مروحة بروسيسور 3 كاش 2 بتعمل صوت؟؟؟

**hisham2007** · 03-07-2007, 18:14

السلام عليكم
انا اشتريت بروسيسور ال جى ايه 3 كاش 2 ميجا من واحد
وانا بشترى جربته عنده مفيش مشاكل

خدته بمروحته ومشيت
ولما روحت البيت
شغلته عادى
دخلت العب لعبة لقيت مروحة البروسيسور رفعت من 2500 لفة ل 4500 لفة
والصوت ارتفع جدا
فهل ده عادى بالنسبة للصوت ولا المروحة دى فيها مشكلة
وانا شيلتها وركبت مروحتى القديمة
كنت جايبها مع البروسيسور سيليرون 2.6 سيليرون كان البروسيسور بالمروحة ب 185 جنيه
بس انا خايف تكون ضعيفة

ارجو ارشادى
وشكرا

**hisham2007** · 03-07-2007, 18:20

وانا مروحتى القديمة مالهاش صوت خالص
وانا فاكر انى روحت عند اتنين صحابى عندهم بروسيسور 3 بوكس برضه زى اللى انا جايبه
ومش فاكر انى سمعت عندهم صوت ملاحظ لما كنت بالعب
انما البروسيسور ده المروحة اللى معاه بوكس برضه بس جوه اللعبة الصوت مسمع فى البيت كله

ارجو الافادة
ازيتها ولا اعمل ايه
علما بان الاختيار الاخير انى ارجعها لأنى شاريه من واحد فى بلد تانية مستعمل مش شارى جديد من محل

**واحد مسكين** · 03-07-2007, 19:50

وعليكم السلام ورحمة الله وبركاته :
أما بعد :
مراوح معالجات إنتل وخصوصاً لمعالجات ذات نواة بريسكوت تحتاج إلى تبريد أكثر لإرتفاع حرارتها كثيراً وبالتالي فطبيعي أنه في حالة اللعب فإن المعالج سيعمل بأقصى طاقة له وبالتالي ترتفع حرارته مما سيزيد من سرعة دوران المروحة ليحصل المعالج على تبريد أكثر ..

وإذا لم تكن تحب الإزعاج وخاصة إزعاج مروحة المعالج فقم بتغيير المشتت وريّح رأسك

.

**salah1234** · 03-07-2007, 21:10

ممكن تغير المروحة ب 15 جنية

**hisham2007** · 03-07-2007, 22:59

المشاركة الأصلية كتبت بواسطة واحد مسكين

وعليكم السلام ورحمة الله وبركاته :
أما بعد :
مراوح معالجات إنتل وخصوصاً لمعالجات ذات نواة بريسكوت تحتاج إلى تبريد أكثر لإرتفاع حرارتها كثيراً وبالتالي فطبيعي أنه في حالة اللعب فإن المعالج سيعمل بأقصى طاقة له وبالتالي ترتفع حرارته مما سيزيد من سرعة دوران المروحة ليحصل المعالج على تبريد أكثر ..

وإذا لم تكن تحب الإزعاج وخاصة إزعاج مروحة المعالج فقم بتغيير المشتت وريّح رأسك

.

شكرا على الرد
ولكن لو كانت المشكله كده انا مكنتش زعلت
انا زعلت لما روحت لتلاته اصحابى عندهم نفس البروسيسور بنفس المروحة البوكس

وبالعب عندهم عادى المروحة بتزيد سرعتها لكن مفيش الصوت المفزع اللى انا باسمعه ده

**hisham2007** · 03-07-2007, 23:02

المشاركة الأصلية كتبت بواسطة salah1234

ممكن تغير المروحة ب 15 جنية

مش فاهم
يعنى المروحه البوكس ب 15 جنيه؟
ولا قصدك اى مروحه
انا كنت جايب مروحه للبروسيسور السيليرون 2.6 اللى كان عندى كنت جايبها ب 30
جنيه اسمها اى ار تى
وانا مشغلها دلوقت مش عاملة اى صوت ومشغلها من الصبح مفيش مشاكل
هل اكمل بيها ولا ال 3 ميجا لازمله البوكس
ولا المروحه القديمة دى بتاعت سيليرون 2.6 بس ولا ايه
الجهاز شغال كويس
بس انا خايف يكون اللى عملته كده غلط
ارجو الافادة
وشكرا

