مشاهدة نتائج الإستطلاع: ما رأيك بمستوى المراجعة؟

المصوتون
31. أنت لم تصوت في هذا الإستطلاع
  • ممتاز

    26 83.87%
  • جيد جداً

    4 12.90%
  • جيد

    1 3.23%
  • سيء

    0 0%
صفحة 1 من 3 1 2 3 الأخيرةالأخيرة
النتائج 1 إلى 15 من 40

الموضوع: مراجعتي الشخصية "الاحترافية" لقرص ADATA XPG SX900 128GB SATA III ذو المساحة الممتدة!

  1. #1
    عضو ذهبي الصورة الرمزية محمد الجوهري
    تاريخ التسجيل
    Apr 2007
    المشاركات
    3,047
    الدولة: Saudi Arabia
    معدل تقييم المستوى
    109

    Thumbs up مراجعتي الشخصية "الاحترافية" لقرص ADATA XPG SX900 128GB SATA III ذو المساحة الممتدة!




    أبدأ مراجعتي بسم الله و الصلاة و السلام على رسول الله, النهاردة لأول مرة هأعمل مراجعة هارد SSD في بيتي المتواضع, و على جهازي الشخصي المتواضع جداً, أتمنى أن يحوز تقريري على إعجاب حضراتكم, خصوصاً و إنه القطعة اللي هأعمل عليها المراجعة النهاردة لم يتم نشر أي مراجعة عالمية لها سوى على موقعين فقط. الأول خلوني أتكلم شوية عن هاردات SSD و ماهيتها, و طبعاً فيه احتمال كبير إن كلامي يكون متشابه -أو حتى متطابق- مع الكلام المنشور على أي موقع تاني, السبب يكمن في إن الكاتب شخص واحد -اللي هو أنا- و بالتالي الأسلوب واحد و الكتابة واحد.

    أدعوكم لمشاهدة فيديو فك الصندوق و فحص القرص عن كَثَب, أتمنى الفيديو يعجبكم, ما تنسوش بقى, Subscribe, Like, Share [IMG]http://www.***********.com/forum/images/styles/lifeElement/smilies/Legend%204/biggrin.gif[/IMG]





    الرابــــــــط للفيديـــو
    *
    *
    *
    *
    *

    ADATA XPG SX900 128GB SATA III SSD First look by Muhammad Al-Jawhary

    أقراص SSD كانت من سنتين فقط حلم صعب المنال, كان الأمر –بالنسبة لكثير من المستخدمين- أشبه بحلم امتلاك سيارة في سن الثامنة عشر من العمر. كان أقصى ما نستطيع عمله وقتها هو النظر للأرقام القياسية التي تحطمها تلك الأقراص, و معاودة النظر للأقراص الميكانيكية الموجودة داخل أجهزتنا الحزينة. طبعاً أيامها كان أقصى حلم لكل واحد فينا هو الحصول على قرص ويسترن ديجيتال أسود Black بحكم إنه أفضل ما في الاستطاعة الحصول عليها... فاكرين؟ و لما كان واحد بيلاقي هارد Blue في محل و ييجي ينشر الخبر بسرعة علشان الكل يلحق الغنيمة, كانت أيام حلوة و الله. قبل ما أدخل في صلب الموضوع, عاوز بس أدعو بعض المحترمين اللي لسة ما يعرفوش يعني إيه قرص حالة صلبة إنهم يبصوا بصة على الشرح البسيط جداً ده عن هاردات SSD


    مُقدمة عن أقراص الحالة الصلبة SSD

    "هل ما زلتم تشعرون بأن أجهزتكم باهظة الثمن تعاني من بطء مستمر؟ هل تساءلتم يوماً عن سبب بطء استجابة حاسوبك الشخصي عند فتح التطبيقات و الألعاب؟ هل قمت بتحديث جهازك على أمل أن يتحسن الأمر, و لكن اكتشفت أن عملية التحديث كانت بلا فائدة؟ هل فكرت يوماً في العامل المسئول عن هذا البطء المحسوس؟ يتكون الحاسوب من مجموعة من المكونات الصلبة و أخرى برمجية, المكونات الصلبة هي تلك الأشياء المحسوسة و لها نوعان؛ مكونات إلكترونية, و أخرى ميكانيكية. النوع الأول يتمثل في أشباه الموصلات التي تنتقل فيها الالكترونات المدفوعة بالطاقة, أما النوع الثاني فهو يشير للمكونات التي تعمل بحركة ميكانيكية مثل المراوح مثلاً. يبدو أنني نسيت أن أذكر لكم أن هناك نوعاً ثالث؛ و هو المكونات الهجينة التي تجمع في عملها بين النوع الأول و الثاني, فالأقراص الصلبة مثلاً تجميع في عملها بين الصفة الإلكترونية عندما يتعلق الأمر بالذاكرة المخبئة عليها Cache Memory, و لكنها من زاوية أخرى تمتلك صفة ميكانيكية تتمثل في الحركة الدورانية للأسطوانات الممغنطة بداخلها.

    العامل الرئيسي الذي أشرنا إليه في المقدمة هو تلك المكونات "الهجينة" التي تعتمد في عملها على الحركة الميكانيكية بشكل أساسي, لذا يمكننا القول بكل ثقة أن الأقراص الصلبة هي المسئول الأول عن بعض البطء الذي يشعر به المستخدم, رغم أن جهازه قد يكون مجهز بأحدث العتاد, إلا أن هذا العتاد الفخم عليه أن ينتظر القرص الصلب الميكانيكي البطيء ليمده بالمعلومات.

    انتظروا ! ولا تسيئوا الظن بالأقراص الصلبة, فهناك نوع من الأقراص يمكنه التعامل مع البيانات بسرعات مضاعفة, و الأهم بمعدل استجابة شبه لحظي, و هو ما يُعرف في عالم الحاسوب باسم أقراص الحالة الصلبة Solid State Drive و اختصاره SSD ... فما هو قرص الحالة الصلبة؟
    أقراص الحالة الصلبة (و التي يُطلق عليها أيضاً أقراص الحالة الثابتة) هي نوع حديث -نسبياً- من وسائط التخزين التي لا تعتمد في عملها على الحركة الميكانيكية للأجزاء الدوارة التي عهدناها في الأقراص التقليدية. تعتمد الأقراص الجديدة في عملها على ذواكر الفلاش التي تنتقل البيانات بداخلها بسرعة مذهلة, و ليست السرعة وحدها هي ما يميز تلك الأقراص؛ فبجانب السرعة نجد أن لها قدرة عالية على تحمل الصدمات و السقطات و هو ما جعلها منذ ظهورها الخيار الأمثل للتخزين على الحواسيب المحمولة. كما أن استهلاكها للطاقة منخفض للغاية و تلك ميزة أخرى جعلتها تتفوق على الأقراص التقليدية عند استخدامها مع الحواسيب المحمولة, فضلاً عن حجمها الصغير و الذي -عادة- ما يكون 2.5 بوصة. الأمر الأهم بالنسبة لمحبي الهدوء الشديد هو أن صوتها منعدم, بعكس الأقراص التقليدية التي يؤدي صوت إبرة رأس القراءة بداخلها لشعور المستخدم أنه ثمة خطأ ما في جهازه !"

