النتائج 1 إلى 13 من 13

الموضوع: نصيحة لكل من يود شراء جلاكسى 2

  1. #1
    عضوية جديدة
    تاريخ التسجيل
    Apr 2009
    المشاركات
    33
    معدل تقييم المستوى
    0

    Lightbulb نصيحة لكل من يود شراء جلاكسى 2



    السلام عليكم
    انا انهاردة نزلت عملت جولة بتاريخ 27/12/2011 فى شارع شريف و شارع عبد العزيز عشان اعرف سعر الموبايل وصل كام
    مبدئيا كده زى منا توقعت فعلا سعر الموبايل فى النازل
    فى شارع شريف السعر بالضمان كان يتراوح بين 3650 و 3800 و بصراحة 3650 بالضمان انا شايفه سعر ممتاز جدا
    و برده كان نفس الحال فى شارع عبد العزيز
    اهم حاجة فى الموضوع ان انا لاقيت محل بيبيع الجهاز ب 3650 بضمان يونيون جروب فى شارع شريف
    و محل تانى برده بيبيع الجهاز ب 3650 بضمان سكاى فى عبد العزيز
    المشكلة ان انا ثقتى فى شارع عبد العزيز مش اد كده انا بنزله بس عشان اعرف اخبار الاسعار و ايه الموبايلات اللى نزلت و الكلام ده
    فانا دلوقتى محتار هل اجيبه من عبد العزيز و اتوكل على الله ولا اجيبه من شارع شريف بضمان يونيون جروب و انا حظى بقه اذا كانوا هيقرفونى معاهم فى الضمان ولا هيطلعوا معايا ناس محترمين (اشك) :cool:
    لكن المحل اللى فى عبد العزيز لما سألته على موضوع ال14 يوم اللى ممكن ارجع فيهم الموبايل قاللى لا همه اول يوم او يومين بالكتير اوى بعد كده تروح للضمان
    الصراحة كان بياع اتم اوى و خنقنى بالرد ده اصل بينى و بينكوا محلات عبد العزيز ديه كلها مش بتؤمن بوجود قوانين حماية مستهلك ولا بتاع دول شغالين على مزاجهم و ده اللى بيخلينى افكر الف مرة قبل ما اشترى حاجة من عبد العزيز
    بالنسبة للموبايلات اللى بدون ضمان كلها كانت فى رينج 3300 طبعا ما اهتمتش انا بيها اوى لان فرق 350 جنيه ولا حاجة طبعا فانا اجيب اللى بضمان افضل
    :ah7:
    المهم انا رجعت البيت و انا عاوز اعرف طب لو هوه رفض يدينى موبايل غيره هل الضمان هيرضى يدينى موبايل غيره خلال ال14 يوم اذا لا قدر الله طلع فيه اى عيوب مصنعية ولا حاجة
    المهم اتصلت بالرقم الساخن بتاع ضمان سكاى فوجئت ان همه مواعيد عملهم من الساعة 9 الصبح للساعة 5 مساء و كمان ماعدا الجمعة .. ايه الهنا ده ياخويا اول مرة فى حياتى اشوف خط ساخن ليه مواعيد عمل .. بصراحة الحتة ديه ضايقتنى اوى من توكيل سكاى ... حسيت ان همه شركة نفرين و طفاية الصراحة
    المهم اتصلت على الخط الساخن بتاع يونيون جروب و قولتلها على اللى حصل قالتلى ان لازم عشان نبدلك الجهاز لو لا قدر الله فيه اى عيب لازم يكون معاك فاتورة شراء ضريبية و مكتوب فيها موديل الموبايل و السيريال نمبر و التاريخ و ختم المحل و السجل التجارى و الضريبى و يكون كل ده بخط واضح
    موضوع الخط الواضح ده انا بقوله عشان فيه واحد مرضيوش يدخلوله موبايله فى الضمان عشان التاريخ فى الفاتورة مكنش مكتوب بخط واضح
    طيب يبقه نطلع من الموضوع ده كله بكام نقطة كويسين نعملهم قبل ما نشترى الموبايل

    1- التأكد ان الموبايل موديله I9100 و ليس I9100G
    2- التأكد من البرشام الاسود اللى هوه بتاع سامسونج ما يكونش مفكوك او حد لعب فيه و انا كنت سألت الراجل هل سكاى مبرشمة الموبايل بالبرشام بتاعها قالى لأ و ديه الصراحة معلومة انا حابب اسال فيها اى حد اشترى موبايله بضمان سكاى لان هوه قالى ان برشام سامسونج بس هوه اللى موجود لكن سكاى مش بتحط برشام .. !!!
    و برده ما خدتش بالى اذا كانت يونيون جروب بتحط برشام على الموبايل ولا برده بتعمل زى سكاى و بتكتفى ببرشام سامسونج الاسود.
    3- التأكد من ان النسخة ديه نسخة شرق اوسط و ده بان الكتابة من الضهر بتكون باللغة العربية مش كلها انجليزى ... هوه اكيد طبعا هتكون نسخة شرق اوسط اللى هيه بالضمان يعنى بس برده اعمل تشيك .
    4- طلع الضمان من العلبة من غير ما تفكها بيكون فى الجمب كده و شوف تاريخ الضمان بيبتدى من امته لو لاقيت التاريخ قديم ما تشتريش الموبايل يعنى فرضا جيت تبص فى تاريخ الضمان لاقيته بادئ من شهرين فاتوا طب و انا ايه ذنبى اخد موبايل ضاع منه شهرين من الضمان .. انا شايف ان المدة المعقولة تكون شهر واحد و ده كتير اوى كمان بس كده كده السوق نايم فمفيش مشكلة يعنى
    كل الخطوات ديه هتعملها قبل ما تفك البرشام يعنى لسه ما دفعتش الفلوس ولا عملت اى حاجة انت كل ده انت طلبت منه انك بس تشوف علبة الموبايل من بره ...
    اللى جاى ده بقه هوه الاهم من ده كله
    5- قول للراجل انا هاخد الجهاز بس عاوزك تفتحه ابص عليه من جوه ... طبعا الراجل هيفك البرشام و يفتح العلبة بص على الاكسسوارات بتاعة الموبايل و اتاكد ان كل حاجة موجودة الشاحن و وصلة اليو اس بى و البطارية و السماعات و برده تتأكد ان التليفون موجود
    :D

    بعد كده بقه المفروض انك تجرب الجهاز .... بس الصراحة انا مش شايف اى داعى لموضوع تجربة الجهاز جوه المحل ... لو عاوزه يجربلك الموبايل جوه المحل عادى مفيش مشكلة بس اصل كده كده انت لما تروح البيت افتح الموبايل براحتك و اقعد دقق فى كل حاجة فيه لكن و انت فى المحل مش هيبقه عندك الفرصة انك تعمل كده اخرك هتفتح الموبايل و تشغل فيديو و تشوف الالوان و تسمع الصوت و دول مش من العيوب المعروفة بتاعة الجلاكسى
    انا ممكن اخد منه الموبايل و اروح البيت اقعد براحتى اجرب الموبايل و افليه بقه

    1- تأكد من عدم وجود بقعة حمراء فى منتصف الشاشة اثناء التصوير
    2- تأكد من عدم وجود اى بقع صفراء فى الشاشة و ان الشاشة تكون كلها لون واحد و فيه اختبار بتعمله اسمه LCD Test ده من جوه الموبايل مش برنامج ولا حاجة بس الصراحة مش فاكر الكود بتاعه ايه بس انت اعمل سيرش على الحتة ديه و هات الكود و اعمل الاختبار ده هيجيبلك الشاشة كلها لون ابيض مثلا تقوم تدور على نقط مثلا مسودة ولا حاجة و بعد كده يجيبلك اللون الاسود تقوم تدور على نقط مصفرة ولا حاجة كده يعنى
    3- عيب صدى الصوت اثناء التحدث ... حط شريحتك و كلم اى حد من اصحابك و سلم عليه و كده و قوله انت سامع اى صدى صوت و انا بتكلم لو قالك لا كله تمام يبقه فل لو قالك اه انا سامع صدى صوت و انت بتتكلم يبقه للاسف العيب ده موجود عندك
    اعتقد ان همه دول التلات عيوب الرئيسية فى الجلاكسى 2 اللى كنت بشوف الناس بتشتكى منهم فى المنتديات بس برده احب اطمنكوا ان العيوب كانت فى النسخ الاولى اللى كانت نزلت فى شهر 5 و 6 دلوقتى احنا فى شهر 12 يعنى اكيد العيوب ديه كلها سامسونج تخلصت منها بدليل ان الموبايل محقق المبيعات ديه كلها
    اخر حاجة و اهم اهم اهم اهم حاجة نسيت اقولها فى اول الموضوع اسال البياع قبل ما تشترى الموبايل او حتى تشوفه قوله انت هتدينى فاتورة ولا هتدينى الموبايل فى كيس و تقولى مبروك عليك لو قالك بس كده تمن الموبايل هيزيد حاول معاه بشكل ودى ان الفاتورة ديه عشان تحميلك حقك عشان لو الموبايل طلع فيه اى عيوب صناعة تروح التوكيل تبدله و انت فارد جناحاتك عليهم لان لو روحت التوكيل و مش معاك الفاتورة هيقولولك الموبايل هيدخل صيانة مش هنديلك واحد جديد مكانه .. فريح دماغك و اطلب منه فاتورة شراء ده اذا كان مش ناوى يديلك فاتورة يعنى و قوله انا كده كده مليش دعوة بيك انا عشان لو الموبايل طلع فيه اى عيوب مصنعية اروح للتوكيل و انا مطمن انهم هيبدلوا الجهاز ليا
    بس كده اعتقد ان انا قولت كل المعلومات اللى اعرفها عن الجلاكسى 2 موبايلى القادم ان شاء الله و ياريت الناس تاخد بالها من موضوع الفاتورة و البرشام

  2. #2
    عضو
    تاريخ التسجيل
    Dec 2009
    المشاركات
    123
    الدولة: Egypt
    معدل تقييم المستوى
    9

    رد: نصيحة لكل من يود شراء جلاكسى 2

    ألف شكر علي المعلومات القيمة
    بس ازاي ممك اشوف الضمان من غير ما أفك البرشام ؟

  3. #3
    عضوية جديدة
    تاريخ التسجيل
    Apr 2009
    المشاركات
    33
    معدل تقييم المستوى
    0

    رد: نصيحة لكل من يود شراء جلاكسى 2



    بص حضرتك المفروض يكون الضمان محشور بين الغطاء و العلبة من الجنب
    انا شخصيا كل الموبايلات اللى جبتها كنت بشوف الضمان قبل ما افتح البرشام و كانت بتبقه محطوطة زى ما قولتلك كده
    بالمناسبة ده شكل ضهر العلبة اهو الكلام مكتوب بالعربى و الموديل I9100 و ليس I9100G
    و ده البرشام الاسود بتاع سامسونج

  4. #4
    عضو
    تاريخ التسجيل
    Dec 2009
    المشاركات
    123
    الدولة: Egypt
    معدل تقييم المستوى
    9

    رد: نصيحة لكل من يود شراء جلاكسى 2

    [QUOTE=Shap Rewesh;2107592]

    بص حضرتك المفروض يكون الضمان محشور بين الغطاء و العلبة من الجنب
    انا شخصيا كل الموبايلات اللى جبتها كنت بشوف الضمان قبل ما افتح البرشام و كانت بتبقه محطوطة زى ما قولتلك كده
    بالمناسبة ده شكل ضهر العلبة اهو الكلام مكتوب بالعربى و الموديل I9100 و ليس I9100G
    و ده البرشام الاسود بتاع سامسونج
    [/QUOTE

    مشكور علي الأهتمام و سرعة الرد

  5. #5
    عضو الصورة الرمزية a7med $oft
    تاريخ التسجيل
    Nov 2010
    المشاركات
    303
    الدولة: Egypt
    معدل تقييم المستوى
    8

    رد: نصيحة لكل من يود شراء جلاكسى 2

    شكرا لصاحب الموضوع

    اول حاجة انا من الاسكندرية و بصراحة بفضل ضمان يونيو جروب .. لانهم في منتهي الاحترام
    انا جبت الموبايل من شركة سيليكت بس طلعت شركة مش محترمة بالمرة
    :eek: ... قلة في الادب و بيعاندو معايا و بيقولولي الموبايل مفهوش حاجة انت الي بتتوهم :confused:

    فا رحت للتوكيل و للاسف هناك قالولي احنا محتاجين الفاتورة الضريبية
    :mad:
    فا رجعت لمحلات سيليكت :confused:... انا مش عارف اقولك انا عملت اية علشان اجيب الفاتورة الضريبية:D:D
    قول قولتلك اني شتمت
    :Dاصغر واحد فيهم لغاية المدير علشان اخدها :D.... مكنوش عاوزين يدوني الفاتورة ..:eek:
    قالتلي هتاخدها بعد اسبوع .:eek:. بس الحمد لله بعد لما ظبتهم كلهم في الكلام و فرجتهم الحياة عاملة ازاي :D
    اخد الفاتورة في يوميها بالظبط و انا واقف جاتلي :D:D

    و رحت للتوكيل و باذن الله يوم 1 في السنة الجديدة هاخد تلفون
    samsung galaxy SL I9003

    و اكيد هدفع فرق
    دول 700 جنية
    :D:D


    و بالنسبة للبرشام
    توكيل يونيو جروب بتلاقي ورقة البرشام الاصلية السوداء و عليها واحدة صغيرة
    محطوطة عليها
    مكتوب عليها يونيو جروب
    :D:D:D:D
    ــــــــــــــــــــــــــ

    بس الحاجة الغريبة انا لما جيت اشتري الجلاكسي ايس

    لقيت الضمان بتاع يونيو جروب فوق التلفون نفسة يعني جوة العلبة !!!! فا معني كدة كان مفتوح يعني ولا اية ؟
    ولا يمكن فتحوة و عندهم ورق زي البرشام الاصلي ؟


    Nothing Is True, Everything Is Permitted

  6. #6
    عضوية جديدة
    تاريخ التسجيل
    Apr 2009
    المشاركات
    33
    معدل تقييم المستوى
    0

    رد: نصيحة لكل من يود شراء جلاكسى 2

    انا مش عارف والله التجار بيتعاملوا مع الزباين كده ازاى مع ان الزبون ده هوه اللى بيأكله عيش
    انا مش فاهم بجد بيحسسوا الواحد انى هيدينى التليفون صدقة او صعبت عليه فهيدينى عدة من عنده
    والله يا بوحميد انا كنت فى مشوار انهاردة فى وسط البلد فقولت اعدى تانى على شارع شريف كده اشوف المحل اللى كان ادانى السعر 3650 بضمان يونيون
    المهم قعدت اتكلم مع الواد قالى ان كل الناس بتيجى تشترى الضمان الدولى و محدش بيشترى الضمان بتاع يونيون ولا سكاى او قليل اوى يعنى لما حد بيشترى من الضمان المصرى
    و نصحنى قالى خد الضمان الدولى و مش عارف ايه
    بصراحة الواد لعبلى فى دماغى اكتر ما هى ملعوب فيها
    و قالى على حاجة كانت صدمة بالنسبالى الصراحة قالى موضوع البرشام ده ما تعتمدش عليه اوى عشان فيه ناس بتعرف تفك البرشام ده بطرق معينة ... الكلام ده لما انا قولتله ان فيه محل فى عبد العزيز كان عارض الموبايل بنفس سعرك و كده فقالى بلاش عبد العزيز و مش عارف ايه دول ولاد لعيبة و بيفكوا البرشام و يقلبوا الاكسسوارات و الكلام ده
    بصراحة انا بقيت تايه هل اجيب من المحل بتاع عبد العزيز بضمان سكاى لان هوه حتى الواد قالى لو هتجيب بضمان هاته سكاى مع ان هوه قاللى ان عنده الاتنين بس هوه رشحلى سكاى ... ولا اجيب من عنده الدولى على اساس ان مفيش فرق بين الاتنين و كمان قاللى ان الدولى احسن عشان هوه بيجيبه من دبى و اكيد طبعا البضاعة اللى بتروح دبى افضل بمراحل اللى بتنزل عندنا مصر
    يا ريت الناس اللى معاها جلاكسى او اتعرضت لمواقف مشابهة زى ديه و هيه بتشترى يشاركونا بتجاربهم و ارائهم

  7. #7
    عضو فضي الصورة الرمزية wella1000
    تاريخ التسجيل
    Feb 2008
    المشاركات
    574
    الدولة: Egypt
    معدل تقييم المستوى
    25

    رد: نصيحة لكل من يود شراء جلاكسى 2

    ان حقولكم حاجة بس مايحديش يزعل أو يضايق أو يتفرس ولا حاجة :D :p
    التليفون ده في امريكا ب 2700 أو أقل والشاشة كمان 4.65 انش
    وهو معايا على فكرة بس أنا جايبه من الكويت مواصفات خليجي :p وكان اغلاه

  8. #8
    عضوية جديدة
    تاريخ التسجيل
    Dec 2011
    المشاركات
    33
    معدل تقييم المستوى
    7

    رد: نصيحة لكل من يود شراء جلاكسى 2

    غريبة دى : 2700 ج ؟؟
    ده على امازون بـ 600 دولار ؟؟؟!!

  9. #9
    عضوية جديدة
    تاريخ التسجيل
    Mar 2009
    المشاركات
    30
    معدل تقييم المستوى
    0

    رد: نصيحة لكل من يود شراء جلاكسى 2

    انت المفروض تنصحنا دلوقتي
    نعمل ايه بالظبط لان انت حيرتني بصراحة
    انا نازل كمان اسبوعين أجيب الجالاكسي نووت وأنت كده لعبتلي في دماغي زي ما البياعين لعبولك في دماغك
    رسينا على الفولة

  10. #10
    عضوية جديدة
    تاريخ التسجيل
    Nov 2011
    المشاركات
    18
    معدل تقييم المستوى
    0

    رد: نصيحة لكل من يود شراء جلاكسى 2

    اخي الكريم ايه المقصود بالفاتوره اللي بتروح بيها للتوكيل في اول 15 يوم لو في مشكلة
    انا لما بشتري الموبايل بيديني فاتوره بسعر الموبايل و عليها ختم المحل هل دي اللي تنفع في التوكيل لتغيير الموبايل لو حدث مشكلة؟
    ولا لازم فاتوره ضريبيه
    انا اسمع ان الفاتوره الضريبيه دي بتزود سعر الجهاز يجي 300 جنية و طبعا مش بيدوهاني لما اشتري الموبايل فازاي هطلبها من المحل لو حصل مشكلة خلال 14 يوم
    ياريت حد يفهمني

    و ياريت لو سمحت اسم المحل اللي بيبيع ب 3650 في شارع الشريف
    و شكرا

  11. #11
    عضوية جديدة
    تاريخ التسجيل
    Nov 2011
    المشاركات
    18
    معدل تقييم المستوى
    0

    رد: نصيحة لكل من يود شراء جلاكسى 2

    انا مش فاهمة الضمان الدولي يعني ايه
    مش كله بروح اصلحه في توكيل سامسونج ولا في توكيلات تانية بصلح فيها زي سكاي و يونيون؟

    هو الضمان كام شهر بالضبط؟؟
    و المفروض الضمان من يوم ما اشتري مش يتخصم مني شهور زيادة على الفاضي
    و معلش سؤال هل صدى الصوت ده يعتبر عيب صناعة و بيبدلو الجهاز لو فيه كده ولا ما ينفعش

  12. #12
    عضوية جديدة
    تاريخ التسجيل
    Dec 2011
    المشاركات
    33
    معدل تقييم المستوى
    7

    رد: نصيحة لكل من يود شراء جلاكسى 2

    متابع بأهتمام

  13. #13
    عضو
    تاريخ التسجيل
    May 2011
    المشاركات
    21
    الدولة: Egypt
    معدل تقييم المستوى
    0

    رد: نصيحة لكل من يود شراء جلاكسى 2



    اولا احب اشكرك على الموضوع
    ثانيا انا اشتريت الجلاكسى إس 2 فى شهر 7 على ما اذكر
    بضمان دولى ( ضمان المحل 14 يوم ) من شارع شريف
    والعلبه كانت مفتوحه والتليفون بره كمان وملفوف بسلوفان شفاف علشان العرض
    وبالرغم من كل ده كبرت دماغى خالص .. مسكت العده قلبتها كويس فعلا مفيهاش حتى بصمه ايد
    وتوكلت على الله واشتريته والحمد لله حتى الآن شغال تمام

    موضوع صدى الصوت ده كل اللى شوفته كان عيب من الكفر خصوصا الكفرات التعبانه هى اللى بتسبب الصدى
    والحل تجيب كفر محترم المشكله دى هتختفى ( الحقيقه اول مره اسمع منك انها عيب فى الموبيل نفسه )

    طبعا الموبيل لما اشتريته ما كنش في النسخه G دى اصلا فكنت مشترى مطمن والحمد لله ما حصلش اى مشكله

    عموما حكاية الضمان الدولى ما تخوفش المهم تجرب الموبيل كويس ولو شكيت فى اى حاجه سيبه وامشى كده كده علبته بتبقى مفتوحه يعنى انت مش اول واحد مسكته
    اهم حاجه تكون لزقة الشاشه عليه ده دليل كافى ان الموبيل لم يستخدم إلا للتجربه لان الشاشه مطبوع عليها كلام وصعب استخدام الموبيل وهى عليه

المواضيع المتشابهه

  1. طلب نصيحة شراء
    بواسطة noway_eg84 في المنتدى الأرشيف
    مشاركات: 0
    آخر مشاركة: 31-01-2012, 16:19
  2. مشاركات: 2
    آخر مشاركة: 24-05-2011, 20:19
  3. ساعدوني في قرار شراء سامسونج جلاكسي تاب P1000
    بواسطة Mezoxin في المنتدى الأرشيف
    مشاركات: 22
    آخر مشاركة: 06-05-2011, 11:48
  4. شراء هاتف جلاكسي اس (مراجعه بسيطه)
    بواسطة el_deep في المنتدى الأرشيف
    مشاركات: 3
    آخر مشاركة: 24-03-2011, 15:39
  5. طلب نصيحة فى شراء لاب توب
    بواسطة حازم 14 في المنتدى الأرشيف
    مشاركات: 0
    آخر مشاركة: 07-12-2010, 19:11

الكلمات الدلالية لهذا الموضوع

المفضلات

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •