ஐ◄███▓▒░ تــــاريـــخ الــبـــوردات ░▒▓███►ஐ

[%El.Magic%]

هتكلم انهردة عن المازربورد بصورة عامة ومراحل تطورها والتطرق الى مكوناتها بالتفصيل حتى تكون هذه المادة مرجع بسيط لمن يريد الخوض في هذا المجال ونظرا لكبر الموضوع ساجعل المرجع على عدة اجزاء حتى لا اطيل عليكم ارجو من الله التوفيق وبسم الله نبدأ ..

في البداية وقبل أي حاجة عاوزين نتفق ان ال Mother board او اللوحة الام او اللوحة الرئسية ايا كان الاسم هي العمود الفقري لجهازالكمبيوتر بمعنى وجوب جميع المكونات المتصلة بجهاز الكمبيوتر ان تمر على اللوحة الام سواء كانت هذه المكونات بداخل الكيسة او بخارجها .

في واحد بيسأل اهو بيقول حتة البتاعة دي بتتركب فين في الكمبيوتر ؟؟
اكيد يعني بتتركب جوه الكيسة مش محتاجة زكاء بس في غلطة وقع فيها ناس كتير لما تيجي تركب اللوحة الام في الكيسة لازم تركب قواعد عازلة عشان تبعد الكيسة عن البوردة وميحصلش تلامس بينهم لان لو حصل تلامس هيحصل قفلة والبوردة نفسها مش هتشتغل باور خالص .

تعالو بقى نفصص المازربورد حتة حتة ونشوف بتتكون من ايه ؟؟

المازربوردات نقدر نقسمهم نوعين :

1- لوحة ام متكاملة ( Integrated System Board ) :

دا نوع يتميز بوجود العديد من الخصائص الاضافية والمزايا المضافة الى اللوحة الام زي مثلا منافذ توصيل الصوت ومنفذ توصيل الشبكة وهكذا انظر الصورة ..


2- لوحة ام غير متكاملة او فاضية (Nonintegrated System Board) :

باين من اسمها ان اللوحة الام بتكون فاضية خالص مفهاش اي حاجة يعني لو عاوزتشغل الصوت اشتري كارت صوت لو عاوز تشغل الشبكة اشتري كارت شبكة وهكذا ..

وفي الطبيعي جميع البوردات اللي موجودة حاليا لازم يكون فيها منفذ للصوت والشبكة وشوية حجات كدا انظر الصورة ..

ندخل بقى في التصميم العام للوحة الام وازاي نقدر نفرق بينهم من الشكل العام او Form Factors :

1- AT Mother Board :


اول مازربورد تم انشاءها حاجة كدا من ايام اسماعيل يس مش هنتكلم عنها كتيير لانها خلاص بقت حاجة من التراث بس اهم ما يميزالمازربورد دي :

1- مكان توصيل الكايبورد فيها كبير نسبيا وبه 5 فتحات او ما نسميه DIN 5


2- نظام الباورسبلاي بتاعها يتميز بوجود كابلين كل كابل 6 اسلاك


3- مكان البروسيسور خلف فتحات التوسعة كما هو موضح في صورة المازربورد ..


2- ( ATX ( Advanced Technology Extended :


اهم الفروق بينها وبين النوع السابق هو تغيير مكان البروسيسور من خلف شقوق التوسعة الى يمين شقوق التوسعة .

في واحد هيسأل هيقول وايه الفايدة من دا ياعم احمد ؟؟

هقوله لما ننقل البروسيسور للمكان دا هيديك مساحة كفاية تقدر تركب كروت كبيرة في فتحات التوسعة من غير ما يحصل تعارض مع البروسيسور بالاضافة لتهوية افضل .


منظر كابل الباور اتغير بدل ما كان كابلين منفصلين كل واحد به 6 اسلاك اصبح كابل واحد على صفين بمجموع 20 او 24 سلك


بالاضافة الى ان فتحة الكايبورد بقت اصغر و بها 6 فتحات DIN 6 او ما نسميه PS2


ملحوظة : البوردة AT لما كنا بنقفلها كنا بندي الامر من الويندوز بس مكنتش بتقفل غير لما نقفل المفتاح كانت بتدينا شاشة غبية كدا



حد عمره شافها

انما البوردة ATX بتقفل لوحدها على طول لما ندي الامر بايقاف التشغيل لوجود وحدة Front Panel ..