    و بالبلدي كدة, أقراص الحالة الصلبة باختصار شديد هي نوع من وسائط التخزين يتميز بسرعة رهيبة في التعامل مع البيانات إذا ما قورنت بالأقراص التقليدية HDD و السبب يعود لكونها لا تعتمد على أي أجزاء ميكانيكية في التشغيل. تلاقي واحد صاحبك أو جارك جايب هارد 60 جيجا مثلاً, طبعاً هتبص له بازدراء بمجرد ما تفتكر تشكيلة الهاردات اللي عندك في البيت و البالغة مساحتهم 2280 جيجابايت مثلاً, و أكيد هتظن إن صاحبك شاري الهارد مستعمل وارد الخارج بسعر 15 جنيه مثلاً (ماهو الهارد الـ 80 جيجابايت بـ 100 جنيه, أكيد الهارد الـ 60 هيكون أقل بكتير, غير إنه صغير في الحجم, فأكيد رخيص جداً) لكن فجأة تلاقي صاحبك بيقول لك إنه اشتراه بسعر لقطة من محمود راجح, الهارد سعره 600 جنيه بس... بدون ما أكمل, ده تعريف تاني لهاردات SSD!


    ADATA XPG SX900 128GB SATA III SSD ذو الغلاف المعدنيّ اللامع تحت عدسة الكاميرا

    طبعاً الهارد اللي معانا النهاردة من ADATA المتخصصة في إنتاج رامات الحاسوب و تصنيع كروت الذاكرة Memory Cards و مؤخراً أنتجت هاردات SSD (آختبرت هارد لهم قبل كدة طراز S511 لكن ما أعرفش مصيره دلوقت إيه). النهاردة معانا الـ Top Notch في خط انتاج الشكرة و هو هارد من عائلة XPG و اللي سمع عن رامات XPG هيعرف معناها إيه, أما اللي ما اتعاملش معاها قبل كدة أقول له إن XPG معناها Extreme Performance Gear يعني القطع أو العتاد عالي الآداء. ADATA استخدمت متحكم SandForce الشهير SF-2281 مع الهارد ده, و مع واجهة الربط SATA III بسرعة 6 Gbps. طبعاً الهارد فيه مزايا و تقنيات ممتازة (كغالبية أقراص SSD الحديثة) لعل أهم الخواص دي هو خاصية Trim و اللي هنتعرف عليها عبر قراءة الفقرتين الجايين دول.


    صورة توضح دعم القرص للأمر TRIM من داخل نظام التشغيل Windows 7, هل تتساءل "ما هو TRIM؟"
    الأمــر TRIM

    هل تساءلتم يوماً عن آلية عمل برامج استعادة الملفات المحذوفة؟

    عندما تقوم بتحديد ملف أو مجموعة ملفات على جهاز الحاسوب, و تعطيه الأمر بحذف هذا الملف, فإن القرص يقوم تلقائياً بتحديد مكان القطاعات التي يشغلها الملف و يعلّم عليها بأنها منطقة فارغة مما يكون له الفضل في أن تظهر تلك المنطقة كمساحة فارغة على القرص. إلا أنها في الواقع لا تكون فارغة؛ لأن الملف الذي أمرت بحذفه لم يتم حذفه, و إنما تم إخفاءه فقط بحيث لا تجد له أثر عند استخدامك للقرص. و هنا تكمن وظيفة برامج استعادة الملفات المحذوفة و التي تقوم بالبحث عن تلك الأماكن التي أعطى القرص إشارة أنها فارغة, و يقوم برنامج استعادة الملفات المحذوفة بالتدقيق و عمل مسح على تلك القطاعات لكي يستطيع استخراج البيانات المخزنة عليها (التي قمت أنت بإعطاء الأمر بحذفها, لكن القرص لم يحذفها فعلياً, و إنما أعطى إشارة أنها فارغة).

    تظل تلك الأماكن الفارغة شكلياً و المليئة بالبيانات فعلياً جاهزة حتى تمتلئ باقي القطاعات و عندما تقوم بإضافة ملف جديد للقرص, فأين سيتم تخزين ذلك الملف؟ ببساطة, يتم تخزينها في الأماكن التي كانت تشغلها الملفات الأولى التي قمت أنت بحذفها مسبقاً, الأماكن التي تحدثت عنها في السطر السابق و التي تكون فارغة شكلياً, إلا أنها تكون مليئة بالبيانات فعلياً. و عندما تقوم بإضافة ملفات جديدة على تلك القطاعات فإن الملفات الجديدة تحل محل الملفات القديمة. لا تعاني الأقراص التقليدية من تلك العملية, إلا أن أقراص SSD تعاني كثيراً, حيث تضطر عند إجراء عملية الكتابة على الملفات القديمة و التي تم حذفها نظرياً أن تقوم بحذف تلك الملفات أولاً حتى تحل محلها الملفات الجديدة, و هذا يستهلك الكثير من موارد القرص, حيث أنه في عملية إعادة الكتابة على ملفات محذوفة يكون أمام القرص عمليتين هما 1. حذف الملفات القديمة, و التي تم حذفها نظرياً و لم يتم حذفها فعلياً. 2. كتابة الملفات الجديدة.

    ظلت الأقراص تعاني حتى ظهر الأمر TRIM, وظيفة هذا الأمر أنه يحرص على حذف البيانات بشكل كامل عندما يقوم المستخدم بعملية الحذف, فلا يكتفي القرص بالتحديد على الملفات القديمة بأنها محذوفة, بل يتعدى ذلك بحذفها فعلياً حتى يتيح الفرصة و يجهز المساحة الفارغة للملفات الجديدة التي سيتم إضافتها لاحقاً. يقوم الأمر بإعطاء تنبيه للقرص بأن يقوم بالتحديد على الملفات المراد حذفها أولاً و إظهار أنها محذوفة ثم يقوم بعد ذلك بحذفها من على ذواكر الفلاش فعلياً. عند تفعيل الأمر TRIM يستحيل استعادة الملفات التي تم حذفها من على القرص الصلب SSD.



    عودة للهارد بتاعنا تاني, ADATA XPG SX900 128GB و هأتكلم عن نقطة مهمة جداً, ليه الشركة عاملة بروباجاندا و دعاية جامدة للهارد ده على وجه التحديد؟ حد شاف الفيديو؟ مثل ما ذكرت في الفيديو, ADATA أعلنوا في شهر فبراير عن أول قرص SSD في العالم بيستخدم متحكمات SandForce و بيعطي المساحة الكاملة دون نقصان.

    طيب يعني إيه الكلام ده يا جوه جوه؟ باختصار شديد, الأقراص التي تعتمد على متحكم SandForce تقوم باستقطاع 7% من مساحة القرص الإجمالية و دي مساحة تُعرف باسم Over-Provisioning وظيفة المساحة دي إنها تساعد المتحكم في أداء مجموعة من الوظائف المنوطة به و لولاها لن يكون بإمكان القرص عمل بعض العمليات الدورية اللازمة زي Garbage Collection و الحفاظ على ذواكر Nand عبر Wear Leveling لأن القرص علشان خاطر يعمل الحاجات دي محتاج مجموعة من الخلايا الفاضية (اللي هما 7% من مساحة القرص) علشان خاطر يقدر يوزع و ينقل البيانات اللي محتاجة تتنقل و تتنظم على راحته.

    معايا و لا حد تــاه
    ؟... تمام, كويس إنكم معايا, الحمد لله.

