" اخر تعديل : 9-2-2008 ,,, || شرح تسطيب اوبنتو ... خطوة بخطوة .. || ابدأ مع لينوكس ..

[أحمد م. أبوزيد]

* ملحوظة : تم تعديل الشرح بتاريخ 9-2-2008 ,,, بسبب المشاكل التي يسببها برنامج " Acronis Disk Director " ,,, و تم تعديل الصور لتظهر بشكل مناسب اثناء التصفح ,,, و اذا اردت مشاهدة الصور بحجمها الاصلي اضغط على الصورة .

*****************



حبيت اعمل شرح لتسطيب الاوبنتو بجانب الوندوز - اكس بي - .... عشان ناس كتير جت تسطب اللينوكس عموما و غالبا بتفرمت الهارد كله بالغلط D: خطوة خطوة كدا هنشوف توزيعة الاوبنتو بتتسطب ازاي ... و من غير ما نفرمت حاجة بالغلط D:

في نقطة مهمة ... الشرح ده على النسخة الـ live cd ...

الاوبنتو نازل بنسختين ... نسخة بتسطب ها على طول ... و دي هى الـ alternate ... و نسخة live cd ... بتجربها الاول و بعد كدا ممكن تسطبها ... بس مينفعش تحفظ اي حاجة عليها ... لانك بمجرد ما بتعمل ريستارت كل حاجة بتروح ..

المهم اني هشرح على النسخة الـ live cd ... طبعا الـ alternate دي فيها ميزة عن النسخة الـ live إنها أخف في التسطيب كتير وأسرع بالذات لو الرام عندك أقل من 512 ميجا ... بس المفروض محدش يستخدمها غير لو هو متدرب على التسطيب كدا مرة ... عشان دي عامله زي تسطيب الوندوز كدا ... انما الـ live دي بتكون بواجهة رسومية لذيذة خالص و سهلة ...

اللينوكس عموما بيحتاج 2 بارتشن ... واحد اللي بيكون عليه الحاجات الاساسية زي الـ C في الوندوز و بارتشن تاني صغير زي الـ virtual memory ... و البارتشن ده اسمه .. سواب " swap " ... الـ swap ده عبارة عن مساحة السيستم بيتسخدمها في حالة وجود نقص جامد في الرام .. يعني دي مش بيتحط عليها ملفات

المهم يعني ...

هناخد جزء من بارتشن فيه مساحة فاضية ... و هنعمل بارتشن بنظام ext3 ... و ده زي الـ fat32 و ntfs بتاع الوندوز ...

هنحتاج حوالي 4 جيجا للبارتشن الاساسي ... ويستحسن 6 جيجا و لو 10 جيجا يكون احسن و احسن ... و السواب يستحسن يكون ضعفين الرامات عندك ... يعني لو راماتك 256 ... يبقى تعمل سواب بمساحة 1024 ... و لو عندك رامات 512 تعمل سواب بمساحة 2048 ميجا ... و هكذا ... و على الاقل باي حال من الاحوال لازم يكون عندك السواب 256

المهم هنشوف ازاي هناخد جزء من البارتشنات من غير ما نفرمط حاجة .... دي حاجة بسيطه خالص ... هنستخدم برنامج Gnome Partition Editor - اللي مع نسخة الاوبنتو - او ما يرمز اليه اختصارا بـ GParted .... او اي برنامج تقسيم بتستعمله ...

خطوة خطوة كدا هنشوف ازاي هناخد جزء من اي بارتشن فيه مساحة فاضية ... و نعمل بارتشن جديد للينوكس ...

*********************************

بدلا من استخدام برنامج خارجي ....

هنستعمل برنامج موجود مع نسخة الاوبنتو ... و بيكون مع اغلب توزيعات الـ جنو / لينوكس ....

المهم هنستخدم برنامج ... Gnome Partition Editor في تقسيم الهارد .... بس يستحسن يكون عندك رامات اكتر من 256 عشان الجهاز ميهنجش

ملحوظة : الشرح تحت الصور ..


*********************************



اسهل طريقة لفتح البرنامج ....

من قائمة System .... بعدين Administration

بعدين نختار البرنامج ... Gnome Partition Editor

زي الصورة كدا ....

