السلام عليكم اعضاء المنتدي

الحقيقه انا مش عارف ده المكان لموضوع زي ده و لا لأ

بس الحقيقه انا محتاج ارائكم و مشاوراتكم
انا بنتي عندها 3 سنين و لاحظت بعد فتره من ولادتها ان عنيها اليمين فيها حول في بعض الاحيان يعني جايه ناحيه انفها
و شويه تتعدل و شويه تحول لحد اما استقرت علي الوضع ده

طبعاً رحت بيها للدكاتره في الاسكندريه و قالولي اعمل نظاره و اللي يقولي حطلها لزقه علي عنيها السليمه ساعتين كل يوم عشان الضعيفه تقوي و كلام من ده كتير .

اخر حاجه رحت لدكتور واحد في الشغل قالي عليه في القاهره و مراتي هناك قالتلي ان الدكتور كويس و كشف عليها و قعد يلاعبها عشان ترضي تكشف ( في الكشوفات السابه ما كنتش ترضي تكشف و بنضطر نكشفلها ببنج )

و بعد الكشف قالها اللي قالك علي لزقه و نظاره دول ما بيفهموش و البنت لازم تعمل عمليه لأن العين الحوله فيها عضله مرخيه و عضله مشدوده و العمليه جراحيه بسيطه حيرخي المشدوه و يشد المرخيه و كده يعني

و قالي علي اسم مستشفيتين عشان اختار ما بينهم عشان تعمل العميله فيهم

طبعاً انا كنت راضي بحكم ربنا بس امبارح دخلت علي اليوتيوب و بالصدفه شفت فيديو للعمليه دي

و الحقيقه انا اترعبت ( طبعاً اللي عنده اطفال و تخيل العمليه دي فيهم حيتصدم ) .

دلوقتي انا بقيت خايف جداً و مش عارف اعمل ايه و بفكر الغي موضوع العمليه افتكر كلام الدكتور ان في الصغر الموضوع اسهل بكتير .

يا ريت تشاركوني و لو في حد عمل العمليه دي لابنه او يعرف حد عملها يقولي اخبار العمليه دي ايه لان العمليه المفروض حنعملها بعد 12 يوم من دلوقتي .

و برضه يا ريت الاعضاء اللي في القاهره يقولولي ايه رأيهم في الدكتور اللي حنعمل معاه العمليه و اي مستشفي افضل ( ده لو الاداره ممكن تترك المعلومات اللي حسيبها عن الدكتور و المستشفيتين ) :o

د . محمد احمد رشاد
أستاذ م كليه الطب عين شمس
استشاري جراحات العيون و الحول و الليزك
دكتوراه طب و جراحه العيون و زميل الكليه الملكيه للجراحين ( أدنبره - بريطانيا )
مصر الجديده - ارض الجولف

المستشفيتين
المركز التخصصي للعيون
المستشفي الوطني للعيون
الاثنين في مصر الجديده


يا ريت يا جماعه مشاركاتكم للأهميه و قصر الوقت و شكراً