تجربتى مع براند evga موضوع يهمك

[ahmedsamaha84]

بسم الله الرحمن الرحيم

هادخل فى الموضوع على طول

ناس كتير وانا كنت واحد منهم من اللى هما دماغهم وتفكيرهم تعب من البحث عن كارت شاشة

ولما تطلب كارت شاشة هتلاقى 50 واحد بيرد عليك وكل واحد بشكل وكل واحد بنوع

معنى كدا انى لما هطلب شراء كارت شاشة وهطلب من الاعضاء يساعدونى هلاقى فى الاخر قدامى 10 انواع من الكروت وعليا انا اختار

وبعدين تعمل حسابك مثلا على مبلغ معين للكارت اللى هتجيبة تلاقى واحد يقولك طب زود 50 جنية وهات دة احسن واحد يرد بعدية ويقولك لالالالا زود كمان 100 وهات الكارت دة

يعنى مثال لو عامل حسابك على كارت ب700 جنية هتلاقى نفسك وصلت ل 1500 جنية

طب وبعدين مش هشترى كدا والله انت شوفت اراء الاعضاء وانت وراحتك

انت كدا وقعت فى مطب صناعى طل اجيب ابو 700 ولا استنى ل1500 يبقى مش هتجيب خالص

بمعنى ادق وهو دا اللى انا عملتة انا قولت هجيب كارت بكذا يبقى هو كذا ومفيش كذا تانية لانى صدقنى صدقنى صدقنى

لو قعدت تدور يبقى مش هتجيب عايز اقولك ان مش الاعضاء هنا بس كل واحد برأى لالالالا دا فى كل المنتديات كدا ومش معنى ان كل واحد برأى يبقى هتقوم خناقة يعنى مقصدش كدا هو بمعنى ان كل واحد شايف الانسب بالنسبة ليك سواء سعر مقابل اداء او جودة او على حسب تجربتة الشخصية للكارت مثلا

اللى يهمنى فى الموضوع دا انى انا بشجع جميع من يمتلكون كروت شاشة فئات قوية سواء nvidia او ati انو مش هيخسر حاجة انة لو عمل موضوع بسيط يقول فية تجربتة مع الكارت بما يرضى الله دا هيفيدنى كتير بما انى مثلا هشترى كارت شاشة جديد وممكن اشوف موضوعك مثلا واعرف تجربتك اية مع الكارت انزل اشترية واتوكل على من غير ما ادور ولا اتعب نفسى ولا اقع فى حيرة وافضل اقول هجيب لا مش هجيب

بالنسبة بقى لموضوع الالعاب

هوباااااااااااااااا دخلنا فى الجد

انت عايز تلعب

اة يريت

الالعاب الحديثة

اكيد طب وهو انا تاعب نفسى لية وعمال ادور على نوع كارت

يبقى اعتقد ان اول مبلغ هتفكر انك تتكلم بية على الاقل يعنى وحسب خبرتى الضعيفة قوى هيبقى مثلا 700 جنية

دا كلامى على حسب الاسعار اللى بشوفها دا غير طلبات من اعضاء كتير فى منتديات كتير جدا

وكان الرد ان من 700 وانت طالع هى دى البداية

طيب كدا يبقى اتفقنا مبدئيا طب نرجع تانى ونقول

عايز حاجة بقى سعر مقابل اداء ماهو انا مش معايا كل شهرين 700 جنية علشان اجيب غيرة اكيد هدور بقى علشان اجيب الحاجة الصح والمظبوطة

هتبدأ بقى تدور على مقارنات الكروت وتلاقى موقع يقولك دا الاحسن وتلاقى موقع تانى يقولك لالالا غلط دا التانى هو اللى احسن
ودا طبعا فى المواقع الاجنبية وفى ناس زى حلاتى يحبو يدورو فى المنتديات العربية ويشوف حبايبنا العرب اللى نفهمهم يا عم احسن مش كدا ولا اية

اة طبعا كدا وابو كدا كمان

علشان كدا انا بقول وبرجو السادة الاعضاء اللى يمتلكو كروت شاشة فئات عالية يدخل ويقول تجربتة مع الكارت كانت اية صدقنى فى ناس كتير جداااااااااااااا هتشكرك لانها فعلا محتاجة دة

طولت عليكم وندخل فى المفيد بقى

تجربتـــــــــــــــــــى مع كــــــــــــــــــــارت شــــــــــــــــــــاشة

EVGA GeForce GTS 450 Superclocked 1gb gddr5

واحد يقولى يا ترى nvidia الاحسن ولا ati الاحسن

ماهو مينفعش اجى واقول على اكبر واعرق شركتين فى تصنيع كروت الشاشة واقول مين الاحسن

