إستفسار هام أرجو الرد

[yahia elmasry]

السلام عليكم ورحمه الله وبركاته
أرجو من أخوتى بالموقع الرد سريعاً ... أنا عاوز أخد كورس فى الـweb Design بس أنا فى حيرة كبيرة ومش عارف أيه أفضل مكان موجود فى القاهرة الواحد ممكن يدرس فيه الكورس وأنا سمعت عن سنتر Next Academy بمدينة نصر وبيقدم مشروع أسمه (خريج المستقبل) فياريت لوحد عنده أى معلومة ياريت يفيدنى بيها ولو حد يعرف أى مكان تانى أفضل ياريت يقولى رأيه؟
وجزاكم الله خيراً

[Michael Youssef]

أهلا أخي الكريم
أولا لازم تحدد عايز تتعلم ايه لو مش عارف ممكن نساعدك ، مصطلح web design عام شوية لازم تبقي محدد عايز تعمل ايه بالظبط. بالنسبة للكورس حاول تجيب التفاصيل و هنقولك ان شاء الله اذا كان كويس او لا.
بالتوفيق

[yahia elmasry]

إلى الأخ الكريم مايكل يوسف
أولاً:- ألف شكر على مشاركة حضرتك الكريمه.
ثانياً: أنا معرفتى كلها بالنسبة للـweb desgin أنه مقسوم لشقين هما web desgin و الـweb develope فياريت لو حضرتك تقدر تفيدنى بمعلوماتك يبقا ألف شكر
وبالنسبة للكورس ده هو اللينك بتاع الكورس
https://www.next-eg.com/next/index.p...d=10&sobi2Id=8
فى إنتظار رد حضرتك. وشكراً على مجهودك

[Michael Youssef]

أهلا بيك مرة أخري و ان شاء الله موفق بس اجتهد و اعمل العليك
أول حاجة أخي الكريم الدبلومة دي 260 ساعة و هتخدها في اربعة شهور و اسبوع او اتنين ، طبعا مع احترامي الشديد للجميع ده مستحيل.
كمان انا لفت نظري الاتي
CONCEPT OF PROGRAMMING
PROGRAMING BY C# OR VB.NET
OBJECT ORIENTED PROGRAMING
ASP.NET BY C# OR VB .NET
VISUAL STUDIO 2010
Data Access " Ado"

أولا التكنولوجيا اسمها ADO .NET مش Ado و يعني ايه CONCEPT OF PROGRAMMING؟
يعني لو الكاتب مش عارف الفرق بين تسمية ال ADO .NET ل Ado تبقي مشكلة كبيرة في رأيي الشخصي.
انت عايز 600 ساعة علشان تاخد الدورة و دا اقل حاجة.

[Michael Youssef]

الفارق بين Web design و Web Developer ايه بقي؟
تصميم المواقع (web design) هتتعلم فيه ازاي تصمم الصفحات الخاصة بالموقع و الجداول و كيفية وضع كل شيء علي الصفحات في اماكنها و تتعلم جرافيك مرتبط بالموضوع.
اما برمجة المواقع فهي شيء مختلف و اصعب بكتير طبعا لانك هتحتاج تتعلم لغة برمجة و قواعد بيانات و كمان تكنولوجيا برمجة المواقع ASP.NET و قبل متبدأ المفروض تكون تعرف تصميم مواقع كويس طبعا بس مش لازم جرافيك خالص.

قرر انت عايز تعمل ايه و قدامك وقت تدرس فيه اد ايه و ان شاء الله الخبراء في عرب هاردوير هنا هيساعدوك
بالتوفيق

[yahia elmasry]

بجد والله الواحد مش عارف يشكرك إزاى يامايكل على مجهودك الأكثر من رائع فى إيضاح الأمر لى لأنك بصراحة لحقتنى قبل ماكنت هاحجز الكورس خلاص ويضيع عليا وقت وفلوس هباءاً وفى النهاية ألاقى نفسى مااستفدتش الأستفادة المرجوة.
بالنسبة ليا أنا شخصياً بالنسبة لموضوع الوقت أنا عندى إستعداد أتعلم الموضوع إن شاء الله حتى لو خد منى سنة بس المهم فى رأيك أيه أفضل الأماكن الواحد ممكن يتعلم فيها سواء (web desgin) أو (web develope) ؟ وهل الموضوع شاق لو الواحد قضاها self study ؟

[Michael Youssef]

أهلا بيك أخي الكريم ، في الواقع عايزك تقرأ موضوعي هنا الاول و بعدين نتكلم خلاص؟
الموضوع هنا https://arabhardware.net/forum/showthread.php?t=283970

[yahia elmasry]

على فكرة مقالة محترمة جداً من إنسان من الواضح أنه عقلانى وغير مندفع فى إتخاذ القرارات وعلى فكرة أنا بدأت فى تنفيذها فوراً
بس حضرتك نسيت شئ بسيط وهو الأستفادة من أهل الخبرة فى مجالى لوضع خطة محكمة لتصل فى النهاية إلى تحقيق الهدف المطلوب.
وهذا ماأردته

[Michael Youssef]

شكرا و ان شاء الله نقدر نساعدك ، في البداية مستوي اللغة بتاعتك ايه؟

[yahia elmasry]

الحمد لله جيد جداً

[Michael Youssef]

انا رديت عليك في رسالة خاصة ولكن احب نكمل النقاش هنا تاني علشان الاخوة يشتركوا معانا و دا هدف المنتدي.

[yahia elmasry]

بصراحة ياباشمهندس مايكل أنا فعلا سعيد بأنى أتعرفت على شخصية زى حضرتك وربنا يكرمنى وأقدر أستفاد من خبرات حضرتك.
أنا بس حابب أوضح لحضرتك فكرة أنى قررت أحول مسار تعليمى من الشبكات للبرمجة بشكل موجز أنا من محافظة الإسماعيلية وللأسف مفيش عندنا مراكز تدريب قوية فى مجال تكنولوجيا المعلومات وبالتالى أنا أى كورس باقرر أخده لازم أنزل القاهرة كأقرب محافظة ليا وبالصراحة الدنيا هناك مختلفة خالص بطبيعة الحال عشان هناك مجال العمل أكبر وطبعاً حضرتك فاهم طبعا أن تكلفة الكورس بالنسبة ليا بتبقا الضعف تقريبا (موصلات ومصاريف طبعا) وأنا جربتها فى ccna . بعد ماخدها لقيت أى كورس تانى لو حبيت اكمل فى المجال هايتراوح بين 2800 إلى 3500 تقريبا. إلى جانب إن أنا شغال فى شركة تعتبر مجال الشبكات مش ضرورى بالنسبة لها وبالتالى مش هاقدر أستفيد بالكورسات دى فى المكان حالياً ياعنى لو ملقتش شغل فى أى مكان تانى يبقا كانى معملتش حاجة خالص
وبالتالى قررت أدخل مجال برمجة صفحات النت على الأقل ممكن أستفيد بيها فى مكانى لو ملقتش أى فرص شغل بره (إلى جانب إن درست بعض لغات البرمجة فى الكلية بس المجال مااستهونيش فى البداية).
أما بالنسبة لموضع اللغة فى الحقيقة أنا عارف أنها مهمة جداً فى أى شغل أو وظيفة وأنا على قد ماأقدر هاحاول أطور نفسى فيها بس بالنسبة لموضوع إن اللغة مهمة فى المجال عشان العلم كله بيها فالواحد أكيد متعود شوية على قرأتة Refrences وكتب علمية ياعنى الواحد مش هيلاقى صعوبة فى فهم المضمون العلمى ياعنى.
آسف على الأطالة وفى أنتظار رأى حضرتك المحترم ....

[Michael Youssef]

اه انا كدا فهمت الوضع اولا عايزك تقرأ المقال ده و هو عبارة عن مقدمة
https://www.devarticles.com/c/a/C-Sh...ing-Languages/
و دا ايضا
https://www.devarticles.com/c/a/C-Sh...-Introduction/

انا كتبتهم من زمن طويل و لكن المباديء ثابتة :D
اقرأهم و ان شاء الله هنعملك خطة الطريق ، أو علي الاقل هساعدك في انشائها.

[yahia elmasry]

ألف شكر ياباشمهندس. أنا هبدأ فى قرأيتهم على طول وهاتابع مع حضرتك على طول. ومعلش أسف على تأخير الرد بس كان فى مشكلة عندى فى الكمبيوتر

[Michael Youssef]

بالتوفيق و ربنا معاك