تقرير عن موبايل Nokia E72

[optimus prime]

بسم الرحمن الرحيم

تقرير عن موبايل Nokia E72

من فترة قريبة اشتريت موبايل Nokia E72 وبصراحة موبايل جميل جدا بل اكتر من رائع ووصلت معايا اني حسيت اني ما استخدمتش موبايالات قبل كدا ودا تقرير بسيط عنه ان شاء الله اتمنى اني اوفق في اني اعرض مميزات الموبايل .. ف البداية انا هبدأ ببعض الصور ليه وهبتدي اتكلم عن حاجة حاجة فيه ان شاء الله

ودلوقتي بعض الصور ليه

بالنسبة للتقرير

بصراحة انا اول مرة اكتب تقرير عن حاجة اشتريتها فهحاول اتكلم في شوية نقط تحت عناوين

أولا : الشكل والتصميم الخارجي للجهاز :

الموبايل جميل جدا كشكل واستايل وجميع الالوان منه اكتر من رائعة انا عن نفسي اشتريت اللون الدهبي الموبايل طبعا زي جميع موبايلات الE series الوش الخارجي للمبوايل ستاليس ستيل وكمان الجزء الي بيغطي البطارية ومتغطي بجزء بلاستيك في جميع المناطق المختلفة عن ذلك الزراير الاجزاء البارزة من التلفون هي كالتالي :

- أزرار زيادة وخفض الصوت وفي النص بينهم زر متخصص للاوامر الصوتية

- بابين واحد منهم مغطي مكان وصلة الUSB والتاني مغطي مكان الميموري كارد

- في قمة التلفون من فوق زر تشغيل التلفون والاختيار بين الاوضاع

- جمبه على اليمين شوية في مكان توصيل السماعة 3.5 mm

- من الاسفل في مكان لتعليق الدلاية وبجانبة فيه مكان لدخول وصلة الشاحن الي هي الابرة الصغيرة

شاشة التليفون :

- شاشة التليفون 2.4 بوصة بالعرض تقريبا او حاجة زي كدا

- بصراحة القراية من على الشاشة متعة جدا بس في بعض الاحيان ممكن تضطر تقرب الموبايل من عينك علشان تقرى كويس لكن في اغلب الاحيان بصراحة مقروءة جدا

- اضاءة الشاشة ممتازة جدا زي ما الصورة الي فوق موضحة والخطوط فيها واضحة جدا جدا

- الالوان بتاعتها اكتر من رائعة

- طبعا على الشاشة من فوق في عدسة الاستشعار الي بتضلم الشاشة اول ما تقرب من الودن علشان توفير البطارية وكمان في الكاميرا الامامية المختصة لمكالمات الفيديو

لوحة المفاتيح :

- بصراحة لوحة المفاتيح هي اجمل ما يميز الجهاز دا اختراع جميل جدا واالكتابه عليها اكتر من رائعة ومريحة جدا جدا جدا جدا

- يميزها ان كل الحروف موجودة والضغط عليها سهل جدا وملمسها جميل وسهل التعامل معاها

- يعيبها تلات نقط اساسية وهي كالتالي ::

- مفيش زر مخصص لتغير اللغة زي بقيت الموبايلات الي ممكن تغضط ع الشباك تغير اللغة او تدخل على القائمة انما هنا مفيش الكلام دا بس ممكن تغير حالة الحروف

- علشان تكتب ارقام وانت بتستخدم الوررد او الرسائل لازم تضغط على زر مخصص علشان تفتح الارقام انما علشان تتصل وانت بتستخدم الشاشة العادية للتليفون عادي جدا مفيش اي مشاكل

- في زر مخصوص طبعا علشان تحول التلفون لوضع الصامت وزر اخر علشان تفتح البلوتوث ومن وجهة نظري دي جميلة جدا

- في زر مخصوص علشان تشغل فلاش الكاميرا كضوء مصباح ودي برضه جامدة جدا

- فيه طبعا اربع ازار متخصصة واحد للاسماء وواحد لبرنامج الايميل وواحد للتقويم وواحد للقائمة

السوفتوير :

- سوفتوير نوكيا المعتاد مفيش فيه اي زيادات او نقص غير بعض الحاجات الطفيفة المختلفة

- مثلا نازل معاه طبعا جميع برامج الاوفس من اول الAdobe reader والQuick office وفي طبعا وضعية التعديل جميلة جدا

