بقالى سنة بادور على علبة هواء مضغوط لتنظيف اللاب توب !

**baherbadr** · 13-09-2012, 23:15

السلام عليكم ورحمة الله وبركاته

من حوالى سنتين لقيت فى راديو شاك علبى هواء مضغوط (فريون) Air can .. اشتريتها لتنظيف اللاب توب وكانت النتيجة رائعة

بعد فترة رحت اشترى واحدة ثانية .. قالوا لى دى كانت اخر واحدة .. عليك وعلى كومبيومى... رحت.. لقيت أثنين فقط .. أشتريتهم ..

بعد كدة .. بقالى سنة بادور على العلبة دى مش لاقيها .. نهائيا.. كل اللى موجود اسبراى

البياعين فى كومبيومى وفيرجن وراديو شاك .. شككوا أساسا ان فى حاجة بالمنظر ده

جبت لهم صورة من النت .. قالوا لى ماهو الاسبراى ينفع برضه ... حاولت افهمهم ان دى ماكنتش اسبراى ولكن هواء فقط

مافيش فايدة .. ولا حد منهم فاهم اى حاجة

لو حد منكم يعرف ممكن الاقيها فين يبقى كتر الف خيره

وشكرا جزيلا

**baherbadr** · 14-09-2012, 00:24

للرفع . لان فى واحد دخل وعرض لابتوب للبيع فى كل المشاركات .. بهدل الدنيا

**Khaled Khattab** · 14-09-2012, 00:39

هههههههههه هو ده مثال على الغباء إلي بيحصل بايع مش فاهم حاجة بيروج لسلعة وعاوز يخلص منها والسلام

**Khaled Khattab** · 14-09-2012, 00:40

آه بالنسبة للهواء المضغوط تقريباً مش حتلاقي منها غير في راديو شاك أو كومبيوتر شوب غير كده لو مش لقيت يبقى مش حتلاقي لو عندك حد برة إبقى وصيه على كام علبة

**baherbadr** · 14-09-2012, 00:59

تسلم يا استاذ خالد ... دايما موجود وبتفيد الكل .. ربنا يجازيك خير ان شاء الله على كل مساعداتك

**حمادة الخطيب** · 18-09-2012, 00:43

و الله لسة النهاردة من 4 ساعات بالضبط كنت في باب اللوق بادور على واحدة في محلات الإلكترونيات اللي هناك ... و برضه كل ما أسأل حد يبص لي باستغراب كأني شتمته !!! لو عرفت سكة ابقى قل لي الله يرضى عنك
و يا ريت لو تعرف منين أجيب thermopaste تقول برضه

**baherbadr** · 18-09-2012, 03:48

والله يا استاذ حمادة الخطيب ... انا فقدت الامل تماما .. مافتكرش حد لف ودور فى كل المحلات والمولات زى العبد لله ... وفعلا .. كل ما تسأل عليه يبصوا لك كانك مجنون ... عموما
لو لقيته اكيد حاقول لك على طول ... ربنا يصبرنا على الوكلاء والشركات الفقر دول

**BAZOOKA_N2O** · 18-09-2012, 05:30

لكل الاعضاء اللي جربوا عبوة الهواء المضغوط
ياريت توضيح فكرة الاستخدام ايه بالضبط؟

**baherbadr** · 18-09-2012, 21:59

دى تنظف بيها الكى بورد وفتحات التهوية .. بتدى نتيجة رائعة

**BAZOOKA_N2O** · 18-09-2012, 22:58

انا مش بحتاجها عشان عندي البديل

blower مزود بتحكم بالسرعات
ب6 سرعات على حسب الاستخدام
ونوعه APT صيني بس تقفيل عالي الجودة ووزنه تقيل
وفي منه موديل سرعة واحدة وهي تعادل السرعة ال6 في الموديل الاول
ده مش هينفع في الحاجات اللي ممكن تتأثر بالضغط العالي عشان كده اشتريت ال6 سرعات
سعره في السوق في حدود 120 جنيه
ودي صورته

**baherbadr** · 19-09-2012, 02:53

العلبة بقى معاها انبوب بلاستيك رفيع جدا بيدخل جوه فتحة التهوية وبينظف المروحة ... بصراحة كان نافعنى جدا

**حمادة الخطيب** · 27-09-2012, 23:20

المشاركة الأصلية كتبت بواسطة baherbadr

والله يا استاذ حمادة الخطيب ... انا فقدت الامل تماما .. مافتكرش حد لف ودور فى كل المحلات والمولات زى العبد لله ... وفعلا .. كل ما تسأل عليه يبصوا لك كانك مجنون ... عموما
لو لقيته اكيد حاقول لك على طول ... ربنا يصبرنا على الوكلاء والشركات الفقر دول

أنا لقيت على فكرة في RadioShack اللي جنب مسجد رابعة العدوية في مدينة نصر ... لقيت عنده كان هوا مضغوط بولندية الصنع و فيه منها صغير و كبير كمان

**baherbadr** · 28-09-2012, 01:49

شكرا جزيلا يا أستاذنا ... والله ريحتنى .. بس هوه فعلا هواء مضغوط ولا أسبراى ؟؟؟ لان الاثنين شبه بعض بالظبط ... بس الاسبراى مكتوب عليها spray .. انما الشكل واللون والحجم شبه بعض بالظبط

**حمادة الخطيب** · 28-09-2012, 02:47

المشاركة الأصلية كتبت بواسطة baherbadr

شكرا جزيلا يا أستاذنا ... والله ريحتنى .. بس هوه فعلا هواء مضغوط ولا أسبراى ؟؟؟ لان الاثنين شبه بعض بالظبط ... بس الاسبراى مكتوب عليها spray .. انما الشكل واللون والحجم شبه بعض بالظبط

مكتوب عليها Compressed Air
و الوصف: Compressed air for cleaning office equipment and other electronic appliances
مش مكتوب سبراي خالص