غيره من حسابك انت إللي هو الحساب الأساسي واديله admin rights غيره يعني خليه أدمين هو كمان عشان هنحتاج نفتح حاجات اليوزر الليمتد مش بيعرف يفتحها أوك

من جوة الحساب إللي عاوز تقفل عليه النت (إللي هو أدمن زي حساب حضرتك بالظبط)

أول جزء
افتح انترنت إكسبلورر
tools
internet options
افتح الشريط الخاص بـconnections
واختار LAN settings
إعمل enable لـproxy server (حط علامة في المربع إللي جنبها عشان تنشطها)
إعمل الـ address على 127.0.0.1(ده إللي هو الـ Local Host ، والعنوان ده اسمه loop back يعني جهاز حضرتك هيكلم نفسه ومش هيعرف يكلم أي جهاز أو شبكة تانية، يعني نو إنترنت)
وفي الخانة بتاعت الـport غيره من 80 لـ90 ، ولو الخانة فاضية اكتب 90
بعد كدة دوس أوك هيتقفل الويندو بتاع lan settings ودوس كمان أوك في الويندو بتاع internet options



تاني جزء
فتح start
اكتب في شريط البحث gpedit.msc ودوس enter
كدة احنا فتحنا الـ Group policy editor وده محتاج أدمن عشان يتفتح (عرفت ليه غيرنا الحساب)
دلوقتي بقى امشي معايا بالترتيب كدة هنفتح الحاجات دي واحدة واحدة
User Configuration
Administrative Templates
Windows Components
Internet Explorer
disable changing proxy settings (دور عليها هي موجودة بس تحت شوية وخلي بالك انهم مش مترتيبين أبجدي)
لما تفتح آخر واحدة دي اختار enabled وبعد كدة دوس أوك وأخرج من الـgroup policy editor خلاص كدة خلصنا
الهدف من الحوار ده كله إننا نمنع صاحب الحساب إنه يغير الإعدادات إللي احنا عملناها الأول


دلوقتي تقدر ترجع الحساب بقى limited زي ماكان، ويا ريت تعمل كدة عشان يبقى اليوزر معندوش access للـgroup policy editor من أساسه
وبكدة يبقى من رابع المستحيلات إنه يدخل على النت حتى لو كان مهندس شبكات:D:D

طبعا زي ما قولت في الأول إنك محتاج تكرر الخطوات دي في كل حساب، ماعدا طبعا الحساب الرئيسي بتاعك إنت عشان تعرف تدخل على النت

تأثير الكلام ده مش بيظهر غير بعد ما تعمل ريستارت، جرب كدة بعد ما تعمل ريستارت تفتح internet options
هتلاقي مكتوب تحت كدة some options are managed by your system administrator إللي هو حضرتك


إيه رأيك في الخدعة دي يا عم؟

أنا كدة شرحت كل حاجة ماعدا طريقة تغيير نوع الحساب من administrator إلي limited والعكس
ودي أهيف من الهيافة هسيبك تعتمد على نفسك شوية فيها


وبعدين بلاش والنبي حكاية مساعدة من الخبراء والمشرفين دي، مش عارف ليه كل واحد بيعمل موضوع بيكتب عاوز المشرفين وعاوز الخبراء وحاجات تخوف
والله الحاجات دي بتخلي ناس كتير تتردد إنها تفتح الموضوع من اساسه ويفتكروا إنها مشكلة عويصة جدا
أنا مش بقلل من قدر المشرفين ولا حاجة وأنا عارف كويس إنهم ناس ذوي خبرة، بس لما الواحد يبقى مشرف مش معنى كدة إنه أحسن من كل إللي في المنتدى
ده حتى إللي عاوز تجميعة جهاز بيقول مساعدة من المشرفين
والله أوقات أنا بصراحة بعمل بالعند وبقول الدعوة مش موجهة ليا (خلي المشرفين ينفعوك بقى:D:D)
وعلى فكرة في ناس خبرتها قليلة جدا في المجال بصفة عامة ولكن صادف إنه تعرض لموقف مماثل وبالتالي خبرته بتكون كبيرة في النقطة دي بالتحديد عن معظم الخبراء إللي بتقول عليهم