مشاهدة نتائج الإستطلاع: ما رأيك في مستوى المراجعة؟

المصوتون
39. أنت لم تصوت في هذا الإستطلاع
  • ممتازة

    30 76.92%
  • جيدة جداً

    7 17.95%
  • جيدة

    2 5.13%
  • سيئــة

    0 0%
صفحة 1 من 4 1 2 3 4 الأخيرةالأخيرة
النتائج 1 إلى 15 من 51

الموضوع: مراجعتي الشخصية الاحترافية لبطاقة Sapphire HD7770 GHz Edition OC مكسورة السرعة

  1. #1
    عضو ذهبي الصورة الرمزية محمد الجوهري
    تاريخ التسجيل
    Apr 2007
    المشاركات
    3,047
    الدولة: Saudi Arabia
    معدل تقييم المستوى
    109

    Lightbulb مراجعتي الشخصية الاحترافية لبطاقة Sapphire HD7770 GHz Edition OC مكسورة السرعة



    السلام عليكم و رحمة الله و بركاته

    أنا عملت المراجعة على شكل فيديو علشان أسهل على حضراتكم و أوفر وقت القراءة و متابعة الصور, لكن طبعاً المراجعة المكتوبة أشمل و أكبر من الفيديو


    Sapphire HD7770 GHz Edition OC Video Review by Muhammad Al-JawharY

    من فترة قريبة كان عندنا مجموعة محترمة من الكروت سواء من Nvidia أو AMD و كانت –و ما زالت- الكروت دي بتقدم أداء رائع و إمكانيات واعدة في كسر السرعة كمان. بدأ سيل من الكروت الجديدة ينزل علينا و ده خلانا نسأل "إيه الجديد اللي ممكن الكروت دي تقدمه؟!" و كان أول السيل ده هو HD7970 اللي أصبح بين ليلة و ضُحاها حديث الساعة و محبوب الملايين, الكارت اللي أطاح بكل الكروت الموجودة على الساحة و احتل عرش الكارت المُرعب GTX580 اللي كان بمجرد ما تسمع اسمه تعرف إنك بتتكلم عن أسرع كارت أحادي النواة في العالم. دلوقت الوضع اختلف مع وجود حاكم جديد في المنطقة و هو HD7970... طيب تمام, استنينا بعدها بفترة (15 يوم تقريباًّ) و نزل لنا الرجل الثاني في المملكة اللي اسمه HD7950 و هو الكارت اللي كان عليه عين كتير من الناس لأننا عارفين إن الكارت الثاني في سلسلة AMD دايماً بيكون كارت مميز (و لو مش مصدقني إسأل عن HD6950) و فعلاً الكارت قدم أداء متميز للغاية. بعد كدة بدأت AMD تعلن عن باقي العائلة و كانت البداية مع كروت الفئة المتوسطة الاقتصادية HD7770 و HD7750, طبعاً أول ما سمعت اسم الكارت HD7770 قلت في نفسي "إيه السبعات دي كلها, يا ترى هيطلع سبع و لا ضبع؟!". و بعدها ظهرت كروت تانية تحت اسم HD7870 و HD7850. و مؤخراً Nvidia لحقت السباق و نزلت GTX680 و فيه أخبار عن إخواته الصغيرين اللي هينزلوا في غضون شهر إن شاء الله.

    المهم, كارت HD7770 هو خليفة HD6770 و للعلم HD6770 كان خليفة لـ HD5770 اللي كان خليفة لـ HD4770. و خلوني أقولها لكم بصراحة و من خلال نظرتي الشخصية "أفراد العائلة دي شعبيتهم بتقل مع كل مولود جديد!" أيوة, لو تفتكروت معايا HD4770 لما نزل أول مرة, فاكرين كان عامل إزاي و فاكرين الضجة اللي عملها ساعتها, خصوصاً إنه أيامها كان ملك الفئة الاقتصادية بلا مُنازع هو HD4670 (فاكرين الاسم ده؟) و لما نزل HD770 كان وسيلة مناسبة للناس اللي مش عاوزين يدفعوا فلوس كتير و في نفس الوقت يلعبوا على إعدادات لعب مرتفعة. أنا شخصياً قضيت وقت طويل أبحث عن فيديوهات للكارت على YouTube علشان أعرف مستواه في الألعاب على 1920x1080. بعدها دخل HD5770 المعركة و لكنه لم تصاحبه ضجة كبيرة زي اللي صاحبت HD4770 يمكن علشان المولود الأول دايماً بيبقى ليه فرحة خاصة. بعد كدة نزل HD6770 اللي أثار استياء كثير من الناس لأن الناس اعتبروه نُسخة مُقلدة من HD5770. النهاردة معانا HD7770 و هو كارت مبني على معمارية جديدة تماماً بدقة تصنيع جديدة تماماً هي 28 نانومتر, يا ترى الكارت هيقدم جديد على صعيد الأداء, و الحرارة, و كسر السرعة؟ و لا هو مجرد فرد جديد في العائلة و خلاص؟

    الكارت اللي معانا النهاردة من إنتاج Sapphire Technology الشركة الرائدة جدي في تصنيع كروت AMD منذ قديم الأزل (كان عندي زمان Sapphire HD4890 و فضل شغال معايا لحد شهرين فاتوا, كان أســد, الله يرحمك يا حنفي, حنفي ده اسم الكارت يا جماعة). الكارت تصميمه غير قياسيّ (يعني مش نفس الكارت اللي AMD أصدرته) و تبريده مختلف يعتمد على مروحة كبيرة موجودة في منتصف الكارت. الكارت مكسور السرعة مصنعياً و بييجي بترددات مهولة قدرها 1150 ميجاهرتز للمعالج الرسومي, و 1250 ميجاهرتز للذاكرة. فاكرين زمان, كان رقم 1150 للمعالج الرسومي رقم كبير جداً ما حدش يحلم بيه, دلوقت بقت الكروت بتنزل باسم GHz Edition, سبحان الله, الطب اتقدم. الكارت مكسور السرعة بمعدل 150 ميجاهرتز عن التردد الأصلي اللي هـو 1000 ميجاهرتز بالنسبة للمعالج الرسوميّ, و زيادة 125 ميجاهرتز لتردد الذاكرة.

