هارد خارجى بيعمل صوت أثناء التشغيل وبقى تقيل

[Hossam Mokhtar]

السلام عليكم

كنت شارى هارد جديد من حوالى 7 8 شهور، أول لما جبته وجاى أشغله راح خبط فى الكيسة وهو معلق بالكابل بتاعه، قلت طب أجربه وأشوفه الأول شغال ولا لأ: شغلته عمل صوت بسيط وبعد كده إشتغل من غير مشاكل لمدة السبع شهور دول.

دلوقتى بقى غلطت وخزنته فى جراب واحد مع هارد خارجى تانى (الهاردين WD بالمناسبة، واحد Passport والتانى Element)، والظاهر ده خلى المشكلة ترجع تانى، والصوت دلوقتى بقى أكبر بكتير والهارد تقيل جداً فى القراية بياخد ييجى من ربع لنص ساعة عشان يفتح ولا عشان أنسخ ملفات وبتاع. لما بحثت شوية فى جوجل عن الصوت ده، معظم النتايج إتفقت عن إن الصوت ده علامة إن الهارد قرب يبوظ.

الرسايل اللى جاتلى مع إنى مش فاكرها أوى: "Not initialized" وفيه رسالة تانية I/O device error ولو إنها ملهاش علاقة أوى، بس عشان هرجع أسأل عنها سؤال تانى فى الأخر...

عايز أعرف رأيى الناس اللى عندها خبرة:
1- هل المفروض أقلق ع الهارد؟ هو بحالات، يعنى مثلاً شيلته وحطيته تانى وخليت الوصلات محكمة ورحمنى شوية من الصوت. أستنى الصوت يمكن يمشى لوحده زى ما حصل أول ما إشتريته؟ ولا كده خلاص أصبح مش أمن؟ (أهو انا دلوقتى مثلاً مشغله والجهاز شافه بسرعة والهارد شغال زى الصاروخ. للتوضيح: المشكلة دى (الصوت والتقل) محصلتش إلا مرتين بس ورا بعض من حوالى يومين).
2- صوت إيه ده بقى إصلاً (فيه حاجة إتكسرت جوة؟) وإيه الأسباب اللى بتخلي الهارد (يبوظ بالطريقة دى) يعمل صوت؟
3- هل أوديه عند واحد بيصلح هيعرف يعمل فيه حاجة؟ هو لسه فى الضمان، أوديه ولا هيقولوا عيوب الإستخدام؟

عايز أضيف نقطة مهمة هنا: إنى عملت فحص للهاردات الخارجية الإتنين، فحص بتاع الويندوز chkdsk وفحص بتاع Data Lifeguard Diagnostics من WD والإتنين قالولى هارداتك تمام مية مية ومفيهاش أدنى مشكلة.

نرجع بقى لمشكلة I/O device error اللى بحثت كتير جداً عنها فى الإنترنت. واللى هى بإختصار وفى معظم الحالات بيبقى فيه هاردوير معين مش واصل كويس: ممكن وصلة USB... مدخل USB نفسه، واللى هو فى حالتى غالباً المشكلة: لأن لما المشكلة بتبقى موجودة، وأشيل الوصلة وأحطها تانى وأقعد أهز فيها بيشتغل كويس، بعد اما مبيبقاش عايز يشتغل خالص بقى، ولا بـI/O device error ولا بغيره. يبقى معنى كده إن الأماكن الأمامية لـUSB مش ماسكة كويس، دى حلها إيه بقى؟ بتتصلح برضه، طب هل ينفع أصلحها بنفسى؟ ولا بتتغير ولا إيه؟

هو كل كام يوم كانت تتطلعلى مشكلة I/O دى، بس بعد أما نضفت مدخل USB (لأنها كانت أحد الأسباب والحلول المقترحة)، المشكلة مبقتش تظهر إلا كل 10 أيام ولا حاجة، بعد اما كانت بتظهر كل يومين. وانا رغيت الرغى دى كله لأن سؤالى هنا هو إنى ممكن أتعايش معاها، بس انا خايف ع الهاردات الخارجية نفسها، إن لو الموضوع ده حصل كتير ممكن يأثر فى عمرها وكفائتها؟ لأن لما المشكلة دى بتحصل بتعمل مشاكل تانية فى الهارد زى إنه بيبقى Read-only وبتضطر أعمل شوية حاجات عشان أرجعه لطبيعته. فيستحسن هنا الحل الجذرى؟

أخر سؤالين (ده لو فيه حد لسه بيقرأ ومزهقش من الموضوع !):
4- الباور سبلاى ليه علاقة بالحاجات دى؟ انا كنت إشتريت هارد ثانوى 500 جيجا (وباظ الحمد لله) وسألت محتاج أحدث الباور سبلاى عشان يقدر يشغل هاردين من غير مشاكل، قالك لا مفيش مشكلة مبيحتجش طاقة كبيرة. بما إن دلوقتى بيبقى فيه هارد تيرا وأحياناً 2 تيرا كل واحد متوصل على حدة طبعاً بالكمبيوتر، هل ممكن يكون الباور سبلاى هو اللى مسبب المشاكل دى؟
5- نرجع للهارد اللى باظ، واللى كان سبب بوظانه إن موصلوش كهربا كافية لأن كابل الباور مكانش واصل كويس (بعد اما كنت فكيت وربطت عشان كنت نقلت الكمبيوتر فى مكان ورجعته تانى....). لاحظت إن فيه مكان تقريباً بيسموه Socket من اللى بيدخل فيه كابل الداتا، كان بيتقل الجهاز لما بييجى يبدأ لما كنت بوصل عليه. يعنى بالبلدى كده باظ... ده بقى باظ من إيه؟ والمفروض أقلق من المداخل التانية اللى جنبه، الحاجات دى ممكن تبوظ الهارد الرئيسى الداخلى وخلافه، بسبب كهربا زايدة أو ناقصة؟ ده بيتغير برضه ولا بيتصلح؟