- نازل معاه الMsn Messenger وكمان BookMark لجميع برامج الشبكات

- في option مخصوص علشان يغير وضع التلفون من وضع الاعمال لوضع التسلية او الاوضاع الشخصية وبكدا اقصد رنة التليفون وكمان theme التليفون

- غير كدا يعتبر تقريبا كل حاجة في السوفتوير شبه الي موجود في باقي موبايلات نوكيا مفيش اختلاف

كاميرا التلفيون :

الكاميرا طبعا 5 ميجابكسل وتصويرها جميل جدا وفيها Tagging والمفروض كمان في Geo-tagging بس مش عارف ازاي اشغلها الكاميرا تصوريها ممتاز سواء ان كان تصوير فوتوغرافي ثابت او تصوير فيديو وهرفع ملف فيديو وبعض الصور المتصورة بالتليفون

GPS :

جميل جدا وممتاز جدا وكمان النسخة الي انا اشتريتها نازل معاها خرائط مجانية من نوكيا مع الارشاد الصوتي وبعض الاضافات الي مش موجودة في برنامج الGPS الي بينزل من على موقع نوكيا اشارته قوية جدا وبيلقط الاشارة في اي مكان تقريبا وبسرعة تقريبا بياخد من 5-10 ثواني عبال ما يلقط الاشارة واحيانا اسرع من كدا بكتير

السماعات :

صوتها عالي وحلو ومناسب ليا جدا زي اغلب سماعات عائلة الE من نوكيا الصوت نقي وواضح فيه التاثيرات الصوتية الي بتبقى ف الملف

البطارية :

اقوى بطارية شفتها حتى الآن ... ممكن استخدم البلوتوث وال GPS + Wifi والكاميرا واقرى قصص من على التليفون واسمع اغاني عليه واستخدم الفلاش كمصباح وتقعد معايا 3-4 ايام عبال ما يتبقى ف البطارية شرطة او شرطتين

الoptical trackbad

جميلة جدا وممتع جدا استخدامها تقريبا شبه الNavi Wheel الموجودة في الN81 وبتنور دايما لما يكون التلفون مشغل شاشة توقف او في مكالمة او رسالة ما اتشافوش

مميزات التليفون :

1- الشاشة بتاعته حلوة والقراية من عليها واضحة جدا

2- الزراير الكاملة الي موجودة في الكيبورد مخلية استخدام التلفيون متعة بصراحة وخصوصا جميع البرامج الي فيها كتابة

3- صوته حلو وعالي

4- الكاميرا ممتازة جدا

5- شكله جميل جدا

6- يستحمل الشغل التقيل

7- البطارية بتاعته بتعيش جامد جدا

العيوب

1- شكله كبير ودا ممكن يدايق بعض الناس

2- حجم الزراير صغير ودا برضه ممكن يدايق بعض الناس

3- عدم وجود زرار يغير اللغة بسهولة وكانت المفروض نوكيا تتفادى العيب دا (اتحلت خلاص بدوس على شيفت وزر الرموز مع بعض )

4- السماعة الي بتيجي معاه وحشة جدا ومالهاش اي لزمة

تقيمي العام ليه

9.0 من 10

لو في اي استفسار انا موجود ولو اي حد شايف حاجة ناقصة من التقرير ياريت يبلغني ومعلش ما قدرتش اكتب بالعربية الفصحى :o

دي صورة وملف فيديو الي مصورهم بالتليفون علشان تحكموا بانفسكم

https://tinypic.com/r/2n85zpf/4

[Dr Mohammad]

مبارك عليك الجهاز
ربنا يرزقك خيره و يكفيك شره
الجهاز فعلا ممتاز ما شاء الله
و التقرير جميل جدا و منظم و غطى أغلب النقاط تقريبا
و ينقصه فقط أن تضيف لونا مميزا للعناوين (أحمر مثلا) (لو تحب ممكن أعدله لك)
و طبعا ان التزمت باللغة العربية الفصحى مستقبلا تقاريرك هتبقى تحفة بإذن الله
جزاك الله خيرا

و ياحبذا لو وضعت رابط الموضوع فى موضوع الأسعار , لأن التقرير سيفيد الكثيرين بإذن الله

[optimus prime]