*********************************



دلوقتي برنامج GParted فتح عادي خالص .... و دي الواجهة بتاعته ...


*********************************



دلوقتي نشوف بارتشن فيه مساحة فاضية ... يستحسن 6 جيجا .... و لو خليتهم 10 جيجا يكون افضل ...

هنعمل للبارتشن اعادة تحجيم .... هنعمل كليك يمين و نختار " Resize " .... زي الصورة كدا ...


*********************************



ده شكل البارتشن قبل ما نعمل فيه اي حاجة ...


*********************************



1 : دي المساحة الفاضية اللي هتبقى قبل البارتشن ا?صلي .. يعني البرنامج هيحرك البارتشن ا?صلي يمين بحيث المساحة الفاضية تكون قبله ... ولا يحبذ إطلاقا إنك تخللي المساحة الفاضية قبل البارتشن ا?صلي لما تيجي تعمل إعادة تحجيم ... ?نه هياخد وقت طويل جدا جدا جدا جدا ... خلليها دايما بعده ... يعني دايما تأكد إن الرقم هنا صفر " 0 "

2 : دي المساحة الجديدة للبارتشن اللي تم اعادة تحجيمه ...
طبعا لازم يكون في مساحة فاضية في البارتشن عشان تقدر تاخد جزء منه ...

3 : دي المساحة الفاضية اللي أخدناها من البارتشن عشان نخصصها لبارتشنات اللينوكس ..
يعني في الخانة دي هتحدد مساحة بارتشن اللينوكس + السواب .... يعني مثلا لو انت اديت للينوكس 10 جيجا .... يبقى تكتب في الخانة دي 10 × 1024 = 10240 ميجا ....

المهم يعني تعرف ان وحدة القياس هنا الميجا ... و ادينا في الصورة عملنا مساحة 6 جيجا ... 6 × 1024 = 6144

و مش لازم تكتب الارقام يدوي .... ممكن تحرك السهم شمال لحد ما توصل للحجم اللي انت عاوزة .... بس خلي بالك حرك السهم بس .... و متحركش البارتشن نفسه ... عشان لو حركت البارتشن نفسه هياخد وقت طويييييل جددددا في التقسيم زي ما قولنا من شوية ... بقولك ايه .... اعملها بالارقام احسن D:

*********************************



دلوقتي بعد ما عملنا مساحة unlocated يعني ملهاش file system .... نظام ملفات يعني D:

هنعمل دلوقتي بارتشنين للينوكس واحد من نوع ext3 .... و التاني swap .... و زي ما قولنا السواب ده بيكون غالبا بيكون


ضعف مساحة الرامات ... يعني لو راماتك 512 يبقى تعمل السواب 1024 ...

هنعمل زي الصورة كدا ... كليك يمين على المساحة الغير محددة ... و نعمل " New "


*********************************



هنعمل بارتشن من نوع ext3 و ده اللي بينزل عليه اللينوكس ... اعمله حسب ما انت عاوز ... يعني لو اديت للينوكس 10 جيجا .... اعمل البارتشن ده 9 جيجا ... و سيب واحد جيجا للسواب ..

1 : - New Size - ..... دي مساحة البارتشن الـ ext3...

2 : دي المساحة الباقية ... اللي هنعملها للسواب .... و انا هعملها 1024 يعني واحد جيجا ...


*********************************



و بنفس الطريقة هنعمل بارتشن للسواب ... و هيكون ضعف مساحة الرامات ... يعني لو رامات 512 .... هتعمل البارتشن ده بمساحة 1024 ميجا .... يعني واحد جيجا ..
و نظام الملفات هيكون linux-swap


*********************************



بس كدا كله تمام .... هتعمل - Apply - موافقة على اللي انت عملته ... و ركز كويس قبل ما تدوس Apply .... يمكن تكون عملت حاجة بالغلط كدا ...


*********************************



هيسألك اذا كنت موافق على التغييرات اللي انت عملتها دي ولا لأ ... اختار موافقة Apply

و بكدا هيبدأ ينفذ التعديلات اللي احنا عملناها ...


*********************************



و هيبدا ينفذ التغييرات ... استنى لحد ما يخلص و متعملش اي حاجة .... و ممكن ياخد وقت شوية عشان انت مشغل الـ Live CD ... و دي بتستهلك جزء كبير من الرامات ...

