حديث من القلب .. توضيح حول "متاجر عرب هاردوير"

[wella1000]

أستاذ وائل أعتقد أنه يقصد أن الرد جاء متأخر ولم يأتى فى وقتة حتى نعرف الحقيقة ( حلو كلمة الحقيقة :D )
وكان وفر علينا كل ما جرى

+1
الي جانب زي ماخزتم قرار كبير زي ده
كنتم ردته علينا باستفاضه على قد هذا القرار زي دلوقتي كده
لكن اللي حصل معا إني مش عاوز أفتح الموضوع تاني
دخلتم اتكلمتم على كروت الشاشة.................في عز محدش فاهم حاجة وكله بيغلي..............
فمتقولش إن أنتم مش غالطنين

[HuLkY]

بص يا ويلا , انا سبقت ووضحت النقطة دى , لما تلاقى شخص قدامك بيتصرف بشكل غريب , قدامك حل من 2 ملهوش تالت! يا تحاول تفهم هم عمل ليه كده , او انك ترد عليه فى وقتها بالشكل المناسب للموقف ده.

الموقف الاول انك تفهمه يتطلب حاجتين , حسن النية فى من امامك خاصة لو انت تعرفه كويس , ويتطلب بصيرة وصبر وتفهم ليه عمل كده , الموضوع مكنش استفزاز اكتر منه بكل فهم لمن يملك بصيرة , اتقل شوية , شوف الكلام لأخره , فى ناس دخلت شتمت واللى قال لك مش عارف ايه وصور ل Middle Fingers , تمام جدا , انتهينا؟ خلاص؟ 4 صفحات من السباب المقذع؟ تمام؟ Peace? نتكلم بقى بعقل....

الحل ده صعب جدا! لكن انا شخصيا وثقت فى ناس كتير انها حتفهمنى! لكن يبدو انى لسه برضه متعملتش من الحياة

فكرة مين غلطان او مش غلطان مش حتوصلك لشئ , انت لو مصر انه من امامك غلط , لو هو 10% صح , عمرك ما حتشوفها , لو مستعد تشوف اللى قدامك العكس , عمرك ما حتشوف العكس , الفكرة انك تكون عقلانى ولما تشوف حاجة "مش عادية" او رد "غريب" حاول تفسره بشكل حسن , مش اكتر , ده طباع الناس العاقلة , ما عدا ذلك , كل شخص حر خاصة انه حكم شخص على الاخر لا يقلل منه او يزيده , افعال كل شخص بتتكلم.

فكرة الرد فى وقته او غير وقته , اعتقد زى ما الناس اخدت راحتها فى الشتيمة وما سبق , الادارة متأخرتش على حد فى الرد , حوالى 4 صفحات شتائم , و 4 او 5 صفحات ردود , ارجع قارن بنفسك وشوف فارق الاسلوب, انا ومحمد حاولنا "نفصل" الناس عن الموضوع باى شكل , لكن واضح انه كان فى نسبة لا بأس بها داخلة تتشفى وتشتم , فطبيعي يكون فى تشقق واختلاف فى الكلام والاراء لكن لما يتم الخروج عن الادب , يبقى الموضوع انتهى .

أنا مش بديك مبرر لتصرفى , انت حر تماما فى اعتبارك له , مش حغير اكيد فكرتك لكن انت بايديك تشوف من منظور تانى لو تحب تبص للأمور بشكل مختلف

بالمناسبة : فى ناس فهمتنى وانا متوقعتش انها حتفهمنى! والعكس! الحمد لله ده اثبت لى انى مش غلط على طول الخط.

السؤال الأن متى ستتوفر تلك الخدمة ( بلاش تقولى قريباً برجاء ميعاد محدد )

أنا شخصيا مش حقدر افيدك فى الجزئية دى لكن اكيد لو تمت حاجة, الاعضاء حتعرف على طول

[د . جليبيب الانصاري]

نزولا على رغبة صاحب الموضوع ولان الشأن داخلي بامتياز ...... وخروجا من معترك الـتأويل لفصحى قد تكون حمالة اوجه ...... لتكن العاميه .

