تجربه غير موفقه للشراء عبر شركه جوميه (و السبب ارامكس) و تجربه موفقه من كمبيوتر شوب

[amnpop]

السلام عليكم
اود نقل تجربه الشراء من شركه جوميه عبر الانترنت
اولا طلبت شراء الجهاز من خلال موقع الشركه و هو جهاز(لينوفو Z580 ) ميتال(بروسيسور 2.5 موديل 3210 و رامات 4 جيجا باص 1600 و هارد 1 تيرا و شاشه 15.6 بوصه و كارت nvidia 2 giga gt 630 بدون نسخه و يندوز)
و كان السعر 3999 شامل مصاريف الشحن و قمت بكتابه البيانات المطلوبه بنموذج الشراء
وبعد ارسال طلب الشراء من خلال الموقع بعتولي E-mail للتأكيد علي طلب الشراء
و بعد حوالي نص ساعه اتصلو بيا للتأكيد علي البيانات الشخصيه و العنوان للشحن و ميعاد التسليم المناسب (محدد من 9 صباحا الي 1 ظهرا او من 3 عصرا الي 5 مساءا) و بلغوني بان الجهاز هايوصل خلال 5 ايام عمل في الفتره من 9 صباحا الي 1 ظهرا بناءا علي اختياري
الـ 5 ايام داخلهم يومين الخميس و الجمعه و يبقي ميعاد تسليم الجهاز بعد اسبوع بالتمام و الكمال (من الاربعاء الي الاربعاء)
في اليوم السابع اللي هو الاربعاء من اتفاق الشرا ء جوميه بعتولي رساله علي الموبايل فيها رقم البوليصه و التأكيد علي ان الجهاز تم خروجه من عندهم و استلمته شركه ارامكس للتسليم في نفس اليوم و فضلت مستني لغايه الساعه 6 مساءا و بعد كده اتصلت بارامكس و قالولي ان الجهاز رجع ارامكس و هايجي يوم السبت علشان ما فيش حد ممكن يجيبه النهارده و كان الخميس اجازه بمناسبه المولد النبوي
بصراحه اتغاظت جدا و كلمت جوميه و كان للاسف الرد اللي خلاني افقد اعصابي (معلش يا فندم انت عارف احنا في مصر) :ah34: بصراحه فقدت اعصابي و قولتلهم بما انكم في مصر فأحسن تقفلو شركتكم و ما تفتحوش اللا لما مصر تستاهل انكو تشتغلو فيها و احوالها تتظبط و تتعاملو مع شركه تحترم مواعيد الناس و لاغيت الاوردر (مع العلم اني عارف ان العيب مش من عندهم بس مش لازم الجهاز يخرج من عندهم بعد اسبوع يعني اخر يوم)
لاقيت الموظفه بتقولي خلاص لما يجيلك مل تستلمش الجهاز :confused: قولتلها شكرا و قفلت السكه
و نزلت كنت رايح مشوار و بالصدفه دخلتكمبيوترشوباللي جنبي في الهرم اسأل علي كابل اوديو و لاقيتهم عارضين اجهزه كتير سألت علي نفس الموديل قالولي مش موجود حاليا بس ممكن نجيبهولك النهارده او بكره الصبح بالكتير و فعلا دفعت 100 جنيه ك حجز من سعر الجهاز اللي هو 3888 جنيه :ah7: (اقل من سعر جوميه اللي هو 3999 و اقل من سعر التجار في جميع المولات اللي كان اقل سعر 4100 جنيه) و اخدت ايصال و كلموني بعدها ب ساعتين و قالو ان الجهاز هايجي بكره الصبح لانه في في فرع الكوربه بمصر الجديده
و فعلا اتصلو بيا قبل الساعه 10 الصبح و بلغوني ان الجهاز وصل و اني اروح استلمه و قولت للموظف يا ريت تمليني سريال الجهاز و فعلا لاقيت الضمان تمام و ان الجهاز داخل الي السوق المصري
روحت استلمت الجهاز و كان طبعا مقفول و انا اللي فتحته و قالولي ان الجهاز وصل امبارح الساعه 11.45 لانه اتبعت من فرع المهندسين بس مكانش ينفع نكلمك علشان اخر ميعاد لهم الساعه 12
و الحمد لله تمت عمليه الشراء
اسف للاطاله بس الغرض منها اني احكي بالتفصيل علشان كل واحد ياخد حقه

[amor-elamor]

أكتر حاجه تغيظ الناس اللي مش بتحترم مواعيد ودي في مجال الشغل بتخسر كتير


عالعموم الف مبروك عالجهاز الجديد وربنا يباركلك فيه

[youlost]