و بس كدا كله تمام ^_^ .... و هنيجي لمرحلة التسطيب .....





&&&&&######################&&&&&




كدا الجزء الخاص بعمل بارتشن للينوكس هنيجي لتسطيب الاوبنتو لينوكس .. و زي ما قلت في الاول ... الشرح ده هيكون على الـ live cd .. يعني بواجهة رسومية 100 %
طبعا الاسهل التسطيب من الـ live cd .. عشان ببساطة ممكن تعمل حفظ save للشرح ده على الهارد بتاعك ... و لما تيجي تسطب تفتح الشرح و تطبق ... عشان ميحصلش اي غلط ..

ملحوظة : الشرح تحت الصور ..

*********************************

بسم الله الرحمن الرحيم

دلوقتي بعد ما نزلنا نسخة الاوبنتو و حرقناها على اسطوانة ... هنحط الاسطوانة في الـ CDrom ... و نتأكد ان اول حاجة بنعمل منها بوت هلى الـ CDrom ... كأننا هنسطب نسخة وندوز بوتابل ...

او ما نبوت من الاسطوانة ... او حاجة هنقابلها الصفحة دي ...



هنختار زي الصورة " Start or install Ubuntu "

*********************************



اول ما الجهاز هيحمل هنلاقي الدسيك توب الجميل ده ...
ممكن تستخدم النسخة و ندخل على النت مثلا ... نشغل ملفات ملتي ميديا ... اوفيس ...
يعني نجربها كدا الاول و نشوفها اذا عجبتنا نقدر نسطبها .. - حلوة طبعا D: -
المهم ... لما نيجي نسطبها هنختار .. الايكونة اللي على الديسك توب دي اللي اسمها " Install "

*********************************



دلوقتي هنحدد لغة الواجهة ... هنخليها الانجليزية اعتقد احسن ...
بعد ما اختارنا الانجليزية ... هندوس " Forword " - بعد كدا بعد كل ما نعمل اي حاجة دوس Forword ... مش محتاجة شرح يعني D: -

*********************************



هنختار المكان اللي احنا فيه ... و عليه هيتم تحديد التوقيت ... Cairo طبعا D: ... او حسب المكان اللي انت موجود فيه ....

*********************************



دلوقتي هنختار اللغة الاساسية اللي هنستخدمها في الكتابة ... هنخليها انجليزي دلوقتي ... و لما نسطب النسخة هنضيف اللغة العربية ... و من على الشمال هنختار اللكنة – زي اللهجة كدا - ... هنختار الانجليزي العادي من غير اي لكنات

*********************************



هيحمل شوية .. عادي يعني D:

*********************************


الحته دي مهمة ... ركزوا كويس .. و اعملوا زي الشرح بالظبط ...
دي طريقة تقسيم الهارد ... طبعا احنا هنختار التقسيم اليدوي " Manual " ... عشان احنا اصلا عاملين البارتشن من الاول ...

*********************************


هنختار البارتشن اللي احنا عملناه ببرنامج
GParted

طبعا هنختار البارتشن اللي بنظام ext3 ...

هنعمل " Edit partition " - زي الصورة -

*********************************



بعد ما دوسنا " Edit partition " ... هنعمل حاجة بسيطة خالص ...
عند الخانة بتاعة " Mount point " - اللي معمول عليها بالاحمر في الصورة -


هنشيل الكلام اللي كان مكتوب و هنحط العلامة دي " / " - من غير علامة الاقتباس طبعاً -
العلامة دي اسمها سلاش .. و بيتقال عليها root لانها اصل النظام ... زي الـ C في الوندوز كدا ...
و ندوس ok

*********************************



بعد ما خلصنا و دوسنا ok ... هنعلم على المربع اللي جنب البارتشن بتاع اللينوكس ... عشان يتعمله فورمات ...

خلي بالك .. لو عملت علامة الصح جنب اي بارتشن تاني هيتفرمط كله ... فخلي بالك و انت بختار بدل ما تمسح كل الحاجات اللي عندك على الهارد ...

