فى كل جيل جديد من المعالجات لازم هتلاقى تحسين وتطوير فى الأداء عن الجيل اللى قبله..
بس ده على حسب، ممكن جيل جديد يطلع وعامل تطوير رهيب فى الأداء عن الجيل اللى قبله ويستاهل التحديث، وفيه أجيال جديدة بتطلع بيكون الفرق مش كبير أو مش جوهرى بالدرجة
مثلا: الجيل القائم على معمارية Core اللى جه على طول بعد الجيل القائم على معمارية NetBurst عمل فرق مرعب فى الأداء ورجع إنتل بقوة للسوق بعد ما تراجعت جامد قصاد AMD
الكلام ده كان تقريبا فى 2005 أو 2006
والجيل القائم على معمارية Nehalem اللى جه بعد معمارية Core عمل برضه فرق عظيم فى الأداء عن الجيل اللى قبله وكان فيه خصائص جديدة أهمها ان الـMemory Controller بقى مدمج فى المعالج وبكده تقدر تركب أى رامات بأى سرعة والمعالج يضبط نفسه عليها وما بقيناش محتاجين نجيب رامات بنفس سرعة الـFSB بتاع المعالج عشان يشتغلوا بنفس التردد.. جدير بالذكر ان الخاصية دى AMD سبقت إنتل فيها بفترة
وفى ناحية تانية الفرق فى الأداء بين معمارية هازويل وأيفى بريدج مش كبير جدا
وكمان الفرق فى الأداء بين ساندى بريدج وأيفى بريدج مش كبير جدا
على حسب يعنى
وازاى تفرق بين المعالجات دى قصة تانية عشان إنتل بتصنع معالجات من أواخر الستينات :D
خد شوف المقال ده فى ويكيبيديا
https://en.wikipedia.org/wiki/List_o...icroprocessors
وابدأ بص من أول الحتة دى
64-bit processors: Intel 64 – NetBurst microarchitecture
من هنا هتلاقى المعالجات الحديثة اللى أغلبنا استعملها أو عدى عليها أو سمع عنها
إنما آخر المعالجات اللى ظهرت من إنتل فى السنوات الأخيرة فهى كالآتى ببساطة: هتلاقى اسم المعالج وبعده رقم من اربع أعداد.. لو ابتدا بالرقم 2 يبقى ساندى بريدج، ولو ابتدى بالرقم 3 يبقى أيفى بريدج، ولو بدأ بـ 4 يبقى هازويل
ولو كان معالج كور أى ثرى أو أى فايف أو أى سفن بس ما ابتداش بالأرقام دى وكان بعده رقم من 3 أعداد بس يبقى الجيل اللى قبل كل دول وهو قائم على معمارية نيهالم
أمثلة:
i5 2400 - الجيل "الثانى" ساندى بريدج
I3 3220 - الجيل الثالث أيفى بريدج
I7 950 - الجيل الأول نيهالم
i5 4570K - الجيل الرابع هازويل
لاحظ ان فى معالجات الجيل التانى والتالت والرابع بعضهم بيليه الحرف K بعد الرقم.. الحرف ده معناه انه Unlocked بمعنى انه قابل لكسر السرعة فى كل خصائصه، كل معالج ممكن تكسر سرعته أيا كان وده على حسب البوردة بس برضه فيه شوية حاجات بتكون مقفولة ما ينفعش يتلعب فيها، باستثناء المعالجات اللى فيها حرف K ودى بتكون مفتوحة لكسر سرعة وتعديل كل حاجة، بس طبعا خبراء كسر السرعة يقدروا يفيدونا أكتر
أتمنى اكون أفدتك بحاجة يا صديقى
المفضلات