3-(Micro ATX(μATX :

نفس البوردة ATX في كل حاجة بس حجمها صغير كدا واحد هيسألني بقى يقولي طب انا كدا استفدت ايه يابو حميد من الموضوع دا ؟

اقولو ولا أي حاجة انت صغرت البوردة اوي عشان تركبها في كيسة صغيرة وتاخد جهاز صغير تحطه في أي حتة متحسش بوجوده ..

4- ( Low Profile Extinsion ( LPX :




تكنولوجيا فاشلة جدا ظهرت عام 1990 على يد شركة Western digital وكانت تعتمد على كارت يتم تركيبه في وسط المازربورد سمىRiser Card هذا الكارت يحتوي بداخله شقوق توسعة يتم توصيل بها الكروت وبهذا نقلل حجم الكيسة لان في هذه الوضعية تكون الكروت موازية للمازربورد وليست عمودية عليها ..

العيوب :

1- التهوية السيئة جدا لوجود كارت كبير في وسط البوردة .
2- يجب ان تكون جميع القطع من نفس المصنع وندرة توافرها .


ومع ظهور معالج بانتيوم 2 وتقنية AGP لم تستطيع هذه التقنية في الاستمرار وكان لابد من تطويرها ..

5- ( New Low Profile Extended ( NLX :

التطور المشهود للتقنية الفاشلة ال فاتت بالتعاون مع شركة Intelو IBM و DEC عام 1997 الشلة دي عملت ايه بقى ؟

اول حاجة رجعو مكان Riser Card في اخر المازربورد

شايفك ياللي بتسأل ودا لازمته ايه يا حمادة ؟

اكيد يعني مكنش عندهم وقت فراغ فبيجربوا حاجة جديدة وبعدين اخر مرة تقاطعني وانا بتكلم مفهوم

بص يا سيدي لما رجعنا الكارت في اخر البوردة اولا ظبطنا مشكلة التهوية لاننا بعدنا البروسيسور عن الكروت

ثانيا قدرنا نضيف شق التوسة AGP على البوردة بص في الصورة ال فوق كويس ثالثا بتعاون الشركات دي مع بعض اصبح سهل انك تلاقي المكونات ال تحتاجها عشان تعمل سيستم مش لازم كلو يبقى من نفس المصنع ..

6- ( Balanced Technology EXtended ( BTX :

الهدف الرئسي من الموضوع دا هو التبريد القياسي يعني كل ما الطب بيتقدم لازم مكونات الكمبيوتر تسخن اكتر واكتر ومتسألنيش ايه العلاقة بين الطب والكمبيوتر منعا للاحراج




المهم ايه الجديد في الموضوع دا بقى قالو احنا هنجمع كل الاجزاء اللي بتولد حرارة عالية ونحطهم جنب بعض ونعملهم تبريد لواحدهم

وربنا كنت متوقع منك السؤال البايخ دا ايه الحجات اللي بتسخن يا عم احمد ؟؟

مهو لو انت تسيبني اكمل جملة هتفهم كل حاجة اخرس بقى واسمع

الحجات ال بتسخن زي البروسيسور والرامات والجسر الشمالي خدناهم كلهم وحطيناهم في مكان منفصل وعملنا تبريد ليهم خاص بوضعهم تحت الباور سبلاي ياخد الحرارة بتاعتهم ويطردها برا الجهاز ودي صور عملية للبوردة وهي راكبة في الكيسة



جماعة انتو مش ملاحظين ان في حاجة غريبة في الكيسة دي الباب بتاعها بيتفتح من اليمين مش من الشمال

طب لو ركزنا اكتر في شكل المازربورد هنلاقي تصميمها محتلف يعني البروسيسور على شمال فتحات التوسعة مش على يمينها زي ATX كمان اماكن توصيل الكايبورد والماوس وال usb مخلتف عن مكانها في البوردة ATX وكل دا عشان ناخد تبريد افضل

ومش كدا وبس دا كمان حسن من تبريد كارت الشاشة لان منفذ AGP اصبح اخر منفذ يسارا من فتحات ال Pci بعكس البوردة ATX منفذ AGP اول منفذ على اليمين من PCI مما يعطيها تبريد اقل..