العتاب غير النقاش لان العتاب يكون بين الاحبه والنقاش ممكن يكون بين خصوم ...... وعلشان اللي هقوله ده مش مبني على اساس علمي " تجاري في حالتنا " كان لازم انوه واعرف ايه النظام .

اولا انا العضو محمد لا تربطني اي علاقه من اي نوع باي شركه من الشركات ولا التوكيلات ولا حتى اشتريت منها اي حاجه ولا جبت منهم حاجه لقريبي ولا عمري كلمت حد فيهم الى الان ...... للتوضيح فقط .

مش عارف ابتدي ازاي ..... بس بصراحه المشكله ان الاداره مش مفروض تكون في موقف دفاعي اطلاقا ... مش علشان هي معملتش حاجه غلط ..... علشان دي فلوسها وهي حره فيها .

مشكلة المستخدم العربي وانا منهم .... بتربطني علاقه عاطفيه بالمكان .... اتعرفت على ناس وقابلت بعضهم .... والعلاقات اتطورت ورحت بيتهم وبقينا اصحاب اوي ...... ينزل منتج معين نناقش الاداء مع بعض ونستشهد بمواقع وتشارتات ونحاول نفيد بعض ونوعي بعض ........ في اطار ودي مفيهوش انا مشرف وانت عضو انا اداري وانت ملكش فيها ....... طالما ان الجميع ملتزم الادب والحدود .

مسأله " المتاجر " ممكن نتفق او نختلف في الاليات ..... بس اللي مفهوش خلاف ان في علاقه ما تربط الموقع بالشركات بس العلاقه دي المستفيد منها بشكل اكبر " مش اوحد " هي الشركات وبالتالي كان بالامكان افضل مما كان .

ايه المشكله فعده ظريفه بينك يا جوهري ومعاك هلكي وفادي وبين الشركات في عقر دارهم ...... مش عايز اقول انه اكيد كان هيكون هناك صيغه ما للخروج بحل يرضي جميع الاطراف ....... لكن التعامل عن طريق ايميل موجه نحيطكم علما نحن عرب هاردوير انه ........ مش عارف انا حسيت ببعض التعالى فما بالك بالمستقبل ........ هالكي قال بزنس از بزنس ..... ماشي بس ده بيفكرني لما تيجي الكليه وتقول اخر السنه " نظام الامتحان هيبقى نظام امريكي " !!!! طيب انت علمتني الاول بالنظام الامريكي علشان تمتحني بيه ..... السوق العربي له خصائصه .

الاداره حقها بعض المشاركه الماديه من الشركات في اطار المنفعه المتبادله ..... لكن لا .... كان الرد مين اللي عمل مين ..... وفي الاخر اكيد انتوا الاتنين خسرانين ..... بس يا ترى مين خسر اكتر .

انا ........ ايوه انا خسرت اعضاء مشيو وموضوع من انجح المواضيع في المنتدى بلا جدال ..... ولو سمحت متبررليش الحال اقدامك اهه ...... الموضوع بيكافح للصمود وعرض الاسعار من المنتديات الاخرى ..... مش عارف في جعبتك ايه علشان تنعشه تاني .

بدايه الحوار ومشاركتك انته وهالكي بعد قرار انسحاب الشركات والكلام عن كرتك اللي اتحرق ...... محدش في الكون يقدر يحكم على النوايا ...... بس في فرق اني اغلط من غير مقصد ..... واني مش معترف اساسا اني غلطت ........ بعدها بدأ مسلسل نشر الغسيل ال#$@ ..... التشكيك في الزمم " وكل طرف له شواهد بالادعاء والتاني له شواهد بالدفاع عن نفسه ..... وربنا العالم " ......... اعتقد ان الازمه لم تدر على النحو المطلوب ...... ده لو ينفع اساسا اقول رأيي .