    المساحة الإجمالية للقرص 128 جيجابايت (119 مُتاحة للمُستخدم)

    شركة ADATA عملت إيه بقى؟
    الشركة ما سمحتش للمتحكم إنه يستحوذ على أي مساحة على شكل Over-Provisioning! طبعاً حضرتك مستغرب و هاسألني و تقول "هي الشركة هي اللي بتتحكم و بتقول المتحكم ياخد مساحة و لا لأ؟!", أقول لحضرتك "آه طبعاً, و كمان بإمكانهم إنهم يكبروا المساحة و يصغروها زي ما هما عاوزين, من يومين بس عرفت من دكتور طارق ريحان إنه فيه شركات بتحجز للمتحكم 28% من مساحة القرص, يعني الهارد بيبقى أصلاً 128 جيجابايت, تقوم الشركة تحجز 28%, يتبقى معانا 100 جيجابايت بس, و لو دورت هتلاقي فعلاً فيه أقراص 100 جيجابايت بس, بس طبعاً الأقراص دي موجهة أكتر للعمل الشاق مع المستخدمين المحترفين, و بيئة عمل الخوادم و خلافه".

    طيب إزاي ADATA قدرت تتخلى عن المساحة دي, و المتحكم إزاي هيقدر يقوم بمهامه بدون مساحة معاه؟ أقول "طبعاً فيه هاردات تانية بتبقى مساحتها كاملة, بس الهاردات دي للأمانة بتعمل على متحكمات تانية من Marvell و Phison و غيرهم, و المتحكم بيبقى معاه مساحة من ذاكرة الكاش علشان تساعده في تنفيذ مهامه.

    ما جاوبتش على باقي السؤال, هي ADATA استخدمت ذاكرة كاش؟ لأ, ADATA لم تستخدم ذاكرة كاش, و إنما اعتمدت على حاجة مهمة جداً, و هي الفرق الحسابي الناتج عن التحويل من بايت إلى كيلو بايت, و من كيلو إلى ميجا و من ميجا إلى جيجا. نفس الموضوع اللي بيسبب حيرة للناس و الواحد ييجي يسأل و يقول "الهارد الخاص بي سعته 1 تيرابايت, يعني المفروض أستفيد بـ 1024 جيجابايت منه, أنا مش قادر أستفيد غير بـ 930 جيجابايت بس, إيه السبب؟" السبب هو إن الشركة بتحسب الجيجبايت باعتبارها 1024 ميجابايت, بينما الويندوز بيعتمد على الحساب الحقيقي و هو إن الجيجابايت تساوي 1024 ميجابايت. الفرق في الحساب ده بيدينا 7.3% من المساحة, و هي دي تحديداً المساحة اللي ADATA استخدمتها لخدمة المتحكم بدلاً من أخذ 7% تانيين من مساحة الهارد نفسه. طبعاً الكلام ده بيوحي لنا بحاجة تانية, و هي إن الأقراص العادية (أقصد SSD اللي بيعمل على SandForce و بيسحب 7% من المساحة) هي في الأصل بتسحب 14.3% من المساحة علشان تستفيد منهم, آه, بالفعل.

    طيب إيه تأثير ده على الأداء؟ هنشوف الاختبارات دلوقت We shall know soon enough. و عموماً ADATA قالت أرقام زي ما حضارتكم شايفين من الصورة 85,000 IOPS و 550 ميجابايت/ثانية سرعة قراءة, و 530 ميجابايت/ثانية سرعة كتابة.

    نظرة على المواصفات التقنية للقرص, الهارد اللي معانا النهاردة تحديداً سرعة القراءة 550 ميجابايت/ثانية, و الكتابة 520 ميجابايت/ثانية. ضمان ثلاثة سنوات.

    العلبة و التغليف

    الهارد بييجي في علبة جيدة التصميم, تعاملت مع علب هاردات SSD قبل كدة كتير لكن لأول مرة بشوف الحجم ده لعلبة SSD السبب في كدة إن الهارد له نافذة شفافة علشان المستخدم يشوف الهارد منها. الطائر بتاع ADATA مش ملون كما اعتدنا أن نراه, و إنما الطائر بيلمع و شكله ظريف!



    العلبة مكتوب عليها بعدة لغات منها العربية, حاجة ظريفة جداً, لكن اللي مش ظريف خالص إن العربي المكتوب على العلبة حروفه منفصلة عن بعضها و مكتوبة بالمقلوب. هأكلم الشركة في الموضوع ده لأن شكلنا مش ظريف خالص, و ده استخفاف بالمستخدم العربي, فيها إيه يعني لو بعتوا لي تصميم الكرتونة أبص عليها بصة قبل الطباعة و أقول رأيي؟!


    جوانب العلبة تصميمها حلو جداً على صعيد الألوان, مكتوب اسم الشركة و الموديل بس.


    خد بالك من الملصق الشفاف اللي على أبواب العلبة, أوعى تشتري أي حاجة الملصق بتاعها متشال أو مقطوع.


    العلبة بييجي جواها الهارد (أكيد يعني) و كتيب التشغيل و ورقة للتذكير بتحميل برنامج Acronis True Image HD.


    واجهة الهارد بيغلب عليها حاجتين؛ الأولى إن الهارد متصنع من معدن شديد الصلابة علشان يحافظ على الهارد من الصدمات. تاني حاجة هي الملصق اللي لونه مايل ناحية اللون الذهبي. و طبعاً مكتوب اسم الشركة و الموديل و سعة الهارد.



    الجانب الخلفي من العلبة عليه رقم الطراز و الرقم الخاص بالضمان, و رقم الكود الأوربي EAN أو European Article Number. و في الآخر بنلاقي ملصق عليه سيريال لتحميل برنامج Acronis True Image HD.


    خد بالك, الملصق الخاص بالضمان لو حاولت تزيله أو تتخلص منه استحالة هيرجع زي ما كان, أي لمسة غلط مع الملصق ده هتحرمك من الضمان البالغ ثلاث سنوات.

    طبعاً فكيت الهارد و زي ما حضراتكم شايفين الملصق انتهى أجله تماماً, و زي ما قلت لحضراتكم, الملصق ده عامل زي عود الكبريت, بيولع مرة واحدة فقط! يلا بينا نبص على الهارد نفسه.

    الهارد نفسه شكله شكل أي هارد SSD في الدنيا من حيث التكوين مع اختلافات طفيفة في المكونات (المتحكم و الذاكرة).


    بنلاقي أدامنا المتحكم SF-2281 الشهير و المستخدم في أقراص SSD الحديثة الداعمة لواجهة SATA III. و بنلاقي كمان 8 شرائح من ذواكر NAND سعة كل واحدة فيهن 8 جيجابايت, يعني المجموع 64 جيجابايت. طيب أمال فين الباقيين؟




    باقي شرائح الذاكرة موجودة على الناحية الأخرى من الهارد, 8 شرائح كل واحدة بمساحة 8 جيجابايت, يعني معانا 64 جيجابايت تانيين.


    نظرة قريبة على العقل المفكر, المتحكم اللي بيتحكم في كل العمليات اللي بتحصل جوة الهارد من قراءة و كتابة و تنظيم للبيانات و توزيع لعمليات القراءة و الكتابة على كل شرائح الذاكرة الموجودة. صحيح, سمعتوا إن مؤسسة LSI اشترت SandForce؟ أهم حاجة في المتحكم ده رغم ضعفه أمام البيانات غير القابلة للضغط إنه بيدعم تقنيات بتحمي الهارد تحت اسم Dura Class Technology و بيقدر يحمي الهارد حتى مع غياب دعم Trim (كأن يكون عندك منظومة RAID مثلاً).


    شرائح الذاكرة من ماركة Intel موديلها هو 29F64G08ACME3 و هي ذاكرة من النوع غير المتزامن, الشركة بتعمل العكس مع السعات الأكبر من الهارد ده (256 و 512 جيجابايت) و بتستخدم شرائح متزامنة و طبعاً آداءها بيكون أفضل. طبعاً الذاكرة دي نفس الموجودة على هارد كينجستون SSDNow V+200.