هناك بعض التصميمات الاخرى لشكل المازربورد اللي بنقول عليها اورجينال يعني مثلا شركة زي Compaq تقول انا مش عاوزة اي تصميم من التصميمات دي انا هصمم تصميم على مزاجي يركب على الكيسة بتاعتي بس ودا عيوبها ان لو باظت البوردة بتاعتك بتروح تجيب البوردة من الشركة الام نفسها انما لو البوردة بتاعتك عادية بتنزل السوق وتشوف ارخص بوردة موجودة وتجيبها وتركبها تشتغل معاك زي الفل والحياة بتبقى لول



ودا جدول بقى للي يحب يعرف الابعاد الحقيقية للمازربورد الخاصة بكل تصميم من التصميمات المذكورة ..



وبكدا يبقى انتهى الجزء الاول من الموضوع دا ونتقابل في الجزء الثاني وهو تفصيص اجزاء المازربورد وشرح شقوق التوسعة بالكامل ...

ارجو من الله ان اكون قد وفقت في طرح هذا الموضوع وما كان به من توفيق فهو من الله وما كان به من خطأ او سهو فهو من نفسي ومن الشيطان

ملحوظة : يسمح بنقل الموضوع الى اي منتدى اخر لتعم الفائدة مع ذكر المصدر تقديرا للجهد المبذول فيه ..

[%El.Magic%]

الجزء الثانى

بسم الله الرحمن الرحيم نتوكل على الله في طرح الجزء الثاني من الموضوع وهنختص فيه الحديث عن Chipsets و حركة البيانات على البوردة بسم الله نبدأ ..

قبل البدئ في التحدث عن طريقة ربط البيانات على البوردة يجب معرفة بعض الاساسيات والمبادئ نخش في الموضوع على طول بقى بناقص من المقدمات

تعريف ال BuS :

الترجمة الحرفية بتاعته الناقل بمعنى اي موصل بينقل الداتا من مكان لمكان يعتبر BuS يعني لو حد هيسألني كابل الماوس دا يعتبر BUS هقوله اه بس يعتبر من الموصلات المادية بس مش دا اللي انا اقصده الباص اللي بيكون في البوردة عبارة عن خطوط نحاسية او PrintedCircuits مطبوعة على ظهر اللوحة الام انظر معي ..
هذه الصورة تم تصغيرها . إضغط على هذا الشريط لرؤية الصورة بحجمها الطبيعي . أبعاد الصورة الأصلية 584x211 .



ال BuS دا بقى بيتميز بحاجتين :

1- BuS Width :


هو العرض القادر على استيعاب مقدار البيانات وارسالها في المرة الواحدة .. ووحدة التمييز هناBITS

بمعنى لو عندنا كابل مقدار العرض بتاعه 8Bits يقدر يرسل 8Bits في المرة الواحدة
طب لو فيه كابل 16Bits هاااا قولو يبقى دا يقدر يرسل 16Bits في المرة الواحدة وهكذا ..

2- BuS Speed :

سرعة تدفق البيانات التي يتم ارسالها او استقابلها خلال الموصل في الثانية الواحدة ... ووحدة القياس HertZ

طب في مانع لو نقول كل مرة يتم فيها ارسال البيانات او استقابلها خلال الموصل العملية دي تسمى Cycle

Chipsets :

مجموعة من الايسيهات المدموجة في شريحة واحدة لكي تقوم بتوصيل جميع المكونات الى البروسيسور وكل Chipset يكون لها اسم وموديل عن طريق الاسم والموديل دا يتم تحديد سرعة ونوع البروسيسور وسرعة ونوع وكم الرامات وعن طريق اسم وموديل ال Chipset يتم تصميم هيكل اللوحة الام بالكامل ..