انا أسف ع الإطالة، كنت عارف إن الموضوع هيبقى طويل لأن المشاكل كتيرة. انا كده كده عارف إنى محتاج مهندس، بس قلت أسأل هنا الأول عشان أعرف هبقى محتاج إيه بالظبط وممكن أتكلف كام.

[Yasser]

كما قلت لو الصوت خارج من الهارد فهو علامه سيئه لكن ممكن تستعين ببرنامج مثل hard disk sentinel لتعرف حاله الهارد مبدئيا بشكل اوضح ثم تابع معنا مثل الصوره التاليه :

[Hossam Mokhtar]

طيب انا حملت البرنامج وعملت الإختبار والنتيجة 100% برضه. انا مش عارف اعمل ايه بصراحة، هوديه لواحد وخلاص واشوف ايه حكاية الصوت ده...

هو ممكن هارد يبقى سليم من ناحية الباد سيكتور والكلام ده، لكن فيه مشكلة كبيرة هاردوير من جوة؟ طب إيه أسوأ الإحتمالات فى الحالة دى؟ بيبوظ فجأة برضه ولا بيدى إشارة؟ ولو باظ بيبقى إيه إحتمالات إستعادة البيانات من عليه، أقصد الميديا والبوردة بيفضلوا سلام ع الأقل؟ يعنى بصيغة تانية: لو فيه مشكلة هاردوير، هل بيبوظ كل حاجة فى الهارد بعد كده (بما فيها البيانات طبعاً)، ولا ع الأقل بيسيبلى حاجة سليمة فيه؟

[RVD150]

نزل برنامج HD tune تمام و اعمل فحص فى و شوف النتيجة و قولنا

[Yasser]

مبدئيا كويس جدا ان النتيجه بالصوره دى ممكن تصور لنا تبويب SMART ايضا فى البرنامج نفسه ....انت مشكلتك انه بطىء فى النقل فطبعا اكيد انت جربته على جهاز اخر ونفس المشكله فنستبعد مشكله بمنافذ جهازك وايضا تستخدم كيبل اصلى .... لا اعرف الصوت المسموع طبيعى ام لا من وصفك لكن اتمنى ان يكون العيب فى سوكيت الهارد نفسه يكو ن بيفصل وهو سهل تصليحه لكن اولا اذهب للضمان .

[Hossam Mokhtar]

المشكلة مش فى انه بطىء فى النقل، المشكلة فى إنه اتخبط اول لما جه وعمل صوت، وبعد كده معملش مشاكل لمدة 7 شهور، ودلوقتى الصوت رجع تانى خلال احد المرات اللى كنت بشغله فيها. فعشان كده قلقان. انت بتسأل عن طبيعة الصوت، على الرغم من انى عمرى ما شفت اى هارد من جوة بيبقى عامل إزاى، بس انا بتخيل ان فيه حاجة بتدور جوة، الصوت اللى بيطلع كأن فيه حاجة (مكسورة؟) بتحوشها أو بتبطأها عن الدوران، لكن بعد فترة بسيطة بيشتغل كويس والصوت بيختفى. الكلام ده كان أول مرة، ومن حوالى يومين الصوت أصبح مخيف أكتر وإستمر طول فترة تشغيل الهارد وإدانى الكام Error دول.

انا مجربتش الهارد على جهاز تانى، لأنه ممكن بكل بساطة يقعد 7 شهور تانى ميعملش مشاكل ولا صوت، فالتجربة مش هتبقى فعالة ومش هتدينى نتيجة. هو الواضح إن مشكلة I/O جاية من عيب فى مداخل USB الأمامية. لأنها بتيجى فى الهاردين (وبوصلات مختلفة). والغريب إن الهارد التيرا كان شغال عليهم كويس قبل ما أجيب الهارد التانى، وعمرى ما شفت مشكلة I/O، لكن بعد أيام بسيطة من شراء الهارد التانى وتوصيله، المشكلة إبتدت تظهر كتير فى الهاردين.

انا خايف أودى الهارد يتصلح لأنه هيتفك، و دى حاجة مقلقة فى حد ذاتها. عشان كده قلت أجى أسأل هنا يمكن واحد يطمنى من الصوت ده ويقولى تجاهله بكل بساطة. اللى هيحصل إنى هستنى أشوف هيعمل صوت تانى ولا لأ خلال الفترة القليلة اللى الجاية، ولو عمل هبعته يتصلح وأمرى لله.

ده تبويب SMART



و دى نتيجة فحص ممتد من برنامج HD tune

[RVD150]

معليش دوس على health و صورها و ارفعها

[Hossam Mokhtar]

معليش دوس على health و صورها و ارفعها