    مراجعتي للكارت مش هأتكلم فيها عن المعمارية و التقنيات المُعقدة, و إنما هأحاول أبسط الأمور قدر المستطاع, و الأهم من كدة هو إني أقدم لكم تصور منطقي و طبيعي و عملي و موضوعي عن قدرة الكارت و شكل الأداء العام, و علشان أحقق كدة اختبرت الكارت على معظم ألعاب DirectX-11 و حاولت أتجنب كثير من برامج الاختبار النظرية و الألعاب القديمة, حتى القوية منها.

    تعالوا الأول نتعرف على الكارت و نشوف إيه اللي بييجي معاه من متعلقات و أدوات, ياريت بس ناخد في الاعتبار أمر مهم جداً, و هي إنه كل الكروت تقريباً بيبقى فيه منها نسختين (بتكلم عن كروت سافاير تحديداً) النسخة الأولى بيبقى اسمها Full-Package و دي الكروت بتبقى علبتها كبيرة و مُصممة بشكل عرضي كدة (يعني الكرتونة بتتفتح من الجانبين). و النسخة التانية بيبقى اسمها Lite-Package و دي بتبقى علبتها أصغر و مصممة بشكل طولي و بتتفتح من فوق أو من تحت. طيب إيه الفرق بينهم يا جوه جوه (اعتبروه اسم الدلع بتاعي)؟ الفرق إن العلبة الكاملة بييجي معاها متعلقات أكتر زي كابل HDMI و يمكن محولات أكتر من النسخة الـ Lite و غالباً سعرها بيبقى أغلى بنسبة 10 أو 20 دولار. بس التوكيلات بيفضلوا النسخة الأصغر علشان بتبقى أرخص فيقدر يحط هامش ربح أحسن و في نفس الوقت يحافظ على ميزانية الناس. عموماً واضح إن النسخ اللي في مصر كلها Lite حتى شوفوا الرابط ده: http://www.********.com/search.php?q=7770

    حبيت بس أوضح النقطة دي علشان ما حدش يروح يشتري و يحس إنه اتخدع أو إني ضللته, و عموماً الكارت ده أنا مش جايبه من مصــر, ده أنا جايبه من سافاير رأســاً قبل الإطلاق الرسمي بعشرة أيام, بس المراجعة اتأخرت لعدة أسباب منها إن دي أول مراجعة أعملها بالكامل (تصميم و شغل و كتابة) ده غير إن فيه ألعاب كنت حذفتها و طلبت مساعدة صديقي الغالي أحمد سعــد علشان يجيبها لي, بخلاف إني أنا في الجيش و وقتي مش ملكي.

    العلبة و التغليف:

    الكارت بييجي في علبه شكلها ظريف عليها نفس البنت اللي على كل كروت سافاير الجديدة, البنت محتشمة أكتر من Ruby يمكن علشان الصفة العسكرية الطاغية عليها (شايفين الأقراص المعدنية اللي لابساها في رقبتها, أنا حاولت أعمل زيهم بس ما عرفتش). أهم حاجة على علبة الكارت إنه بذاكرة 1GB GDDR5 و نسخة Overclock و كمان معاه كيبل HDMI (دُخت علشان أشتري كابل زي ده من شهرين, سبحان العاطي الوهــاب). كلمة GHz Edition ملزوقة تحت اسم الكارت. تحت نحية الشمال هنلاقي التقنيات اللي بيدعمها الكارت زي دعمه لمخارج PCI-Express 3 الجديدة, و دعمه لمخارج DisplayPort و HDMI. و تقنية AMD للتسريع AMD APP Acceleration. و كمان وجود تقنية AMD Eyefinity 2.0 الخاصة بتوصيل أكثر من شاشة ليعملوا كشاشة واحدة كبيرة, الكارت ده بيقدر يشغل 3 شاشات في نفس الوقت, لكن طبعاً ما تحاولش تلعب على 3 شاشات بدقة مهولة على كارت من الفئة دي. و في الآخر هنلاقي مكتوب رقم 28 و هو إشارة لدقة التصنيع المُستخدمة مع الكارت ده, 28 نانومتر.


    ظهر العلبة عليه شرح موضح أكتر للتقنيات سالفة الذكر, و فيه فقرة ترويجية للكارت نحية الشمال. تحت بنلاقي –كالعادة- مجموعة من الجوائز الضخمة اللي حصلت عليها Sapphire طول السنين اللي فاتت.


    و بعد ما بنقطع الملصق الموجود على مكان فتح الكارت (أوعى تشتري الكارت لو لقيت اللزقة دي مقطوعة قبل كدة, اللزقة دي زي عود الكبريت, بيولع مرة واحدة بس!) بنلاقي علبة صفراء كبيرة في استقبالنا. يلا نطلعها

    هتلاقي على العلبة تحت من نحية الشمال شعار كدة منقط, ده معناه إن Sapphire بتحبنا و بتحافظ على البيئة عن طريق تصنيع الكراتين من ورق يمكن إعادة تصنيعه و الاستفادة منه, تحيـا البيئة.


    بمجرد ما نفتح العلبة بنلاقي في خلقتنا لُكشـة من الأكياس و الورق و الاسطوانات, يلا نخرجهم و نبص بصة, نبص إيه؟!


    1) الكارت طبعاً.
    2) كابل HDMI مش مكتوب عليه غير إنه High Speed Cable
    3) محول من DVI إلى D-SUB أو VGA
    4)محول من Mini-DP إلى Full-DP
    5) جسـر Crossfire (نفسي ربنا يكرمني و أستخدمه مرة في بيتنا!)
    6) وصلة Molex to 6-Pin
    7) اسطوانة التعريف و كتالوج صغير مالوش لزمة و بطاقة اشتراك في Sapphire Select Club.



    الكارت بييجي في كيس محترم للحفاظ عليه من الصدمات و الخربشة و الكهرباء الاستاتيكية طبعاً.



    و بمجرد ما بنفتح الكيس بنلاقي الموديل بيرحب بينا, هلا و غلا!


    الكارت نفســه



    الكارت بذات نفسه, تصميم الكارت غير قياسيّ, اعتمدت سافاير على تبريد جديد و شكل جديد للكارت أفضل من الشكل التقليدي من وجهة نظري المتواضعة. جسم الكارت البلاستيك فيه خطوط تصميم انسيابية و بنلاقي اسم الموديل و شعار AMD و في النصف بنلاقي المروحة عليها شعار Sapphire. الكارت طوله 21 سم بالظبط, و بالتالي هيكون مناسب للتركيب داخل معظم الكيسات.




    الناحية التانية من الكارت بتوضح اللوحة المطبوعة PCB بشكل أحسن, و طبعاً اللوحة هنا لونها أزرق (سافاير بقى) و بنلاحظ البساطة في التصميم و هو أمر متوقع من كارت في الفئة دي. الكارت متثبت في وحدة التبريد بأربعة مسامير بس, بمجرد فكهم بسهولة تقدر تفك الكارت بالكامل. مفيش أي ملصق على المسامير لضمان إن المستخدم لا يفك الكارت (استحالة طبعاً هيحطوا ملصق حول المعالج الرسوميّ).



    بمجرد ما نتحرك تحت شوية بنلاقي انبوبتين نحاس كبيرتين الحجم, دول مسئولين عن نقل الحرارة من المعالج الرسوميّ لباقي ريش التبريد, هنتعرف عليهم أكتر بعدين.



    الكارت من الجنب المقابل لخارج الكيسة (لما تركبه إن شاء الله) عليه اسم الشركة (مش بينور خدوا بالكم) و بنلاحظ إن تصميم التبريد مش Rear Exhaust يعني مروحة الكارت بتاخد الهواء البارد من الكيسة تضخه على المبرد و الهواء الساخن مش بيخرج برة الكيسة من خلفية الكارت, لأ الهواء الساخن بيخرج من جوانب الكارت و يرجع لجوة الكيسة تاني. الغطاء البلاستيك مش بيغطي الكارت بالكامل, و بالتالي هتقدر تشوف دائرة تنظيم الطاقة و كمان شرائح الذاكرة, ابسط ياعـم


    عندنا وصلة Crossfire واحدة بس, يعني مش هتقدر توصل أكتر من كارتين.


    المروحة الكبيرة قطرها 9 سم, و صوتها منخفض للغاية, اطمن مش هتحس بأي إزعاج.


    الكارت مش محتاج أكتر من مخرج واحد بس 6 بن, و لو ما عندكش مخرج 6 بن في الباور سافاير قدمت لك محول تقدر توصله بأي كابل Molex 4 بن.


    الجانب الخلفي لكارت فيه وصلات الشاشة, هنلاقي وصلة واحدة Dual-Link DVI و أخرى HDMI كاملة الحجم و وصلتين Mini-DisplayPort. و تحت بنلاقي فتحات اخراج الهواء الساخن.

    فك الكارت و نظرة على المُشتت


    فك الكارت سهل للغاية, مش محتاج تفك أكثر من أربعة مسامير اللي موجودين حول المعالج الرسوميّ, و هــــــوب (حد, 2, 3) الكارت اتفك.



    دي مكونات الكارت بعد الفك بالكامل, تخيلوا إننا ممكن نركب المشتت على الكارت بس و نسيب الغطاء البلاستيك ده برة خالص!



    وحدة التبريد تعتمد على أنبوبتين كبيرتين من النحاس بينقلوا الحرارة من قلب المعالج الرسومي و يوصلوه للريش الألومونيوم اللي حضراتكم شايفينها دي . و طبعاً شايفين المعجون الحراري كتير إزاي, شكراً سافاير.



    المروحة قابعة في منتصف المشتت , و أنابيب الألومونيوم بتلمع.


    أهم حاجة في المروحة دي هو الهدوء, لم أعاني منها طوال فترة الاختبار.


    تصميم بسيط جداً للكارت, بنلاقي المعالج الرسومي اللي اسمه Cape Verde

    المُعالج الرسوميّ و الذاكرة



    صورة قريبة للمعالج الرسومي اللي أتمنى إنه يقدم أداء أفضل بفضل دقة التصنيع الجديدة و التقنيات المُستحدثة, للعلم المعمارية اللي بيستخدمها المعالج ده هي نفس المعمارية المُستخدمة في تصنيع الكروت الأعلى زي HD7970 و HD7950. بس طبعاً مواصفات الكارت ده أقل من حيث عوامل كتير منها عدد الترانزستورات و عدد المظللات و عرض نطاق الذاكرة و سعة الذاكرة. كل دي عوامل بتأثر في أداء الكروت و هي السبب في اختلاف أداء الكروت عن بعضها حتى و لو اشتركوا في نفس المعمارية و دقة التصنيع, و على جانب آخر نفس العوامل دي هي المؤثرة في اختلاف الأسعار.


    الذاكرة المستخدمة في الكارت من نوع Hynix (أول رامة اشتريتها في حياتي كانت ماركة Hynix... سبحان الله) الشريحة دي بتقدر تشتغل بسرعة 5 جيجاهرتز. طبعاً في الإصدار القياسي من AMD الذواكر دي بتشتغل بسرعة 4.5 جيجاهرتز بس, لكن مع كسر السرعة اللي سافاير قدمته بنلاقي إن الرامات دي اتعصرت.

  2. #2
    عضو ذهبي الصورة الرمزية محمد الجوهري
    تاريخ التسجيل
    Apr 2007
    المشاركات
    3,047
    الدولة: Saudi Arabia
    معدل تقييم المستوى
    109

    الاختبارات و النتائج و الكلمة الختامية

    مرحلة ما قبل الاختبارات

    انتهينا من النظر على الكارت و دلوقت حان الوقت إننا نبدأ نلقي نظرة على مجموعة من الاختبارات علشان نشوف أداء الكارت عامل إزاي, الأول خلوني أعرفكم على جهازي المتواضع للغاية:


    Intel Core™ I5 2400 Overclocked @ 3764 MHz
    Sapphire Z68 Pure Platinum
    2x4 GB Corsair Vengeance DDR3 1600 CL9
    Western Digital Caviar Black WD6401AALS
    Seasonic S12 II 520W
    Gigabyte Setto 1000 مدهونة أسود من جوه.
    Asus DVD-RW 2014L1T الباب بتاعه مش بيفتح غير لما أحط إبرة أو دبوس في الفتحة المُخصصة لذلك!

    طبعا اختبارات كروت الشاشة بتتطلب دقة شديدة علشان خاطر نخرج بنتائج منطقية, و دايماً بنحاول توحيد ظروف الاختبار علشان الحيادية و الدقة. و ده بالظبط اللي عملته, و قبل ما أبدأ أي اختبار إتأكدت إن كل البرامج في الخلفية مُغلقة و سبت اللي محتاجه بس شغال, بعد كدة فتحت لوحة التحكم و إتأكدت إن كل حاجة على الوضع الافتراضي. نسخة نظام التشغيل المُستخدمة هي Windows 7 Enterprise X64 متحدثة لآخر تحديثات حتى تاريخ المراجعة. التعريف المُستخدم هو 12.2 WHQL و تم تطبيق آخر Application Profile موجود. كل اختبار أعدته 3 مرات و فيه اختبارات عملتها خمس مرات. اخترت العمل على دقتي 1920x1080 و 1600x900 و السبب كنت كاتبه قبل فترة قبل ما أقرر أكتب المراجعة بالعربية العامية المصرية, عموماً أنا اخترت الدقتين دول علشان:

    "عندما فكرت في اختيارالدقات التي سأقوم بالعمل عليها, وقعت في حيرة من أمري و سأسرد لكم أفكاري. دقة 1920x1080 لا مناص من استخدامها في المراجعات؛ ربما لأنها أصبحت أكثر دقة شائع استخدامها في الألعاب في ظل انتشار الشاشات الداعمة لها و تقديمها لتجربة لعب رائعة جيدة التفاصيل. و ربما لأنها تُمثل تحدياً للبطاقات الرسومية. أما المعضلة الحقيقية فكانت في اختيار الدقة الأقل للعمل عليها, بالطبع كان بإمكاني اجراء الاختبارات على خمسة أبعاد Resolution مختلفة, إلا أن هذا كان سيؤدي لتشتيت القرائ فضلاً عن استهلاك وقتي و مجهودي!

    كنتُ أمام حيرة الاختيار بين 1280x720 و تُعرف بأنها HD Ready و 1680x1050 و 1280x1024 و 1366x768 و 1600x900. في البداية استبعدت 1680x1050 و ذلك لأنها دقة عالية و تقترب بشكل أو بآخر من الدقة الأعلة التي اخترتها بالفعل. ثم استبعدت 1280x1024 التي تستخدمها الشاشات المربعة التي باتت شيئاً من عبق التراث. 1280x720 دقة منتشرة في الأجهزة المحمولة و لم أرى شاشات تستخدم هذه الدقة بكثرة فاستبعدتها هي الأخرى. و توقفت عند الاختيار ما بين 1600x900 و 1366x768, الأخيرة منتشرة بكثرة في أجهزة التلفاز الرقمية و قلما يستخدمها محبو الألعاب, و الأولى منتشرة بكثرة في الشاشات ذات حجم العشرين بوصة التي تدور أسعارها في مصر حول نقطة 700 جنيــه و هو ما جعلني اختار هذه الدقة كممثل للعب على دقة متوسطة. بالطبع مع البطاقات الاقتصادية سيتغير الوضع و ستدخل دقات لعب أقل مناسبة إلى حيز المراجعة!"


    FutureMark 3DMark 11

    تم تنصيب آخر تحديث للبرنامج و إصداره 1.0.3, و اخترت الاختبار على الثلاث إعدادت اللي البرنامج مضبوط عليهم مُسبقاً.


    شخصياً مش بعتد ببرامج الاختبار لأني بحس دايماً إنها مجرد أداة للمفاضلة بين كارت و كارت تاني, و بما إن معانا كارت واحد بس في المراجعة دي فالبرامج دي أنا عملتها كنوع من تأدية الواجب ليس إلا!

    Aliens vs predator

    طبعاً عمري ما استخدمت أداة اختبار اللعبة رغم إنها أسهل بالنسبة لي سواء في الاستخدام أو في النتائج بتاعتها, دايماُ بفضّل اعتمد على تجربة اللعب الفعلية و ده اللي حصل فعلاً, لعبت أول خمس دقائق من مرحلة Refinary, المرحلة دي فيها مناطق داخل كهف و مناطق في الهواء الطلق و مناطق مفتوحة و أخرى مُغلقة, و في آخرها بقابل مجموعة من الكائنات الفضائية اللي بقتلها بواسطة البندقية و بعتمد كمان على تفجير اسطوانات الغاز حمراء اللون و ده بيخلي فيه انفجارات تحصل تقلل من معدا الإطارات بشكل كبير. صاحبي محمد صبحي ولي الله كان معايا لما كنت بختبر اللعبة دي, كان جاي يزورني و يحط حتى معجون على كارت Gigabyte GTX275 بتاعه. تم تحديث اللعبة لحد التحديث رقم 3, سامع واحد بيلسن و يقول لي "فيه تحديثات لحد رقم 6 يا جوجو", عارف يا خفيف, بس التحديثات دي عملت معايا مشاكل كتير في اللعبة من زمان فبقيت بحدث لحد التحديث رقم 3 و بس.


    على أعلى جودة صورة و دقة Full HD الكارت حقق 46 إطار كمتوسط إطارات, و اللعبة كانت ماشية بمنتهى السلاسة و النعومة. تعالوا بينا نشوف الإطارات كانت ماشية إزاي لحظة بلحظة:


    مفيش أي إنحدار في الأداء تحت 30 فريم في الثانية (الخط الأحمر) إلا لحظة الانفجارات المهولة اللي أنا كنت بعملها, صحيح, أنا مش هأتكسف أقول لكم إني استخدمت Trainer مع اللعبة.