    مواصفات الجهاز المُستخدم

    فاكرين المراجعة اللي فاتت؟, كانت مواصفات جهازي كالتالي:

    Intel Core™ I5 2400 Overclocked @ 3764 MHz
    Sapphire Z68 Pure Platinum
    2x4 GB Corsair Vengeance DDR3 1600 CL9
    Western Digital Caviar Black WD6401AALS
    Seasonic S12 II 520W
    Gigabyte Setto 1000 مدهونة أسود من جوه.
    Asus DVD-RW 2014L1T الباب بتاعه مش بيفتح غير لما أحط إبرة أو دبوس في الفتحة المُخصصة لذلك!

    سبحان الله, ربنا سبحانه و تعالى أراد و غيرت قطعتين في جهازي و بقى الجهاز كالتالي:

    Intel Core™ I5 2500K @ Stock Speed 3300 MHz و أتوجه بخالص الشكر لأبو يوسف (محمود راجح, يعني محدود الدخل) ربنا يزيده و يرزقه و يباركله و يفرح بيوســف.
    Sapphire Z68 Pure Platinum
    2x4 GB Corsair Vengeance DDR3 1600 CL9
    Western Digital Caviar Black WD6401AALS
    Seasonic S12 II 520W
    Gigabyte Setto 1000 مدهونة أسود من جوه.
    Lite-On iHAS324 24X DVD-RW (شكراً صديقي حسام يحيى, و شكراً حسن جاد, رغم إني زعلان علشان ما لقيتش عندكم iHAS524, و ناوي أول ما ينزل هأشتري واحد إن شاء الله).
    Asus DVD-RW 2014L1T سلم النمــر, يعني طلع معاش و حطيته في الكرتونة, ارقد في سلام يا أســوس.


    الاختبارات و النتائج

    ATTO Disk Benchmark


    البرنامج ده بيستخدم بيانات قابلة للضغط, و بالتالي متحكمات SandForce بتعشقه عشق القمر للنجمة و الليل و السهر. سرعة القراءة وصلت إلى 554 ميجابايت/ثانية و دي سرعة أعلى من السرعة المُعلن عنها. و سرعة الكتابة وصلت إلى 520 ميجابايت/ثانية و هي نفس السرعة المُعلن عنها. أرقام رائعة و أداء مُشرف. ما تفرحوش أوي الله يكرمكم, الأرقام دي لا تمثل بالنسبة لي أي قيمة لما بشوفها, دي مجرد أرقام دعائية مالهاش لزمة, لا تسمن و لا تغني من جوع, أجيب لكم هارد سرعته بتوصل 250 ميجا/ثانية و أبطأ من هاردات ويسترن ديجيتال الميكانيكية لما بيتسطب عليه ويندوز. المهم عندنا مش سرعة القراءة و الكتابة المتتابعة Sequential, خلونا نبص بصة على الاختبارات الجاية و نعرف المهم إيه, اتفقنا؟

    Anvil Storage Utilities

    البرنامج ده جديد نسبياً و ما زال في طور التطوير (كل النسخ الموجودة منه بيتا لحد دلوقت و لم يصدر الإصدار النهائي بعد, أول ما ينزل هأشتري نسخة إن شاء الرحمن) البرنامج له خصائص كتير محتاجة مقال كامل علشان أغطيها, أهم ما فيه إننا نقدر نحدد مستوى الضغط الخاص بالملفات علشان نشوف الهاردات بمتحكمات SandForce هيجرى لها إيه. أنا عملت الاختبار على 3 درجات من الضغط (0, 46, 100) % ضغط.



    لما عملت نسبة الضغط صفر %, متحكم ساندفورس كان بيرقص من الفرحة, و علشان كدة حقق 3450 نقطة, و ده اسكور عالي بالمناسبة. سرعة القراءة المتتابعة 500 ميجا/ثانية, و الكتابة 486 ميجا/ثانية. شوفوا سرعة القراءة لما للملفات بحجم 4K لما كان Queue Depth = 16, هتلاقوها 117.7 ميجابايت/ثانية, الرقم ده ممتاز. سرعة الكتابة لنفس العمق و حجم الملفات كانت 271.8 و ده رقم أروع. و سرعة كتابة الملفات بحجم 4K كانت 61.9 ميجابايت/ثانية.



    دي لما كانت نسبة الضغط 46%, شوفوا يا أفندية سرعات القراءة و الكتابة كلها -تقريباً- قلت إزاي, المتحكم هنا بدأ يتعب, بس ما زال بيقدم أداء ممتاز, و ده تقريباً صورة واقعية للإداء اللي هنشوفه كل يوم.


    شايفين سرعة الكتابة التتابعية على نسبة ضغط 100%؟ المتحكم هنا بينازع بمعنى الكلمة. إلا إنه قدر يحافظ على مستوى محترم في 4K Write بسرعة 62.7 ميجابايت/ثانية. سرعة أكثر من رائعة.

    Crystal Disk Mark

    طبعاً أول ما بنجيب هارد جديد بنجري و نشغل البرنامج ده, أقصد هارد SSD لأن أصحاب الهاردات التقليدية اللي زي حالاتي بينهم و بين HDTune عمار من أيام 2007


    كلمة واحدة بس, آداء مُذهل! سرعات القراءة و الكتابة التتابعية ممتازة جداً, صحيح بعيدة عن المُعلن عنه, بس قصة الأداء المُعلن عنه دي الشركات بتقيس الآداء ببرنامج ATTO و البرنامج قدم أداء ممتاز. صحيح, ما تخلوش حد يخدعكم يا حضرات بالبرنامج ده, قبل ما تقرأ الأرقام بص فوق و شوف نوع البيانات, هتلاقي في شريط البرنامج فوق مكتوب ALL 0X00, 0Fill, و ده معناه إن البيانات كلها قابلة للضغط و المتحكم مبسوط, و هو اللي خلى الأرقام حلوة أوي كدة. تعالوا نشوف إيه يحصل لو عملنا الاختبارات على بيانات عشوائية.


    دي سرعات الهارد على بيانات عشوائية (مش مكتوب حاجة في شريط البرنامج فوق), بس حتى مع السرعات دي أقدر أقول لحضراتكم إن الأداء ممتاز للغاية, سرعة 4K Write رائعة 65.9 ميجابايت/ثانية. و السرعة لما كان عمق صف الأمر QD32 كانت أكثر من رائعة.

    HD Tach 3.0.4

    للأسف مش هنشوف نسخ جديدة من البرنامج ده لأن الشركة أوقفت دعم البرنامج Once and for all, للأسف


    أداء ثابت Steady Performance بصراحة, مع معدل اندفاع للبيانات بسرعة 412 ميجابايت/ثانية.

    HDTune Pro 5.00

    حبيب الملايين, قصدت أسيبه للآخر علشان ده حبيبنا كلنا, و لا إيه؟


    سرعة القراءة وصلت إلى 356 ميجابايت/ثانية, و بالمقارنة بنتائج هاردات تانية بنفس البرنامج, السرعة جيدة جداً, المهم شايفين Access Time كام؟ حوالي نصف جزء من عشر أجزاء من المللي ثانية, زمن الوصول ببساطة هو الزمن الذي يستغرقه القرص للوصول للبيانات المطلوبة, طبعاً في الهاردات اللي بتعتمد على الإبرة و الخيط, قصدي الإبرة و القرص Platter و هي أقراص HDD زمن الوصول متوسطه 10 مللي ثانية. و ده واحد من أهم أسباب تفوق أقراص SSD و هو زمن الوصول المتدني للغاية. الهارد بيوصل للبيانات بشكل لحظي.


