عشان الإختلاط

**event88** · 20-04-2011, 09:13

عشان الإختلاط

للفاتح جـــبرا | ساخر سبيل

عندما كنا طلاباً بالمرحلة الوسطي (إتلاشت وكده) كنا نحب حصة التربية الإسلامية ونحرص أشد الحرص علي حضورها وذلك لأننا كنا (فلاسفة صغار) أو هكذا يخيل لنا فى ذلك العمر الغض النضير .. وقد كان أساتذتنا فى هذه المادة فطاحلة نشهد لهم بالعلم والإستقامة وهمو والحمدلله لا زالوا يعيشون بيننا كالأستاذ (محمد أحمد مصطفي) والبروفيسور (محمد أحمد الشامى( !
- من حكمة مشروعية الصوم يا أبنائي أن يحس الغني بمدى معاناة الفقير الذى يجوع ولا يجد ما يأكلة !
- طيب يا أستاذ والفقير يصوم عشان شنو؟
وهكذا كنا نحاول أن نصل إلى الحقيقة والتى بلا شك كان أساتذتنا الأجلاء يعرفونها تماماً ويقدموها لنا فى شرح بسيط مقنع وميسر ، طيب ايه مناسبة الكلام ده ؟ مناسبته (فتوى) أطلقها على الهواء مباشرة (الرئيس علي عبد الله صالح) رئيس اليمن (لحدت كتابة هذه السطور) أفتى فيها بحرمة خروج (المرأة) فى تظاهرات بدعوى الإختلاط !
في رأئي أن الأخ (علي عبدالله) قد جانبه الصواب (وما عرف يلعبا كيف) لأننى لو كنت فى مكانه لأوكلت (ترزية الفتوى) بعمل اللازم لتخرج الفتوى فى أبهى حلة وآخر (تطريز) ومن جهة (متخصصة) ولكن يبدو أن الوقت يداهم (صالح) فأراد لهذه الفتوى أن تبث على الهواء دون تأجيل أو إبطاء .
- خروج المواطنون فى مظاهرات مختلطة حراااام !
- ده كلام صاح يا أستاذ (صالح( !
- كيف يا سوداني
- أقول ليك .. مش خروج الرعية علي الحاكم حرام
- أيوه
- طيب يبقي خروج المواطنين فى مظاهرات حرام
- ومش المظاهرات (مختلطة(
- أيوه
- ومش الإختلاط حرام
- مافي شك
- يبقي خروج المرأة في المظاهرات (حرام تربيع( !
- طيب يا سودانى ما تجى تشتغل (مفتى) معانا
- ده عليا يا (أبويمن) ؟ من زمان كنتا وين ؟ تكلمنى بعد ما الحفلة لموا كراسيها ! (مواصلا) أقول ليك كمان حاجه تانية
- قول يا سوداني
- مش المراة المسلمة لا يجوز لها معارضة زوجها ؟
-أكيد
- طيب مش من باب أولى إنها ما تعارض (سيد زوجها) اللى هو إنتا ! يبقى الموضوع كوووولو حرام في حرام
- والله إنتا يا سوداني ختيييييييير ياخى ما تجى تشتغل معانا
- كدى حكاية الشغل دى خليها هسه أنا مريض وعندى قلب وما بقدر على (سخانة اليمن) دى لكن لو عاوز أرسل ليك (علماء من عندنا) والله يظبطوا ليك الشغل جنس (ظبيط) لمن تآآآأمن
- وأيش عندك تانى يا يا سوداني
- المرأة عندكم مش لا يجوز ليها (قيادة السيارة) في الشارع ؟
- أيوه !
- طيب كيفن تقود الشارع ذاااااتو يا (فخامة الرئيس) … يعنى يا سعادتك بس بالقياس سااااكت الكلام ده ما بجي
- يعني يا سودانى الفتوى بتاعتى دى صاح؟
- هو إنتو يا زعماء بتقولوا حاجه غلط؟ ده حتى صوت المرأة عورة يثير الرجال .. فكيف يجوز ليها تكورك وتصيح (الشعب يريد إسقاط النظام) والمظاهرة مليانه رجال ..
- عشان كده أنا يا سودانى قلتا ليهم (المرا تطلع الشارع( !
- والله أخير إنتو نحنا ناسنا هنا قالوا لينا (الراجل اليطلع الشارع( !

كسرة :
قال أيه؟ عشان الإختلاط

**Mubarak** · 20-04-2011, 09:44

اضحك الله سنك

**وى واا** · 20-04-2011, 10:00

كويس ان مفيش زيه عندنا :D

**[Dr.Mohammed [F@H** · 20-04-2011, 10:51

جميل جدا عزيزى ابراهيم

اسمح لى ان اقتبس رد الشيخ مبارك لك ( اضحك الله سنك )

لكن لو عاوز أرسل ليك (علماء من عندنا) والله يظبطوا ليك الشغل

توقفت عند هذه الجملة وضحكت كثيرا ً , رائع ان يكون للعلماء سوق يباعون فى ويـٌشترون

افكر فى شراء مفتى لتحريم العمل والشغل لو زادت درجة الحرارة عن 28 درجة :D

**event88** · 20-04-2011, 10:57

المشاركة الأصلية كتبت بواسطة [Dr.Mohammed [F@H

جميل جدا عزيزى ابراهيم

اسمح لى ان اقتبس رد الشيخ مبارك لك ( اضحك الله سنك )

توقفت عند هذه الجملة وضحكت كثيرا ً , رائع ان يكون للعلماء سوق يباعون فى ويـٌشترون

افكر فى شراء مفتى لتحريم العمل والشغل لو زادت درجة الحرارة عن 28 درجة :D

والله ده لحاصل يا دكتور محمد , اي حاجة بقيت تتباع وتشتري

, انا خايف يكون عبدالله صالح ده اخطر من القذافي زاته , الناس القذتفي عامل ليها لخمة بس الزول ده اخطر منه بكتير :eek: وما بنسي الطرطور بتاع سوريا المستبد داك كمان , الله ياخدهم كلهم :mad:

**[Dr.Mohammed [F@H** · 20-04-2011, 10:59

المشاركة الأصلية كتبت بواسطة event88

والله ده لحاصل يا دكتور محمد , اي حاجة بقيت تتباع وتشتري

, انا خايف يكون عبدالله صالح ده اخطر من القذافي زاته , الناس القذتفي عامل ليها لخمة بس الزول ده اخطر منه بكتير :eek: وما بنسي الطرطور بتاع سوريا المستبد داك كمان , الله ياخدهم كلهم :mad:

امين يا رب العالمين