**Scorpion007** · 04-07-2007, 00:16

اهلا H ازيك

المروحة بتشتغل الطبيعى بتاعها 1200 لفة ومش هتمسعلها صوت
لكن لو شغلت لعبة المروحة هتلف 4200 لفة علشان البوردة فيها حاجة اسمها CPU Smart Fan Control

دة معناة ان البروسيسور كل ما درجة حرارة بتعلى المروحة لازم تلف اسرع علشان تبردة وتنزلة لدرجة حرارة بين 40- 60 درجة س

لو الصوت اللى انت بتسمعة صوت زننننننننننننننننن دة طبيعى اصبر عليها فترة وهصوتها هيخف بس بردة هيبقى فية زنة
لو صوتها مش منتظم يبقى وهية بتلف تشوفها ممكن تكون بتحك فى سلك جانبى ولا حاجة

بدل ما تكلف نفسك انا متاكد انك ماحطتش معجون على البروسيسور ودة مهم جدا لانة بيوزع الحرارة على جمع انحاء المشتت طبعا دة بيدى امكانية لتبريد سريع وعدم وصول المروحة للدوران باقصى طاقة
جرب وقولى عملت اية

**hisham2007** · 04-07-2007, 00:26

للأسف كل الكلام ده موجود والمعجون محطوط
لأن انا شارى المازر بالبروسيسور على بعض ما فكيتهمش وفكيتهم برضه للتأكد
والمازر فعلا سمارت بس سمارت بغباء عايزه توصل بالحرارة ل 50
والزنه غبيه قوى وما بتخلصش خالص وحتى اول ما بفتح الجهاز بتظن وبعد كده يضيع رغم ان الواحد بيقول يا هادى لسه معملتش حاجه

وزى ما قولت لحضرتك كل اصحابى اللى عندهم نفس مواصفاتى مابيعملش كده
وكمان واحد صاحبى عنده كور تو ديو برضه اسمارت مش اسمارت مبيحصلش كده

السؤال دلوقت
انا ممعاييش فلوس اجيب مروحه نضيفة
المروحه البوكس تعمل كام؟
وانا مشغله بمروحة اى ار تى بتاعت البروسيسور 2.6 السيليرون ومفيش مشاكل
هل فيه مشاك لو فضلت استخدم المروحه دى؟

**Scorpion007** · 04-07-2007, 00:56

بص دة عيب فى المروحة وفكها واكيد صدقنى هتلاقيها بتحك فى حاجة مثل المشتت نتيجة عيب تصنيع دة عادى جدا ساعات المراوح البوكس بتيجى تالفة والله

مافيش ضرر من استخدام المروحة القديمة خالص لكن مش هتستفيد من السمارت الى موجود فى البوردة وهتشتغل المروحة باقصى طاقة لها

**hisham2007** · 04-07-2007, 11:47

شكرا لكل من شارك فى الموضوع
الغريبه انى اتصلت بصاحب المروحه وحلفلى انها مبتعملش كده عنده حتى لو لعب اى لعبة
والغريبة انى اشتريت منه المازر والبروسيسور والمروحه يعنى لو كنت غيرت حاجه كنت قولت هيا السبب

انا ححاول ازيت المروحه وانفضها بالبلاور وان شاء الله خير ولو ما نفعتش
هكمل بالعادية

**hichamo** · 10-07-2007, 18:05

السلام عليكم عندي جهاز واما قمت بتنظيفه ومسحت المعجون بتاع البروسيسور بدء يعملي مشاكل في الحرارة بترتفع كتير هل السبب هو المعجون لقمت بمسحه جازاكم الله خيرا

**واحد مسكين** · 10-07-2007, 21:18

أخي / hichamo .. إذا مسحت المعجون السابق ولم تضع معجون جديد عليه فطبيعي أنه ترتفع الحرارة ويعمل مشاكل ..
فيجب شراء معجون مثلاً : Arctic Silver5 وتضع المعجون على سطح المعالج .