انا لسه طالب زي ما انتا عارف لاب من موقع جوميه بردو من يومين بس بصراحه ناس ذوق جدااا جدااا لحد دلوقتي ,, فعلا بعتو رساله الاول وبعد كده اتصلو عليا للتأكيد و انهارده بعد يوم من الطلب اتصل بيا واحد من الشركه قالي يا فندم الجهاز اللي حضرتك طلبه لونه اسود في سيلفر ومفيش عندنا للاسف غير سيلفر كله قالي يمشي مع حضرتك رحت قايله يا فندم الفيرجن اللي انا طالبه الديل 7520 مفيش منه سيلفر كله ؟ راح قالي يا فندم طب لحظه اتصل بتوكيل كويست وفعلا انتظرت معاه وفعلا اتصل وراح قالي يا فندم زي ما بقول لحضرتك سيلفر كله اللي موجود رحت قايله انا متأكد ان هو مفيش منه سيلفر كله دي هو بلاك في سيلفر الألمونيا اللي علي الايطار راح قالي طب حضرتك هبعتلك اللينك علي الميل للون قولت له اوك رحت قافل وطالع فاتح نت وفعلا بعت لينك دخلت لاقيت اللاب لونه اسمر في سيلفر الحته الألمونيا فعلا زي ما انا قولت بعد شوية راح متصل بيا وقالي انا اسف يا فندم العيب من عندي انا انا اتلخبط في الالون كنت فاكر ان الحته السلفر دي كلها هتبقي اللاب ههههههههههههههههه :D:D:D:D حت قايله ولا يهمك يا فندم وساعتها قولت بس هقفشه بقي استفسر علي كل حاجه وبصراحه طلع شاب ذوق فضل يتكلم معايا حوالي 13 دقيقه عن اللاب وخليته ينزل يبص علي الكارتونه ونزل فعلا وقالي انا ماسك الكارتونة في ايدي اهي يا فندم رحت قايله ممكن السيرفس تاج بتاع الجهاز اللي هيجلي راح فعلا ادهولي واتأكدت ان الجهاز جديد و التوكيل كويست فعلا وقالي اللزقه علي الكارتونة فعلا وخليته يقراء ليا الامكانيات من علي العلبه وقالي حضرتك العلبه هتيجي ليك متبرشمه وانتا هتكون اول واحد تفتحها واحنا بنشتغل مع التوكيلات ومفيش اجهزه عندنا بتكون رجعت المصنع والكلام ده وفعلا كلامه صح من السيرفس تاج بتاع الجهاز لاقيته جديد ... وقالي اي استفسار حضرتك انا معاك لان ده حقك وانتا بتدفع فلوس ولازما تاخد قدام الفلوس دي خدمه لان ده حقك قولت له حضرتك راجل ذوق ومحترم وراح قالي في خلال يومين ان شاء الله بالكتير الجهاز هيكون عند حضرتك وانا مستني اهو وان شاء الله يوصل في خلال يومين فعلا

انا قولت بردو احكي اللي حصل معاهم لحد دلوقتي بس بصراحه ناس ذوق لحد دلوقتي ومحترمين

[youlost]

اهاااااا صحيح نسيت اقول حاجه مهمه كمااااااااااااااااان شركه جوميه اللاب عليها عامل 7555 وعليه خصم دلوقتي 4 % يبقي بـ 7255

انما باقي المواقع والشركات السعر 7800 فما فوق ^^

[amnpop]

ان شاء الله الاب يجيلك في ميعاده بس انا مشكلتي كانت مع شركه الشحن(ارامكس) و الرد المستفز من موظفه خدمه العملاء في جوميه مش اكتر
و الغريب ان اللاب لازم جوميه تسلمه لأرامكس اخر يوم دي بردو حاجه مش تمام علي العموم بالتوفيق ان شاء الله

[rayfire]

أفضل حاجة إنك لغيت الأوردر لما ما احترموش المواعيد.... حتي لوالعيب مش عليهم يبقوا هما يتعاملوا مع شركات محترمة!!

[amnpop]

أفضل حاجة إنك لغيت الأوردر لما ما احترموش المواعيد.... حتي لوالعيب مش عليهم يبقوا هما يتعاملوا مع شركات محترمة!!

و فعلا كان قرار الغاء الاوردر افضل رد علي الشركتين

[McLaren]

(معلش يا فندم انت عارف احنا في مصر)

هههه
أنا أول مرة أشوف موظف يرد كده


بس ردك عليه أعجبنى
ومبروك على اللاب الجديد وربنا يبارك لك فيه.

[amnpop]

هههه
أنا أول مرة أشوف موظف يرد كده


بس ردك عليه أعجبنى
ومبروك على اللاب الجديد وربنا يبارك لك فيه.

اعتقد اي حد مكاني هايكون ده رد فعله بصراحه موضوع المواعيد ده حاجه تجنن