وطبيعي جدا واحد هيسأل انا مش فاهم ولا كلمة من اللي انت قولتها دي يا عم احمد ؟

اقولو اهدى طيب من غير ما تمد ايدك تعالى نفهم واحدة واحدة
بص يا سيدي بوردة مثلا زي Giga Byte GA-H61M-S2P بوردة مشهورة جدا اسم ال Chipset اللي فيها H61 البوردة من انتاج شركة جيجا بايت انما الشيب من انتاج شركة انتل طب ازاي ؟؟؟

بسيطة شركة جيجابايت تروح لشركة انتل تقولها عاوزة اشتري من عندك شيب H61 عشان اصمم عليها البوردة بتاعتي طيب مواصفات الشيب دي ايه نجيبها بقى من موقع انتل
ARK | Intel® H61 Express Chipset (Intel® BD82H61 PCH)
دي مواصفات الشيب دا

طيب تعالى ناخد شيب تاني زي مثلا G41

ARK | Intel® G41 Express Chipset (82G41 Graphics and Memory Controller Hub)

دي المواصفات الخاصة بالشيب دا

طيب سلسلة بوردات LGA 775 كانت البوردة ممكن يبقى فيها شيب مثلا g41 وبوردة تانية فيها شيب q45 وتلاقي في نوع بروسيسور يركب هنا ويركب هنا مفيش مشكلة مادام السوكت واحد وعشان تطمن بترجع لموقع انتاج اللوحة الام وانت تعرف ايه انواع المعالجات المدعومة من بوردتك

طيب واحد هيسأل ليه يا ابو حميد البوردات الحديثة السوكت بتاعها 1155 اروح اشتري بوردة الشيب بتاعها Z77 مادام ممكن اشتري بوردة الشيب بتاعها h61 ودي هتدعم نفس نوع المعالج ؟

لا فيه فرق كبير ارجع لخواص Z77 افضل كثيرا كدعمها لكسر السرعة وترددات رامات اعلى وخواص تانية كتير مش موضوعنا انهردة ..

NorthbridgeVs Southbridge

في الطبيعي كل مازربورد تحتوي على 2 Chipset الجسر الشمالي والجسر الجنوبي ولكن اغلب البوردات الحديثة تم دمجهم معا في شيب واحدة وشكلهم على اللوحة الام يكون هكذا ...

هذه الصورة تم تصغيرها . إضغط على هذا الشريط لرؤية الصورة بحجمها الطبيعي . أبعاد الصورة الأصلية 619x365 .

هذه الصورة تم تصغيرها . إضغط على هذا الشريط لرؤية الصورة بحجمها الطبيعي . أبعاد الصورة الأصلية 566x362 .

واضح جدا ان الجسر الشمالي يقع اسفل البروسيسور وبجانب الرامات اما الجسر الجنوبي يقع خلف منافذ PCi

يعني ايه جسر يا عم احمد ؟ وليه سميناه جسر ؟

الجسر هو الموصل بين اتنن BuS فاكر الباص ال اتكلمنا عتها فوق الجسر هو المسئول عن ربط 2 منهم ببعض ..

طب ايه فايدة الشمالي والجنوبي بقى ؟؟

تعالى نبص بقى على الرسمة البسيطة دي ونفهم كل جسر مربوط بيه ايه ...

هذه الصورة تم تصغيرها . إضغط على هذا الشريط لرؤية الصورة بحجمها الطبيعي . أبعاد الصورة الأصلية 590x370 .

واضح طبعا من الصورة ان الجسر الشمالي متصل مباشرة مع المعالج ومع اي حاجة سريعة زي منافذ PCiE و AGP المسئولين عن كروت الشاشة ومتصل ايضا بالرامات ومش كدا وبس دا كمان مسئول عن الجسر الجنوبي .
والجسر الجنوبي بقى مسئول عن الحجات البطيئة على البوردة اي حاجة مدمجة يعني زي الصوت المدمج كارت الشبكة المدمج هكذا ...
طب اللي بيربط بين المعالج والجسر الشمالي حاجة اسمهاFront Side Bus ..

في واحد هيسأل بقى يقولي احمد معلش ازاي نحدد سرعته ؟

والله منا رادد اقرى الشرح اللي فوق وانت تفهم ..

وبتطبيق المبدأ دا ممكن نقدر نعرف اسماء الموصلات المسئولة عن ربط البيانات ودي صورة اكثر تفصيلا

هذه الصورة تم تصغيرها . إضغط على هذا الشريط لرؤية الصورة بحجمها الطبيعي . أبعاد الصورة الأصلية 657x488 .