*********************************



دلوقتي لو عندك نظام تشغيل تاني زي الوندوز مثلا و عاوز تاخد نفس الاعدادات بتاعته هتعلم على المربع اللي جنب اسم الوندوز ... و زي ما انتوا شايفين كدا الجهاز ده عليه وندوز اكس بي .. و عادي يعني براحتك تختارها او لأ ... انا عن نفسي غالبا مش بختارها ...

*********************************



دلوقتي هنعمل مستخدم جديد ... ده الاسم اللي هندخل بيه يعني ...
اول خانة : اكتب اسمك .. او اي حاجة .. مش مهم يعني ...
تاني خانة : الاسم اللي هتدخل بيه ... - لازم تحفظه كويس عشان ده اللي هتدخل بيه - ... خلي بالك مينفعش تعمل اول حرف من اسم المستخدم حرف كبير ... لازم يكون صغير ..
تالت خانة : الباسورد و تأكيد الباسورد ... بده لازم تحفظه كويس عشان تقدر تدخل ..
رابع خانة : الاسم اللي عاوز الكمبيوتر بتاعك يظهر بيه على الشبكة ... - network -

*********************************



هتظهرلك الصورة دي عشان تأكد عليك التغييرات اللي انت عملتها ... لو انت عملت زي الشرح يبقا انت كدا في السليم .. و دوس " Install " على بركة الله ..

*********************************



دلوقتي هو بيسطب النسخة ... سيبوه براحته خالص .. روح اعمل كوباية شاي ... بس اوعى تكون صايم D:

*********************************



بيقولك مبروك ... تم التسطيب بنجاح .. عاوز تكمل بالـ live cd ولا تعمل ريستارت و تدخل على النسخة المتسطبة
يستحسن تعمل ريستارت ..

*********************************

نسخة اوبنتو live cd ...



Ubuntu Feisty 7.10 Live CD

Download

*****************

الملفات مرفوعة على الموقع الرائع " www.archive.org " .

نسخة من الشرح بامتداد PDF -نسخة معدلة - ,,, من الممكن قراءتها اونلاين ,,, او تحميلها عن طريق كليك يمين و حفظ باسم ,,, او باستخدام برنامج التحميل اللي بتستخدمه

هـــــنـــــا

نسخة من الشرح بامتداد ODT - نسخة معدلة -

هـــــنـــــا


><><><><><><><><><

انتهى #

و طبعا الرخصة :D

[أحمد م. أبوزيد]

اولا اسف جدا ان الموضوع مكتوب باللهجة المصرية ... بس انا اصلا كنت عامله لمنتديات معظم اعضائها مصريين ... بس قولت برده اجيبه هنا و ان شاء الله تستفادوا منه .. و اعتقد ان اللهجة المصرية من الهلجات المستساغة و مش هيكون في اي مشكلة في الشرح .. :rolleyes:

و الشرح ده كنت عامله على النسخة 7.04 ... و دلوقتي في النسخة 7.10 ... بس اعتقد مفيش اي ختلاف .. و الشرح هيكون عادي خالص ..

و بالنسبة للناس اللي عندها مشاكل في الصور الكبيرة .. عندها حل من اتنين ..

يا اما ينزل النسخة الـ PDF من الشرح ...

او لو بيستخدم الفاير فوكس ... من قائمة view .... يختار page style ... و منها يختار no style
اي نعم مش هيكون في تنسيق .. بس هيقدر يشوف الصور كويس جدا ..

على فكرة النسخة الـ PDF جميلة جدا ...

يستحسن تنزلوها ..


و بالتوفيق ان شاء الله :rolleyes:

[almoha]

تسلم ايديك يا استاذنا الفاضل بجد انا فرمت الهارد لما ستبت اليوبنتو وبعدين راح مشتغلش عندي وتقريبا كده لان في خطأ في السيت اب انا عملته واعتقد السواب Swap اثر علي الموضوع فعلا

ثانيا عاوز طلب من حضرتك :: ازاي نثبت ال breyl علي اليوبنتو ولو ممكن اثبتها علي live cd وياريت الشرح يكون بالصور برضو او فيديو وياريت فيديو وتبدء من الاول يعني هل بتحمل حاجه من علي الويب ولا المكتبه نفسها بتجيبها منين