كل واحد فيهم لية مميزات ولية برضه عيوب عادى اية المشكلة وكل شركة فيهم بتحاول تقدملك اقصى ما عندها علشان ترضيك انت

وهتلاقى اللى من هنا لية مقابل من هنا يعنى كارت nvidia قصادة كارت ati

هى ممكن ترجع للراحة النفسية وممكن ترجع لاستخدامك انت من فترة لنوع معين وفى اللى بقالة فترة بيستخدم نوع معين وحابب يغير عايز اقول فى الاخر ان الاتنين حلوين بتحب نوع معين يبقى مفيش مشكلة حابب تغير مفيش برضة مشكلة هتشوف اللى يناسبك ويناسب المبلغ اللى انت ناوى تجيب بية مش اكتر اهم حاجة بس انك تركز على موضوع التبريد دا مهم جدا

نرجع لموضوعنا تانى

تجربتـــــــــــــــــــى مع كــــــــــــــــــــارت شــــــــــــــــــــاشة

EVGA GeForce GTS 450 Superclocked 1gb gddr5

الكارت ثمنة 775

مبدئيا انا بحب nvidia

ولما حبيت اشوف براند معين اجيب منه اول حاجة بصيت عليها evga

براند يعنى صنف او علامة تجارية

طب اشمعنى بقى evga

اقولك لية

شركة evga من الشركات الصديقة والمقربة جدا ل nvidia دا اولا ثانيا جودة التصنيع للكارت لا يعلى عليها ثالثا التبريد انا شايف انو ممتاز قوى قوى

تصنيع الكروت فى evga مقارب جدا لnvidia بنسبة 70% حتى لو بصيت فى اسعار الكروت فى موقع nvidia نفسة هتلاقى الموقع عامل ترتيب للشركات اللى بتقفل كروت ليها بمعنى انك لو حابب تشترى كارت nvidia من الشركة الاصل او من الشركات الاخرى هتلاقى asus و evga اوائل الاختيارات ليهم على فكرة سامع ان asus كروتها ممتازة وفى التبريد بالذات بس مجربتش

المهم انها حاجة بجد جميلة وعجبتنى evga من اوائل الشركات اللى بينصح بالشراء منها وزيها asus دا طبعا رأى الشخصى علشان محدش يقول انا بميز شركة عن شركة انا بقول دا من واقع تجربتى وبما يرضى الله

ادخل على الروابط دى وشوف evga مع nvidia

https://www.nvnews.net/vbulletin/sho...d.php?t=157771

https://www.nvnews.net/vbulletin/sho...d.php?t=155050

دا غير اشكال الكارت نفسة شكلها مقبول مش مهمة قوى بس بنقول يعنى

طبعا اول ما جبت الكارت اختبار بقى ولا اية

مسكت لكارت غسلتة العاب ومن اللى قلبك يحبها

مثال

FIFA 2012
Mafia II
Pro Evolution Soccer 2012
Sniper Ghost Warrior
call of duty modern warfare 3
call of duty black ops
need for speed the run
gta iv episodes from liberty city
Battlefield 3

كل الالعاب دى يا اما

high
very high
ultra

الضغط بيبقى من 3 الى 4 ساعات لعب متواصل ودقة الشاشة 900*1600

كارت الشاشة فى الخمول درجة الحرارة 27 ولما تزيد قوى يبقى 29 ودا مع الوقت الطويل

اما فى الضغط عمل معايا درجة حرارة بالظبط من 50 الى 55 وممكن 57 مشوفتش اكتر من كدا

اداء الالعاب مفيش تهنيج مفيش تقطيع الالعاب ثلثة جدا وممتازة وشغالة زى الفل قوى قوى

دى تجربتى مع الكارت لو حد هيسألنى على برامج ثرى دى او بينش مارك انا مجربتش انا جايب الكارت مخصوص للالعاب وقولت على تجربتى للكارت بالظبط وبما يرضى الله


وبكدا اكون خلصت اتمنى انى يكون الموضوع عجبكم ولو انا نسيت اى حاجة اقولها سامحونى كل هدفى انى اقدم موضوع يستفيد بية الاعضاء والزوار الكرام اتمنى انى اكون قدمت الموضوع بشكل كويس

شكرا وتحياتى للجميع

[yossefzied]

متفق معاك جدا في رأيك ي بداية الموضوع وكنت سعات كتيرة بقول الكلام دا في بعض المواضيع اللي ناس جديدة بتكون طالبة مساعدة في شرا كارت شاشة ونلاقي تغير الشركة والميزانية !!!
المهم .... أظن قسم المراجعات الشخصية بقي في مواضيع زي دي تساعد الناس ولو حابب تعمل حاجة أكبر .... يبقي ممكن نتفق علي بنود نعملها في موضوع كبير .... وتكون مختصرة علي قد ما نقدر لأني متوقع لو إتعمل هيكون كبيييييييييير جدا

[I M P O]

أول حاجة بشكرك عالموضوع الطويل الجميل ^^

شركة EVGA هي الشركة رقم لمبيعات منتجات nVidia في الولايات المتحدة... و الشركة تتميز بخدمات مابعد البيع زي الضمان و الدعم و إلخ ... شركة ممتازة الصراحة

[lovepc]

انتا تمام والله رغم انى خلاص نويت ولسة مش عارف امتى انى اجيب كارت غالى 6870 بس تلاقى ملا لوحد عايز يجيب كارت ب 700 ولا 900 جنية تلاقى كل الناس تحسسة انو مش هييشغل حاجة هههههه يا جدعان انا لحد دلوقتى بلعب العاب السنة اللى فاتت بكارت ati 3200 و كمان بلييت ان طبعا على اقل حاجة بس يشغلها مش لازم يعنى تجيب 100 فرييم فى اللعبة عشان تستمتع +و دة بيخلى الناس اللى عايزة فيجا رخيصة تصاب بالاحباط مع ان والله ال 700 جنية مش رخيصة خالص و زى ما حضرتك قلت اهو انها بتشغل العاب 2011 على ال high

[ahmedsamaha84]

ردا على العضو lovepc حابب اكمل كلامة واقول انو صح كل الالعاب بتاع السنة اللى فاتت كنت بلعبها على كارت بلت ان مش كلها لاكن اقسملك انو معظمها الموضوع كلة انى بقلل الاعدادات بتاع اللعبة وانا بالنسبالى موضوع الاعدادات دا مش بركز علية قوى وحاليا عندى فى الجهاز القديم كارت شاشة gienword geforce 9500 gt 1gb ومشغل كل حاجة وبدون اى مشاكل كل الموضوع ان فى العاب اعدادتها مثلا medium بدل high عايز اقول على حاجة مهمة ودا عن راى الشخصى فى ناس كتير من كتر ما عملت بحث على موضوع كروت الشاشة بقو واخدين فكرة واعتقاد ان لو كارت الشاشة اللى هجيبة جديد مش هيشغل الالعاب على very high يبقى بلاش منه طب ازاى يعنى مش فاهم يعنى انا لو معايا مبلغ معين ومش هقدر ازود علية فلوس تانى يبقى مجبش احرم نفسى علشان خاطر high و very high ما تلعب يا عم اعدادات متوسطة وخلاص انا واحد من الناس مازلت بقول انا زمان مكنتش طايل اشغل لعبة معينة حابب العبها على low وربنا كرمنى بمبلغ معين ومش هقدر ازود علية اجيب بقى اللى يشغل ومش لازم اعدادات عالية فى الالعاب انا ماشى بمبدأ اللعبة تشتغل سواء بقى high low medium مش مهم المهم انها تشتغل وخلاص هو لازم تبقى واقعية قوى مش ناقص بقى انى وانا بلعب لعبة جتا مثلا هلاقى الراجل طلع من الشاشة وبيضربنى بالرصاص من كتر التجسيم

يا جماااااااااعة اولا واخيرا دى لعبة بسلى نفسى وقت معين وبينتهى الوقت وبنسى بقى تجسيم وكارت شاشة high و low

انا اللى عايز اوصلة ان انا بقول مش لازم تزنق نفسك علشان تجيب كارت شاشة لو حسبتها صح يبقى هتجيب وهتشغل كل اللى انت عايزة وبدون ادنى مشكلة انما لو ركزت هتتعب ومش هتجيب وهتعمل زى زمان كنت يا عينى عمال اتفرج على الجيم بلاى للالعاب على اليوتيوب هههههههه

تحياتى للجميع

[lovepc]

والله كل الاحترام لصاحب الموضوع احيييك بشدة و خلى الناس تتبسط و تلعب و فى حاجة الناس مش بتركز فيها برضوا ان اغلب المنتديات المشهورة بيبقى فيها ناس اجهزتها جامدة جدا جدا و بتفكر ان لو جهازك اقل من كدة يبقى سيئ ووحش يعنى فى ناس بتجيب كيسة ب 1000 جنية او اكتر هو عايز كدة لكن انتا لو جبت كيسة يا سيدى ب 350 جنية زى الفل لو الحرارة هتبقى كويسة و الموضوع فى الكمبيوتر احتياجك ايه و فلوسك اد ايه وشكرا لصاحب الموضوع و كانت محاولة منى لتاكيد كلامة عشان اى حد يشوف موضعنا يجيب جهاز زى ماهوز عايز و هيلعب ان شاء الله بس كل الفكرة انك هتققل الاعدادات بس اللعبة هتشتغل .