    Batman Arkham City

    اللعبة دي حلوة جدي, بلعبها بدراع الإكس بوكس بتاعي, بس مش عارف ليه حاسس إني مش هأخلصها. طبقت الباتش 1.01 بتاعها. الإعدادات اللي اسمها Extreme مش بتظهر إلا بعد تسطيب الباتش ده, و طبعاً فعلا 16xAF من لوحة التحكم, و قفلت الفيزيكس. استخدمت أداة الاختبار المُدمجة مع اللعبة.

    أداء مشرف للغاية.


    أمر رائع إن الواحد يعرف يلعب لعبة حديثة زي دي على كارت متوسط. الأداء فوق الـ 30 فريم, و طبعا متفقين إنه إحنا طول ما إحنا فوق 30 فريم تبقى الدنيا بيــس!


    Battlefield 3

    اللعبة اللي ناس كتير مستنيينها و عاوزين يعرفوا شكل الأداء معاها عامل إزاي, بصراحة أنا ظلمت الكارت في اللعبة دي لأني اعتمدت على Trainer و خليت السلاح يضرب بدون توقف, مما جعلني أتجنن و أضرب في كل السيارات الموجودة في الملعب اللي في مرحلة SwordBreaker. و طبعاً بن آلية (يعني بندقية آلية بلغة الجيش) في إيد واحد زيـي لن تتوقف طالما أتنفس, يعني كنت بضرب في كل الناس و في كل اتجاه, و عملت حمل كبير جداً على الكارت في اللعبة دي. طبعاً سطبت Patch 2 اللي حجمه 3.84 جيجابايت و قعدت أحمل فيه حوالي أسبوع!



    و الله كتر خير الكارت إنه جاب الأداء ده مع الضغط الشديد اللي أنا عملته و مع الإعدادات المتطرفة كمان.


    لو بتلعب على شاشة 20 بوصة هتبقى اللعبة معاك سلسة آخر 3 4 حاجات.



    على دقة Full HD اللعبة بتحوم حول خط الـ 30 فريم, لو حسيت إن فيه ثقل في اللعبة (أنا ما حسيتش بكدة خالص) ممكن تقلل الإعدادات شوية.


    Crysis 2

    قاهرة البطاقات بجد, استخدمت آخر باتش 1.9 و معاه باتش DX11 و مجموعة Hi-Res Texture Pack و طبعاً جالي احباط لما عرفت إنهم مش عندي على الجهاز و اضطريت أحملهم. الإعدادات اللي استخدمتها تقيلة جداً, و أنصح بتقليلها لأن اللعبة كانت بطيئة شوية (مش بطيئة أوي). استخدمت Trainer (مش فشل و الله) علشان خاطر آخد راحتي وسط وحوش مرحلة A walk in the Park و بصراحة ضربت حوالي 23 قنبلة و خلصت حوالي 40 خزنة كاملة من الرصاص الحيّ, كل ده علشان أخلق ضغط شديد على الكارت و أشوفه هيعمل إيه.


    نتيجة متوقعة في الحقيقة, و أنصح بخفض حدة الإعدادات شوية.


    لو هتلعب على ريزوليوشن 1600X900 اللعبة هتبقى تمام و زي الفل. لكن مع القة الأعلى زي ما حضراتكم شايفين اللعبة كانت دايماً تحت خط الفقر (قصدي تحت خط الـ 30 فريم) و بالتالي محتاج تخلي الإعدادات على Extreme مثلاً.


    Dirt 3

    لعبة خفيفة (بشكل أو بآخر) و لكني قلت أحطها كمالة عدد, و كمان علشان جماهير العاب السباق.



    أداء ممتاز (يمكن علشان اللعبة خفيفة زي ما قلت).



    أنا قلت برضه أشوف مدل الإطارات هيبقى عامل إزاي على طول الاختبار.


    Lost Planet 2

    عمري ما لعبتها و لا حبيتها أبداً, بس قلت أحطها علشان أشوف اختبار B الثقيل هيعمل إيه في الكارت.


    على أعلى إعدادات البطاقة بالكاد تحقق 30 فريم/ثانية مع دقة 1920x1080.
    Mafia II

    من أكتر الألعاب اللي بحبها و بحب قصتها جداً بس ساعات كانت بتحطني في مواقف محرجة مهببة للغاية If you know what I mean. طبعاً حدثت اللعبة لحد آخر تحديث مُتاح و هو Update 4. استعملت أداة الاختبار المُدمجة, و قفلت الفيزيكس, مش ناقصة هَبَل هي!


    أداء ممتاز!



    لو بصينا على معدل الإطارات بشكل متعمق هنلاقي إن اللعبة ما نزلتش لخط 30 فريم إلا قليل أوي و ده شيء محمود للغاية.


    Metro 2033

    صباح العكننة على الكارت, ممكن نقول أثقل لعبة في العالم! تم تحديث اللعبة حتى Update 2 الآخير اللي بيضيف أداة اختبار لملفات اللعبة, بس بصراحة أنا ما استخدمتش أداة الاختبار و فضلت استعين بمرحلة الجسر لأنه "The Bridge is a Nasty Place" و سجلت من أول المرحلة لحد أما بنسمع كلمة "They are looking for the bandits".



    رغم إني كنت عارف ألعب اللعبة و أمشي بس اللعبة لم تكن سلسة أبداً, لدرجة أني كنت حاسس إن فيه بطء ملحوظ لما كنت بتحرك داخل القوائم نفسها, تخيلوا؟ قلل الإعدادات يا بلدي الله يكرمك قبل ما تلعب و خليها High بس و أنصحك تلعبها على DirectX-10 لو العملية زنقت معاك.



    لا تعليق, حقيقي لا تعليق, هو شيء متوقع من الكارت إنه يعمل كدة مع اللعبة دي و على الإعدادات دي. زي ما قلت لك قلل الإعدادات أو اعمل زي ما أنا عملت زمان يا صاحبي, و ما تلعبش اللعبة خالص!

    Resident Evil 5

    معشوقة الجماهير, أداء اللعبة ممتاز جداً و جودة الرسوميات رائعة, حقيقة Bravo Capcom. يا أخي لعبة ظريفة جداً, حاجة كدة بونو بونو, لا ليها تحديثات و لا باتشات و لا أي بدنجان.


    مش محتاج أتكلم.

    Street Fighter IV

    سيبكم منها, انا بس حطيتها علشان خاطر بحب أتفرج على الماتشات اللي في برنامج الاختبار!


    Unigine Heaven 3.0

    زي ما قلت لكم يا حضرات في الأول, أنا مش مؤمن بالبرامج دي لأنها مش بتقدم صورة واقعية عن الأداء, أنا عاوز أعرف أداء الكارت في الألعاب العميلة في المقام الأول. لكن هأعمل إيه لازم استخدم البرنامج ده أسوة بالأولين و الآخرين. اضطريت أحمل البرنامج مرتين, الأولى من "جوريا3د" Guru3D و طلع الملف فيه مشكلة مش عارف ليه, و التانية كانت من TechPowerUp.


    كســر السرعــة

    ما أخبيش عليكم, أنا مش بحب الكروت اللي بتبقى مكسورة السرعة أوي, عارفين ليه؟ لأنها بتبقى جايبة آخرها أساساً, الشركة بتكسر سرعة الكروت و ده بيستهلك إمكانية كسر السرعة في الكروت, في كلتا الحالتين الكارت جاي من المصنع مكسور السرعة بزيادة قدرها 150 ميجاهرتز, و طبعاً دي زيادة كويسة جداً لو أخدنا في الاعتبار التردد الأصلي للكارت و هو 1 جيجاهرتز. المهم, أنا حاولت اكسر سرعة الكارت لكن ما كانش فيه أي وسيلة لرفع الفولت إلا عن طريق عمل فولت مود, وبيني و بينكم ما حبيتش أتبع الطريقة دي لأن مش كل مستخدم هيعرف يعملها. اتبعت الطريقة التقليدية في الكسر و وصلت للسرعة دي:


    ما تفرحوش أوي, الكارت كان ثابت جداً مع اختبار Kombustor لكن لما أخدته لفة 3DMark 11 الكارت هنج, قللت الترددات و وصلت لـ 1200 للمعالج الرسوميّ و 1300 للذاكرة و كانت زي الفل, بس فجأة بدأ التهنيج يظهر لما كملت اختبار الثبات على الألعاب و تحديدا في المتوحشة Metro2033. و كان أقصى كسر ثابت هو 1180 ميجاهرتز.

    درجات الحرارة


    صدقوني كان ليا قصص معاناة مع درجات حرارة الكروت, زمان لما كان عندي HD4890 كانت درجة حرارته في الخمول 63 درجة (حاجة عظمة... صح؟) و لما كنت ببقى محظوظ الكارت كانت حرارته بتبقى 58 درجة. دلوقت أنا معايا كارت حرارته 32 درجة في الخمول, 32 درجة, متخيلين؟ على أي حال, تحت الضغط درجة الحرارة كانت 55 لما شغلت دورتين 3DMark 11 و ارتفعت وصلت لـ 57 درجة مع ظروف اللعب القاسية مع Battlefield 3. و طبعاً لما سبت الكارت شغال على MSI Kombustor لمدة نصف ساعة درجة الحرارة وصلت 63 درجة, و دي أعلى درجة حرارة شفتها مع الكارت ده.

    طبعاً السبب في درجات الحرارة الممتازة دي بيرجع في المقام الأول للمعمارية المتقدمة و دقة التصنيع الرائعة (22 نانومتر بس) و في المقام الثاني بييجي المشتت المستخدم, نظام تبريد محترم للغاية اعتمد على أنبوبتين حراريتين في غاية الضخامة.

    رأيي الشخصي في الكارت

    طبعاً اتعاملت مع الكارت بما فيه الكفاية علشان أقدر أحكم عليه بشكل موضوعي, الكارت أداؤه كويس جداً زي ما حضراتكم شايفين. طبعاً الناس هتسأل و تقول لي هو الكارت ده بينافس كارت إيه عند معسكر Nvidia و أقول إن الكارت ده منافس لكارت GTX560 من غير Ti. الـ 560 بيتفوق على الكارت ده بنسبة بسيطة, و سعره عندنا هنا في مصر بيزيد بنسبة 100~150 جنيه. طبعاً واحد هيقول لي طيب ما هو أنا لو هأشتري كارت, بالشكل ده أحسن لي أجيب GTX560 و لا إيه يا أبو الجواهر؟ أقول لك لأ يا صاحبي, لا تجيب ده و لا تجيب ده, فيه كارت أداءه أحسن منهم و بسعر ممتاز ألا و هو HD6870 اللي سعره في مصر 1150 جنيه, الكارت ده ما زال موجود في مصر, و لحد ما يخلص و يختفي يُعتبر أفضل خيار مُتاح. و طبعاً السبب في وجود خلاف بين كروت AMD إن الشركة نزلت كروت جديدة في ظل وجود Stock من الكروت القديمة في نفس منطقة السعر, الأفضل كان لو انتظروا لحد ما الكروت القديمة تنتهي (و ده خيار صعب جداً و غير منطقي) أو إنهم ينزلوا الكروت الجديدة (بتكلم عن HD7770) بسعر أرخص حبتين علشان يكون ده عامل جذب للزبون.