وتسلم ايديك مقدماً

[Escape]

مشكو ر يا استاذ

[ammaR80]

مشكور يا باشا

[أحمد م. أبوزيد]

تسلم ايديك يا استاذنا الفاضل بجد انا فرمت الهارد لما ستبت اليوبنتو وبعدين راح مشتغلش عندي وتقريبا كده لان في خطأ في السيت اب انا عملته واعتقد السواب Swap اثر علي الموضوع فعلا

ثانيا عاوز طلب من حضرتك :: ازاي نثبت ال breyl علي اليوبنتو ولو ممكن اثبتها علي live cd وياريت الشرح يكون بالصور برضو او فيديو وياريت فيديو وتبدء من الاول يعني هل بتحمل حاجه من علي الويب ولا المكتبه نفسها بتجيبها منين

وتسلم ايديك مقدماً

عملت فورمات لما طبقت الشرح بتاعي ده :eek:
اكيد لأ :Big:

بالنسبة للبيرلي في النسخة الـ live بيشتغل لوحدة طالما كارت الشاشة يقدر يشغله كويس ...

و بيكون نازل مع النسخة عادي لما تتسطب ... بس لو كارت الشاشة بتاعك مش هيشغل البيرلي بكفائة مش بتشتغل تلقائيا .... لازم انت اللي تفعلها ..

الكلام ده بالنسبة للاوبنتو 7.10 .... يعني اخر نسخة .. :rolleyes:

مشكو ر يا استاذ

جزاكم الله كل خير على المرور ... اتمنى يكون الشرح مفيد ..

مشكور يا باشا

جزاكم الله كل خير .. مفيش اي استفسارت ؟ D:

[almoha]

تسلم تسلم تسلم

شكرا بجد علي الاهتمام يا راجل المهمات الاول


طيب ممكن اعرف ايه هيه المواصفات الدنيا عشان يشتغل يعني ممكن اشغله علي كرت بلت ان ولا ليه واضفات معينه ؟؟


وشكرا يا باشا

[أحمد م. أبوزيد]

تسلم تسلم تسلم

شكرا بجد علي الاهتمام يا راجل المهمات الاول


طيب ممكن اعرف ايه هيه المواصفات الدنيا عشان يشتغل يعني ممكن اشغله علي كرت بلت ان ولا ليه واضفات معينه ؟؟


وشكرا يا باشا

بصراحة معنديش اي خلفية عن اقل احتياجات لتشغيل البيرلي ... على العموم جربه ... اذا اشتغل خير و بركه .. مشتغلش .. يبقى الجهاز ميقدرش يشغله .. Wink:

معلش بقى انا تقريبا مش هقدر ادخل على النت قريب تاني (B)

الامتحانات و كدا بقى .. (BB)

بس ان شاء الله هحاول اتابع الموضوع كدا .. :rolleyes:

[almoha]

ربنا يكون في عونك يا رب ويوفقك ويسدد خطاك قادر يا كريم

وشكرا علي اهتمامك يا عمي


بالتوفيق

[adam black ice]

تسلم ايدك يا باشا ومشكور على المجهود

[أحمد م. أبوزيد]

ربنا يكون في عونك يا رب ويوفقك ويسدد خطاك قادر يا كريم

وشكرا علي اهتمامك يا عمي


بالتوفيق

امين يا رب العالمين :rolleyes:

و ان شاء الله لنا قعدة تانية بعد الامتحانات :Big:

تسلم ايدك يا باشا ومشكور على المجهود

عفواً يا باشا .... بعض ما عندكم

[almoha]

أن شاء الله

[amna_ali]

موضوع رائع جزاك الله خيرا

[botygool2010]

الف الف شكر

[CooLGhost]

الف شكر Skeleton_eel انا والله حبيتك وحبيت اللهجه المصريه العسل
انا من زمان نفسي أجرب لينوكس وموضوعك كان مفيد جداً
بس ياليت تفيدني برابط للنسخه الحديثه من لينوكس
والف شكر ياعسل وربنا يوفقك في دراستك
أخوك صالح من السعوديه
نسيت أسئلك سئوال مهم أنا ناوي أنزل اللينكس على الويندز ينفع ولا لا؟؟