    سرعة الكتابة لم تقل في كفاءتها عن سرعة القراءة, وصلت إلى 346.8 ميجابايت/ثانية. بالمناسبة دي أعلى من نتائج OCZ Agility 3 و كمان OCZ RevoDrive X2.


    اختبار سرعة الملفات في البرنامج اختبار مهم للغاية, و ده من الاختبارات اللي بتفصح عن السرعة القصوى للقراءة و الكتابة التتابعية للهارد (زي ATTO يعني). أعلى سرعة قراءة كانت 540 ميجابايت/ثانية تقريباً, و أعلى سرعة كتابة كانت 470 ميجابايت/ثانية تقريباً.

    لو حضراتكم نظرتوا للرسم البياني الخطيّ الموجود أعلى البرنامج هتلاحظوا إن سرعات القراءة و الكتابة لم تعاني من أي انحدار أو تدرج للأسفل و الأعلى إلا في منطقتين فقط, و بشكل لحظيّ. سرعات القراءة تدور حول خط 50 ميجابايت/ثانية, بينما تدور سرعات الكتابة حول (470-500) ميجابايت/ثانية.

    عارفين إيه أهم حاجة في الصورة دي و الاختبار ده كله, أهم حاجة هي كمية عمليات الإدخال و الاخراج في الثانية و المعروفة باسم IOPS هتلاقيها وصلت إلى 75,367 عملية/ثانية, و هو رقم قريب جداً للرقم المُعلن عنه و هو 80 ألف IOPS. أمر رائع للغاية.

    HDTune Random Access Speeds


    على حجم ملف 1 ميجابايت, و الأحجام العشوائية القرص حقق نتائج جيدة جداً, 472.9 و 426.9 ميجابايت/ثانية على الترتيب. على حجم ملف 4 كيلوبايت, حقق الهارد 28.4 ميجابايت/ثانية. هتصدقوني لو قلت لكم إن النتيجة الأخيرة دي -رغم إن شكلها قليل- إلا أنها رائعة, لأنه بواقع التجربة أدامي دلوقت هارد SSD تاني سرعته في الاختبار ده لم تتجاوز 10 ميجابايت/ثانية.


    اختبارات الكتابة لحجم ملفات 4 كيلوبايت هو 79.5 ميجابايت/ثانية, رقم مذهل جداً, خصوصاً لو عرفنا إن الهارد الجبار RevoDrive X2 اللي هو في الأصل 4 هاردات و متوصلين RAID0 بيحقق 84 ميجابايت/ثانية.


    PCMark 7 Professional

    واحد من برامج الاختبار التي أفضلها شخصياً لأنه يقدم اختبارات فعلية واقعية, و بيئة محاكاة حقيقية لما يفعله المستخدم العادي كل يوم, كما إن النتيجة أو التقييم الذي يعطيع البرنامج يمكن الاعتماد عليه في المقارنة بين أكثر من هارد أو قطعة هاردوير.


    5150 نقطة هي مقدار ما حققه القرص, و النتيجة دي تقع بين ما حققه OCZ Agility 3 240GB اللي حقق 4861 نقطة, و RevoDrive X2 اللي حقق 5407 نقطة.

    دي النتيجة تفصيلاً:

    طبعاً فيه اختبارات عملية لزمن تنصيب الويندوز و حاجات تانية, بس أنا بفضل أسيبها لحد أما يتوفر معايا مجموعة هاردات علشان نعرف نقارن.

    كلمة أخيرة


    الصورة أبلغ من أي كلام, هذه مقارنة سريعة بين قرص S511 بسعة 120 جيجابايت, و قرص اليوم بسعة 128 جيجابايت. المستخدم بإمكانه الاستفادة من 8 جيجابايت كاملة, بالطبع سيقول بعضكم أن 8 جيجا مساحة لا يمكن النظر إليها, و أن رقم 8 في عالم التخزين اليوم أصبح يُنظر إليه بدونية و ازدراء, إلا أنني أؤكد لكم أن هذه المساحة -و لو بدت لكم بسيطة- إلا أنها في الأصل مساحة كبير ستسمح لك بتنصيب لعبة من ألعابك و تشغيلها بسرعة و الاستمتاع بسرعة التحويل بين المراحل بشكل مذهل, ما المانع من انتهاز تلك الفرصة و الفوز بالمساحة المجانية؟

    ربما كان هناك مانع كبير لو كان القرص آداؤه متدني بدرجة كبيرة عن منافسيه, عندها فقط -كما ذكرتُ في الفيديو- لم أكن لأرشح هذا المنتج و لا أتحدث عنه بهذا الفخر و الفرحة. لقد قدمت ADATA هديه لمستخدميها متمثلة في 7% مساحة مجانية من أقراص SSD تحت اسم XPG SX900. أظن أن كثير من الشركات ستتبع نفس النهج و سنرى أقراص مشابهة خلال الفترة القادمة, بالطبع صاحب المبادرة الأولى يكون مميز دوماً, لكن لا بأس, نتمنى أن تصل المنافسة إلى أشدها في هذه الفئة الجديدة.

    أنا اتكلمت بالفصحى كتير أوي, أرجع بقى تاني للمصري, الهارد سعره 170 دولار للنسخة 128 جيجابايت (يعني 1020 جنيه من غير جمارك) و فيه فرق 10 دولار فقط بينه و بين S511 اللي سعره 160 دولار و الفرق بينهم 8 جيجا, يعني الجيجا سعرها في الفرق ده أقل من 8 جنيه, يا بلاش. تخيل كدى معايا لو تقدر تشتري الـ SSD فرط, بالجيجا, و الجيجا بـ 8 جنيه, 60 جيجا بـ 480 جنيه, و نعود من عالم الأحلام لأرض الواقع. سعر النسخة 64 جيجابايت هو 110 دولار (يعني 660 جنيه). أتمنى أن نرى المنتج قريباً من الوكيل في مصر ( X.Track أعتقد). و الشركة الله ينجح لهم المقاصد أرفقوا مع الهارد براكيت شكلها ظريف جداً, و نسخة مجانية من برنامج Acronis True Image HD, طبعاً نزلتها و فعلتها بس مش هأستخدمها!

    ده جزء من الكلام اللي هأكتبه في خاتمة المراجعة الإنجليزية إن شاء الله, ربنا ييسر و أخلصها كتابة و أنا في الجيش, و لما آجي أنشرها على المواقع الأجنبية[IMG]http://www.***********.com/forum/images/styles/lifeElement/smilies/Legend%204/smile.gif[/IMG]

    The ADATA XPG SX900 is spectacular in every way, the extra 7% space will give you great benefits, taking into consideration that this is an SSD, not an HDD, so 7% space is a good amount of rock and roll. The performance did not get hurt due to the 0% Over-Provisioning space even as the benchmarks demonstrated. With a 170$ price tag, it sets close to many SATA III SandForce based SSDs, nevertheless, it has 7% extra gigabytes, a nicely done 3.5" bracket, and a free downloadable copy of Acronis True Image HD software. I highly recommend the SX900, especially if you could get a 256 GB version with high end synchronous nand flashes.


    أتشرف باستقبال تعليقاتكم و نقدكم.

    هذا و ما كان من توفيق فهو من عند الله وحده, و ما كان من خطأ أو سهو أو نسيان فهو مني و من الشيطان. سبحانك اللهم و بحمدك, لا إله إلا أنت, أستغفرك و أتوب إليك.