لكن بلا شك الفلوس غيرت النفوس .... واحد من اهم المحكات الفارقه في علاقة اي طرفين ... وربنا الهادي .

معظمنا يستطيع الاكتفاء بعشر مواقع كبيره للهاردوير تتيح له الاطلاع والمعرفه والتحليل ...... وجودنا هنا هو لموضوع اسمى من هاردوير ....... هو محاوله قضاء وقت في هذا العالم الافتراضي تستمتع فيه بما تحب مع من تحب .

اذا اردتم الهيمنه على الشرق الاوسط ..... فالطريق وعره بلا شك ......... وتحتاج لسواعد اعضاء عرب هاردوير قبل متاجر عرب هاردوير .... انت عارف ان الاقصاء ده ولد منتديات موازيه " صحيح انت مش مفعل خيار استقبال الرسايل ليه هناك :D " ........ ناهيك عن منتدى اماراتي المحل وعند سؤالي للشيخ مبارك عنه لطبيعه انه امارتي احاطتني ببعض المعلومات المفاجئه لي ....... يا راجل يا طيب الافترى وصل انهم بيعملوا مراجعات لعربيات bmw ولاندكروزر :D :D .

ربنا يعلم معزتك انت وهالكي عندي وده مش محتاج اني اقوله ...... واحد صاحب اطول مكالمه مرثونيه عملتها لواحد اول مره اكلمه ...... والتاني ليه في رقبته عزومه :D .

انا عارف ان هناك مياه بدأت تعود لمجاريها ........ هل حان الوقت للقعده اياها .

[mohamed91]

السلام عليكم ورحمة الله وبركاته
احب أقولكم اني كنت متابع موضوع اسعار واخبار الهاردوير في مصر من سنة 2008 حتى اواخر 2009 كنت اصحى من النوم افتح الكومبيوتر على الموضوع , بدون مشاركات مني (كنت من الأغلبية الصامته) كنت حابب الروح الموجوده في الموضوع لأني عمري ما شفتها في أي مكان أخر غيره. وكنت نفسي اتعرف بهؤلاء الناس اللي حبيتهم من غير ما أشوفهم ده أنا فاكر يا أخ هالكي انك كنت في الجيش والأعضاء بيتكلموا عنك وكنت مستني اعرف مين هالكي ده وحبيتك لله في الله من قبل ما اشوف مشاركاتك حتى.بعدين حصلت فترة كبيرة من عدم متابعة الموضوع لأني بعت جهازي القديم.
المهم علشان مصدعكوش
مستحيل يكون شخص فاتح منتدى بالجهود الذاتية لنشر الثقافيه الالكترونية للمسخدم العربي يتحول هدفه الى الربح المادي وحتى لو فكر انه يربح من هذا الموضوع مفيش عيب في كده العيب علينا احنا لو قلنا(ان هذا الشخص اللي كرس جزء كبير جدا من وقته ومجهوده ليتحقق هذا الهدف وتحقق فعلا) ان ده مش من حقه.
اثناء قرائتي للاحداث بتاعة انسحاب الشركتين لقيت مشاركات غريبة جدا من بعض الأعضاء فعلا اللي بيشتم واللي بيتهم الأخ الكبير مبارك وأعضاء كبار بتقول ان الشركات هي اللي شهرت المنتدى والشركات مش مستفيدة بأي حاجة
على العكس أنا قدامكم أهه (حالة عملية) أسكن خارج القاهرة في محافظة الشرقية معرفتش حاجة اسمها ماكسيمم هاردوير ولا كومبيونيل ولا باقي الشركات مع احترامي ليهم الا من خلال عرب هاردوير ومن قبل ما يتعمل موضوع الأسعار بالشكل الجديد (ان كل شركة يبقى ليها موضوع فيه أسعارها) لأ عرفتهم من خلال الموضوع بالشكل القديم (الاسعار في الصفحة الاولى والمشاركات في الصفحات التالية) واعتقد ان كتير من المشترين اللي من خارج القاهرة عرفوا هذه الشركات من خلال عرب هاردوير ليه بقى نقول لأ عرب هاردوير لم يفيدني في شيئ