طب اسأل نفسي انا سؤال بقى ايه حركة معالجة الصوت على البوردة ؟
تنتقل بيانات الصوت من الجزء الخاص به على البوردة الى الجسر الجنوبي ثم من الجسر الجنوبي الى الجسر الشمالي ثم من الجسر الشمالي الى البروسيسور يتم المعالجة ثم يتم ارسال المعلومات الى الجسر الشمالي ثم الى الجنوبي ثم الى IC الصوت ليتم تحويله الى تناظري او رقمي حسب النظام المستخدم وبعد كدا يتوصل الصوت الى السوكت ومن السوكت للسماعات ومن السماعات نسمع ااااااااااه يا دونيااااااااااا ,اااااااااااه يا دونيااااااااااا

وبكدا يبقى الجزء الثاني انتهى بفضل الله ونلتقى في الجزء الثالث لشرح شقوق التوسعة المختلفة او Expansionslots

ارجو ان اكون قد وفقت في شرح هذه الجزئية وما كان بها من توفيق فمن الله وما كان بها من خطأ او سهو فمن نفسي ومن الشيطان ..

[المتمرد11]

السلام عليكم
موضوع مميز يحتوى كثيرمن المعلومات فى قالب علمى كوميدى مبسط

[%El.Magic%]

السلام عليكم
موضوع مميز يحتوى كثيرمن المعلومات فى قالب علمى كوميدى مبسط

[HOPA2012]

أستاذ

[%El.Magic%]

استكمالا لما بدأناه نواصل اليوم الجزء الثالث من موضوعنا ونخصص هذا الجزء في الحديث عن شقوق التوسعة او Expansion slots بسم الله نبدأ ...
اول سؤال بقى يعني ايه شقوق توسعة يا عم احمد ؟
شقوق التوسعة هي الاماكن الخاصة بتركيب الكروت الخارجية يعني لو مثلا الصوت عندك في البوردة باظ تروح تجيب كارت صوت وتركبه او عاوز تاخد اداء اعلى مثلا البوردة فيها منفذ صورة او معالج رسومي ضعيف ومش هينفع للالعاب بتروح تجيب كارت شاشة قوي عشان تاخد اداء افضل في معالجة الرسوميات والالعاب وهكذا شقوق التوسعة دي هي ال بنركب فيها الكروت الخارجية .

(Peripheral Component Interconnect Bus (PCI
اول نوع من انواع شقوق التوسعة ودا شكله .. ال متحدد باللون الاحمر



اول ملاحظة ان في الغالب شكل ال Pci ان لونه ابيض طيب شق التوسعة دي مربوط على البوردة ب BUS

ملحوظة : يجب مراجعة شرح الباص في الجزء الثاني حتى يكون الامر سهلا باذن الله ..

نرجع للصداع قولنا Pci بيكون مربوط مع البوردة عن طريق الباص والباص ال تم اختراعه للشق دا حاجة من اتنين اما ان يكون 32BIT او 64BIT هنركز بقى على باص 32 لان 64 دي مش موجودة خالص نادرا لو لقيناها موجودة في السرفرات القديمة وصعب تقع في ايد حد انا بصراحة عمري ما شفتها لو حد شافها يقولي ...

بعد مراجعة الباص في الجزء التاني بص بقى على الجدول الجاي دا ...

واضح الفروقات بين انواع pci ممكن الباص لما يكون 32 بت تسير البيانات بسرعة اما 33 او 66 ميجا هرتز سيبك من العمود الثالث هنتكلم عنه بالتفصيل قدام المهم بضرب الثلاثة مع بعض ال هم Bus Width و Bus Speed و Bits per line per cycle ينتج لنا شيئ جديد اسمه Band Width ووحدة قياسه ميجا بايت لكل ثانية MBPS

طب جرب كدا مثلا نمسك النوع الاول اضرب 33 * 32 * 1 = 1056

طب ازااااااااااااي يا احمد مطلعتش ليه 133 ؟؟

عشان حضرتك بكل بساطة مقسمتش على 8 للتحويل من Bit الى Byte جرب كدا اقسم 1056 / 8 = 132 تقريبا يعني 133 لان النسب دي مش بتطلع صحيحة مية في المية

طيب يا احمد عشان بس مفيش حاجة تهرب مني هو يعني ايه اصلا Band width ؟؟

بص يا سيدي دا لفظ بنعبر عن الحجم الاقصى للبيانات القادرة على المرور في هذا الباص خلال الثانية الواحدة ..

طيب نكمل بقى موضوع ال PCi احنا قولنا ان دا شق توسعة لتركيب الكروت وقولنا ان الشق دا بيتكون اما من 32BIT او 64BIT كلام جميل طيب شقوق ال 32Bit دي ذات نفسها بتتكون من نوعين اما شق يعمل على 3.3 فولت ودا نادر جدا وجوده ايضا اما شق يعمل على 5 فولت ودا المنتشر في كل البوردات وهكذا شقوق ال 64BIt يوجد منها 3.3 فولت و 5 فولت دا طب افرقهم ازاي يا عم احمد ؟؟ من الشكل يا حبيبي ومكان الناتش بص في الصورة الجاية ...

دا بالنسبة للشقوق طب الكروت ايه نظامها عادي جدا لو منفذ 3.3 فولت تجيبله كارت 3.3 فولت وهكذا اما تجيب كارت Universal يقدر يشتغل على 3.3 فولت او 5 فولت الصورة القادمة هتوضح كل ال قولته دا

اخر ملاحظة في شق التوسعة دا ان جميع جميع شقوق ال PcI مربوطين على باص واحد والباص دا مربوط بالجسر الجنوبي كما بالصورة ..


(Accelerated Graphics Port (AGP

يداية التطور في موضوع كروت الشاشة وال Port دا نادر جدا تلاقيه في البوردات الجديدة لعدم انتاج كروت شاشة له طب ايه المميز في منفذ AGP ..
اولا لا يتم توصيل فيه سوى كروت شاشة فقط .
ثانيا اسرع 8 مرات من منفذ PCI نتيجة اتصاله المباشر بالجسر الشمالي مما يوثق ارتباطه بالمعالج والرامات راجع حركة البيانات على البوردة في الجزء الثاني .
ثالثا لا يعمل سوى بباص عرضه 32BIT فقط .. وسرعة 66MHZفقط ...
طب ازااااااااي يا احمد اسرع 8 مرات من Pci دا فيه اصدارات من Pci بتستخدم باص عرضه 64Bit مع سرعة 66 ميجاهرتز يبقى ازاي AGP اسرع منها انت بتشتغلني ؟؟؟

ياعم لا اشتغلك ولا تشتغلني هنا بقى نشرح العمود التالت من الجدول ال هو Bits Per Line Per Cycle :-
دا معناه ان كل خط او ممر يستطيع ان يحمل اكثر من بت في كل سايكل بمعنى لما بنقول عرض الباص دا 32BIT دا معناه ان عندنا 32 ممر في الباص دا والمفترض ان كل باص قادر على حمل 1 بت في المرة الواحدة لا احنا هنضاعف ما يمكن الممر استحماله من البت يعني الممر الواحد قادر على حمل 2 بت او 4 بت او 8 بت فهمت حاجة ؟؟

بص على الجدول بقى وشوف الفروقات بين منافذ AGP



واضح طبعا تضخم معدل ال BandWidth بشكل ملحوظ مما يتيح معالجة بيانات اكبر وجودة اعلى في الالعاب ومعالجة الروسميات ..

هذا الجزء له بقية سيتم فيها شرح منافذ PCi Express وباقي شقوق التوسعة قريبا ان شاء الله ارجو ان اكون وفقت في هذا الامر وما كان به من توفيق فمن الله وحده وما كان به من خطأ او سهو فمن نفسي ومن الشيطان ..

[%El.Magic%]

استكمالا للجزء الثالث والحديث عن شقوق التوسعة على اللوحة الام نخصص اليوم الحديث عن احد اهم شقوق التوسعة على الاطلاق وهو اكثر ما يهم الكثير من المستخدمين وهواه الالعاب الحديثة ايها الاخوة الافاضل اربطوا الاحزمة استعدادا لاستقبال منفذ PCI - EXPRESS بسم الله نبدأ :-
طبعا الصورة السابقة موضحة ان شقوق الاكسبرس مختلفة من حيث الحجم ومن حيث السرعات في شقوق صغيرة وشقوق اكبر قليلا وشقوق كبيرة وجدير بالذكر ان هذه التقنية قدمتها شركة INTEL عام 2004 ليكون البديل عن جميع شقوق التوسعة الموجودة على اللوحات الام بسبب استهلاك المنفذ لطاقة اقل وارخص في عملية التصنيع مما ينتج عنه ارباح اعلى للشركات المصنعة للمازربورد ولكن السؤال المطروح الان على الساحة اعزائي المشاهدين ايه الفروقات الجوهرية بين المنفذ دا ومنافذ AGP و PCI ؟؟
تعالو ناخد الموضوع بهدوء كدا وبلاش توتر منافذ ال PCI كانت بتستخدم حاجة اسمهاShared Bus بمعنى ان البيانات ال بيتم تداولها بين الكروت والمعالج تكون مشتركة فيBus واحد كل الكروت بتستخدمه بمعنى لما يكون في كارت حالا بيكلم البروسيسور لازم الكل ينتظره لحد ما يخلص كلام ودا بينتج عنه عدم الدقة في نقل البيانات وبطئ وتداخل الكتروني وبلاوي زرقا كتير ودا منظر المشاركة بباص احادي

انما بقى في منافذ PCI - E تم التغلب على المشكلة دي باستخدام مفتاح او Switch وعمل باص خاص بكل شق توسعة طب دا ايه فايدته يا ابو حميد ؟؟
طبعا سرعة اعلى ودقة في نقل البيانات وكل العناصر قادرة على التحدث مع المعالج بصورة منفصلة دون انتظار بالاضافة الى ان الضجيج الالكتروني المنبعث جراء الارسال والاستقبال اصبح اقل كثيرا .. انظر الصورة ..

[%El.Magic%]

ايضا جدير بالذكر ان من اسباب زيادة سرعة شق التوسعة PCI- E هو استخدام تقنيات مختلفة في اسلوب نقل وتداول البيانات ما نسميه LINK - LANE


واضح من الصورة ان شقوق الاكسبرس تستخدم الطرق او LANES كل LANE بها خطين احدهما للارسال والاخر للاستقبال طب لو قولنا احنا بنستخدم شق PCI -E *1 دا معناه ان عندنا Lane واحدة وبداخلها ممرين احدهم للارسال والاخر للاستقبال وهكذا مع باقي السرعات ...
طيب دا بالنسبة لمصطلح ال Lane طب ايه هو ال Link يا عم احمد ؟؟


لينك يعني رابط ال بيربط بين 2LANE ودا بيتم ربطهم من خلال Switch الصورة في الاعلى موضحة المفهوم بالكامل بس اكيد البعض عنده فضول رهيييييب هل اللينك دا معناه الرابط بين كروت الشاشة ال هو Cross Fire و SLI يا احمد ؟؟؟؟

انا اسف مش هرد على السوال دا دلوقت باذن الله هيكون موضوع منفصل وهتكلم عنهم بالتفصيل مع كروت الشاشة لو لينا عمر ان شاء الله ..

نيجي بقى عند ملاحظة مهمة جدا وايضا جديرة بالذكر ان شقوق PCI - E تكنولجيا سريال او زي ما قرأتها بالنصPCIe is a Serial Technology معناه ايه الكلام دا يا عم احمد ؟؟؟؟

تعالى بهدوء كدا نفهم ايه الفرق بين Serial و Parallel



السريال حرفيا معناه متسلسل بمعنى ان البيانات جميعا يتم ارسالها على خط واحد بالتسلسل يعني لو اردنا ارسال 8BIT من البيانات يتم ارسالهم على التوالي وعلى نفس الخط ..

البراليل حرفيا معناها التوازي وكما هو موضح بالصورة اذا اردنا ارسال 8BIT من البيانات سيتم ارسالهم دفعة واحدة على التوازي على 8 خطوط ومن الواضح جدا ان البراليل اسرع لانها يتم ارسال فيها البيانات دفعة واحدة صحيح الكلام دا يا باشمهندسين ؟؟اكيد مش صحيح لان الفكرة دي زمان بس كانت صحيحة عند التطور بقى لو حبينا نطور طريقة الارسال بال Parallel يجب توافر دائرة كهربية تضمن تزامن انطلاق البيانات ودائرة كهربية اخرى تضمن وصول البيانات في نفس الوقت حتى لا يحدث خلل في المقابل لو حبينا نزود السرعة هنفضل نزود في خطوط يعني 32 خط و 64 خط
تخيلوا بقى التداخل والضجيج الالكتروني هيكون عامل ازاي ساعتها
فطبعا السريال افضل طبعا لو تم تطويره وزيادة سرعة حركة البيانات به والان نتعرف سرعات منافذ الاكسبرس والفرق الشاسع بينها وبين منافذ ال AGP




مما سبق ولمعرفة سرعة النقل التي يحققها المنفذ, علينا بخطوات المعادلة التالية:
المنفذ PCI-E 1.0:


المنفذ PCI-E 2.0:

المنفذ PCI-E 3.0: ( الاصدار الاحدث )

الإصدار الأحدث يحقق سرعة نقل مضاعفة عن سابقه PCI-E 2.0 وهي:
1000MB/s (في حين كانت 500MB/s)

وبذلك تكون أرقام معادلة حساب سرعة نقل البيانات وفق الإصدار الجديد:

وجدير بالذكر ايضا ان منافذ الاكسبرس غير مخصصة لكروت الشاشة ومعالجة الرسوميات فقط لوجود العديد من كروت الصوت والدش والتلفزيون تعمل على منافذ الاكسبرس ...


بكدا نبقى انتهينا من اكثر الامور اهمية وهو منفذ PCI- Expressوبقي الحديث عن بعض شقوق التوسعة المنقرضة حتى يكون الموضوع كامل والكمال لله ناخد الموضوع دا بقى زي الحكاية كدا لان مش مطلوب ولا حتى من المحترفين الدخول في اي امور تقنية لانها اصبحت منقرضة ولن تجدها في الوقت الحالي مهما بحثت ..


كان هناك في القديم منفذ اسمه I S A ودا مش هتكلم عنه خالص لانه اصبح من عبق التراث ولكن شكله هكذا

(AMR Expansion Slots (Audio Modem Riser



دا نظام انشأته شركة INTEL كانوا عاوزين يصنعو كارت صوت او كارت مودم رخيص ولكن عشان يعملو حاجة زي دي كانوا لازم ياخدو تفويض من حاجة اسمها FCC ال هي فدرالية الاتصلات موضوع زي دا كان هياخد منهم وقت طويل فقالو احنا هنعمل السلوت دا وبعد كدا نصنع الكارت ال يركب عليه وبكدا نبقى هربنا من التفويض وفي نفس الوقت عملنا ال احنا عاوزينه ..
ما يميز السلوت دا انه كان به خطين كل خط 23 بن بمجموع 46 بنومع كامل اسفي التقنية دي فشلت .


والسبب سلوت AMR دا بيحل مكان سلوت PCI واغلب المستخدمين آن ذاك لم يستخدمو هذه التقنية وبكدا انت خسرتهم منفذ PCI على الفاضي بالاضافة على كدا انه لا يستطيع التعامل غير مع كارت اما صوت اما مودم فقط بخلاف PCi دا علاوة على انه غير داعم لتقنيةPlug And play يعني عشان نركب عليه كارت لازم نمر بخطوات طويلة مطولة لتعريف هذا الكارت ولهذا لم يشهد استحسان كافي من المستخدمين ..

CNR Expansion Slots (Communications and Networking Riser


التطور المشهود للتكنولوجيا السابقة يتكون من خطين كل خط به 30 بن بمجموع 60 بن طب ايه الجديد فيه ويفرقه عن AMR يا حمادة ؟
قادر على التعامل مع كروت الصوت والمودم والنيتورك ثانيا دعمه لتقنية Plug And Play
والميزة الاهم انهم استخدمه تكنولجي اسمها Shared Slot بمعنى لو الكارت عندك كارتPCI وصله هيلغى CNR ولو عندك كارت CNR ركبه هيلغى PCI وبكدا هو مش واخد مساحة على البوردة ووجوده مبقاش عبئ على حاجة تانية بالاضافة الى قدرته على التطوير كهاردوير وتقليل الحمل من على المعالج ..