  2. #2
    عضو فضي
    تاريخ التسجيل
    Apr 2009
    المشاركات
    3,337
    الدولة: Egypt
    معدل تقييم المستوى
    53

    رد: مراجعتي الشخصية "الاحترافية" لقرص ADATA XPG SX900 128GB SATA III ذو المساحة الممت

    مراجعة أكثر من ممتازة وهائلة وبها مجهود كبير جداً، شكراً لك

    هذا القرص بالتأكيد يعاني من مشكلة لا أعلم سببها عند الكتابة العشوائية 4kB فقد حقق 65 MB/s فقط وهذا يعتبر أقل بحوالي 30 % أو أكثر عن باقي أقراص متحكم ساندفورس بالذاكرة المتزامنة، وكما يبين برنامج Anvil فقد حقق عند الكتابة العشوائية 4KB بعمق 4 أوامر، 147 MB/s وهي نتيجة ضعيفة أيضاً.
    سرعة القراءة التتابعية للقراءة (مع بيانات مضغوطة) أقل من المعتاد الا أن سرعة الكتابة التتابعية (مع بيانات غير قابلة للضغط) ممتازة جداً.

    النتيجة مع البيانات العشوائية مع عدد أوامر من 1 الى 4 لا تعجبني.:ah32:

    هذا القرص يجب فرمه :D حتى الوصول الى "Steady-State" حتى نرى تأثير Over Provisional = 0 وفاعلية الأمر TRIM

    في هذه الفئة السعرية ومن وجهة نظري لا يوجد أفضل من Samsung 830 128GB

    تقييم من نار :D

  3. #3
    عضو ذهبي الصورة الرمزية MrTom
    تاريخ التسجيل
    Dec 2011
    المشاركات
    2,905
    الدولة: Egypt
    معدل تقييم المستوى
    171

    رد: مراجعتي الشخصية "الاحترافية" لقرص ADATA XPG SX900 128GB SATA III ذو المساحة الممت

    مراجعة ممتازة يا مشرفنا :D

    أنا مش عارف أقولك أيه كل شوية تعمل مراجعة أحسن من التانية:eek:

    و المواقع الاجنبية أشتكت منك يا مشرفنا دول هما كده قربوا يقفلوا

    تم تقيم الموضوع وجارى مشاهدة الفيديو وبعد أذن حضرتك هحمل الفيديو لان مراجعات حضرتك متميزة لو فى أعتراض على التحميل قولى و انا أوقفه حالا :D
    ولو الواحد أصبح فضى يبقى ليك عندى تقيم :D

    تعديل

    حاولت التقيم بس سمعة موجود
    التعديل الأخير تم بواسطة MrTom ; 18-04-2012 الساعة 10:20
    [CENTER]
    [/CENTER]

  4. #4
    عضو ذهبي الصورة الرمزية Ahmed.Saleh
    تاريخ التسجيل
    Nov 2009
    المشاركات
    3,635
    الدولة: Egypt
    معدل تقييم المستوى
    32

    رد: مراجعتي الشخصية "الاحترافية" لقرص ADATA XPG SX900 128GB SATA III ذو المساحة الممت

    الأخ محمد له معزة خاصةعندى

    المراجعة رائعة اعطتنى فكرة عن اقراص الSSD التى لم اكن اعرف عنها الكثير لأنى ببساطة صعب امتلك واحد الوقت ده

    افضل شئ هو جزء الفيديو لفتح العبوة وحتى فك القرص نفسه.

    تقييمك عندك والحمد لله سمعة ما وقفش ف وشه
    [CENTER][COLOR=#008000][FONT=comic sans ms][SIZE=4][B]عن أبي هريرة، عن النبي صلي الله علية وسلم قال:" ما من رجلٍ يحفظ علماً فيكتمه، إلا أُتي به يوم القيامة ملجماً بلجام من النار "[/B][/SIZE][/FONT]
    [/COLOR][B][COLOR=#800080]لا تؤجل لعب اليوم الى الغد[/COLOR][/B][/CENTER]

  5. #5
    عضو ذهبي الصورة الرمزية محمد الجوهري
    تاريخ التسجيل
    Apr 2007
    المشاركات
    3,047
    الدولة: Saudi Arabia
    معدل تقييم المستوى
    109

    رد: مراجعتي الشخصية "الاحترافية" لقرص ADATA XPG SX900 128GB SATA III ذو المساحة الممت

    اقتباس المشاركة الأصلية كتبت بواسطة tarekforall مشاهدة المشاركة
    مراجعة أكثر من ممتازة وهائلة وبها مجهود كبير جداً، شكراً لك

    هذا القرص بالتأكيد يعاني من مشكلة لا أعلم سببها عند الكتابة العشوائية 4kB فقد حقق 65 MB/s فقط وهذا يعتبر أقل بحوالي 30 % أو أكثر عن باقي أقراص متحكم ساندفورس بالذاكرة المتزامنة، وكما يبين برنامج Anvil فقد حقق عند الكتابة العشوائية 4KB بعمق 4 أوامر، 147 MB/s وهي نتيجة ضعيفة أيضاً.

    سرعة القراءة التتابعية للقراءة (مع بيانات مضغوطة) أقل من المعتاد الا أن سرعة الكتابة التتابعية (مع بيانات غير قابلة للضغط) ممتازة جداً.

    النتيجة مع البيانات العشوائية مع عدد أوامر من 1 الى 4 لا تعجبني.:ah32:
    أستاذي العزيز,,,

    المراجعة ازدادت و تألقت بوجودك

    ما هي الذاكرة غير متزامنة للأسف! و ده تفسير إن الأداء متدني عن الأقراص التي تتحدث عنها, استحالة هيكون الأداء موازي مثلاً لـ OCZ vertex III . على فكرة, أنا كنت كاتب تعليق شديد اللهجة على أول صورة موجودة في المراجعة, حيث تدعي الشركة أن القرص هو الأسرع في العالم! و لكني تراجعت بعدما قمت ببحث سريع لأكتشف أن الأقراص بسعة أكبر من نفس الطراز تأتي بذاكرة متزامنة و أداءها أفضل, شوف كدة:

    The printed circuit board (PCB) contains the SF-2281 processor and 16 pieces of Intel mlc synchronous NAND flash memory (29F16B08CCME3), each module being 16GB in capacity for a total capacity of 256GB.

    http://thessdreview.com/our-reviews/...-driven-speed/

    و طبعاً سحبت التعليق التهكمي لأني لم أختبر القرص بذواكر متزامنة, فقررت إني أقارنه بقرص بذاكرة غير متزامنة زيه, و لقيت OCZ Agility III 240GB. أنا أشدت بالأداء لما قارنته بقرص OCZ Agility 3 240GB, نظراً لأن قرص XPG قدم أداء أفضل منه مع Crystal Disk Mark عند سرعة الكتابة العشوائية بحجم 4K. شوف كدة:



    و فعلاً نتيجة Anvil قليلة عند مقارنتها بنتيجة Agility 3


    لم أقم بعمل Secure Erase قبل استخدام Anvil, أظن النتيجة ربما تتحسن مع عمل Secure Erase, سأجرب فيما بعد و أوافيك بالنتيجة.

    هذا القرص يجب فرمه :D حتى الوصول الى "Steady-State" حتى نرى تأثير Over Provisional = 0 وفاعلية الأمر TRIM
    تقصد عن طريق ملئ القرص بالبيانات بدرجات مختلفة و إعادة الاختبارات مع كل درجة و بيان ما سيحدث له و هو في حالة Dirty State؟ ثم تركه فترة طويلة (طول الليل مثلاً) لنرى فاعلية الأمر TRIM؟ هي عملية متعبة و ما شفتش حد بيعملها غير TweakTown تقريباً.

