G.Skill Ripjaws-X 8GB DRR3 1866 MHz Memory Kit Unboxing & Overview

[Sherrah]

السلام عليكم و رحمة الله و بركاته

اخوكم محمود من القاهرة, مصر. بأذن الله, انا مقبل على شراء جهاز جديد في خلال الشهرين القادمين. و بما اني مش بحب اجيب الجهاز كله على بعضه, فقررت اجيبه قطعة قطعة. و بالفعل ابتديت في المهمة العظيمة التي تسعد القلب و تحزن المحفظة

انا بعت جبت الرامات و الباور صبلاي من بره. ليه؟ عشان انتو طبعا عارفين ان مش كل حاجة موجودة في مصر. و اللي موجود في مصر طبعا مش وحش و لكن الواحد لما حاجة معينة تخش دماغه, مبيقتنعش بأي بديل ليها. و انا للأسف دخل دماغي باور سبلاي معين و ملقيتوش هنا. فركبت دماغي و قلت "مليش دعوة, حجيبه من بره"

طبعا نفس الحكاية للرامات. طبعا فكرتوا "ماهي رامات GSkill Ripjaws-X موجودة في مصر!!". و لكن الفكرة اني دورت و ملقيتش الرامات دي بالذات و اللي هي 8 جيجا و تردد 1866 ميجاهرتز و تواقيت 9-10-9-28 و تشتغل على فولت 1.5 . ممكن تكون عيني غفلت عنها هنا و لكن تخيلوا اني جبتها من بره ارخص من لو كنت جبتها هنا (70 دولار كله يعني 420 جنيه مصري و هنا ال8 جيجا 1866 ب700 جنيه على الاقل).

اسف على المقدمة الطويلة. يلا نبتدي في الunboxing (ارجو انكم تعذروني على اي اخطاء في التصوير. فانا مبتدئ في الموضوع ده:o)



نبتدي ببعض الصور المختلفة للعلبة. الرامات موضوعة بإحكام داخل العلبة البلاستيك. لو تلاحظوا على العلبة مكتوب" Designed for 2nd Generation Intel Core Processors and P67 Platforms". ده مش معناه انها تشتغل على ساندي بريدج فقط و لكن على اي منصة اخري. الفكرة في الجملة دي ان الساندي بريدج بيحتاج (و لكن مش ضروري قوي) رامات تشتغل على فولت 1.5 عشان الرامات تشتغل باعلي كفاءة ليها, على عكس اللي كان منتشر قبل كده و تشغيل الرامات على فولت 1.65










و دي صورة للعلبة من الخلف. مفيش اي معلومات و لكن GSkill عايزة تقولنا انها جامدة و الحركات دي يعني هههه :rolleyes:





و دي بعض الصور لرامة واحدة منهم بعد ما شلتها من العلبة. طبعا احنا مش حنقدر نشوف التشيبات نفسها, لأنها متغطية بالمشتت الحراري المميز للفئة ال Ripjaws-X series من GSkill بلونه الاحمر المميز.






و هنا نشوف كل المعلومات اللي محتاجينها عن الرامات دي:
السعة: 8 جيجابايت (2 في 4 جيجا)
التردد: 1866 ميجاهرتز
الفولت: 1.5 فولت
التواقيت: 9-10-9-28 (الرامات دي تعتبر CL9 الا و هو CAS Latency 9)




و دي محاولة يائسة اني اشوف التشيبات. و لكن نقدر نلاحظ السمك بتاع الرامة (مع انه مش حيفرق قوي) و نقدر برضه نلاحظ طول الرامات و التي تعتبر متوسطة. يعني مش طويلة جدا و لا قصيرة زي الرامات من غير مشتت. التقارير على النت بتقول انك مش حتواجه مشاكل مع الرامات دي في حالة تركيب مشتت هوائي احترافي كبير للمعالج و لن يحدث ما يسمي بالClearance issue or conflict.





و ده منظر الرامة من فوق و ده اللي متوقع نشوفه عند تركيب الرام في البوردة.




و ملاحظة صغيرة كده. الPCB او البوردة اللي راكب عليها التشيبات لونها اسود و ده يختلف عن معظم الرامات اللي بيبقي لونها اخضر عجيب ممكن ده ميكونش عامل مهم بالنسبة لناس كتير و لكن بما اني نمكي حبيتين و GEEK :cool:, احب الالوان تكون متناسقة مع بعضها(و ده اللي ان شاء الله ناوي اعمله في الجهاز كله)




و دي صورة الرامتين مع بعض (يا حلاوتكم يا جمالكم )




و الصورة دي اهداء لأفضل منتدي geeks على الاطلاق :D





و في النهاية, ارجو ان يكون الunboxing الخفيف ده عجبكم . ده اول unboxing اعمله فيا ريت لو فيه اي اخطاء او تعديلات, تقولولي علي طول عليها.

و انتظروا قريبا جدا unboxing لباور سبلاي مختلف شوية (غير منتشر في مصر اقصد) و لكن مش حعمله دلوقتي عشان عايز اعرف العيوب في موضوعي ده الاول عشان مكررهاش بعد كده :cool:

سلام

[ZEX]

مبرووووك الرامات و عقبال باقى الجهاز
Unboxing جميل واصل من غير ما تفاصل
عالفكره انا برضوا بحب تناسق الالوان فى الكيسه و تكون الكيسه شكلها حلو من جوه
نوع الباور ايه ؟؟ شوقتنا و ناوى على قطع ايه

[Sherrah]

مبرووووك الرامات و عقبال باقى الجهاز
Unboxing جميل واصل من غير ما تفاصل
عالفكره انا برضوا بحب تناسق الالوان فى الكيسه و تكون الكيسه شكلها حلو من جوه
نوع الباور ايه ؟؟ شوقتنا و ناوى على قطع ايه

اسلام حبيبي الله يبارك فيك

فعلا ناس كتير بتتجاهل الشكل الداخلي علي اساس انه مستخبي. لكن اعتقد الشكل الداخلي في نفس اهمية الخارجي.

الباور هو اللي كنت قلتلك عليه قبل كده و هو الThermaltake Toughpower Grand 850W :D

و انا ان شاء الله ناوي على البلدوزر لو طلع كويس, حجيب ال8100 و ال crosshair v formula او الfatal1ty 990fx لسه مقررتش. و كرت الشاشة حستني لما الHD7970 ينزل. الكيسة level 10 gt. و بعد بفترة باذن الله عامل حسابي على ocz agility 3 120gb و الantec kuhler 620.

و شوية كابلات من bitfenix حجيبها من بره.

و شكرا علي المرور

سلام

[ZEX]

تمام , مبروووك مقدما

ايوه خليك فى bitfenix او ModRight احسن من NZXT كخامه

[Skyline1989]

مبروووك على الرامات

وكويس انك حصلت على رامات بتردد 1866 بفولت 1.5 :ah7:

[mido hamdy]

الف الف مبروك اخى محمود على الرامات الرائعة . وموضوع منسق ورائع . وعقبال الجهاز ان شاء الله .

كنت عاوز اعرف جبت الرامات من موقع ايه ؟ وجبتها عن طريق شركة ادفعلى ولا عن طريق صديق لك فى الخارج ؟

[wella1000]

مبروك اولا الرامات .........
وشكرا على ال Unboxing الجميل
وقد تم

[H@IDER]

ألف مبروك أخ محمود, أنتقاء أحترافي للذواكر, بارك الله لك فيهم

كنت أتمنى أن أفرء المراجعة باللغة العربية الفصحة, و لكن لا مشكلة, أن شاء الله تصحح هذا الخطأ في مراجعاتك القادمة.

تم التقييم لك عزيزي على هذا المجهود

[is master]

مبروك وهنسستنى الجهاز كولو لما يكمل ومراجعه ممتازة

[Sherrah]

تمام , مبروووك مقدما

ايوه خليك فى bitfenix او ModRight احسن من NZXT كخامه

فعلا, اعتقد ان bitfenix بتعمل احسن sleeving للكبلات. و لكن لللأسف الطلب عليها كتير قوي و بتخلص بسرعة بره. و لكن مش مشكلة الكبلات نتسني عليها مش قضية.

و شكرا مرة تانية علي مرورك يا اسلام

سلام

[Sherrah]

مبروووك على الرامات

وكويس انك حصلت على رامات بتردد 1866 بفولت 1.5 :ah7:

الله يبارك فيك اخي العزيز. فعلا تردد 1866 و فولت 1.5 و بالشكل و اللون الواحد عايزه بيبقي صعب قوي تلاقيه بسهولة و لكن الحمد لله انا كنت محظوظ اني لقيتها و خصوصا بالسعر ده.

و شكرا جدا على تعليقك و مرورك الكريم

سلام

[Sherrah]

الف الف مبروك اخى محمود على الرامات الرائعة . وموضوع منسق ورائع . وعقبال الجهاز ان شاء الله .

كنت عاوز اعرف جبت الرامات من موقع ايه ؟ وجبتها عن طريق شركة ادفعلى ولا عن طريق صديق لك فى الخارج ؟

ميدو حبيبي الله يبارك فيك سعيد ان الموضوع عجبك.

انا جبت الرامات من موقع امازون امريكا. و جبتها عن طريق شركة هي بتعمل الطلب و تجيبهولك لحد عندك و بياخدوا نسبة صغيرة. انا مش عايز اقول اسمها هنا عشان خايف اخالف قوانين القسم (عشان ميبقاش اعلان و كده) و لكن حقولك على اسم الشركة على الخاص.

و علي فكرة, الرامات دي بالذات كان عليها خصم و من حظي لقيتها و انا بتصفح الموقع. انت و حظك بقي

و شكرا على مرورك.

سلام

[Sherrah]

مبروك اولا الرامات .........
وشكرا على ال Unboxing الجميل
وقد تم

حبيبي الله يبارك فيك انا سعيد ان الموضوع عجبك و متشكر جدا على تعليقك الجميل ده.

و شكرا على مرورك.

سلام

[Sherrah]

ألف مبروك أخ محمود, أنتقاء أحترافي للذواكر, بارك الله لك فيهم

كنت أتمنى أن أفرء المراجعة باللغة العربية الفصحة, و لكن لا مشكلة, أن شاء الله تصحح هذا الخطأ في مراجعاتك القادمة.

تم التقييم لك عزيزي على هذا المجهود

اخي حيدر, الله يبارك فيك اخي العزيز لا احترافي ولا حاجة, احنا بنتعلم منك بس مش اكتر :D

بالنبسة لللغة العربية, انا أسف, لم يخطر في بالي ابدا ان ده كان يسبب مشكلة عند البعض في استيعاب الموضوع. قول لي لو عايزني اعدله, انا مستعد و وعد ان شاء الله في المراجعات القادمة استعمل فيها اللغة العربية الفصحي.

و شكرا مرة تانية اخي حيدر على المرور و التقييم.

سلام

[Sherrah]

مبروك وهنسستنى الجهاز كولو لما يكمل ومراجعه ممتازة

الله يبارك فيك يا حبي و انا سعيد ان المراجعة عجبتك

و ان شاء الله كل ما يوصل احد المكونات, حعملكوا مراجعة ليه على طول

و شكرا لمرورك يا فنان (هو انت اللي راسم الصورة دي؟؟ )

سلام