مبارك عليك الجهاز
ربنا يرزقك خيره و يكفيك شره
الجهاز فعلا ممتاز ما شاء الله
و التقرير جميل جدا و منظم و غطى أغلب النقاط تقريبا
و ينقصه فقط أن تضيف لونا مميزا للعناوين (أحمر مثلا) (لو تحب ممكن أعدله لك)
و طبعا ان التزمت باللغة العربية الفصحى مستقبلا تقاريرك هتبقى تحفة بإذن الله
جزاك الله خيرا

و ياحبذا لو وضعت رابط الموضوع فى موضوع الأسعار , لأن التقرير سيفيد الكثيرين بإذن الله

شكرا على مرورك يا كبير والله نورت الموضوع
هظبط موضوع الالوان دا دلوقتي ان شاء الله
المشكلة اني ف الفصحى مش متميز قوي وتقيلة علية شوية
بس ان شاء الله مقدما هحاول التزم وانا فعلا حطيت الرابط في موضوع الاسعار
ونورت الموضوع مرة تانية

[event88]

بجد يا أحمد روعة وابداع بجد
أنا من زمان بعجب بال E سيريس 72 شئ مبالغ في الروعة والتقرير مفيهوش كلام مية مية يا جامد ألف تقييم ما يكفوك

[optimus prime]

بجد يا أحمد روعة وابداع بجد
أنا من زمان بعجب بال E سيريس 72 شئ مبالغ في الروعة والتقرير مفيهوش كلام مية مية يا جامد ألف تقييم ما يكفوك

الله يخليك يا هيما والله كلامك دا احلى تقييم عندي ف الدنيا
فعلا السلالة دي ممتازة جدا وامكانيتها حلوة ومفيش مرة اجيب موبايل منها الا احترم نوكيا اكتر من الاول
بجد انا مبسوط قوي ان التقرير عجبك

[isl_amd]

موبايل جميل ربنا يباركلك فيه بس مقولتش جبته ب كم و منين و صناعة إيه

[optimus prime]

موبايل جميل ربنا يباركلك فيه بس مقولتش جبته ب كم و منين و صناعة إيه

انا جبته من الامارات بمبلغ 1150 درهم اماراتي وصناعي صيني بس مش فارقة كتير يعني انا جربته مع واحد صاحبي مفيش اي فرق خالص

[ehab7bob]

تقرير جميل وما رايك في blackberry 8520

[coolhero]

شكرا اخى على التقرير المتمبز

[samor]

موبايل رائع وتقرير رائع ربنا يباركلك فيه
شكرا أخى الكريم

[optimus prime]

تقرير جميل وما رايك في blackberry 8520

شكرا على مرورك ... بص انا كنت هجيب الblack berry بس هو اساسا استخدامه بيكون ف الايميل وانك تستخدم خدمة البلاك بيري يعني لازم يكون عندك ناس كتيرة مشترية البلاك بيري من اصحابك وساعتها ممكن يكون افضلك من النوكيا لانك هتستخدم الماسنجر انما لو مش هتستخدم الخدمة الي هي اساسا هتتلغي قريب يبقى هات النوكيا افضل لان الكاميرا بتاعته اعلى وشكله احلى

شكرا اخى على التقرير المتمبز

شكرا يا محمود على مرورك

موبايل رائع وتقرير رائع ربنا يباركلك فيه
شكرا أخى الكريم

الله يكرمك وشكرا على مرورك

[Black-Edition]

الف مبروك اخى الموبايل الممتاز

وتقرير رائع جدااااا ... شكرا

[optimus prime]

الف مبروك اخى الموبايل الممتاز

وتقرير رائع جدااااا ... شكرا

شكرا على المرور يا سيدي الفاضل
الموبايل فعلا اكتر من رائع

[BlacK ShaDoW]

ألف مبروك يا حاج احمد

تقرير ممتاز بس ياريت تعملوا زي ما قالك دكتور محمد هيبقى شكلا احلى :ah7:

[egyzero]

فى نقطة مهمة جدا موجودة فية انة فيه VOIP يعنى ممكن تستعمل السكاى بى او تعمل مكالمات عن طريق الانترنت او لو عندك نظام PBX بيدعم ال SIP هيبقى ساعتها بيوفرلك كتير فى مكالماتك يعنى تخيل انت مسافر برة البلد بتاعتك وتدخل على ال PBX بتاعك وتاخد الخط وتعمل مكالمات بسعر المحلى مش دولى كل الى هتحتاجة هو انترنت فقط وشكرا