محتاج حد يجاوبني قبل ان اكره مجال الشبكات واتركه ؟؟؟؟؟؟؟؟؟؟؟؟؟

[net2010]

السلام عليكم

زي ما هو واضح ف العنوان انا واحد درست كورسات كتير ف المجال دا انا سني صغير علي فكرة درست mcsa mcitp isa ccna tmg
وطبعا اشتغلت الحمدلله من قريب ولكن عشان دي اول شغلانه ليا في المجال دا ف كان المسمي الوظيفي HELP DESk
شغلي كله عبارة عن روح ارش الكابل الفولاني او هات البرنتر دي وحط مكانها دي او روح سطب الاوفيس لأستاذ كذا
بصراحة حاسس اني اقرب للصنايعي يتقالي اسطي تليق اكتر من باشمهندس

وانا بذاكر الشبكات كنت بستمتع جدا انما لما احتكيت عمليا وشفت بعيني لقيت المجال عبارة عن خدمات بتعملها للناس

العيوب اللي قابلتها ان المجال دا مفهوش برستيج نهائيا الهيئه طول ما ف ايدي الاراشه وموطي اصلح اجهزة اقرب للميكانيكي مع احترامي
تاني عيب ان الحاجات اللي بعملها مليون واحد يعرف يعملها اساسا الحاجه اللي بعملها عند اليوزر وليكن تسطيب الاوفيس انا متأكد انه يعرف يعمله
حتي رئيسي ف الشغل كل حياته عباره عن عقود الصيانه والمشتريات بتاعت السيرفرات وبرده بيروح 12 و3 بالليل !!!

ف هل هو دا المجال فعلا ؟ كله كده شقي ولا دا ف الاول بس ؟
نفسي اعرف ترتيب الكارير في المجال دا ايه ؟ وكل رتبه بيعمل ايه
Help Desk
Sys Admin
Network Eng
Network Admin
IT Manager
Team Leader

اللي مخليني كمان مضايق اوي مقارنتي بمجال البرمجه اللي صاحبي فيه
برستيج وعليه اهتمام كبير وبيحس انه فعلا حاجه تقيله ف قرارة نفسه لأنه بيعمل حاجه مش اي حد يعرف يعملها لازم يكون دارس وفاهم
دا غير ان مرتب الجونيور اللي هو مبتدئ برمجه مبيقلش عن 1200 بعكس مجال الشبكات البداية فيه ممكن تلاقي 600 و 800

حد يريحيني ويقولي ايه قصة المجال دا لأني فعلا ابتديت اكرهه انا بحب الحرية مش اني اروح واجي وافك واركب انا احب يكون عملي حر اخلص امشي مش افضل مربوط جنب الناس عشان اخدم عليهم بجد انا تعبان اوي حاسس اني اخدت مقلب

[Gawad]

هههههههههههههههههههههههههههههه
سبحان الله ، يعم الحج انت في مصر انا بفضل الله متخرج من كلية الاقتصاد والعلوم السياسية ومعايا شهادات في النيتورك وتخيل كنت بعمل في الشغل اللي انت بتعمله بالظبط بس زيادة عليه كنت بشيل السلم علي كتفي رايح جاي وتشوف هدومي اكني نقاش بالظبط طبعا مع الاحترام للاخوة النقاشين، كنت بتشعلق في السقف وانا بركب الاكسس بوينت وتشوف جيبي مليان مفكات علي ارشات علي بنز علي حاجات كتير، كان المدير بيخلينا انا والمهندس اللي معايا وهو علي فكرة خريج هندسة اتصالات بينزل يشيل الصناديق من علي باب الشركة علشان مفيش عمال كفاية كنت بترممط لما نيجي نفتح فرع جديد في التراب وانا الجيوب الانفية عندي بايظة وتقعد تارش سلك الموقع كله لان الكهربائية مبيعملوش كده، هههههههههههههههههههههههههه حاجات كتير اوي، المهم انت اصبر "لا تدري لعل الله يحجث بعد ذلك أمراً"

وصلي الله وسلم وبارك علي النبي وآله وصحبه وإخوانه وسلم

[NASA Science]

أخى صاحب الموضوع : طريقك الوحيد هو : نطوير نفسك فى مجال الشبكات وبعدها سيتم الوصول الى أعلى الوظائف المراده ان شاء الله ومش فى الدول العربية بل الأجنبية أيضا

[NASA Science]

OnlyMe_OnlyU
تحياتى لك أخى الفاضل على تعليقك ونعم الصواب , ربنا يكرمك باللى انت عايزه , اللهم أمين

[ellassy]

كلنا كنا كده يا محمد ولازم تتعب فى الاول وده شئ طبيعى
وعلى فكره شغل ال Technical على قد ما هو مقرف بس برضه بتستفاد علشان لما ربنا يكرمك وتبقى Network Eng
ساعتها هتحس بقيمة والمنصب اللى وصلتله وهتحافظ عليه وتطور من نفسك زيادة
وبعدين شغل Technical بعلمك ازاى تتعامل مع الموظفين وده اهم حاجة فى الشغل ده علشان هتقابل اشكال كتير جدا من الناس
وبعدين زى ما المهندس احمد سرحان
مشوار الشبكات بيبدأ بـــ R J

[internetworld]

اخى فالله
بدايه احب اقول ان شغل الشبكات مش كله واحد والطريق فيه بيبدا بخطوات سلم متدرج مفيش حد بيبدا ادمن لمجرد انه حصل على كورسات فالشبكات
وقبل ما تفكر فى ايه التسلسل الوظيفى فاحب اقولك ان مفيش تسلسل وظيفي ثابت هتلاقى نفسك فيه لاسباب بسيطه جدا وهو اختلاف كل شركه ومفهومها عن ال IT يمكن كتير يستغرب كلامى دا بس فعلا دا واقع فرق كبير لما تشتغل فى شركه فقسم من اقسام ال IT وفرق لما تشتغل فى شركه IT ................. كلنا اتعاملنا مع ناس متعرفش الفرق ما بين الكيبورد والماوس فالبدايه وكلنا بنشيل ونحط بس فى حاجات انت اللى بترسمها وبترسم انطباعك فيها وتحط بصمتك وشخصيتك فوظيفتك شغلتك دى هتتعلم منها حاجات كتير جدا جدا لو انت مهتم بمجال security & system troubleshooting هتبدا تعرف فشغلك البسيط دا عن مشاكل استخدام ال user العادى واهتماماته وايه الاساليب والوسائل اللى بيلجا ليها فنقل بياناته واغلب المواقع اللى بيتعامل معاها وتبدا تجمع كميه معلومات عن مختلف كل موظف واسلوب ونمط شغله واحتياجاته وايه اللى ممكن يكون سبب فثغره فنظام تشغيله وبيخلى جهازهه تحصل فيه مشاكل هتلاقى بقى فى فرق بينك وبين اى واحد تانى شغال فنفس مجالك انت بتدرس المشكله واتعرفت على مثلا فايروس معين بيخلى الجهاز يعمل ريستارت وفايروس تانى بيخلى نظام التشغيل فى حاله اختناق تام وهككذا وتعرف مصادر الفايروس منين وبياثر على اى نوع من الملفات هتلاقى نفسك عملت تحليل كامل للمشكله هينفعك فى حياتك المستقبليه لما تسمك ادمن مثلا على الايزا فى شركه كبيره هتعرف بخبرتك فى شغلك اللى انت فيه حاليا واللى انت مستهتر بيه وتتجنب المشاكل دى قبل حدوثها بعكس لو فكرت زى اى واحد فنى يعم انت شايف فايروس فالجهاز اعمل فورمات ل C ونزل نسخه جديده ونزل اى انتى فايروس كويس قبل ما تفتح اى بارتشن وريح دماغنا خليه يعمل scan وهتلاقى كل حاجه تمام ......هو دا فعلا حل بس شوف مستقبل كل حل هيوصلك لفين دا اختار يريح دماغك وهيفضل كدا بتاع فورمات على ما تفرج وينتهى حاله فى محل تجميع كمبيوترات فك وتركيب وانت بتفكيرك ودراستك وعزيمتك شوف هتوصل بمعلومتك فين دا مجرد مثال اهو من الواقع ...........
طيب سامحنى ان كنت اطول عليك لكن هو مثال تانى لعل الله ينفعنا بما علمنا ويوفقك بما نقول لما فيه الخير لنا ولك اللهم امين ..........
طب انا لو بفكر اشتغل واكمل بعيد عن System وعاوز مجال network eng ايه اللى يفدنى من الشغلانه بالطريقه دى ابسط شيء هتعرفه مش مجرد بس عمليه تأريج كابلات ودى حاجه مش صغيره بس كمان هتعرف اى المشاكل اللى ممكن تكون مش نتيجه configuration غلط هتكون مشكله تركيب كابل غلط او تركيبه صح بس فى مشكله فالبورت او مفيش مشكله خالص بس ممكن نتيجه تراب دخل على الكابل تخيل !!!!!!!!!!!!! ممكن توصل لايه تراب غيرك دارس بس هيعمل كل التجارب زى ما زاكرها من الكتاب واحد اتنين تلاته اربعه زى ما الكتب قالت وهيوصل لحل المشكله لكن اخد وقت اد ايه وارتبك وحالته النفسيه اتوترت اد ايه ولو كان فى حد شغال معاه فالقسم او كان مديره موجود وقتها كان ممكن يحصل ايه فى ناس من كتر خوفها على انطباعات اللى شغالين معاها عنها بيخليه ينسي كل اللى درسه وكل اللى حفظه لكن انت من كتر ما درست المشكله خلاص بقى عندك رصيدد من الثقه ووالخبره اللى تخليك تحل المشكله ومش بس تحلها لا دانت كمان تحلها فى اسرع وقت ودا عند اى شركه محترمه له قيمه كبيره وتقدير من الاداره على علمك وخبرتك انك حليت المشكله فى اسرع وقت ممكن وفر على الشركه ااعباء ماليه كبيره
اسف انى اطلت الحديث ولكن بس حبيت اساعد بما فتح الله لى لعله يفيدك .......واخر كلمه احب اقولها حكمه دايما محفوره فعقلى واتمنى انك تعتبر منها
بدل من ان تلعن الظلام حاول ان توقد فيه شمعه
فمهما كان عملك حاول ان تخلق تحديات علميه ومنهجيه ترفع بيها قدر معلومتك وتكسب الناس احتراما وتقديرا لك المظاهر لا يمكن بحال من الاحوال ان تؤثر على ما تقوم به ااذا كنت انت فى قراره نفسك مقتنع بما تقوم به ......اسال الله لك ان يوفقك للخير وان يعينك على كل خير ويكيفك كل كرب وشر وسائر اخوتى واحبتى والمسلمين اجمعين اللهم امين
نسالكم صالح الدعاء .....................بالتوفيق ..............

