Samsung Galaxy S II

[is master]

تقرير وتجربتى مع التليفون الذكى الاكثر من رائع Samsung Galaxy S II
( اول انطباع عن الاندرويد )








المواصفات الفنيه







الاول هتكلم عن الاندرويد كنظام بعيدا عن الموبيل نفسه

زى ناس كتير دى اول تجربه ليا مع الاندرويد والتاتش بشكل عام

تجاربى السابقه كانت مع نوكيا وكانت وقتها موبيلات ممتازه جدا
لكن ديما كنت بزهق من الموبيل لان مش مفيش جديد ولا تطوير
غيرت من N70 لـ N73 لـ N86
استخدامى للموبيل لم يزيد عن التصوير وتشغيل الميوزيك بلير
اكتر من كده الموبيلات دى لم تقدم اى جديد

لكن مع الاندرويد كل يوم فى جديد
نظام بسيط وسهل جدا فى التعامل مع عدد تطبيقات مهوله

اول شئ لاحظته بعد ما ركبت شريحة الخط ودخلت على الفيس بوك والياهو
نزل كل الايميلات واكونتات الفيس بوك فى الـ Contacts اتوماتيك
وطابق ارقام التليفونات الموجوده فى الشريحه باكونتات الاعضاء على الفيس بوك اللى كاتبين رقم تليفونهم ودمج الصور الشخصيه والايميل ورقم التليفون فى كونتاكت واحد

استغربت جدا لما لقيت صورة واحد موجوده فى الـ Contacts مع انى مش مختار له صوره
كل ده بدون تدخل

جمال النظام ايضا فى انه لا يجبرك على استخدام برنامج معين
مثلا .. لو نزلت ميوزك بلير وحبيت تشغل اغنيه يسألك عن البرنامج اللى تحب تشغل بيه الاغنيه


ميزه كمان هى تعديل واجهة الجهاز انك تقدر تعلم اختصار للبرامج المهمه فى الواجهه وتحط اضافات زى ساعه والطقس والاخبار او تخلى الفيس بوك و تويتر فى الواجهه ينبهك باى تحديث


الماركت والبرامج ده موضوع لوحده
كفايه ان اى برنامج تحتاجه تلاقى بدل البرنامج عشر برامج مختلفه
والتحميل مباشر من ماركت اندرويد شئ جميل جدا





نتكلم عن الموبيل
( جميع الصور من على النت )


مشتمـــــــــلات الجـــــهاز


الموبيل بيجى فى كرتونه صغيره جدا







بيجى بنفس المشتملات اللى فى الصوره دى تماما بالاضافه طبعا للبطاريه







التصميم والشاشه








مشاهدة الموبيل ثلاثى الابعاد :-

https://www.gsmarena.com/samsung_i910...-spin-3621.php




مع اول لمسه للجهاز

هتحس بحجم الموبيل الكبير وسرعة استجابة التاتش

وهتشوف الوان الشاشه اللى اكيد هتستمتع بيها جدا وتنسى اى موبيل تانى

لما قارنت الوان الشاشه بالوان نوكيا C6 و 5800 هتشوف فرق رهـــيب بكل معنى الكلمه الوان التليفونات التانيه ميته بعكس الإس 2 الصوره فيه بتنطق

الشاشه من اجمل واروع مميزات الجلاكسى إس 2
الرؤيه تحت اشعه الشمس مع جعل برايتنس الشاشه اوتوماتيك
( يوجد سينسور يستشعر الضوء وعلى اساسه يحدد برايتنس الشاشه )
تكون الرؤيه ممتازه جدا وواضحه

فى الاول هيكون صعب شويه فى الستخدام بسبب الحجم لكن مع الوقت هتتعود عليه
من فتره طويله كنت بفكر اجيب نوكيا 5800 علشان حجم الشاشه الكبير لكن لما اشتريت الجلاكسى وشوفت بعدها الـ 5800 حسيت انه انكمش وصغر

الموبيل نحيف جدا بشكل واضح






الصــــــــــوت





الموبيل فى سماعه واحده فى الخلف من الاسفل ودى تعتبر عيب لكن من السهل انك تمسك الموبيل وتوجه الصوت للامام بايدك لان مكان السماعه اعلى نسبيا من باقى الجهاز
الصوت متوسط مش عالى اوى لكنه نقى جدا

