الاستفتاء علي الدستور 19 مارس

**Mr.pOPo** · 04-03-2011, 19:57

يا ريت يا جماعة لو كل واحد ياخد دقيقتين من وقته و يقرأ التعديلات بتركيز شوية مش هتاخد منه و قت كتير. علشان ان شاء الله لما يحين موعد الاستفتاء معتش بقى تقول " هو يعنى هيحصل ايه؟ ، و انا مالى". خلاص كل الكلام دا كان زمان.

دلوقت كل واحد مهما كان لازم يشارك ، دى بلدنا دلوقت لازم نبنيها كويس و نطورها. لا رجعة للحال السابق على 25 يناير أبداً ، و اللى مبيبقاش مهتم بالموضوع لازم يهتم لأن دى بلده ، بلدنا كلنا.

انا قلت رأيى فى الصفحة الأولى من الموضوع.. ياريت الناس تشارك أو على الأقل تاخد فكرة عن التعديلات اللى حصلت و تكوِّن إجابتها "التعديلات مكتوبة فى أول صفحة فى الموضوع" علشان لما تروح تبقى بتجاوب عن اقتناعها هي مش علشان انا أصحابى هيعلّموا على "نعم" أو "لا".

لأ لازم انت تكوّن قناعتك و تشغل دماغك شوية و تجاوب باللى انت مقتنع بيه سواء بعدم بوافقتك للتعديلات ، أو موافقتك ليها. يا حبذا طبعا لو كتبت رأيك فى مشاركة مع إجابتك ، تبقى مية مية علشان نتناقش. من هنا ورايح بإذن الله ، اى حاجة فى البلد لازم الكل يشارك فيها ، و الأهم من دا ان لازم انت تقول رأيك و اللى انت مقتنع بيه. مترددش اللى بيقوله غيرك و خلاص.

تعديلات دستورية... لازم تشارك.
انتخابات مجلس شعب... لازم تشارك.
انتخابات مجلس شورى... لازم تشارك.
انتخابات رئاسية... لازم تشارك.
انتخابات محليات... لازم تشارك.

يعنى ملكش حجة دلوقت انك متشاركش ، لا هيبقى فى تزوير ان شاء الله ، و لا هيبقى فيه بلطجية يخوفوا الناس و لا داخلية تتحكم فى الدوائر.. إلخ.

خلينا نبنى البلد كويس بقى من الاول.. و قبل ما نغير بلدنا لازم نغير نفسنا. و إلا ميبقاش عملنا حاجة و لا فى اي فايدة و دم الشهداء اللى فى رقبتنا دا لازم نتحمل مسئوليته. الناس دول ضحوا بدمهم ، و انت مكسّل تبدى برأيك و انت قاعد فبيتكم!

@ صام:

الانتخابات و الإستفتاء بالرقم القومى ان شاء الله.

**moriatte** · 04-03-2011, 19:59

يا عم سام الله يهديك الموضوع اتحسم خلاص و قالوها كذا مرة
التصويت ببطااااااااقة الرقم القومى
لا أكثر و لا أقل
موضوع البطاقة الانتخابية خلاص كان لعبة وسخة من النظام البائد و انتهت بلا رجعة
بالنسبة لسؤالك عن موضوع من لهم حق الانتخاب.....أيوه المقصود بيه أى شخص يحمل بطاقة الرقم القومى و يحق له الانتخاب قانونا باكمال السن القانونى للانتخاب...و ألا يكون ممن لا يملكون حق الانتخاب مثل الجيش
على حسب معلوماتى الجيش و الشرطة و القضاة مش من حقهم الانتخاب
أنا متأكد من معلومة الجيش
الشرطة و القضاة مش أكيد
لكن لا بطاقات انتخابية ولا يحزنون............خلاااااااااص البعبع راح و انتهى
يا اخواننا مطلوب مننا نؤدى واجبنا نحو بلدنا

**moriatte** · 04-03-2011, 20:02

المشاركة الأصلية كتبت بواسطة Mr.pOPo

يا ريت يا جماعة لو كل واحد ياخد دقيقتين من وقته و يقرأ التعديلات بتركيز شوية مش هتاخد منه و قت كتير. علشان ان شاء الله لما يحين موعد الاستفتاء معتش بقى تقول " هو يعنى هيحصل ايه؟ ، و انا مالى". خلاص كل الكلام دا كان زمان.

