مشكلة البنج العالى (latency ) فى adsl tedata مصر

[traino]

السلام عليكم

مشكلة البينج العالى و تاثيرها على سرعة الالعاب الاونلاين ... خلونى افصل النت من tedata

عشان كدا عايز اشترك فى خدمة فودافون adsl للمنزل - سرعة (1 ميجا) ... و كنت عايز اعرف السرعة هتكون limited ولا unlimited .. و موقفى من سياسة الاستخدام العادل ....

وكنت عايز اعرف هل البينج او (latency) هيكون كويس ولا لا يعنى مثلا من (90 الى 120 ms ) ...

اخيرا هل شركة فودافون كويسة فى ال adsl ولا يوجد شركة افضل ؟؟

وشكرا جزيلا ...

[kahled15486]

انا عندى نفس المشكلة فى تى اى داتا وهلغى الخدمة بكرة

سياسة الاستخدام العادل فى شركة تى اى داتا ولينك بتنطبق على السرعات اللى اعلى من 4 ميجا
اما باقى الشركات زى فودافون واتصالات بطبق السياسة على كل السرعات حتى اقل سرعة 512

مشكلة البنج فى مصر بسبب ان الشركات بتعمل نظام مشاركة خطوط فى السنترال .. يعنى لو مثلا السنترال واصل علية 500 مشترك بسرعة 1 ميجا المفروض يكون الباندودث فى السنترال يكون 500 ميجا .. الشركة ممكن تحط 250 بس بدل ال 500 .. طيب ازاى السرعة بتوصلك كاملة والسعة فى السنترال اقل من عدد المشتركين ؟ .. السبب ان استهلاك كل مشترك مش بيكون ال 1 ميجا كاملة يعنى مثلا لو بتلعب لعبة اونلاين ممكن يكون استهلاكك 20 ل 40 كيلوبت . مثلا واحد مشغل الجهاز بيتفرج على فيلم .. واحد بيتصفح صفحات عادية استهلاكة مثلا من 40 ل 100 كيلو بت وبيكون فية ناس قافلة الاجهزة اصلا وهكذا ..

طبعا مع وجود الشباب اللى بيعملو شبكات تلاقى 50 واحد فى خط واحد دة بيعمل ضغط على السنترال وبيكون الاستهلاك اكبر من المتاح وساعتها المشترك العادى بينضر من الموضوع دة فى السرعة وفى البنج .. بدل ما الشركات تزود السعة للسنترال بيطبقو سياسة الاستخدام العادل اللى مش باين فيها اى عدل

انا عايز اوضحلك من اللى انا قولتلو ان العملية هتفرق من سنترال لاخر .. على سبيل المثال انت فى حى السيدة زينب مثلا
فى السنترال شركة تى اى داتا علية 1000 مشترك وشركة لينك 500 مشترك وشركة اتصالات 100 مشترك .. هتكون اتصالات افضل علشان العدد اللى محمل على السنترال اقل ... طيب تعرف ازاى ان الشركة دية الافضل .... جرب الخدمة عند اى حد تابع لنفس السنترال عندك

انا فى حى شعبى وخدمة تى اى داتا عندى زفت وجربت الخدمة عند اكتر من واحد تبع شركة لينك فى نفس السنترال والخدمة عندة تمام ودة اختيارى القادم

[ahmed50]

تمام انا كنت بلعب مع واحد صحبي في سيرفر الطبيعي اني انا و هو 1 ميجا انا تي اي داتا و هو فودافون و كان البنج زي بعض بالظبط او فرق 2 او 3 حاجة بسيطة كدا و كانت لصالحي كمان :ah4:
من اسبوعين او شهر كدا ابتدي الموضوع يتقلب و الفرق بقي 120 :mad: طبعا لاج و حاجة نيلة ......
انت لو تقدر تروح السنترال و تسالهم عن عدد المشتركين في كل شركة و خش مع اقل عدد :rolleyes:

[Ahmed.Elsayed]

أنا بصرحة جربت شركة LinkDsl (أنت واصل:cool وشركة Tedata (ليه تزنق نفسك :D)
وشركة LinkDsl خدمة العملاء فيها جيدة بصراحة و بيوصلوا النت بسرعة ووصلت النت وشغلته في يومين بس و بعدها ندمت بسبب أن سرعة التحميل و التصفح كانت سيئة جداً و كانت أقل من نص السرعة و بعد مكالمات كتير مع خدمة العملاء ما وصلتش لحاجة و فررت إلغاء الأشتراك مع الشركة و فصلوا النت عندى بعد شهر ونص مع أنهم موصلين النت عندى في يومين بس و من ساعاتها كرهت الشركة دى لأنها شركة دعائية أكثر منها خدمية

وبالنسبة لشركة Tedata سرعة التحميل معظم الوقت ثابتة و بتحصل على سرعة تحميلك كاملة لكن خدمة العملاء بطيئة ووصلت النت عندى فى شهر كامل لكن كان حظى حلو و قدمت أشترلك فى فترة العرض الصيفى و أخدت راوتر لاسلكى هدية من الشركة الحمد والشكر لله وبقالى أكتر من سنة مشترك معاهم و الحمد لله مفيش أى مشكلة :ah7:

لكن المشكلة عندك فى اللعب أونلاين أعتقد أنها مش بسبب الشركة لأن السرعة بتعتمد على حاجات كتير

أولاً المسافة بينك و بين السيرفر فممكن تدخل فى سيرفر موجود فى مصر و البنج يكون فى حدود 120 وممكن تدخل فى سيرفر فى أمريكا و طبعاً البينج هيكون عالى جداً
ثانياً لو أنت موصل معاك ناس على الشبكة و فيه ناس بتتصفح بس هتأثر فى مستوى البنج
ثالثاً لو فيه برامج بتستخدم النت عندك فى خلفية الجهاز هتأثر فى سرعة النت مثل برنامج مضاد الفيروسات و التحديث التلقائى للويندوز و برنامج ال Real Player و أى برامج بتشتغل فى خلفية الجهاز
ورابعاً البنج بيتأثر بسرعة الأبلود مثل سرعة الداونلود لأنك بتنقل و بتستقبل بيانات فى نفس الوقت و سرعة الأبلود بتكون 1 على 8 من سرعة الداونلود فبتكون بطيئة خصوصاً لو متصل بسيرفر بعيد

[traino]

اعتقد الاحتمال الرابع ليه تأثير معايا ... سرعتى 512

لكن اللى مجننى .. انى مشترك فى الشركة دى بقالى 3 سنين وشوية ... على سرعة 512 وكان دائما البينج حلو ما بين 110 و 150 ms

وفى شهر زودت السرعة 1 ميجا على امل الحصول على بينج افضل .. فحصلت على بينج ما بينن 110 و 90 ms

لكن بقالى اسبوعين دلوقتى البينج مرتفع من 300 الى 400 ms وده عمرو ما حصلى قبل كدا ... كلمت الشركة كتيييييير و بفهمهم ان البينج العادى بتاعى 110 الى 150 وعمرو ما وصل 300

مسمعش منهم غير رد واحد ... ( احنا مبيهمناش غير سرعة التحميل والتصفح فقطططططططططططط ) :mad: زهقت منهم وقررت اغير الشركة

[Ahmed.Elsayed]

مفيش شركة أحسن من tedata عن تجربة أعرف واحد مشترك فى شركة لينك سرعته 1 ميجا وكان بيشتكى برضه من البنج
وأعرف واحد تانى من سوريا سرعة النت عنده 256 لكن البنج عنده كويس و السبب كله بسبب سرعة الأبلود وده اللى الناس مش فاهماه

الشركات كلها الموجودة فى مصر بتقدم سرعات أبلود منخفضة وحتى السرعات اللى بتقدمها الشركات قدمت المفروض أول سرعة فى النت تبقى 2 ميجا مش 512 لكن يعنى هوا كل حاجة أتطورت فى مصر ووقفت المسيرة على سرعات النت !!

على العموم لو ناوى تغير الشركة خد بالك إن الألغاء ممكن ياخد منك شهر أو أكتر لغاية ما تقدر تقدم فى شركة جديدة وأنا بقولك الكلام ده بس للتوضيح علشان ما تفتكرش أنى شغال فى شركة tedata ولا حاجة

[traino]

كلامك مظبوط ومنطقى جدا ... فعلا الالعاب تحتاج ابلود بجانب الدونلود ... فاكيد سرعة الابلود مؤثرة
من ناحية تانية كلمت واحد صحبى شغال فى الشركة قالى ان ارتفاع البينج ده نتيجة حمل زائد على السنترال اللى انا تابع ليه و المشكلة دى بتاخد وقت عشان تتحل ..