الصوت فى الهاند فرى عالى جدا ونقى افضل من تجاربى السابقه مع نوكيا



الكـــــــاميـــرا





جودة الكاميرا فى التصوير الثابت ممتازه
وفيها خاصية Smile Detection
وعند تفيعلها وضغط اللتقاط لا يتم التقاط الصوره إلا لما الشخص يبتسم
ودى ميزه جميله جدا خصوصا فى تصوير الاطفال


تصوير الفيديو
بالرغم من انه بيصور Full HD 1080 لكن بعد التجربه فضلت التصوير HD 720 الصوره بتكون انعم ومساحتها معقوله ولم الاحظ فرق فى العرض على شاشه 23 بوصله بين الجودتين لما صورت فى نفس المكان
يمكن كمان 720 افضل وانعم فى التصوير + لا يمكنك استخدام الزوم عند تصوير Full HD
لكن ممكن تلاحظ فرق عند العرض على شاشات كبيره

الفلاش
الفلاش بالرغم من ان شكله صغير كده لكن قوى جدا
واقوى من N73 بفرق كبير





التــــــــاتــش




طبعا شاشة الموبيل كابستيف زى أغلب الموبيلات الحديثه الآن
استجابة التاتش ممتازه جدا
المالتى تاتش ممتاز جدا وحساس

عيب الكابستيف سكرين ان ما ينفعش تكتب بقلم مع استخدام الموبيل مش محتاج قلم لان الشاشه كبيره بما يكفى




الـــــــواى فــــــاى



الموبيل يدعم جميع الـمودات الخاصه بالواى فاى
من اول المود B حتى المود N
الفرق بين المودات دى هى سرعة نقل البيانات بين الروتر او الاكسس بوينت والموبيل

سرعة التصفح والداونلود من الواى فاى سريعه جدا







البطــــــــــاريـــه




المستهلك الاكبر للبطاريه هى الشاشه



دائما بتكون هى رقم 1 فى استهلاك البطاريه لكن تستاهل بصراحه


لو بستخدم الموبيل بشكل جامد واى فاى وجيمز ومكالمات وكاميرا غالبا بشحنه مرتين فى اليوم
مره وقت النوم يستمر بعدها 7 ساعات مثلا واعيد شحنه ساعه او اتنين ( لا يصل الى 100 % ) يستمر لاخر اليوم
وشايف انه وقت قياسى جدا بالنسبه للاستخدام القاسى

لكن فى حالة الاستخدام المعقول هتشحنه مره واحده فى اليوم ويكون كافى جدا
وده اللى ماشى عليه الآن بعد ما جربت الموبيل كويس

البطاريه لا تقلق منها ابدا لان حتى لو فيها 10 % بدون استخدام تستمر وقت طويل جدا فصعب يفصل منك شحن فجأه إلا لو انت مصمم انك تفصله وشغال عليه

اعتقد لو سيبت الموبيل فى وضع ستاند باى يشتغل 4 ايام مثلا وممكن اكتر ( راى شخصى )
وكل واحد على حسب استخدامه خصوصا الواى فاى بيتسهلك جزء كبير من البطاريه عكس الميوزيك بلير استهلاكه قليل لان البروسيسور والرام والشاشه بيكونوا فى اقل استهلاك لهم

بصراحه اداء البطاريه ممتاز بالنسبه لاستهلاك الشاشه والبروسيسور والرام




منقول للامانه

اتمنى اكون قد افدتكم وياريت تقييم الموضوع
اى استفسار موجود للرد عليه ان شاء الله

[crashplant]

شكرا علي الموضوع و لو ان فيه موضوعين هنا في المنتدي عن الجالاكسي اس 2 بس التنسيق هنا احسن ده اولا

ثانيا حضرتك قلت ** لصوت فى الهاند فرى عالى جدا ونقى افضل من تجاربى السابقه مع نوكيا**
الكلام ده مش دقيق اوي لأن السماعات المرفقة مع الجهاز ليست في قوة سماعات هواتف نوكيا ولو مش مصدق جرب انا اشتريت سماعات جديدة بعد ما جربت السماعات بتاعة سامسونج كمان بأستخدم برنامج POWER AMP بدل من الميوزيك بلير العادي لأنه احترافي و أفضل .

ثالثا حضرتك قلت **استغربت جدا لما لقيت صورة واحد موجوده فى الـ Contacts مع انى مش مختار له صوره
كل ده بدون تدخل **
ده علشان زي ما حضرتك ذكرت انت عملت سينك للفيس بوك و التليفون فهو اوتوماتيك بيضيف بيانات الأصدقاء الموجودين في الفيس بوك و في دليل الهاتف .

رابعا : **سيبت الموبيل فى وضع ستاند باى يشتغل 4 ايام مثلا وممكن اكتر**

جرب تفصل الواي فاي و تسيب الموبايل ستاند باي علي HSPDA او 3G G لو كمل يوم يبقي ليك الحلاوة

**يمكن كمان 720 افضل وانعم فى التصوير + لا يمكنك استخدام الزوم عند تصوير Full HD**
الزووم الرقمي بيقلل جودة الصور يعني لو علي اعلي جودة و انت قربت و بعدت احسن من انك تستخدم الزووم الرقمي

في النهاية احب اضيف حاجة ان الموبايل ده يستحق تقييم 8.5/10 لأن سامسونج اهملت في حاجتين 1- اداء البطارية 2- الأهتمام بالوزن علي حساب جودة المكونات ( ده رأي شخصي من مستخدم محترف )

[xvivax]

السلام عليكم
- مبروك على حضرتك الجهاز و ربنا يباركلك فيه ان شاء الله
- فعلا زى ما عمرو قالك انت هتلاقيك مفعل خاصيه sync و على فكرة هى موجوده فى كل ال smart phones
مش galaxy s2 فقط
- بالنسبه للسماعات هى مش قويه اوى للدرجه لا سامسونج بتهتم بالنقاء على حساب الصوت العالى و فعلا جرب برنامج power amp فعلا برنامج احترافى
انا كمان بستخدمه و لو بتحب الصوت العالى اختار من pre sound profiles >> phone speaker loud
بس من وجهة نظرى امكانيات سماعات سامسونج افضل من نوكيا من حيث اظهارها اداء الصوت
ليس ارتفاعه
- البطاريه استهلاكها كويس طبعا و لكن على فكرة بتختلف من تحديث لتحديث و من روم لروم انا شخصيا افضل روم ريحتى فى الحوار دا
الروم الرسمى jpkg5 من حيث سرعه و اداء و استهلاك
و دى صورة لاستهلاك البطاريه بتاع 4 ساعات مكالمات و اخويا بيلعب على الجهاز كتير جدا خصوصا grave defense hd & fieldrunners hd


و دى صورة ل benchmark على الروم دى فاجئنى مرة بنتيجه فظيعه



- هتحس بتغير كمان فى اداء البطاريه وسرعه شحنها مع الاستخدام الكتير هتحس انها بتقعد اكتر وتشحن اكتر مع مرور الوقت
- ممكن تحس بمشاكل حرارة فى البدايه لكن انا على الروم اللى قلتلك عليها الحمد لله مفيش اى مشاكل فى الحرارة
- بالنسبه للماركت الرسمى فى برامج تانيه افضل منه و بتنزل منها البرامج المدفوعه مجانا منها blackapp
- بالنسبه لخامات الجهاز هى مش بجوده ال htc و لكن تبقى هى الحل الوحيد للوصل لاخف و انحف هاتف فى العالم و لكن برده لسه من يومين تقيم الايفون 4 على انه انحف من جالكسى s2
لان السمك يحسب من اعلى نقطه لاقل نقطه و طبعا اللى عمل المشكله اخر حته فى الجلاكسى 2 اللى فيها السماعه
- الموبيل هيعبجك جدا كأداء و برامج و العاب
- من وجهة نظرى الموبيل دا يغنى عن psp & camera hd
- تقييمى 9/10
و هو ليس الا تقييم شخصى

[is master]

مظنش ياجماعه ان سماعات النوكيا انقى من السامسونج موضوع البطاريه ايلى بتقعد يوم على الستاند باى ازاى يعني اومال لو حملت على الجهاز شغل واتصال والعاب بتقعد ساعتيين ولاا ايه ؟

بعديين انا شايف ان الجهاز نقطه لصالح سامسونج وموضع الوزن دة صعب ان تلااقى وزن خفيف اوووووووووى وجودة خامات عاليه

[crashplant]

مظنش ياجماعه ان سماعات النوكيا انقى من السامسونج موضوع البطاريه ايلى بتقعد يوم على الستاند باى ازاى يعني اومال لو حملت على الجهاز شغل واتصال والعاب بتقعد ساعتيين ولاا ايه ؟

بعديين انا شايف ان الجهاز نقطه لصالح سامسونج وموضع الوزن دة صعب ان تلااقى وزن خفيف اوووووووووى وجودة خامات عاليه

بالنسبة لسماعات النوكيا المقصوده هي سماعات هواتف اكسبريس ميوزيك الهيدفونز الإير بلجز و ليست السماعات العادية
لو قعدت تلعب الموبايل هيفصل منك بعد ساعتين او تلاتة + هتلاحظ سخونة شديدة في منطقة الكاميرا
الخامات الرديئة تؤدي الي عمر افتراضي اقصر + مقاومة للعوامل الطبيعية اقل مثل الأتربة و الأوساخ و الصدمات .... الخ

[is master]

ممممممممممم ممكن يكون كلاامك صح بس دة ميمنعش ان الجهاز حاليا هو اقوى هاتف لحد دلوقتى ومفيش منافس لييه غيير السينسيشن

[is master]

السخونه دي اى حد لاازم يتوقعها لاان ثنائى النواة دة موضوع جديد بالنسبه للموبيلات وشى متوقع لحد ميطوروها وتنتهى المشكله دى

[xvivax]

على فكرة موضوع السخونه بيقل مع التحديثات انا مكنتش مصدق غير لما حسيت الفرق مع التحديث

[crashplant]

ممممممممممم ممكن يكون كلاامك صح بس دة ميمنعش ان الجهاز حاليا هو اقوى هاتف لحد دلوقتى ومفيش منافس لييه غيير السينسيشن

للأسف جالاكسي اس 2 مش اقوي جهاز في العالم .... حاليا الأقوي سامسونج جالاكسي نوت و بعدين سينسيشن اكس اي

[Mohmmed Zaky]

بالنسبة لسماعات النوكيا المقصوده هي سماعات هواتف اكسبريس ميوزيك الهيدفونز الإير بلجز و ليست السماعات العادية
لو قعدت تلعب الموبايل هيفصل منك بعد ساعتين او تلاتة + هتلاحظ سخونة شديدة في منطقة الكاميرا
الخامات الرديئة تؤدي الي عمر افتراضي اقصر + مقاومة للعوامل الطبيعية اقل مثل الأتربة و الأوساخ و الصدمات .... الخ

فى تجربة لاحد الالعاب المعتمده على حساس الحركه بشكل كامل
انتهى عمر البطاريه من 100 % إلى اقل من 10 % فى حوالى 8 ساعات متواصله بدون انقطاع مع ضبط اضائه الشاشه على اتوماتيك
( ما تستغربش كنا اكتر من واحد بنلعب طول اليوم والحمد لله انهينا اللعبه :D )

موضوع السخونه تغير كتير جدا مع تحديث السوفت وير
لكن ما زال الجهاز ييخسن لكن اقل كتير من الاول واعتقد ان الموضوع ده لا يؤثر على عمر الجهاز لانه مصمم لتحمل درجات حراره عاليه وكذلك الخامات الخاصه بيه

راى شخصى ==> الخامات الرديئه ليست هى خامات الجلاكسى إس 2 قد تكون خامات تليفونات اخرى
مش معنى ان الجهاز تم تصنيعه من البلاستيك ان الجهاز ردئ ابدا ... بل معناه ان الجهاز خفيف ونحيف جدا
والجهاز بزجاج غوريلا جلاس مقاوم للخدش ,, وما هى علاقة تحمل الاوساخ بسمارت فون لا يظهر منه إلا الشاشه والظهر محمى بكفر لتحمل الرمى على المكتب :ah24:
من حيث الصدمات .. كان معايا سابقا نوكيا إن 73 مصنع من البلاستيك مع بعض اجزاء المعدن ووقع اكتر من مره بدون اى تأثير
ومن بعده N86 ذو الوزن الكبير ومتانة المعدن والحمد لله مع اول واقعه ليه ضرب فلاته مع ان السلايد كان مغلق

جرب تفصل الواي فاي و تسيب الموبايل ستاند باي علي HSPDA او 3G G لو كمل يوم يبقي ليك الحلاوة

لا اعمل على 3G إلا نادرا وفى حالة تفعيله او تفعيل الواى فاى فى وضع الاستاند باى الجهاز مش بيكمل يوم
بالفعل البطاريه غير مؤهله لتفعيل الـ 3G مع انترنت الشركه طوال اليوم
لكن بالنسبه لى الموضوع ده لا يعنينى لانى مش بستخدمه :p


تحياتى

[is master]

للأسف جالاكسي اس 2 مش اقوي جهاز في العالم .... حاليا الأقوي سامسونج جالاكسي نوت و بعدين سينسيشن اكس اي

شكلىمش متابع بقى يا باشاا بس محدش لسه عملنا تقرير عن السينسيشن الجديد والسامسونج نوت تقريبا لسه مصدرش