فكرة مين غلطان او مش غلطان مش حتوصلك لشئ , انت لو مصر انه من امامك غلط , لو هو 10% صح , عمرك ما حتشوفها , لو مستعد تشوف اللى قدامك العكس , الفكرة انك تكون عقلانى ولما تشوف حاجة "مش عادية" او رد "غريب" حاول تفسره بشكل حسن , مش اكتر , ده طباع الناس العاقلة , ما عدا ذلك , كل شخص حر خاصة انه حكم شخص على الاخر لا يقلل منه او يزيده , افعال كل شخص بتتكلم.

ده رأيي بالظبط والمفروض نحسن الظن في الناس كلها الشركات وادارة المنتدى ,يعني لو أنا كنت في موقف الشركات ليه أفكر ان ادراة عرب هاردوير سيئة ودول ناس أشرار وأنا الضحية.والعكس او أنا ادارة عرب هاردوير ليه أفكر ان الشركات وحشة طيب ما يمكن زي ما دكتور محمد قال ان الشركات اتخضت من هذا الاسلوب والمفروض الموضوع يكون بشكل ودي أكتر من كده.مين قال ان الشخص الحسن النية أهبل !!! أنا شايف العكس تماما. وزي ما هالكي قال "الفكرة انك تكون عقلانى ولما تشوف حاجة "مش عادية" او رد "غريب" حاول تفسره بشكل حسن " أحييك بشدة على هذا الكلام يا هالكي.

وأنا بتفق مع كلام دكتور محمد

مشكلة المستخدم العربي وانا منهم .... بتربطني علاقه عاطفيه بالمكان .... اتعرفت على ناس وقابلت بعضهم .... والعلاقات اتطورت ورحت بيتهم وبقينا اصحاب اوي ...... ينزل منتج معين نناقش الاداء مع بعض ونستشهد بمواقع وتشارتات ونحاول نفيد بعض ونوعي بعض ........ في اطار ودي مفيهوش انا مشرف وانت عضو انا اداري وانت ملكش فيها ....... طالما ان الجميع ملتزم الادب والحدود .

مسأله " المتاجر " ممكن نتفق او نختلف في الاليات ..... بس اللي مفهوش خلاف ان في علاقه ما تربط الموقع بالشركات بس العلاقه دي المستفيد منها بشكل اكبر " مش اوحد " هي الشركات وبالتالي كان بالامكان افضل مما كان .

ايه المشكله فعده ظريفه بينك يا جوهري ومعاك هلكي وفادي وبين الشركات في عقر دارهم ...... مش عايز اقول انه اكيد كان هيكون هناك صيغه ما للخروج بحل يرضي جميع الاطراف ....... لكن التعامل عن طريق ايميل موجه نحيطكم علما نحن عرب هاردوير انه ........ مش عارف انا حسيت ببعض التعالى فما بالك بالمستقبل ........ هالكي قال بزنس از بزنس ..... ماشي بس ده بيفكرني لما تيجي الكليه وتقول اخر السنه " نظام الامتحان هيبقى نظام امريكي " !!!! طيب انت علمتني الاول بالنظام الامريكي علشان تمتحني بيه ..... السوق العربي له خصائصه .

الاداره حقها بعض المشاركه الماديه من الشركات في اطار المنفعه المتبادله ..... لكن لا .... كان الرد مين اللي عمل مين ..... وفي الاخر اكيد انتوا الاتنين خسرانين ..... بس يا ترى مين خسر اكتر .

صح جدا

انا ........ ايوه انا خسرت اعضاء مشيو وموضوع من انجح المواضيع في المنتدى بلا جدال ..... ولو سمحت متبررليش الحال اقدامك اهه ...... الموضوع بيكافح للصمود وعرض الاسعار من المنتديات الاخرى ..... مش عارف في جعبتك ايه علشان تنعشه تاني .

يا رب الكلام ده يكون مش صح ... بس هو فين دلوقتي الأخ WMGC والأخ CRYPT76 والأخ moatez مبقتش أشوف أي مشاركات ليهم

معظمنا يستطيع الاكتفاء بعشر مواقع كبيره للهاردوير تتيح له الاطلاع والمعرفه والتحليل ...... وجودنا هنا هو لموضوع اسمى من هاردوير ....... هو محاوله قضاء وقت في هذا العالم الافتراضي تستمتع فيه بما تحب مع من تحب .

أحيك يا دكتور محمد حضرتك قلت اللي أعضاء كتير كانت حاسه بيه وعاوزه تقوله.

معلش يا شباب استحملوا المشاركة بتاعتي دي بس كانت جوايا وكنت لازم اقولها

[ahmedziz]

مشكلة الانسان المصرى عموماً ان حبيب . . . وذات كيان قلبى وليس عقلى
بمعنى ان المصرى بيحب . . يحب بسرعة وبيفكر بقلبه قبل عقله
بمعنى تانى : ان انا كمصرى رحت المحل الفلانى اللى بيعرض على عرب هاردوير واشتريت منه مرة والناس كانوا لطاف معايا
يبقوا خلاص صاحب المحل او العاملين به اصبحوا اصحابى من عشر سنين وتلاقى المعزه او المحبه بقت للركب
ودى مشكلتنا كلنا كمصريين . . .
كون ادارة عرب هاردوير عايزة تعمل متاجر لها بشكل محترف دة حقها . . . اى انسان او مكان بيحب انه يطور نفسه للوصول للعالمية او لمستوى عالى
لكن مش هاقول كان ( المفروض ) عشان دى كلمه توجيه مش كلمه رائ
كانوا يحطوا فى اعبارهم ان المصريين كدة وان ممكن المحلات ماترضاش بالنظام دة وان عشان يفصلوا بين المحلات والاعضاء دة هايبقى صعب شويه مثل ما حصل فعلاً
كل الناس كانت صعبانه عليهم المحلات دى وصعبان عليها اصحاب المحلات والعاملين بها اللى هما بقوا اصحابنا من اول شراء قطعه كمبيوتر من عندهم . . . فكان صعب شويه ان الادارة تفصل بيننا وبين التجار شويه شويه
يعنى كانوا يمشوا فى اتجاهين
الاول : انهم يتكلموا عن متاجر عرب هاردوير لفترة لحد ما الاعضاء كلها تعرف يعنى ايه الكلمة دى وتحبها
وثانياً : بعد وقت قصير اوى تبتدى تتكلم مع الشركات وجهاُ لوجه
على التوالى يعنى كنا كأعضاء هانفهم يعنى اية متاجر عرب هاردوير ونحبها وفى نفس الوقت التجار هايعرفوا نظامهم اية
ويدرسوه جيداً ولو حد فكر انه يعمل مثل ما حدث من التجار هنا . . . . . هايلاقى كل الاعضاء او اكثرهم فهموا الفكرة وحبوها
وقتها مش هايقدروا يتراجعوا عن الدخول فيها ولو حد تراجع ماحدش من الاعضاء هايزعل لان خلاص الكل فهم وعرف النظام الجديد

لكن اللى حصل ان الفكرة نزلت مرة واحدة على الاعضاء وعلى الشركات مرة واحدة وطلب من التجار الاشتراك سريعاً
فما كان منهم الا بالرفض والمغادرة والبكاء كثيراُ للاعضاء او ( قلوب المنتدى ) اللى شافوا كدة راح عدد كبير منهم يشتم ويزعل ويتوعد بالخسارة مثل ما حدث فعلاً لانه شايف اصحابه واحبائه بيبكوا ويظلموا . .

صحيح دى كانت غلطه بسيطة من الادارة ( و اى حد بيغلط ) بس الحمد لله الناس ابتدت تفهم خلاص .. صحيح هاتاخد وقت بس مش مشكله طالما ان فيه دلوقتى توعيه جيدة من الادارة وبعض الاعضاء اللى فهموا النظام الجديد

وربنا يسهل وتبتدى بعض الشركات تدخل هنا تانى بالنظام الجديد والشركات القديمة تكون فهمت وتمت مقابلتهم من قبل الادارة مرة اخرى وتصحيح كل ما هو خطاْ

ومن نجاح الى نجاح متواصل وتقدم مستمر وعالمى . . . .
يا من احب الجلوس بين ازقاته. . . واستمتع بحوارات سكانه
واستمتع بإوقاتى بين سكناته . . .
و ادافع عنه بقلبى. . و بعقلى . . و بكيانى

منتدانا . . . . منتدى عرب هاردوير

[Am|r]

بمعنى اكثر وضوحا و شمولا ان متاجر عرب هاردوير ستقوم بدور اشرافى و سيتدخل اذا حدث اى لبس او مشكله
ما بين العميل و شركه ما و سيراقب سير العمليه التجاريه من خلال المتجر و انها تتدم على اكمل وجه و بدون مشاكل

.. اسمحلى محمد لو كان هذا الموضوع نزل قبل اعلانكم متاجر عرب هاردوير و وقف العضويات التجاريه ما كان ده كله حصل
لان و بكل بساطه ستصبح جميع الامور واضحه امام الجميع و لا بستطيع احد وثتها التشكيك فى كلامكم او تغير معناه
لو كان ده حصل من الاول ما كان حدث كل هذا الغضب من الاعضاء و منهم من ترك المنتدى ... انت تعلم
و كان كل شىء مشى بكل وضوح و دون زعل من احد او غضب من البعض ,,

[mohammed_kamal]

اه انت عايز تقول
عرب هاردوير - كشهاده ايزو :D
يامسهل ادينا مستنين -احسن الفجوه فعلا فى موضوع الاسعار دى عامللى مشكله - بقت لو عايز حاجه بضطر انزل انا

[Mohamed.Kamal]

شكرا محمد على موضوعك... البساطة حلوة

محمد تحدث ببساطة عن الموضوع، رغم أن كواليس الموضوع كثيرة ولم يذكرها أحد، فمثلا تم تسريب خبر أن العضويات التجارية ستتحول إلى نظام مدفوع، بالطبع انطلق "بائع" اسمه "انسان!" بلسانه وبشتائم غير محترمة تجاه عرب هاردوير وإدارته.

على صعيد آخر، طلبنا رعاية بعض الشركات والتوكيلات لنا في معرض القاهرة، فقابلنا الجميع إما بالسخرية أو بعدم الرد، وكأننا لا نرتبط بأية مصالح أو منافع متبادلة؟؟ ما هذا؟ هل وصلت درجة "المصلحة" و"مص الدماء" لهذا الحد؟

لا يمكنني أن أذكر أكثر ﻷن "الرقابة" ستقطع باقي الحكاوي

ألا تعتقدون أننا لو فكرنا في مصلحتنا نحن فقط وفي جيوبنا نحن فقط لكنا بعنا أمانتنا وذمتنا منذ قديم الأزل؟ سمعتم وشاهدتم حكايات شراء الذمم والعقول في سوق التقنية، وخصوصا في المنطقة العربية التي لا تعرف معنى المنافسه الشريفة،،،

هل تعلمون ما هو بيت القصيد؟
أغلب مشاريعنا "مجانية أو مدفوعة ليس مهما" تأتي لمصلحة المستخدم النهائي وضد المنتفعين وأصحاب المصالح سواء شركات أو أعضاء. فمنهم تأتي الغوغاء ومنهم يأتي الهجوم.

ودوما يأتي ردنا متأخرا ليس ضعفا أو تفكيرا، بل هو صبر لنرى وترون معنا الصالح من الطالح، من معنا ومن علينا... والحمد لله كانت دوما سياسة ناجحة وتأتي بثمارها...


نهاية أنتم على رأسنا، ومصلحتكم تهمنا، وحتى لو تكلفنا مزيد من الجهد والعمل، فهذا ما تعودنا عليه منذ سنوات طويلة جدا، تأتي الناس وتروح ويأتي أعضاء ومشرفون وتتغير الدنيا في هذا المكان، ولكن يبقى رضاكم هدفنا، ومصلحتكم فوق كل شيء، هذه الأمانة الثقيلة هي ما يضعنا دوما في وجه المدفع باستمرار.

أشكركم لسعة صدركم.

[أيمن النعيمي]

كلام منطقي وواقعي جدا ولا غبار عليه.
لكن الأهم أن تكونوا على أستعداد للمنافسة من خلال طرح آليات وفوائد تجعل مندوبي الشركات يسارعوا للأنضمام إلى هذه المتاجر وليس المنتدى فقط.

[gouba]

انا اول مرة اشوف الموضوع بس حبيت اقول راي

موضوع المتاجر حلة بسيط ان مندوب من الموقع يروح للشركات ويقنعهم بالموضوع و

واستفسار تكلفة الاشتراك اغلي من انك تعمل موقع ودومين ولا العكس

وبالنسبة للشركات الي لن ترضي بالقبول الف شكر ليهم وفي غيرهم كتير والقاهره فيها وباقي المحافظات

وممكن تخلوا ليكم مندوبين في كل المحافظات وبكده ينتهي الموضوع


شيء تاني ممكن تبحثوا عن حل تاني غير المتاجر وتكملوا فية

وياريت تكملوا وبدون احباط هي الحياة كده ما تحلاش بدون حل مشاكل

[eslamhamdy]

فعلا الواحد مفروض ميرد على اى حاجه الا اما يفهم الصح الاول و فعلا هو ده الصح و زى ما الشركات بتبيع عن طريق المنتدى و تشتفيد لازم كمان المنتدى يستفيد و كده برضه بنخدم العضو فى الاخر

[elbass]

اتمنى لكم التوفيق فى هذة الفكرة الجبارة
وبالفعل ستنتقل بسوق الكمبيوتر بمصر نقلة مميزة جداً

[0xAli]

الله يوفق الجميع

- حصول الشركة على Sub-Domain على عرب هاردوير شبيه بهذا: https://stores.arabhardware.net/STORENAME

كده Sub-Directory مش Sub-Domain

[Mubarak]

رسالة للأخوة الذين يقولون أننا تأخرنا في الرد، يا أخو الرد موجود، لكن لا يصلح أن نكتب الرد والجميع يشغب، لما تغيب العقول لا ينفع المعقول، مهما قلت من كلام حسن وبينت وكانت لديك الأدلة، ما دام عدد يزيد عن عشرة أشخاص في المنتدى يشغبون عليك وينتقدون، وهم لا يعرفون حتى طرف الموضوع، فكيف اتكلم؟
في حال الفوضوى واللمنطقية والغوغائية ليس من الحكمة أن تطرح أي كلام مهذب ومنمق لأنه لن يصلح شيئا، بل سيفسد الكلام لأنك لن تستطيع أن تكرر نفس الكلام الذي اعترضوا عليه، سيصبح تكرارا لكلام لم يستوعبوه، لذلك ننتظر حتى تهدأ الأمور ثم نتكلم.

اللوم في تأخير الرد لا يقع علينا، الرد موجود لكن لن تكون له قيمة لو طرح في وقته، وهذه ليست أول تجربة لنا.

[Mubarak]

بالمناسبة، للأخوة الذين يقولون أن المشروع صدم الشركات هذا الكلام غير صحيح، بعض الشركات تم التواصل معها قبل إنزال الإعلان، ووعدونا بالرد، ولم نجد ردا، وأنزلنا الإعلان لنتفاجئ بأن ردهم لم يكن مباشرة علينا كما وعدونا بل كان على الموضوع نفسه.