    في هذه الفئة السعرية ومن وجهة نظري لا يوجد أفضل من Samsung 830 128GB
    هذا قرص متميز بشكل غير طبيعي, يكفي Toggle DDR و استخدامه لذاكرة كاش 256 ميجابايت. و الشياكة و الأناقة و كيبل الساتا و النورتون و العلبة, تحس إنه موبايل مش SSD

    تقييم من نار :D
    و الله الرد كان كفاية عليا

  6. #6
    عضو ذهبي الصورة الرمزية محمد الجوهري
    تاريخ التسجيل
    Apr 2007
    المشاركات
    3,047
    الدولة: Saudi Arabia
    معدل تقييم المستوى
    109

    رد: مراجعتي الشخصية "الاحترافية" لقرص ADATA XPG SX900 128GB SATA III ذو المساحة الممت

    اقتباس المشاركة الأصلية كتبت بواسطة MrTom مشاهدة المشاركة
    مراجعة ممتازة يا مشرفنا :D

    أنا مش عارف أقولك أيه كل شوية تعمل مراجعة أحسن من التانية:eek:

    و المواقع الاجنبية أشتكت منك يا مشرفنا دول هما كده قربوا يقفلوا

    تم تقيم الموضوع وجارى مشاهدة الفيديو وبعد أذن حضرتك هحمل الفيديو لان مراجعات حضرتك متميزة لو فى أعتراض على التحميل قولى و انا أوقفه حالا :D
    ولو الواحد أصبح فضى يبقى ليك عندى تقيم :D

    :D

    حبيب قلبي

    يا عمنا أنا مش مشرفكم و لا حاجة, أنا مجرد مشرف سابق, إعطيت للمنتدى أكتر ما أعطيت لأي مكان أو أحد تاني, و كنت دايماً موجود لخدمة المنتدى و الأعضاء, استلمت الأقسام اللي كنت مشرف عليها و هي خرابة (بالمعنى الحرفي للكلمة) و بتوفيق ربنا و جهود الأعضاء و مشرفين القسم (اللي عينتهم بنفسي بعدين) الأقسام تحولت لجنة, و الدنيا بقت زي الفل, و استمريت مدير لها. بس في الآخر كل ده اتقابل بالإقالة بدون سبب! و ما تحاولش تسأل حد من الإداريين علشان ما حدش يعرف حاجة!

    أنا مش زعلان, لأن معظم الناس الكويسين اللي كنت أعرفهم زمان بقوا مشتركين معايا دلوقت في اللون البنفسجي الظريف اللي تحت الاسم ده :D

    يا حبيبي حمل الفيديو براحتك, و لو تأمر الفيديو و المراجعة الهارد و كاتب المراجعة كلهم تحت أمرك

    مش هأوصيك بقى, شير و لايك و سبسكرايب :D

  7. #7
    عضو ذهبي الصورة الرمزية محمد الجوهري
    تاريخ التسجيل
    Apr 2007
    المشاركات
    3,047
    الدولة: Saudi Arabia
    معدل تقييم المستوى
    109

    رد: مراجعتي الشخصية "الاحترافية" لقرص ADATA XPG SX900 128GB SATA III ذو المساحة الممت

    اقتباس المشاركة الأصلية كتبت بواسطة ka7rata مشاهدة المشاركة
    الأخ محمد له معزة خاصةعندى

    المراجعة رائعة اعطتنى فكرة عن اقراص الSSD التى لم اكن اعرف عنها الكثير لأنى ببساطة صعب امتلك واحد الوقت ده

    افضل شئ هو جزء الفيديو لفتح العبوة وحتى فك القرص نفسه.

    تقييمك عندك والحمد لله سمعة ما وقفش ف وشه
    أشكرك يا أبو حميد, بارك الله فيك, مش صعب و لا حاجة, ممكن هارد بسعة 64 جيجا يظبط لك الأدء و بسعر حنين كمان

    شفت لما رميت العلبة, فيه فيديوهات تانية بعامل العلب بمنتهى الجفاء, أنا كل ما أشوفها أضحك:D

  8. #8
    عضو فضي الصورة الرمزية Hassan.Ali
    تاريخ التسجيل
    Apr 2009
    المشاركات
    924
    الدولة: Egypt
    معدل تقييم المستوى
    28

    رد: مراجعتي الشخصية "الاحترافية" لقرص ADATA XPG SX900 128GB SATA III ذو المساحة الممت

    انا هقول كلمه واحده بس مفيش غيرها .......... أستااااااااااااااااااااااااااااااااااااااااذ :ah7:

    واذا سمحت تقيل تقيمى البسيط ....... شكرا لك

  9. #9
    عضو برونزي
    تاريخ التسجيل
    Apr 2008
    المشاركات
    687
    الدولة: Syria
    معدل تقييم المستوى
    16

    رد: مراجعتي الشخصية "الاحترافية" لقرص ADATA XPG SX900 128GB SATA III ذو المساحة الممت

    ما شاء الله
    اله يعطيك العافية المراجعة رائعة و لكن الشرح عن هاردات SSD أروع
    تم التقييم

  10. #10
    عضو فضي
    تاريخ التسجيل
    Apr 2009
    المشاركات
    3,337
    الدولة: Egypt
    معدل تقييم المستوى
    53

    رد: مراجعتي الشخصية "الاحترافية" لقرص ADATA XPG SX900 128GB SATA III ذو المساحة الممت

    اقتباس المشاركة الأصلية كتبت بواسطة محمد الجوهري مشاهدة المشاركة
    أستاذي العزيز,,,

    المراجعة ازدادت و تألقت بوجودك

    ما هي الذاكرة غير متزامنة للأسف! و ده تفسير إن الأداء متدني عن الأقراص التي تتحدث عنها, استحالة هيكون الأداء موازي مثلاً لـ OCZ vertex III . على فكرة, أنا كنت كاتب تعليق شديد اللهجة على أول صورة موجودة في المراجعة, حيث تدعي الشركة أن القرص هو الأسرع في العالم! و لكني تراجعت بعدما قمت ببحث سريع لأكتشف أن الأقراص بسعة أكبر من نفس الطراز تأتي بذاكرة متزامنة و أداءها أفضل, شوف كدة:



    http://thessdreview.com/our-reviews/...-driven-speed/

    و طبعاً سحبت التعليق التهكمي لأني لم أختبر القرص بذواكر متزامنة, فقررت إني أقارنه بقرص بذاكرة غير متزامنة زيه, و لقيت OCZ Agility III 240GB. أنا أشدت بالأداء لما قارنته بقرص OCZ Agility 3 240GB, نظراً لأن قرص XPG قدم أداء أفضل منه مع Crystal Disk Mark عند سرعة الكتابة العشوائية بحجم 4K. شوف كدة:



    و فعلاً نتيجة Anvil قليلة عند مقارنتها بنتيجة Agility 3


    لم أقم بعمل Secure Erase قبل استخدام Anvil, أظن النتيجة ربما تتحسن مع عمل Secure Erase, سأجرب فيما بعد و أوافيك بالنتيجة.



    تقصد عن طريق ملئ القرص بالبيانات بدرجات مختلفة و إعادة الاختبارات مع كل درجة و بيان ما سيحدث له و هو في حالة Dirty State؟ ثم تركه فترة طويلة (طول الليل مثلاً) لنرى فاعلية الأمر TRIM؟ هي عملية متعبة و ما شفتش حد بيعملها غير TweakTown تقريباً.



    هذا قرص متميز بشكل غير طبيعي, يكفي Toggle DDR و استخدامه لذاكرة كاش 256 ميجابايت. و الشياكة و الأناقة و كيبل الساتا و النورتون و العلبة, تحس إنه موبايل مش SSD



    و الله الرد كان كفاية عليا
    شكراً يا محمد على ردك وبارك الله فيك
    لا يمكن أن يحقق هذا القرص سرعة تتابعية عند القراءة مع بيانات غير قابلة للضغط تقترب من 500 MB/s وتكون ذاكرته غير متزامنة، فبالتأكيد ذاكرته من النوع المتزامن (synchronous) لا شك في ذلك.
    لكن كما يتضح فهو أقل أداءً من باقي الأقراص التي تحتوي على الذاكرة المتزامنة.
    هل قرأت موضوعي عن هذا الأمر...هنا

    الذاكرة في هذا القرص تحمل الرقم 29F64G08ACME3 فبحثت عنها قليلاً فوجدت شيء غريب.
    1- هذه الذواكر موجودة في بعض أقراص ADATD S511 120gB وهذه أقراص تحتوي على ذواكر متزامنة.
    http://www.pureoverclock.com/review.php?id=1429&page=3


    2- هذه الذواكر موجودة أيضاً في القرص Zalman F1 120GB وهو قرص ذو ذاكرة متزامنة، وفي نفس المراجعة يذكر الموقع أن العينة التي لديهم من قرص Corsair Force GT 120GB تحتوي على نفس الذاكرة!!
    http://www.xbitlabs.com/articles/sto...lman-f1_2.html

    3- هذه الذاكرة موجودة في القرص BIWIN S836 Elite 120GB وهو قرص بذاكرة متزامنة أيضاً.
    http://thessdreview.com/our-reviews/...ance-achieved/

    4- هذا هو الغريب، قرص Kingston V+200 120GB يحتوي على نفس نوع هذه الذاكرة ولكنها من النوع غير المتزامن ؟؟؟!!! وأداءه بالطبع يؤكد ذلك (لا تفسير لدي لهذا الأمر).
    http://www.legitreviews.com/article/1874/2/


    لكن بلا شك قرص ADATA SPG SX900 1208GB ذاكرته هي ذاكرة متزامنة.

    الSteady State هي الوصول بأداء القرص الى حد الثبات فكما تعلم فأقراص SSD تعطي أفضل أداء اذا كان القرص يحتوي على مساحات فارغة تسمح للمتحكم بالكتابة مباشرة الى الذاكرة مع نقل البيانات من مكان لآخر بشكل مريح، ولكن اذا امتلاء القرص بالبيانات عن آخره فالأداء يقل.
    لو قمنا بكتابة بيانات على كل مساحة القرص القرص لفترة، ثم قسنا الأداء فيمكننا معرفة الأداء الثابت لهذا القرص.

    أشكرك يا محمد على هذه المراجعة الثرية مرة أخرى وبارك الله فيك

  11. #11
    إداري سابق
    تاريخ التسجيل
    Jun 2002
    المشاركات
    18,891
    معدل تقييم المستوى
    110

    رد: مراجعتي الشخصية "الاحترافية" لقرص ADATA XPG SX900 128GB SATA III ذو المساحة الممت

    مراجعة قيمة بكل ما تعنيه الكلمة، بارك الله فيك أخي محمد

  12. #12
    عضو الصورة الرمزية mohamed_sophe
    تاريخ التسجيل
    Sep 2009
    المشاركات
    227
    الدولة: Egypt
    معدل تقييم المستوى
    0

    رد: مراجعتي الشخصية "الاحترافية" لقرص ADATA XPG SX900 128GB SATA III ذو المساحة الممت

    ماشاء الله مراجعة ممتازة ومجهود خرافى ربنا يوفقق يا عمنا والف مبروك على التجديد الاخير فى الجهاز وعقبال متخلص الجيش

  13. #13
    مشرف عام
    تاريخ التسجيل
    Jan 2004
    المشاركات
    7,307
    الدولة: Egypt
    معدل تقييم المستوى
    52

    رد: مراجعتي الشخصية "الاحترافية" لقرص ADATA XPG SX900 128GB SATA III ذو المساحة الممت

    اقتباس المشاركة الأصلية كتبت بواسطة محمد الجوهري مشاهدة المشاركة
    :D

    يا عمنا أنا مش مشرفكم و لا حاجة, أنا مجرد مشرف سابق, إعطيت للمنتدى أكتر ما أعطيت لأي مكان أو أحد تاني, و كنت دايماً موجود لخدمة المنتدى و الأعضاء, استلمت الأقسام اللي كنت مشرف عليها و هي خرابة (بالمعنى الحرفي للكلمة) و بتوفيق ربنا و جهود الأعضاء و مشرفين القسم (اللي عينتهم بنفسي بعدين) الأقسام تحولت لجنة, و الدنيا بقت زي الفل, و استمريت مدير لها. بس في الآخر كل ده اتقابل بالإقالة بدون سبب! و ما تحاولش تسأل حد من الإداريين علشان ما حدش يعرف حاجة!
    شكرا محمد على المراجعة وإفادة الآخرين..

    تعليقا على ما كتبته بالأعلى: أود أن ألفت نظرك إلى أنك كنت تتقاضى راتب شهري مقابل العمل في شركة لها وجود وكيان. وهذا الراتب كان راتب عالي ومحترم. وعليه فإن مقابل هذا الراتب كل ما تقدمه هو منوط بعملك وليس منحة أو تفضل أو هبة منك لمكان العمل. وفي ذات الوقت فإن إقالتك هي أمر إداري يرجع لرؤية الشركة التي تمنحك راتبا شهريا للحصول على عمل معين أو تحقيق أهداف معينة.

    ليس غريبا الإقالة للموظفين الذين يعملون برواتب منتظمة، ياهوو أقالت آلاف الموظفين منذ حوالي شهر أو أقل وكذا سيسكو وغيرها كثير.

    رجائي لك أن تكون محترفا في العمل وأن تتوقف عن البكاء بهذه الطريقة العاطفية... كنت موظفا وتم تفنيشك.. هكذا ببساطة.. عيش وتعايش مع الحياة

  14. #14
    عضو الصورة الرمزية mdreem
    تاريخ التسجيل
    Sep 2010
    المشاركات
    424
    الدولة: Egypt
    معدل تقييم المستوى
    8

    رد: مراجعتي الشخصية "الاحترافية" لقرص ADATA XPG SX900 128GB SATA III ذو المساحة الممت

    مراجعة ممتازة ممتازة ممتازة

  15. #15
    عضو فضي الصورة الرمزية Mr VERRO
    تاريخ التسجيل
    Aug 2010
    المشاركات
    907
    الدولة: Egypt
    معدل تقييم المستوى
    13

    رد: مراجعتي الشخصية "الاحترافية" لقرص ADATA XPG SX900 128GB SATA III ذو المساحة الممت



    الف شكر يا مشرفنا مراجعة مفيهاش غلطة بس مازلت شايف ان اقراص الحالة الصلبة غالية شوية عندنا هنا فى مصر , تم التقيم

صفحة 1 من 3 1 2 3 الأخيرةالأخيرة

المواضيع المتشابهه

  1. مشاركات: 50
    آخر مشاركة: 28-04-2012, 00:52
  2. غدا.. "جرانه" و"المغربى" و"غبور" أمام "الجنايات"
    بواسطة وى واا في المنتدى الأرشيف
    مشاركات: 1
    آخر مشاركة: 22-04-2011, 21:32
  3. مشاركات: 3
    آخر مشاركة: 21-08-2009, 07:38

المفضلات

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •