قصة مشكلة جميلة جداً و في النهاية لازلت محتار بين AMD و inTel

**للإحتراف صانع..** · 28-06-2006, 01:13

صراحة ياجماعة الخير ..
أنا محتار فعلاً ..

::::::::: قصة شبه طويلة وجميلة فعليك بقطع الإتصال والقراءة برواقه :::::::::::::::::::::::
جهازي من نوع سليرون 1700 والمذربورد جيجابايت كان جهاز مع التشغيل والشغل .. فجأة تأتيني شاشة زرقاء من ضمنها Save made ويعد عد تنازلي ... إلى أن يعيد التشغيل .. وهكذا ..
وسويت سيف مود طلع تمام بس أنا ماأبي أشتغل بالسيف مود تعبت ..!!

حقيقة .. عانيت من المشكلة .. تخيل تشغل برنامج ولا تتصفح أو تكت مقال فجأة تجيك هذه الشاشة .. ويعد التشغيل ..!!

قلنا خلنا نفرمت .. فرمت الجهاز بنفسي لأني خبير بهذا المجال ومافي داعي لنروح مهندس ..
فرمتنا وأثناء التثبيت كثير متجيلي رسالة معناها " السي د
ي معطوب .. إضغط إعادة أو خروج "
وأنا كخبير أضغط ريدي .. لاني متعودة عليها في فورمات أكثر الأجهزة بس بحد محدود .. لكن عندي حسيت إنها كثرة جداً .. مادري كيف حتى إنها لو تضغط ريدي ألف مرة مايسير شيء ..

مر التثبيت بسلام .. سوى الجهاز ريستر .. وفجأة وعندما يبدأ بتحميل وليس تثبيت الوندوز المعروف .. ( الشاشة السوداء إلي يكون فيها شعار الوندوز وتحته خط تحميل أزرق معروف )

تأتي المصيبة .. وإذا بالشاشة الزرقاء مرة أخرى ولكن الكلام تغير .. بدت الطلاسم وما أتذكر من الرسالة إلى ( 0X000000000 ) تقريباً الزبدة أصفار وإكس وحروف مادري وش تبي .. :Unhappy:

ويعيد التشغيل بعد ثواني .. بل ثانية بل أقل من التانية .. قد تستغربون إذاً كيف قراء الرسالة .. ولكن صبراً .. أهم شيء إنك قطعت الإتصال .. أما إذا كان عندك DSl فهذا كلام تاني ..

ونسوي ذاك الفورمات الثاني وبسي دي آخر .. وتحميل وخربيط وريستر .. ووقت التثبيت .. تأتي الشاشة مرة أخرى بس الآن الكمبيوتر مايعيد التشغيل ويوقف على الرسالة .. حتى طفيت الجهاز .. !

قلبي دق وحالتي صعبة وعرق .. :eek:

صراحة ياجماعة شكيت في نفسي جالي مرض نفسي ..

قلت ياراقل قم وده للمهندس خله يشوف خلاص أعلنت الإستسلام lolo:

رحت للمهندس السلام عليكم و" عليكم السلام " ...

القصة إلي فوق قلتله إيها .. تمام .. " تمام "

" خلاص يازبون هذا بوستر تجيلي إن شاء الله بعد أربع ساعات عشان البرامج تحأعمله فورمات بطريقة الخاصة لأني أنا أضيف أوامر وأكتبه مو زي أكثر الناس نيكست ومع السلامة "

قلته زين خلني أشوف .. ( طبعاً المهندس قلي $ خمسين $ ريال سعودي :D ) فضيحه ها ..

جيتله في الوقت المحدد وأنا متحمس قلي " ياشيخ جهازك مادري وش يبغى مايبي يثبت وندوز خالص " قلتله إذاً .. قال " جهازك يبيله فحص وإنشاء الله خير تجيلي إن شاء الله بكره .. " قلت إن شاء الله

رجعت صراحة بخيبة أمل .. خيبة إلى أبعد ما تتصورون .. (B)
جهازي .. ياحراااااااااااام ..

جيتله الصبحية .. قلي " جهازك هذا معالجه خايس جدا ركب أحسلك إنتل بنتيوم 4 2800 قلته ركب وش نسوي .. قلي تعال بكرة "..

جيتله الصبحية قلي " جهازك هذا المزربود تعبان " وذكرلي قصة المذربورد قلي " قيقا بايت صدرت منها مجموعة في غلط صناعياً وكثير ناس جاو عندنا وبدلوا .. وقصة تجارية .. " قلتله الزبدة قلي " الزبدة لازم تاخذ مذربود تمام وإن شاء الله حيكون زي الفل .. " قلتله كم السعر .. " قلي حوالي مع المعالج 900 ريال " .. قلتله لو إني الحين شاري كمبيوتر جديد يابابا .. قلي " شوف أنا عندي لك حل توفير وتمام .. " قلتله وش .. قال " معالج AMD وخذ هذه النصيحة ترا المعالجات ترتيبياً أول شيء INTEl ثم AMD ثم Celeron .. وسعرة الـ AMD 4000 K7 بسعر 150 ريال فقط .. " قلتله خلاص ركب ..

ركب الرجال متحمس وكل شيء وزنون ولمات ..

جيتله الصبحية .. ها بشر .. قلي " والله إلى الآن نفس المشكلة " قلتله يابابا لا تفلسنا علفاضي تصلح ولا ترجع كل شيء مكانه ولا فلس لك .. قلي .. " والله ياشيخ مالقيت له حل أبدل الرامات نفس المشكلة أغير الهاردسك نفس الشيء وش أسوي .. " قلتله شوف شغلك وأنا مادري !! .. " قلي خلاص تعال الصبحية وأعطيك القرار الأخير " .. تمام

أجيله الصبح خائب الأمل .. بشر .. قلي " أبشرك بالخير أخيراً تثبت الوندوز بنفس القطع الموجودة عندك " قلتله كيف قلي " الله أعلم ..!! هذه سر المهنة " قلتله أهم شئ كل شيء تمام مافي نقص قلي " ماعليك " أحس إنه سوى شيء غريب :confused: .. بس برابو !Clap

أخذت الجهاز مسرع للبيت أحمل برامج وصوت وخربيط .. بس حسيت إنه بطئ أبطئ من السليرون إلى كان معاي يعني مادري كيف بس بطيء .. قلت في نفسي يازين السرعة 4000 ها ..

وفعلاً إلى الآن ماشفت رسائل ..

وسألت بعض الناس عن القصة .. قلي يمكن كان في الرامات فايرس بلاستر وقدر المهندس يحذفه ..

فأرجوا منكم لمن لديه الحل ألا يبخل علينا ..

والزبدة إلى الآن خايف لا يثقل الجهاز وأسوي فورمات وتعود المشكلة وأدفع خمسين تاني ..!! :confused:

أنا الآن أستشيركم بكل صراحة ووقار ووو ..

هل صحيح ما قاله المهندس في ترتيب المعالجات إلي ذكرتها ..

وهل الـ AMD إلي معاي الآن جيد ..

وماهو الفرق بين الإنتل أو السليرون والــ AMD .. ؟؟!! :D

رغم إني حسيت إنهم لعبوا براسي وغشوني .. ووقته كنت غير مدرك لشيء

الكلام يطول والباقي يدوم وأنا أعرف إن دمي ثقيييييييييل مرة .. LooL

بس إن شاء الله إنكم فهمتم قصتي .. والسلام خير ختام ..

**hamza934** · 28-06-2006, 12:35

السلام عليكم
هل تريد شراء جهاز جديد؟

**BANDERzz** · 28-06-2006, 13:13

عزيزي...
مافيه معالج AMD4000 K7 هذا الله العلم انه معلج فيا والمذربورد من نوع ميركوري (ماليه السوق بسعر التراب ويبعونها بعض المحلات على انها AMD)
المهم الي معاك المعالج الجديد مع اللوحه الام مسولها من المصنع اوفر كلوك وانواع التزوير والنصب والاحتيال من المصنع نفسه بالعربي مغشوشه ولا تسوا 100 ريال.
طيب خلال محاولتك لحل مشكلتك ماجربت تغير البورسبلاي وتتأكد من مروحة المعالج والهيت سنك مركب مظبوط ولا لا والحتى المعجون الي بين المعالج والهيت سنك(القطعة المعدنية المتصلة بالمعالج)
واذا كان المودم الي عندك من نوع متورولا تشيله من الجهاز ... وشف يمكن تنحل المشكلة

**للإحتراف صانع..** · 28-06-2006, 14:31

المشاركة الأصلية كتبت بواسطة BANDERzz

عزيزي...
مافيه معالج AMD4000 K7 هذا الله العلم انه معلج فيا والمذربورد من نوع ميركوري ة

والله صدقت جبت نفس الكلام المكتوب على الكرتون .. الله يستر

هو صح حتى إن في المعالج تبعي مافي أي أثر كتوب عليه AMD أو سرعة 4000 بس مكتوب ميركوري .. ياسلااااااااااااااااااام .. نصب علينا ..

طيب بسألك سؤال .. هل المهندس يعرف إنه مو أصلي ..

وعلى فكرة AMD الأصلي أحسن من السيلرون أو البنتيوم ..
وكم سرعته وسعره في سوق العرب .. ( الله يهديهم )

وهل تنصحني بشيء معين .. جزاكم الله خير

**Max Heater** · 30-06-2006, 21:14

ما فهمته أن جهازك القديم لا ينفع ، و "المهندس" بتاعك بدل لك اللوحة والمعالج ، وأعطاك لوحة ومعالج ملتصقين على أساس أنه AMD بسرعة 4000 !!!
أولاً هذا ليس نظام AMD ولا علاقة له به ، هذا معالج مرتجع قديم وممنوع بيعه أو معالج فيا قام أحد المصانع الصينية بإلصاقه بلوحة تعبانة ، وتم بيعه للتجار الأغبياء في الشرق الأوسط مثلاً وهم يجزمون بأنه نظام AMD ومتأكدون تماماً ويبيعونه للزبائن هكذا ، يالنصب!!

أقترح عليك إعادة تلك اللوحة وشراء كمبيوتر جديد ، الزميل GoldenLion يستطيع مساعدتك في إختيار الملائم ، أقصد نظام AMD حقيقي وحديث ، والذي سيقدم لك آداء وسرعة وكفاءة.

**الخلف** · 01-07-2006, 07:25

الحروف والأرقام ( 0X000000000 ) التي تظهر هي التي تحدد نوع المشكلة، يجب أن نعرف هذا الكود تماماً حتى نعرف أين المشكلة...

كما قال لك الأخوة، البائع كان منصوباً عليه وقام بنقل النصب إليك

كلا من Intel و AMD في عراك وصراع مستمر مع بعضهما وفي الوقت الراهن فإن معالجات AMD تفوق على معالجات Intel هذا كان منذ ما يقارب الثلاث إلى أربع سنين، ولكن قبل ذلك كانت Intel متفوقة على AMD لمدة سنتين إلى ثلاث، وقبلها كانت AMD متفوقة على Intel وهكذا...
قريباً ( نهاية الشهر القادم ) ستنطلق معالجات Intel Core2 إلى السوق وتستعيد Intel الصدارة لسنة أو أكثر ( AMD تعد العدة منذ الآن )...