هل حد جرب ماوس او كيبورد وايرلس؟

[AhmedSeif]

عاوز اجيب ماوس وكيبورد وايرليس لأنى زهقت من الاسلاك ونفسى اجدد شكل المكتب
فاكنت عاوز اعرف لو فى حد جرب الوايرليس واية هى عيوبه والبطارية بتشتغل لمده كام يوم تقريبا؟
وبالنسبة للميزانيه هتبقى تقريبا 600 جنية للماوس والكيبورد
وشكرا

[anistoona]

أنا جربت أربع ماوسات وايرلس :

الاول : كان ماركة تجارية غير معروفة وكان تقريبا بثلاثين أو أربعين جنيه .. كان شغال كويس بس مداه كان محدود ، وكان بلاعة بطارية ، وبسببه اضطريت أشتري أربع بطاريات شحن بالشاحن بتاعهم بحوالي 100 جنيه :D عشان أبدل ما بينهم .. قمة العبقرية :p وبعد كل ده بعد كام شهر لقيته فيص وسلملي النمر وانتقل إلى رحمة الله ..

الثاني كان ماوس مايكروسوفت :

Microsoft Wireless Notebook Optical Mouse 3000

كان بحوالي 150 جنيه .. ماوس كويس ومداه معقول ، والبطارية الشحن كانت بتقعد بالشهر معاه .. بس بعد حوالي سنتين إلا .. الزرار اليمين ابتدى يعلق .. السبب تقريبا كان تراكم الأتربة داخل الماوس .. أصلي كنت بحارب بيه Call of Duty :D

الثالث : كان مايكروسوفت برضه :

Microsoft Wireless Mobile Mouse 6000

إللي خلاني أتجنن واشتري الماوس ده كان الأداء بتاع الماوس المايكروسوفت 3000 ، وكمان كان شكله شيك وابن ناس .. بس بعد ما جبته ندمت ، لأنه كان بيعلق معايا ولما أخدته للمكان اللي اشتريت منه اشتغل كويس من غير تعليق خالص .. باين إن كتر الأسلاك ورا الكيسة بتاعتي كان بيشوش على أشارة الماوس ..
فبعته لواحد صحبي واشتغل معاه كويس على اللاب بتاعه ..

الرابع : كان الوحش المدمر :
Logitech G700 Wireless Gaming Mouse

إشتريت مستعمل من هنا في المنتدى ، كان ماوس بإمكانيات جبارة ومعاه عرفت إحساس الراحة في استخدام الماوس بالساعات من غير تعب ، بخلاف الثلاثة اللي قبل كدة ، كان حجمهم صغير والتضاريس بتاعتهم غير مريحة لليد ، وتخليك تسند على كفك وانت بتلعب بالماوس، وده مع اللعب لمدة طويلة غير مريح ومتعب للإيد، أما الماوس ده ، كان حجمه على قد مسكة الإيد وتضاريسه ماشية مع إنحناءات كفك، وتخليك تستند عليه وانت بتعلب، أو بالأصح يشيلك وانت بتلعب وكإنك راكب فرس تقتحم بيه أرض المعركة وتسقط الأعداء صرعى واحدا تلو الأخر :D وتقعد تلعب بيه يوم كامل من غير ما تحس بحاجة.. بس البطارية كانت بتقعد يوم أو يومين بالكتير .. بس إمكانية التحويل ما بين الوايرلس والسلك ع الطاير سهلت الأمور ..
بس بعد سنة تقريبا ، لقيت أهم زرار في الماوس وهو الزرار الشمال بيدي نقرتين في نقرة .. أي لما تدوس مرة واحدة بيديلك مرتين .. وديه حركة رخمة في الإستخدام اليومي بس مش بتأثر قوي في اللعب .. وبعديها بكام شهر .. جت بنت أخوي وأخذت الماوس ورزعته في الأرض وبعديها ما جابش منطق :ah8: الله يرحمه ويحسن إليه .. كان ليا معاه صولات وجولات في مختلف ساحات المعارك الأرضية والفضائية، كان هاين عليا أعمله قبر أدفنه فيه وأحد عليه شاهد وأعلق عليه ميدلالية البطولة..:o

ده مختصر قصتي مع الماوسات الوايرلس ، أنا شايف إنه اختراع كويس ، ويخليك مثلا تتحكم بالجهاز بتاعك وانت نايم على السرير وخصوصا لما يكون من ماركة محترمة فيمكن يشتغل على مدى 5 - 9 متر تقريبا على حسب مستوى شحن البطارية.

أنصحك لو ليك في الألعاب تجيب ماوس حجم كبير على قد كفك عشان ما تتعبش زي ما وضحت في قصتي ، وابتعد عن الماركات التجارية " الصيني أبو جنيه " لأنه مالوش لازمة ،، وألف مبروك مقدما على الماوس الجديد