    طيب لو خلص أشتري إيه؟ أقول لك اشتري HD7770 و خصوصاً نسخة سافاير اللي معانا النهاردة لأن الكارت ده ممتاز على كافة المقاييس, من حيث الأداء و الحرارة و الهدوء و إمكانية كسر السرعة. أرشح كمان إن الناس تجيب النسخة العادية من سافاير اللي سعرها 1100 جنيه و بكسر سرعة بسيط هتوصل للتردد الخاص بالنسخة المكسورة بكل سهولة إن شاء الله. فيه عوامل تانية ما اتكلمتش فيها و هي الحرارة و استهلاك الطاقة, و دي عوامل بيتفوق فيها HD7770 على GTX560, لو الأمور دي هتخليك تفضل HD7770, يبقى توكل على الله بلا تردد.

    الفئة دي من الكروت انا شخصياً بفضلها جداً, لأنها بتمكن الناس من أنهم يلعبوا Games بدون الحاجة لدفع آلاف من الجنيهات في كارت شاشة مثلاً. طبعاً الكلام ده لا يسري على السادة عشاق الأرقام, يعني الناس اللي بتهتم بمعدل الإطارات و بتتباهي بين أصحابها بإن أجهزتهم بتحقق معدل إطارات مرتفع, صدقوني اللاعب الحقيقي مش بيفكر يسطب Fraps حتى و لا بيلتفت للأرقام, المهم عنده إن اللعبة تكون سلسة Playable و المؤثرات تكون مميزة. أعود للكلام عن كارت سافاير, بمجرد ما هتشوف الكرتونة هتعرف إن الكارت ده بيحمل لمحات من احترافية الشركة, جودة تصنيع الكارت و جودة المكونات لا يمكن إننا نغفلها, المشتت المحترم الهادئ و الشكل المميز للكارت و التصميم الرائع, كل دي أمور بتخلينا نفضل كروت سافاير و نحطها على رأس الأولويات لما نيجي نشتري.

  3. #3
    عضو محترف الصورة الرمزية unexpected
    تاريخ التسجيل
    Jul 2011
    المشاركات
    19,576
    الدولة: Palestinian Territory
    معدل تقييم المستوى
    223

    رد: الاختبارات و النتائج و الكلمة الختامية

    مراجعة اكثر من رائعة يا استاذ محمد ويعطيك العافية
    وطبعا تم التقيم
    CPU: I7 4770K
    Motherboard: ASUS Z87-DELUXE
    video card: Gigabyte GTX 780 OC
    RAM: G.Skill 2x4GB DDR3
    Samsung 840 Pro Series 2.5'' 128GB SSD SATA III
    Cooling: Noctua NH-D14
    PSU: Seasonic X-Series 850W
    unexpected out


  4. #4
    عضو برونزي الصورة الرمزية Hoka123
    تاريخ التسجيل
    Jan 2011
    المشاركات
    1,242
    الدولة: Egypt
    معدل تقييم المستوى
    23

    رد: مراجعتي الشخصية الاحترافية لبطاقة Sapphire HD7770 GHz Edition OC مكسورة السرعة

    مبروك الكارت أخي محمد
    تقييم
    [CENTER][COLOR=#800000][B]شروحات برمجيه قريباً.[/B][/COLOR][/CENTER]

  5. #5
    عضو ذهبي الصورة الرمزية محمد الجوهري
    تاريخ التسجيل
    Apr 2007
    المشاركات
    3,047
    الدولة: Saudi Arabia
    معدل تقييم المستوى
    109

    رد: الاختبارات و النتائج و الكلمة الختامية

    اقتباس المشاركة الأصلية كتبت بواسطة unexpected مشاهدة المشاركة
    مراجعة اكثر من رائعة يا استاذ محمد ويعطيك العافية
    وطبعا تم التقيم
    بارك الله فيك مشرفنا العزيز

    الحمد لله إن المراجعة عجبتك

  6. #6
    عضو ذهبي الصورة الرمزية محمد الجوهري
    تاريخ التسجيل
    Apr 2007
    المشاركات
    3,047
    الدولة: Saudi Arabia
    معدل تقييم المستوى
    109

    رد: مراجعتي الشخصية الاحترافية لبطاقة Sapphire HD7770 GHz Edition OC مكسورة السرعة

    اقتباس المشاركة الأصلية كتبت بواسطة Hoka123 مشاهدة المشاركة
    مبروك الكارت أخي محمد
    تقييم
    شكراً يا حوكة, الحمد لله إن المراجعة عجبتك

    شفت الفيديو؟

  7. #7
    عضو برونزي الصورة الرمزية Hoka123
    تاريخ التسجيل
    Jan 2011
    المشاركات
    1,242
    الدولة: Egypt
    معدل تقييم المستوى
    23

    رد: مراجعتي الشخصية الاحترافية لبطاقة Sapphire HD7770 GHz Edition OC مكسورة السرعة

    اقتباس المشاركة الأصلية كتبت بواسطة محمد الجوهري مشاهدة المشاركة
    شكراً يا حوكة, الحمد لله إن المراجعة عجبتك

    شفت الفيديو؟
    أه شوفته
    بردو شوف مراجعتي على GTS 450
    http://arabhardware.net/forum/showth...15#post2182315
    انا لسه بهري في الكارت مش مراجعه نهائيه
    بس سؤال ازاى GTX 560 و 7770 ??
    انت مش شايف الفرق ؟؟
    التعديل الأخير تم بواسطة Hoka123 ; 30-03-2012 الساعة 18:30
    [CENTER][COLOR=#800000][B]شروحات برمجيه قريباً.[/B][/COLOR][/CENTER]

  8. #8
    عضو الصورة الرمزية o0R3D0o
    تاريخ التسجيل
    Jul 2009
    المشاركات
    685
    الدولة: Egypt
    معدل تقييم المستوى
    21

    رد: مراجعتي الشخصية الاحترافية لبطاقة Sapphire HD7770 GHz Edition OC مكسورة السرعة

    مراجعة ممتازة يا جوه جوه .... وعاجبني الاسلوب جدا .... كأنك عازم صحابك في البيت وبتكلهم عن البطاقة باسلوب فيه ود ومحبة ولا يخلو من حسب الدعابة

    تم تقييم الموضوع .... وليك تقييم كبيــــــــــــــــــــر في الحفظ و الصون

  9. #9
    عضو برونزي
    تاريخ التسجيل
    Apr 2008
    المشاركات
    687
    الدولة: Syria
    معدل تقييم المستوى
    16