دلوقت كل واحد مهما كان لازم يشارك ، دى بلدنا دلوقت لازم نبنيها كويس و نطورها. لا رجعة للحال السابق على 25 يناير أبداً ، و اللى مبيبقاش مهتم بالموضوع لازم يهتم لأن دى بلده ، بلدنا كلنا.

انا قلت رأيى فى الصفحة الأولى من الموضوع.. ياريت الناس تشارك أو على الأقل تاخد فكرة عن التعديلات اللى حصلت و تكوِّن إجابتها علشان لما تروح تبقى بتجاوب عن اقتناعها هي مش علشان انا أصحابى هيعلموا على "نعم" أو "لا".

لأ لازم انت تكون قناعتك و تشغل دماغك شوية و تجاوب باللى انت مقتنع بيه سواء بعدم بوافقتك للتعديلات ، أو موافقتك ليها. يا حبذا طبعا لو كتبت رأيك فى مشاركة مع إجابتك. تبقى مية مية. من هنا ورايح بإذن الله ، اى حاجة فى البلد لازم الكل يشارك فيها ، و الأهم من دا ان لازم انت تقول رأيك و اللى انت مقتنع بيه. مترددش اللى بيقوله غيرك و خلاص.

تعديلات دستورية... لازم تشارك.
انتخابات مجلس شعب... لازم تشارك.
انتخابات مجلس شورى... لازم تشارك.
انتخابات رئاسية... لازم تشارك.
انتخابات محليات... لازم تشارك.

يعنى ملكش حجة دلوقت انك متشاركش ، لا هيبقى فى تزوير ان شاء الله ، و لا هيبقى فيه بلطجية يخوفوا الناس و لا داخلية تتحكم فى الدوائر.. إلخ.

خلينا نبنى البلد كويس بقى من الاول.. و قبل ما نغير بلدنا لازم نغير نفسنا. و إلا ميبقاش عملنا حاجة و لا فى اي فايدة و دم الشهداء اللى فى رقبتنا دا لازم نتحمل مسئولية. الناس دول ضحوا بدمهم ، و انت مكسّل تبدى برأيك و انت قاعد فبيتكم!

@ صام:

الانتخابات و الإستفتاء بالرقم القومى ان شاء الله.

+1111111111111111111
الله ينور يا عم الحاج
أيوه كدا خلى الناس تصحى

**S@M** · 04-03-2011, 20:05

يا عم سام الله يهديك الموضوع اتحسم خلاص و قالوها كذا مرة
التصويت ببطااااااااقة الرقم القومى

لم يرد اى بند رسمى بهذا يا جماعة عشان كدة انا بسأل ...!!

وطبعا لاازم هروح ادلى بصوتى ..لآنى واثق الان انة سيذهب الى من اختارة بأرادتى

**™Phantom** · 04-03-2011, 20:36

أنا شخصياً قمت بعمل بطاقات انتخابية لي ولوالدتي ولأختي الاثنتين

Better safe than sorry

الفكرة كلها الآن في الاختيار

وبالنسبة لي الاختيار واضح جداً :

لا

كيف يمكننا تجميل ميت ؟

الدستور كله سقط بالثورة فكيف نقول نعم لتعديلات عليه ؟

أنا شخص Perfectionist أي لا أقبل الترقيع وأنصاف الحلول

مطالب الثورة واضحة من البداية

الشعب..... يريد..... إسقاط..... النظام

والدستور من ضمن النظام

منذ ثورة 52 وكل رئيس يفصل المواد حسب هواه

وحتى لو قلنا أن التعديلات جيدة لفترة انتقالية فهذا خطأ لأن التعديلات بها ثغرات كثيرة عرفتها بمجرد القراءة وتأكدت منها بعد مشاهدة آراء الفقهاء الدستوريين

في كلتا الحالتين : لا

**Cobra007** · 04-03-2011, 20:45

سؤال:

اذا بعد الاستفتاء كانت الاغلبية "لا" يعني رفض التعديلات، ايه اللي يحصل ساعتها؟؟؟

**S@M** · 04-03-2011, 20:49

المشاركة الأصلية كتبت بواسطة Cobra007

سؤال:

اذا بعد الاستفتاء كانت الاغلبية "لا" يعني رفض التعديلات، ايه اللي يحصل ساعتها؟؟؟

المفروض ساعتها يكون هناك دستورا جديدا ..

تبقا مصيبة لو قلك محدش وافق على التعديلاات الدستورية ...يبقا نمشى على الدستور القديم :eek::eek:

**Cobra007** · 04-03-2011, 20:55

المشاركة الأصلية كتبت بواسطة S@M

المفروض ساعتها يكون هناك دستورا جديدا ..

تبقا مصيبة لو قلك محدش وافق على التعديلاات الدستورية ...يبقا نمشى على الدستور القديم :eek::eek:

يعني لو الناس موافقتش علي التعديلات، هيعملوا دستور جديد؟

طب ما يعملوا دستور جديد من دلوقتي بدل تضييع الوقت :rolleyes:

**moriatte** · 04-03-2011, 21:30

طبعا لأ يا جماعة مش هيعملوا دستور جديد دلوقتى
دا هياخد على الأقل سنة
اذا كان المواد اللى اتغيرت بس مازال فيها ثغرات.....و أخدت عشر أيام
يبقى الدستور كله عشان يتغير بدون ثغرات هياخد وقت قد ايه

**ŤǾЯŊΛĐф** · 04-03-2011, 21:42

أعتقد والله أعلم لو تم رفض التعديلات ، سيتم التعديل مرة أخرى وعرض التعديلات الجديدة على الإستفتاء

**ibrahimpop** · 04-03-2011, 21:55

سؤال لو سمحتم
هو الاستفتاء علي المواد المعدلة كلها مع بعض ولا هنختار موافق ولا لا علي كل مادة لوحدها

**Cobra007** · 04-03-2011, 21:57

انا معلوماتي مش كبيرة في الموضوع ده بس سمعت من كذا شخصية قانونية ان حكاية عمل دستور جديد مش صعبة للدرجة دي، بالعكس فيه قالوا ان ده اسهل من انك تقعد تعدل في الدستور الحالي لان الدستور الحالي مشوه بكل معني الكلمة.

بس برضه احنا كده مش عارفين لو التعديلات اترفضت هيحصل ايه، هما اكيد مش هيخلوا كل واحد يكتب هو رافض ليه، يبقي لو هيعدلوا تاني هيبقي علي اساس ايه؟؟؟؟

@ibrahimpop

مش اكيد بس معلوماتي ان الاستفتاء هيبقي علي التعديل كله، يعني كل المواد مع بعض لأن محدش جاب سيرة كل مادة لوحدها دي

**™Phantom** · 04-03-2011, 22:23

دكتور يحيى الجمل قالها من قبل وأنا أصدقه لأن كلامه منطقي :

عمل دستور جديد أكثر سهولة من التعديل والترقيع لأننا بالفعل لدينا أساس جيد في دستور 1923 ومشروع دستور 1954

لو رفضنا التعديلات الدستورية ستضطر اللجنة إلى عمل دستور جديد

الأمر كله أصلاً غير منطقي

كيف يتم التعديل على أمر أبطل العمل به بالفعل ؟!