[afathypc]

أخي الكريم ...

أولا :الصبر ثم الصبر فمعظم من اشغلوا في مجال الشبكات كان حالهم اسوأ من هذا

ثانيا : كما نصحوك الأخوة الأعضاء في المشاركات السابقة بتطوير نفسك وأن تنظر الى الجزء المملوء من الكوب وهو ان يضاف عملك

الحالي في سيرتك الذاتية وهو ما سيفيدك قطعا في المرة القادمة

ثالثا : بالنسبة للترتيب فأعتقد

IT Manager

Systems admin

or/and database admin

or/and ERP admin

or/and Network admin and

Support Team leader (help desk team

وللشركات الكبيرة :

IT Director

IT Managers team

System administrators team

Messaging Team

Networking Team

Database admins team

ERP team

Help desk team

Quality operators team

[أ بـو بـد ر]

يا جماعة الخير
طيب لو أنا خريج هندسة اتصالات مثلا ، هل لا بد إني اتشعبط في تاور الأنتينا و أركب الدش و الآر إف كيبل و مش عارف ايش و اقعد سنين في الشغلة هذي و أنا في الأصل هدفي أن أصبح مهندس اتصالات أصمم و أخطط و أحل مشاكل خاصة بشبكة الجوال مثلا !
أو مثلا لو كنت خريج إدارة أعمال ، هل لا بد أني أصبح سواق تريلا بأشيل البضايع و أحاسب المحلات و أقعد سنين على الموضوع هذا علشان أقول و الله هذي أفضل لخبرتك بكرة لما تصير Business developer !

من الواضح أن شغلة الأخ هي مثل ما قال أحد الإخوة IT Technician و ما لها علاقة بالشبكات .. طبعا هو كله له علاقة ببعض .. و لكن ما يطمح له الأخ هو أن يصبح متخصص في الشبكات Network Specialist بينما الشغلة اللي يقوم بها ان تعتبر أعتقد تسمى First level works يعني أعمال أو مهام المستوى الأول .

ربما الوضع عندكم أسوأ من الوضع عندنا ( اللي هو أيضا سيء ) و لذلك لا بد الإنسان يتعامل مع القضاء و القدر بكل حكمة و يحاول يستفيد من تجارب الحياة التي يعيش وقائعها و يخطط للتغيير بكل عقلانية و واقعية .. يعني ممكن اخي الكريم تستفيد أنت من عملك هذا بفهم ايش هي متطلبات المستفيدين عموما و تتعرف على الناس أكثر و تكسب ودهم و صداقتهم بتعاملك الطيب و المتواضع و إنجازك القوي و خدمتك المتكاملة لهم .. من الممكن ايضا أن تتعرف على المتخصصين و تحاول الاستفادة منهم و التعلم منهم في طريقة تنظيهم للعمل و فهمهم و استيعابهم خصوصا المتميزين و المنجزين منهم .

الأمر الآخر .. إذا كنت تريد أن تصبح متخصص في الشبكات ، فلا بد أن تتجه لشهادات الـ Expert في سيسكو ( CCIE ) و هي بالمناسبة لا تتطلب أي شهادة سابقة أو خبرة سابقة ، هما اختبارين ، واحد تحريري ، و الثاني عملي ، إن نجحت فيهم فأنت CCIE و هذي شهادة مش سهلة أبدا .. مهمة جدا في سوق العمل .. و لكنها أيضا ليست سهلة في الدراسة . تحتاج إلى تخطيط و تحضير و جد و اجتهاد .

الله يوفقك

[net2010]

بشكركم جميعاااااااااااااااا واحد واحد رد علي والله فرقت ردودكم معايا جدا وحمستني جدا وخلتني علي يقين اني ف اول ليفل من وظائف الشبكات ولازم اولها تعب ومشقة ولازم اطور نفسي علشان اقدر متعبش واشقي بعد كده بجد جزاكم الله كل خير والله اسعدتوني جدا بردودكم بارك الله فيكم