    رد: مراجعتي الشخصية الاحترافية لبطاقة Sapphire HD7770 GHz Edition OC مكسورة السرعة

    مراجعة شاملة و متعوب عليها
    أداء الكرت رائع على الدقة المنخفضة
    جاري التقييم

  10. #10
    عضو ذهبي الصورة الرمزية MrTom
    تاريخ التسجيل
    Dec 2011
    المشاركات
    2,905
    الدولة: Egypt
    معدل تقييم المستوى
    171

    رد: مراجعتي الشخصية الاحترافية لبطاقة Sapphire HD7770 GHz Edition OC مكسورة السرعة

    مراجعة ممتازة أستاذ محمد و تم تقيم الموضوع وجارى مشاهدة الفيديو :D
    [CENTER]
    [/CENTER]

  11. #11
    عضو محترف الصورة الرمزية unexpected
    تاريخ التسجيل
    Jul 2011
    المشاركات
    19,576
    الدولة: Palestinian Territory
    معدل تقييم المستوى
    223

    رد: الاختبارات و النتائج و الكلمة الختامية

    اقتباس المشاركة الأصلية كتبت بواسطة محمد الجوهري مشاهدة المشاركة
    بارك الله فيك مشرفنا العزيز

    الحمد لله إن المراجعة عجبتك
    لا كدة حزعل بجد انت الاصل يا مشرفنا العزيز محمد
    CPU: I7 4770K
    Motherboard: ASUS Z87-DELUXE
    video card: Gigabyte GTX 780 OC
    RAM: G.Skill 2x4GB DDR3
    Samsung 840 Pro Series 2.5'' 128GB SSD SATA III
    Cooling: Noctua NH-D14
    PSU: Seasonic X-Series 850W
    unexpected out


  12. #12
    عضو الصورة الرمزية Amir A.Fattah
    تاريخ التسجيل
    Jan 2010
    المشاركات
    799
    الدولة: Egypt
    معدل تقييم المستوى
    14

    رد: مراجعتي الشخصية الاحترافية لبطاقة Sapphire HD7770 GHz Edition OC مكسورة السرعة

    ألف مبروك يا أ/ محمد على الكارت .. على الكارت وعلى اللوحة اللي نفسي أعرف أداءها مُرضي ولا إيه ...

    وعقبال الـ i7 2600K إن شاء الله ..

    عاجبني جدًا أسلوب العرض .. وأسلوب تقديم المراجعة ..

    بس واضح إن الجيش فعلًا مأثر عليك

    وتم التقييم بالتأكيد ..





    لا تنس قراءة سورة الكهف
    ليلة الجمعة أي من بعد مغرب كل خميس

  13. #13
    عضو برونزي الصورة الرمزية nayef108
    تاريخ التسجيل
    Apr 2009
    المشاركات
    1,245
    الدولة: Palestinian Territory
    معدل تقييم المستوى
    14

    رد: مراجعتي الشخصية الاحترافية لبطاقة Sapphire HD7770 GHz Edition OC مكسورة السرعة

    يعطيك العافية اخ محمد ..... زمان عن مراجعاتك الرائعة والنموذجية
    [CENTER][SIZE=4][SIZE=2][/SIZE]
    [/SIZE][IMG]http://img405.imageshack.us/img405/2310/ahwnzxt.jpg[/IMG]
    [/CENTER]

  14. #14
    عضو فضي الصورة الرمزية Mr VERRO
    تاريخ التسجيل
    Aug 2010
    المشاركات
    907
    الدولة: Egypt
    معدل تقييم المستوى
    13

    رد: مراجعتي الشخصية الاحترافية لبطاقة Sapphire HD7770 GHz Edition OC مكسورة السرعة

    مراجعة ممتازة:ah7: ولو عايز تلعب metro 2033 من غير تقطيع اللعب dx11 بس مع غلق advanced dof هتلاقى نفس الجرافيك بزياده حوالى 10فريمات,ومبروك عليك الكارت:ah4:

  15. #15
    عضو برونزي الصورة الرمزية khaled_sha6er
    تاريخ التسجيل
    Aug 2009
    المشاركات
    1,852
    معدل تقييم المستوى
    17

    رد: مراجعتي الشخصية الاحترافية لبطاقة Sapphire HD7770 GHz Edition OC مكسورة السرعة



    مراجعه رائعة ومبروك عليك الكارت ويتربى فى عزك :D
    تم
    [CENTER][URL="http://arabhardware.net/forum/showthread.php?t=269738&p=2116339#post2116339"][SIZE=3][COLOR=#008000][B]Asus k42jz laptop review
    [/B][/COLOR][/SIZE][/URL][SIZE=3][B][URL="http://arabhardware.net/forum/showthread.php?t=259263&p=2042711#post2042711"][COLOR=#008000]Adata s102 8g usb3 review

    [/COLOR][/URL][/B][/SIZE][URL="http://imageshack.us/photo/my-images/444/111gd.png/"][/URL][URL="http://www.0zz0.com"][/URL]

    [/CENTER]

صفحة 1 من 4 1 2 3 4 الأخيرةالأخيرة

المواضيع المتشابهه

  1. مشاركات: 30
    آخر مشاركة: 03-02-2013, 16:37
  2. مشاركات: 39
    آخر مشاركة: 14-12-2012, 22:20
  3. مراجعتي الشخصية لبطاقة Gainward GTX 580 Phantom III 3 GB
    بواسطة Amir A.Fattah في المنتدى الأرشيف
    مشاركات: 10
    آخر مشاركة: 23-01-2012, 21:56
  4. مراجعة شخصية لبطاقة AMD GIGABYTE Radeon HD 5750 مكسورة السرعة
    بواسطة TorrentLeech في المنتدى الأرشيف
    مشاركات: 32
    آخر مشاركة: 07-01-2011, 17:38
  5. مشاركات: 53
    آخر مشاركة: 10-09-2010, 11:58

المفضلات

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •