قصة حياة تبدأ مشوار الحياه..

**كثير التفكير** · 13-08-2011, 01:37

بسم الله الرحمن الرحيم
-------------------
شريط الحياه يروي قصة شاب

في الطفوله
وحيد لا يحب الاصدقاء او الزماله
فقط يعيش ليتأمل

المدرسه...
لا يصادق احد ويبتعد عن اللعب معهم وفي الفسحه
يجلس ويراقب هناك من يلعب الكره وهذا يأكل السندوتش واخر يشتري السندوتش
و مجموعه تتشاجر واخرى تضحك وهكذا ..
ينوي التفوق فيفشل في تحقيق اعلى الدرجات
وتمضي الحياه...

نهاية المدرسه...
يتعرف على الاصدقاء يبدأ بالخروج والمرح
يصادق الفتيات ويعيش قصة حب
ويمسك الشيشه
من تأمل وو وحده الى خروج ومرح الى ولد متدين
وتتزبزب الحياه من بين التدين تاره وبين اللهو والشيشه والفتيات تاره اخرى
فالحياه تشتت...

الجامعه..
يستقر بعيد عن اهله
احساس بالخوف من المجهول
يمسك السيجاره
يعيش قصص حب فاشله
يدمن المخدرات ويهوي قراءة الفلسفه والكتب

تمر عليه الايام والسنين كلحظات
فهو مغيب ويتحدى الصعاب
ليشق طريق الضياع
ومن ضياع الى ضياع مصحوبة بالكتب والثقافه الوهميه

فيكون من الحكم الكثير
فيصبح حكيم مسطول

وفي وحل الضياع يمر بالمشاكل
ويتكر مشاكله اثناء العمل
فكان يعمل من ضغره في الاجازات الصيفيه
ايام المدرسه وكيف واجه المشاكل الشريفه وتخطاها
والان عليه ان يواجه المشاكل الفاسقه ويتحداها

وتستمر الحياه......

في لحظة اعادات الحسابات وتحديد المصير..
يمسك الكشكول ويخطط لحياته
وكيف يتخلص من ادمناه وكيف يكون انسان ناجح
ماذا اريد؟؟
فحدد الاهداف والخطه وبدأ التنفيذ
فيفشل خلال عام كامل ويكفيه شرف المحاوله...

السنه التاليه
محاوله اثبات الذات من جديد
امسك الكشكول وكتب من جديد
وهذه المره نجح ولاول مره في حياته يشعر بالنجاح

في نهاية الجامعه...
تعرف على فتاه حبها سهر معها الليالي
احضان وشوق وتخلى عن جميع الاصدقاء
فتزوجها...

ما بعد الزواج..
انهى الجامعه حصل على شهادات علميه
تفوق في حياته وبدأ يحسب الانجازات

بعد مرور عام وكام شهر..
اصبحت الشهادات العلميه عليه ثقيله
شعور بالندم والتهور
كيف تزوجت هذه الفتاه
وكيف اتخلى عنها وهي تتعشم فيا الخير..
واكثر ما يحزنه وشعر بالندم مؤخرا

كيف اتزوج من غير علم اهلي
هو زواج رسمي عند المأزون ليس بزواج عرفي

ولكن لا يهم الاسم المهم هو المضمون

هذه اكبر مشكله ولا يعلم كيف يحل هذه المشكله

بعد ان حل مشكلة الفشل والادمان
لا يعرف ان يحل هذه المعادله
فتاه ضعيفة النسب يريد التخلي عنها
فزوج اختها مثلا رد سجون
وهو من عائلة فيها العالم والطبيب والمهندس
ورجال كتب اسمهم في التاريخ...

فتاه عار لاهله ولمجتمعه ستمنعه من ان يصل الى
اعلى المناصب بسبب تاريخ اهلها
مع انها متدينه وايضا تشق طريقها في العلم والتفوق

ولكن...
يبقى اهلها بصمة عار لها

وهكذا اصبح هذا الشاب
لا يعرف كيف يخرج من هذا الجحر الذي حبس نفسه فيه...

**mohammed_kamal** · 13-08-2011, 02:05

هل دى قصه حياتك
والله اكنك كنت مشاركنى حياتى
واصح انها اول مشاركه لك فمرحبا بك

**كثير التفكير** · 13-08-2011, 02:38

طيب جميل جدا :-))

بالنسبه للزواج
هل يتفق معاك كمان؟؟

لو كده يبقى نشوف الحل مع بعض!!

لانه عملي مشكله كبيره جدا
ومشتت تفكيري
ومش عارف ادرس او اشتغل بسببه

**mohammed_kamal** · 13-08-2011, 02:50

بالنسبه للزواج مش متفق معايا
بس عايز اقولك انى كنت على عتبه انى اتجوز وخلاص كنت هبتدى بس فوقت مره واحده واكتشفت انى ماشى غلط
بس مفيش مشكله ان حتى نحاول نحله المشكله
بص دلوقتى الجواز عاملك مشكله ازاى

**كثير التفكير** · 13-08-2011, 03:18

يا استاذي الفاضل

انا بعدد ما صححت مسار حياتي
مقدرتش ابعد عن واحده كنت عارفها

اتجوزتها ( من غير علم اهلي وبمعرفة اهلها) عند مأزون يعني

الكلام ده اكتر من سنه

البنت حالها اتحسن في جميع المجالات
مطيعه متدينه مثقفه والان هي بتدرس لتحصل شهادات من خارج مصر
فهي مهندسه زي

ولكن المشكله
هي النابغه وسط اهلها

فمثلا عائلة ابوها لا غبار عليها وهو رجل اعمال
ومطلق امها من 20 سنه

المشكله في عائلة امها واخوتها من امها
مستوى متدني جدا
ولا اقصد من الناحيه الماديه
فهم من الناحيه الماديه كويسين جدا

ولا من الناحيه الشرفيه
لان لا دليل عليه وينتهي مع مرور الزمن

ولكن
زوج اختها مثلا رد سجون
وعندها اخ من امها هيكون ده مصيره قريب

فالمشكله في الورق القانوني

وطبعا لما اكبر كمان وكمان
وطموحي يكبر معايه
وعايز امسك منصب مش هقدر وده بسبب اخوتها مثلا

اواجه عائلتي بيها كمان مش هقدر لنفس السبب

**كثير التفكير** · 13-08-2011, 03:23

ومتنساش كمان
اده ده هيبقى خال الولد :-))

والانسانه دي مش قادر اظلمها وهي متعشمه فيا خير

**mohammed_kamal** · 13-08-2011, 03:33

شوف عشان كدا الطلاف مشرع لكدا
بس انا ملاحظ حاجه
ان زوج اختها هو الى فيه المشكله الى هو عديلك
والاخ من امها اكيد مش اخوها من ابوها ولا انا غلطان
انا ملاحظ المشاكل من بره العائله بتاعتها
جوز اختها اخوها من امها الموضوع بعيد عنك نسبى
دلوقتى فى اولاد

**كثير التفكير** · 13-08-2011, 03:55

لا مفيش ولاد
احن متفقين كمان 3 سنين بالكتير ان شاء الله

بالنسبه للطلاق..ده اسهل حل ولكن في نسبه كبيره من الانانيه والظلم ليها
وعشان كده انا مضايق خاصة انها متستهلش كده....
ير
عائلة الاب ناس محترمه جدا من كبيرهم لاصغرهم

المشكله في عائلة الام واخوتها من امها من غير الوالد...
لان امها عندها 5 اولاد من الزوج الثاني الهي كمان مطلقه منه...

بالنسبه لخوتها من نفس الام والاب
مفيش غير اخت ليها سابت التعليم من تانيه ثانوي
ومتجوزه واحد عليه احكلم
:-)))

**mohammed_kamal** · 13-08-2011, 04:03

يبقى مفيش غبر 3 حلول

1 انك تكمل معاها وتحاول توصل
2 انك تسيبها عشان توصل
3 انك ترضى بالى عندك دلوقتى

بس انا رايى الخاص حيله بس حيله مش كويسه معلش يعنى انا محامى بقى واوقات بتحايل على القانون بطرق مش كويسه
انت هطلقها عادى وهتتجوزا عرفى بس فى حاجه لما تجوزا عرفى خلى فى علانيه لان شرط توثيق العقد مش من الاسلام اصلا اوك
وكل ورقك وبطاقتك هتبقى عاذب ومفيش سيره انك متجوز دى بعد ما توصل لمركز بتاعك اعلان جوزك رسمى

**Mubarak** · 13-08-2011, 04:12

انا مقدر جدا الظرف الذي انت فيه، لكنك بحاجة لاستشارة أربع أشخاص.
1- قانوني.
2- شرعي.
3- اجتماعي.
4- نفسي.
وأحيانا قد يجتمع لك الشرعي والاجتماعي والنفسي مرة واحدة.

أخي الكريم، يوجد في مصر مراكز للاستشارات الاجتماعية، ما تطرحه هنا أمر في غاية الحساسية والدقة، وهي من الأمور التي من الأولى أن يتكتم عليها الإنسان ويستشير من له باع في مثل هذه النوعية من المشاكل.

**كثير التفكير** · 13-08-2011, 04:35

استاذ محمد كمال:-)
انا مش فاهم ال 3 حلول...
اما عن عرفي او مأذون... فده مش مشكله لان البطاقه عندي لسه فاضل لها 5 سنين
وفي العمل... الناس عارفه انا متجوز
الموضوع في اهلي و واولادي في المستقبل

وكمان لو انا طلقت
وجيت اكجدد البطاقه لازم اختار مطلق :-)
---------------------------------------------------
استاذ مبارك...
شكرا جدا على المعلومه

ولكن القانوني اسأله في ايه؟؟

انا اكبر حزني على اهلي
خاصة والدي...

**mohammed_kamal** · 13-08-2011, 04:42

اقصد كمل جوزاك كدا بحالتك بالمشاكل كلها
ويمكن ربنا يكرم والله وتوصل للى انت عايزه
(عارف انا حاسس ان الى انت فيه دا بسبب ان انت عملت دا من وراء اهلك)
بس قولى بصراحه
انت عايزها هى ولا يهمك الشغل والمناصب

**كثير التفكير** · 13-08-2011, 05:26

بصراحه...

انا حققت حاجات كتير
بسبب تشجعها وبسبب اني اتحملت مسؤوليه من غير علم اهلي
انت عارف ان الاهل بتساعد في الشقه وحاجات كتير

طبعا انا مقدرش اخد المميزات دي دلوقتي
فده كان سبب اني اتحرك واحاول اوفر لينا مكان
وبتحرك اكتر عشان عايز احقق احتياجاتي واحتياجاتها
وبالتالي كان ليها الفضل الكبير اني ابطل سجاير مثلا
اني ازاكر واحصل على شهادات مثلا

فليها الفضل انها خلتي احس اني انسان سواء كان بصوره مباشره او غير مباشره

يعني الكان نفسي فيه على المدى القصير حققته

من غيرها اعتقد كان صعب احقق حاجه
فصعب اخد قرار اني اسبها...
مع انه القرار ممكن يكون موجود في يوم
مع ان عقلي طالبه الا ان ضميري قبل قلبي رافضه....

لاني بكره التفكير بالقلب ولا اعترف به
المشكله في الضمير...

بالنسبه للشغل والدراسه..
هي بتوفري الوقت الكافي والراحه الكافيه عشان انتج
تقريبا مهما احاول ازعلها مبتزعلش (شفت محظوظ ازاي :-)))) )

وعشان كده العمل لموش علاقه لانه من المستحيل
اقحمه هو او اي زميل بتفاصيل حياتي الشخصيه الدقيقه

المشكله انا بقول كمان 10 سنين مثلا
لو عايز ادخل منصب سياسي او او او

سعتها هيكون ايه الوضع؟؟؟؟؟!!!

ده لو بنتكلم في المستقبل وفيا انا

طيب
بنسبه لابني
ملوش علاقه بموضوع ده خالك من امها فقط او ده جوز خالتك او او
لان لو هيكون فيهم واحد او اتنين مش تمام ماشي
بتحصل كتير يطلع واحد كده متسول ويخرج من ظهر الصالح طالح
بس لما يكون عنده 5 من خلانه مثلا تعلمهم مش تمام
يعني انا شايف ادامي محدش فيهم هيكمل تعليمه مثلا
انا بتكلم على ابناء الام دي صوره صعبه لانها في المستقبل هنسأل سؤال
هتشتغل ايه؟؟؟ والمتعلم بيلاقي شغل بالعافيه؟؟

اما بنسبه لخوتها من الاب فقط
دول شرف

الا اختها المن الاب والام السابت تعلمها في تاني ثانوي ومتجوزه واحد رد سجون

النقطه التالته
عائلتي:: بصراحه مش فارقه نهائي معايه
المشكله والدي و والدتي
وان اكنت امي مش هتزعل وهتتفهم الموضوع
ولكن والدي..

هتبقى ليه صاعقه

خلاصة الكلام الفوق ده

1- مثلا طموحي وداني لمنصب سياسي او او
2- ابني
3- والدي( مش هيرفض ولكن هيزعل جدا)

ده الشاغل تفكيري يا استاذ محمد

**mohammed_kamal** · 13-08-2011, 05:33

لاسف المنصب السياسيى لانى حاولت الوصول الى محلق دبلوماسى من قبل ولكن واجه ان احد من عائلتى كان من احد الاحزاب الغير مرغوبه فيها فما بالك انت
ابنك (فعلا مشكله بس حلها ان يبقى فى استقلال تام بينك وبينهم (اهل زوجتك) واعتقد ان دا صعب الا اذا قدرت توصل لنوع من الاتفاق مع زوجتك على الاستقلال منهم تماما

شوف الحل انت عارفه بس انت رافضه

**كثير التفكير** · 13-08-2011, 05:49

المشكله
ان الدين بيلعب دور اساسي في الموضوع
زي صلة الرحم
لاني ديما بحاول معاها تتواصل مع اخوتها
وتغير تفكرهم

اعتقد لو انجبت منها
هيكون الترشيد للولد انه يفتخر بأهله
سواء ده كان سباك او حرامي ربنا يتوب عليه

الواجب انه يصل رحمه
والا هنتعدى على الله لنرضي النفس :-))

شكرا على مجهودك معايه
وانا اسف اني صدعتك معايه

بس تصدق اني ارتحت كتير
وفي حاجات كتير اتضحت

بس تعالى نفكر كده في الطلاق
1- ممكن تتسبب في فشل انسانه + مقاطعتها لاهلها
ومتعرفش كمان المساوء الممكن تحصل خاصة لو حست ان
سبب الانفصال مش شخصها

2-بعد التصرف الاناني
اتجوز واحده تانيه تطلع عيني
ومعرفش افكر غير في ازاي ارضيها
وافكر في مشاكلها
وبالتالي هفضل مكاني ماتحركش
لانه مش مسبب ليا الراحه

وعشان كده مش هوصل لاي منصب او غيره
بل بالعكس عيشت نفسي في نكد :-))

3- يمهل ولا يهمل
ما عندك مثلا حد كان يتمنى يناسب وزير او او
وطلع في الاخر حرامي ومرتشي
فتلاقي الراجل المحترم في عائلة زوجتك او عائلتي انا
بقى كمان رد سجون

4- الابن يطلع فاشل حرامي
حتى لو حاولت تحسن تربيته ممكن يقع مع شلة سوء
وفجأه يخش السجن بتهمة اغتصاب..

في نظرتين للامور

-- خارجيه
-- داخليه

فلو خارجيه هنطلق
ولكن لو فكرنا من وجهة النظر الداخليه
هلاقي ال 4 نقط الزكرتهم لك فوق

وبناء عليه....
التفكير مشغول والمشكله موجوده :-))

ملحوظه:
مشاركاتك بتفدني جدا فمتحرمنيش منها

الموضوع: قصة حياة تبدأ مشوار الحياه..

أدوات الموضوع

تقييم هذا الموضوع

عرض

قصة حياة تبدأ مشوار الحياه..

رد: قصة حياة تبدأ مشوار الحياه..

رد: قصة حياة تبدأ مشوار الحياه..

رد: قصة حياة تبدأ مشوار الحياه..

رد: قصة حياة تبدأ مشوار الحياه..

رد: قصة حياة تبدأ مشوار الحياه..

رد: قصة حياة تبدأ مشوار الحياه..

رد: قصة حياة تبدأ مشوار الحياه..

رد: قصة حياة تبدأ مشوار الحياه..

رد: قصة حياة تبدأ مشوار الحياه..

رد: قصة حياة تبدأ مشوار الحياه..

رد: قصة حياة تبدأ مشوار الحياه..

رد: قصة حياة تبدأ مشوار الحياه..

رد: قصة حياة تبدأ مشوار الحياه..

رد: قصة حياة تبدأ مشوار الحياه..

المواضيع المتشابهه

هكذا علمونى .. وهكذا اتعلمت من الحياه ::

!!! فلنتخذ من حياة القنافذ درسا لنا‏

مشكلة حياة او موت بلعبة مافيا 2

المفضلات

المفضلات

ضوابط المشاركة