[ahmedsamaha84]

وكل الاحترام والتقدير الشديد ل lovepc

وبرجع واقول لكل الاعضاء والزوار لو حابب تشارك برأيك يريت فى ناس كتير هتحتاج تشوف الكلام دا علشان تطمن وتعرف وتتاكد انهم مش بيجيبو حاجة وحشة صدقنى كلو كويس اهم حاجة انت شوف ميزانيتك كام وهات على قدها واحتياجاتك على قد ميزانيتك ومتزودش علشان تعرف تشترى

حاجة تانية بالنسبة لاختيار الانواع عايز اقولك حاجة مهمة

لما تيجى تجيب جهاز جديد مثلا وتستفسر عن حاجة زى المازر بورد مثلا شوف بقى اللى هيحصل

تلاقى واحد يقولك هات جيجا بايت دى شركة مشهورة وممتازة

واحد تانى يقولك لالالالا دا الاسوس لا يعلى عليها سعر مقابل اداء ومش عارف اية

واحد يقولك والله دا الاسروك دى ممتازة وكفائة وسعرها رخيص وادائها فوق الخيال

واحد بقى هيقولك يااااااااة دا الام اس اى اية بقى هاتها وسيبك من اللى يقولك على حاجة تانية

كل واحد منهم بيقولك على حسب ما جرب وفية اللى بقالة فترة كبيرة بيستخدم نوع معين فا مستريحلة فبيقولك علية هو شايف ان نوع معين مثلا المشاكل بتاعتة قليلة شوية او شايف ان فيها حاجة مش موجودة فى التانية

اللـــــــــــــــــــــه يبقى الموضوع بقى مش موضوع نوع معين

المسئلة بقت مسئلة امكانيات معنى كدا ان البورد دى كلها مش وحشة صدقنى والله مش وحشة

المسئلة مسئلة امكانيات ودا اللى انا شوفتة من خلال التجربة دا غير البحث الطويل على النت قبل كدا

يبقى معنى كدا ان على قد ميزانيتك هات اللى انت عايزة

طب والله لا اقولك على حاجة انا عملتها بنفسى

فى عز عين اذدهار اسوس وجيجا بايت بس دا فترة كبيرة شوية والله لقيت نوع بوردة قدامى وجديدة وواحد قالى لسة بخيرها وممتازة

سمعت كلامة وبدون اى تردد مع انى عارف ان فية انواع تانية موثوق فيها ومع ذلك جبت كانت بوردة اسمها manli لو حد سمع عنها قبل كدا

البوردة دى جبتها من 2002 والله العظيم لحد النهاردة شغالة اية رايك

كل اللى باظ فيها حاجتين usb و سوكت المروحة بتاع البروسيسور والحمد لله كان فيها 2 سوكت هههههه يعنى مشغل بالتانى

شغالة والله لحد دلوقتى

عايز اوصلك فى الاخر ان كل الناس جايبة انواع مختلفة وكل واحد فيهم جرب واتاكد ان البوردة اللى جايبها مثلا حلوة وبتستحمل

متترددش وهات من اى نوع يعجبك

عايز اقول ان الشركات وفى الوقت دا بالذات كل واحدة فيهم بتحاول تقدم اقصى ما عندها علشان تقدملك شئ كفئ ويستحمل علشان المنافسين هما مشغلين المنافسة واحنا اللى بنستفيد فى الاخر كل الفرق هو الاسعار مش اكتر لاكن الجودة اظن انها هتبقى ممتازة وفى عصر التطور دا وبالذات انت شايف بعينك كل يوم فى الكمبيوتر جديد

ارجع واقول فى الاخر على قد ميزانيتك هات اللى يعجبك ومتقلقش ما هو لما انا عرفت ان الناس كلها جربت كل الانواع وكل واحد فيهم بيشكر فى النوع اللى هو جربة طب انا هقلق وافكر كتير لية بقى

شكرا وتحياتى للجميع واللى عايز يشاركنا فى الموضوع اكون سعيد جدا وهتابع معاة باذن الله تعالى

تحياتى للجميع

[Sn007]

بارك اللله فيك أخي الكريم و مبروك عليك الكرت
أنا أيضا كنت أعاني دائما من التردد قبل الشراء و أتشتت بين ألراء الأعضاء وفي الأخير أتراجع عن فكرة الشراء و أنتظر الجيل الأحدث و هكذا !!!
المهم إن شاء الله هذه المرة سأحاول التغلب على الوسواس و حسم الأمر !