صفحة 1 من 2 1 2 الأخيرةالأخيرة
النتائج 1 إلى 15 من 22

الموضوع: فقرات من كتاب " علشان ما تضربش على قفاك " معلومات مهمة يجب معرفتها جيدا !!!

  1. #1
    عضو الصورة الرمزية helioo
    تاريخ التسجيل
    Jan 2008
    المشاركات
    128
    معدل تقييم المستوى
    0

    Smile فقرات من كتاب " علشان ما تضربش على قفاك " معلومات مهمة يجب معرفتها جيدا !!!

    بسم الله الرحمن الرحيم
    اخوانى فى هذا المنتدى اثناء تجولى باحد المنتديات لقيت الموضوع ده وحبيت انقله ليكم
    وهو عبارة عن كتاب اسمه " علشان ما تضربش على قفاك " مؤلف الكتاب دا هو ظابط شرطه سابق اسمه عمر عفيفى والهدف من الكتاب دا هو توعيه المجمتع بحقوق كل فرد فيه من الشرطه والانتهاكات الى بتحصل لينا وهم اصلا ما لهمش اي حق خالص فى الي بيعملوه

    الكتاب دا وزع تقريبا 50 الف نسخه فى 10 ايام واتصادر من السوق

    دي كانت صوره من غلاف الكتاب



    رابط التحميل الكتاب كامل 40 ميجا هنا شكرا للاخ NaAZoOR على وصلة الكتاب الكاملة

    فقرات من الكتاب هنا حجم الكتاب مضغوط تقريبا 190 كيلوبايت
    الكتاب PDF وصورته نقية

    دى بعض فقرات الكتاب :


    الموضوع شكله طويل شويه

    لكنه فعلا شيق ... و هتحس انك فى حاجه شديده للمعلومات دي
    إمتي يدخل الظابط بيتك من غير إذن وميكونش غلطان؟

    إيه الحالات اللي ممكن الظباط يدخلوا فيها البيوت من غير إذن تفتيش من النيابة؟
    ج: من حق الشرطة يدخلوا البيوت لو حد من أصحاب البيت طلب منهم المساعدة أو النجدة من داخل البيت.

    س: زي إيه الحالات دي؟
    ج: مثلا لو كان فيه حريق أو تسرب غاز أو بوتاجاز من بيت أو شق

    س: من حق ظباط المطافي أو المرور يعملوا قضايا للناس؟
    ج: أيـوه من حقهـم لو لقـوا حاجـة صدفـة وهم بيقوموا بشغلهم «مخـدرات، سـلاح مثـلا» يمسكوها ويعملوا بيها محضر تلبس ويسلموه لأقرب قسم شرطة.

    س: وإيه حالات الضرورة الأخري؟
    ج: يجوز للشرطة اللي ليهم سلطة الضبطية دخول البيوت لو كانوا بيتعقبوا شخص له أمر ضبط وإحضار من النيابة أو المحكمة ومطلوب القبض عليه

    البيوت لها حرمة وتفتيشها له قواعد وأسس.. ولازم تعرفها

    إمتي تطلع الإجراء باطل وتتهم الظابط في قضية تزوير محضر وتلفيق اتهام؟
    للبيـوت حُـرمات، ولا يجوز لأي حد إنه يدخل بيت أو يفتشه إلا بأمر من النيابة العامة أو من المحكمة المختصة، ويكون أمر التفتيش مسبب، وأي حد يدخل بيت أو يفتشه بدون أمر قضائي يبقي ارتكب جريمة انتهاك حرمة مسكن.

    س: أعمل إيه لو كنت في بيتي ولقيت حد من الشرطة خبط علي الباب وعاوز يفتش بيتي؟
    ج: لازم تتمالك نفسك ومتخفش وتتحقق الأول من شخصيته وتشوف كارنيهه وتعرف هو مين وبيشتغل إيه وفين وتطلب منه يوريك أمر التفتيش الأول قبل ما تدّخله بيتك عشان يفتشه.

    س: إيه هو البيت؟
    ج: للبيوت حرمة، والبيت هو كل مكان خاص بيقيم فيه الإنسان فترة من الزمن طويلة كانت أو قصيرة بصفة دايمة أو مؤقتة، وأي حاجة تتبع البيت وملحقة بيه تعتبر بيت وليها نفس حرمة البيت، ولو كان ملحق بالبيت حديقة أو مخزن

    س: هل شقة المصيف اللي بيقيم فيها الشخص فترة بسيطة من الوقت كل سنة تعتبر بيت ولها نفس حرمة البيوت؟
    ج: شقة المصيف تعتبر بيت ولها نفس حرمة البيت.

    س: إيه هي الحالات اللي ممكن يفتشوا فيها شقتي أو بيتي؟
    ج: لازم يكون معاهم إذن تفتيش مسبب من النيابة العامة أو المحكمة المختصة، ويكون اللي بيقوم بتنفيذ إذن النيابة

    س: أعمل إيه لو حد حاول يفتش بيتي بالعافية من غير أمر بالتفتيش؟
    ج: تزعق وتلم عليه الجيران والناس اللي ماشيه في الشارع تشهّدهم عليه بأنه انتهك حرمة بيتك وارتكب جريمة انتهاك حرمة مسكنك وتعمله محضر علطول وتطلب النجدة علي122عشان تثبت حالة.

    س: أعمل إيه لو حد طلب مني إنه يفتش بيتي ومكنش معاه إذن بالتفتيش من النيابة وأحرجني؟
    ج: لازم ترفض لأنك لو وافقت علي إنه يفتشك يبقي سقط حقك في الرفض وتبقي إديته الحق في تفتيشك برضاك، ولو فيه حاجة عندك ممنوعة «سلاح مش مترخص» مثلا تبقي حالة تلبس ومن حقه يقبض عليك ويبقي التفتيش سليم مادام وافقت عليه بمزاجك بدون إكراه أو ضرب أو تهديد.

    س: لو كان الظابط معاه إذن تفتيش ومفتحتش له، من حقه يكسر الباب؟
    ج: الظابط لو معاه إذن بالتفتيش من حقه يكسر الباب ويفتش حتي أوضة النوم.

    س: بنسمع إن الظباط بيفتشوا وبعدين يطلّعوا اذن التفتيش، نعمل إيه في الحالة دي؟
    ج: تبعت علطول تلغرافات إن التفتيش تم في المكان الفلاني في الوقت الفلاني وياريت محدش يعرف الظباط إن حد بعت تلغرافات لأن في الحالة

    س: وهو ينفع يكون إذن التفتيش من النيابة شفوي أو في التليفون؟
    ج: لازم يكون مكتوب ولازم يكون مكتوب فيه اسم وكيل النيابة اللي طلعه واسم المتهم أو المتهمين المطلوب تفتيشهم والسبب وتاريخ صدور الأمر، لكن فيه حالات نادرة جدا ممكن يكون الإذن شفوي.

    س: وهو ممكن يصدر الأمر بالتفتيش لشخص والناس الموجودين معاه وقت التفتيش؟
    ج: أيوه ممكن.

    س: وهو ينفع التفتيش بالليل؟
    ج: التفتيش ينفع في أي وقت بالليل أو بالنهار وحتي في أيام العيد والعطلات الرسمية.

    س: ولو حد كان مستخبي في بيته وليه أمر ضبط وإحضار يقدروا يدخلوا البيت ويفتشوه بالقوة؟
    ج: من حقهـم يدخلـوا البيـت ويفتشـوا علي المتهم لتنفيذ الضبط والإحضار عليه.

    س: لو فيه أمر بالتفتيش لبيت من حقهم يفتشوا الناس اللي في البيت؟
    ج: مش من حقهم يفتشوا كل الموجودين في البيت لكن من حقهم يأمروهم بعدم التحرك، لكن إذا قامت وقت تفتيش بيت المتهم دلائل قوية ضد شخص موجود في بيت المتهم اللي بيتفتش إنه مخبي معاه حاجه أو شيء يفيد في كشف الحقيقة يقدر وقتها اللي بيفتش إنه يفتشه.«7»

    س: لو أنا مش في البيت أو في المكتب أو المحل يقدروا يفتشوه وأنا مش موجود؟
    ج: المفروض يفتشوه في حضور حد من أهل بيتك أو من اللي شغالين عندك أو في حضور2 شهود من قرايبك أو جيرانك ويثبتوا ده في محضر، وممكن يفتشوه في غير وجودك أو وجود أي حد من الناس.

    س: لو كان في البيت اللي بيتفتش مكاتيب أو أظرف مختومة ومقفولة من حقهم فتحها وتفتيشها؟
    ج: لو كان في البيت اللي بيتفتش أوراق مختومة ومقفولة بأي طريقة مش من حقهم فتحها وتفتيشها.

    س: من حق اللي بيفتش إنه يقطع المراتب والمخدات عشان يفتش جواها؟
    ج: لو كان اللي جاي بيدور علي حاجات مينفعش بالعقل إنها تكون في المـراتب والمخـدات زي إنـه يكـون جـاي يفتش علي مواشي مسـروقة

    س: أعمـل إيـه لـو كان في بيتي فلوس أو دهب وخايف تضيع وقت التفتيش؟
    ج: تبلغ الظابط اللي بيفتش إن عندك فلوس ودهب وحاجات غالية وخايف عليها وممكن تسلمها له في إيده قبل التفتيش علشان يسلمها لك تاني بعد التفتيش لو كانت ملهاش علاقة بالشيء اللي مطلوب التفتيش عنه.

    س: أعمل إيه لو اكتشفت بعد التفتيش إن فيه حاجات غالية اختفت من البيت؟
    ج: تنزل تقابل مأمور القسم وتحكي له عن الموضوع وتصمم تعمل محضر في القسم بالحاجات اللي اختفت وتعمل شكوي لمفتش الداخلية فوراً.

    س: هل من حق اللي بيفتش يكسر العفش وهو بيفتش البيت؟
    ج: مش من حق حد يكسر أي عفش في البيت، ولو كسروا أي حاجة في بيتك يبقوا ارتكبوا جريمة إتلاف، ومن حقك تعمل لهم محضر إتلاف وتطلب النجدة تعاين الحاجات اللي أتلفوها بدون سبب.

    س: هل من حق اللي بيفتش يخدني ع القسم لو فتش وملقاش أي حاجة ممنوعة؟
    ج: مش من حقه يخدك القسم طالما ملقاش عندك أي ممنوعات أو أي حاجة تعتبر جريمة

    الحالات اللي مكن يعملوا معاك فيها «تفتيش ذاتي» اقرأها كويس جداً

    س: إزاي بيتم التفتيش الذاتي وبيفتشوا إيه بالظبط؟
    ج: بيقوموا بتفتيش جسم المتهم وهدومه والحاجات اللي شايلها معاه والشنـط اللي شايـلها والحاجـات اللي بيستعملها، زي عربيته الخاصة ومحله أو مكتبه الخاص.

    س: أعمل إيه لو كنت ماشي في الشارع ومخبر من المباحث أو مندوب شرطة أو عسكري قاللي إنت مشتبه فيك وعاوز أفتشك أو قاللي طلع اللي في جيوبك؟
    ج: المخبر أو المندوب أو العسكري من حقه إنه يطلب بطاقتك «تحقيق شخصيتك» فقط لو كنت حطيت نفسك بمزاجك في موقف شك وريبة،

    س: أعمل إيه لو كنت ماشي بالليل وكان فيه لجنة وفيها ظابط وقفني وطلب بطاقتي وحاول يفتشني بنفسه أو حد من القوة اللي معاه، أو قاللي طلّع اللي في جيوبك؟
    ج: من حقهم يشوفوا بطاقتك فقط، وأُرفض إن حد يفتشك، وكلمهم بكل حسم ورجولة وثقة، وعرفهم إنك عارف حقوقك كويس، ومش من حق حد يفتشك بدون إذن من النيابة أو المحكمة أو من غير سبب طالما مفيش عليك حكم ولا طالعلك إذن تفتيش ولا ممسوك متلبس بجريمة.

    س: تعمل إيه الشرطة لو المتهم بلع حاجة ممنوعة «مخدرات مثلا»؟
    ج: لازم تعرضه علي طبيب مختص وهو اللي يثبت إذا كان مخبي حاجة جوه جسمه ولا لأ، بعد ما يعملوا له غسيل معدة في مستشفي حكومي.

    س: تعمل إيه الشرطة لو كان المتهم مخبي ممنوعات في مكان حساس من جسمه؟
    ج: لازم الشرطة تعرضه علي طبيب شرعى

    س: أعمل إيه لو كان طالع لي إذن تفتيش وطلبوا مني أقلع هدومي الداخلية؟
    ج: ترفض لأن مش من حق الشرطة تقلعك هدومك لأن ده يعتبر هتك لعرضك، ولازم تثبته وتعمل بيه محضر، وحاول يكون معاك شهود علي اللي حصلك. لو اللي هايتفتش واحدة ست إيه اللي يبعدها عن هتك العرض والتحرش؟ مش شرط اللي تفتش الأنثي تكون ضابطة شرطة.. ممكن دكتورة أو ممرضة يمكن تفتيش الأنثي أمام الضابط لكن بدون خلع الهدوم لـو كـانت اللي هتتفتـش أنثي يبقي لازم اللي تفتشها أنثي زيها يندبها الظابط أو النيابة أو المحكمة اللي بتجري التفتيش، لكن لو كان التفتيش ه

    س: أعمل إيه لو حد من الشرطة حاول يفتش مراتي أو بنتي أو أختي أو أمي تفتيش ذاتي أو حاول يقلعها هدومها علشان يفتشها؟
    ج: ترفض بشدة لأن ده شرفك ولازم تحافظ عليه، والظابط أو الأمين أو أي راجل من الشرطة لو مد إيد

    س: لازم اللي تفتش الأنثي تكون ظابطة شرطة؟
    ج: مش شرط تكون ظابطة شرطة، وممكن تكون دكتورة أو ممرضة من مستشفي أو من السيدات اللي شغالين في القسم أو أي أنثي يندبها الظابط للتفتيش.

    س: ممكـن الظابـط ينـدب دكتور راجل من المستشفي علشان يفتش أنثي؟
    ج: يكون إجراء باطلاً لأنه لازم اللي يفتش الأنثي تكون أنثي زيها مش راجل مهما كان الوضع.

    س: هل من حق الظابط يفتش شنطتها بنفسه؟
    ج: من حق الظابط يفتش شنطتها ويفتحها لو كان معاه أمر بالتفتيش أو كانت متلبسة بجناية أو بجنحـة عقوبتها أكثـر من 3 شهور حبس، ولو لقي فيها أي ممنوعات أو أي حاجة حيازتها تعتبر جريمة يعملها قضية ويكون إجراؤه سليماً.

    س: ولو كانت الأنثي ماسكة حاجه في إيدها من حقه يأمرها إنها تفتح إيدها ويظبط اللي جواها؟
    ج: من حق الظابط يأمرها بفتح إديها، ومن حقه يفتح إيدها بالقوة بنفسـه لـو رفضـت تفتـح إيـدها بمزاجها، ولو لقي فيها أي ممنوعات يعمل لها قضية لكن مش من حقه يفتشها تفتيش ذاتي أو يفتش جسمها أو يقلعها هدومها.

    س: هل ممكن يتم تفتيش الأنثي أمام الظابط؟
    ج: ممكن يكون شايفها وهي بتتفتش ذاتي لكن بدون ما تقلع هدومها أو ينكشف مكان من أماكن عورتها.

    س: أعمل إيه لو طلبت الأنثي اللي بتفتش مراتي أو بنتي إنهم يخلعوا هدومهم وهي بتفتشهم قدام الظابط؟
    ج: ترفض تماما، لأن دي تبقي جريمة هتك عرض لأن كشف جسم المرأة قدام الظابط

    س: أعمل إيه لو الظابط أو الأمين فتش مراتي غصب عني وعنها بالعافيه في أماكن حساسة من جسمها تمس الشرف والحياء؟
    ج: لازم تعملّه محضر هتك عرض ويكون معاك شهود ويتحبس الظابط أو الأمين بتهمة هتك عرض أنثي علاوة علي إن أي حاجة هيلاقيها ملهاش أي قيمة لأن الإجراء اللي قام بيه بتفتيشه لأنثي باطل من أساسه وأي دليل ناتج من إجراء باطل يكون باطلاً.

    س: تعمل إيه الشرطة لو كانت الأنثي مخبية أي ممنوعات جوه جسمها في مكان حساس؟
    ج: مش من حق أي حد من الشرطة يخرج ممنوعات من جوه جسمها أو يلمس جسمها من أساسه لكن من حقهم يرسلوها لطبيب في أي مستشفي حكومي ويقوم الدكتور بإخراج الممنوعات بنفسه بصفته خبيراً.

    القبض علي الناس بدون وجه حق تعرف حدود الشرطة إيه؟

    القبض علي الناس بدون وجه حق تعرف حدود الشرطة إيه؟ الشرطة ليها حدود عشان تحبس حد أو تحجزه، ولو حد منها حبس مواطن بدون أمر من القاضي أو من النيابة العامة أو مكنش في حالة من حالات التلبس يبقي ارتكب جريمة وخالف القانون، ويتعاقب عليها بالحبس أو بالغرامة.

    س: إيه عقوبة اللي يقبض علي حد ويحجزه بدون وجه حق؟
    ج: يتحبس أو يدفع غرامة لا تزيد علي 200 جنيه.

    س: هل معقول تكون عقوبة القبض علي الناس وتفتيشهم وحجزهم بدون وجه حق مجرد غرامة أقل من 200جنيه "يابلاش"؟
    ج: هو ده القانون لكن لو تم أي تعذيب بدني للمتهم أو تم تهديده بالقتل علشان يعترف بأي شئ تبقي العقوبة السجن المشدد، لكن لو مات الشخص المقبوض عليه من التعذيب يبقي اللي موته يتعاقب بعقوبة القتل العمد

    س: لو اللي قبض عليّ طلع عامل ظابط أو لابس ملابس الشرطة؟
    ج: تعمل له محضرعلي طول في القسم أو المركز اللي حصلك فيها الموضوع ده لأنه بيكون ارتكب جناية في حقك ويتسجن.

    س: ولو كان خد مني فلوس علشان يسيبني؟
    ج: خد منك فلوس أو مخدش، القبض علي الناس بانتحال صفة الشرطة جناية عقوبتها السجن المشدد، وأكيد هيكون عيل من العيال الحرامية اللي

    س: يعني إيه استعمال قسوة؟
    ج: استعمال القسوة استخدام عنف غير مبرر بدون داعي علشان يؤلم الناس في شرفهم أو جسمهم مهما قلت درجته.

    س: إيه عقوبة استعمال القسوة؟
    ج: : كل موظف أو مستخدم عمومي أمر بتعذيب متهم أو فعل ذلك بنفسه لحمله علي الاعتراف يعاقب بالسجن المشدد أو السجـن من ثلاث سنوات إلي عشر .وإذا مات المجني عليه يحاكم بالعقوبة المقررة للقتل عمداً.

    س: حتي لو كان معذبش بنفسه؟
    ج: كل موظف أو مستخدم عمومي أمر بتعذيب متهم أو فعل ذلك بنفسه لحمله علي الاعتراف يعاقب بالسجن المشدد أو السجـن من ثلاث سنوات إلي عشر .وإذا مات المجني عليه يحاكم بالعقوبة المقررة للقتل عمداً.

    لكمين لمين؟

    الكمين لمين؟
    س: يعني إيه كمين؟
    ج: المفروض إن مفيش حاجة اسمها كمين للناس، لأن الكمين بيكون للأعداء وإحنا لسنا أعداء للشرطة، لكن اللي بنشوفه بالليل اسمه لجنة لحفظ الأمن والنظام في الشارع واللي سماه كمين هم الحرامية وميصحش أبدا إن حد يقول إن الشرطة عاملة كمين للناس.

    س: إيه فايدة اللجان اللي بتكون في الشوارع بالليل في كل حتة؟
    ج: اللجان بتكون متكونة من ظابط القسم، وظابط مرور، وظابط مباحـث ومعـاهم بـوكس وأمنـاء شرطة وعساكر لحفظ الأمن والنظام في الشارع

    تفتيش عربيتك له قواعد وأصول إوعي الشنطة!

    س: أعمل إيه لو كنت ماشي بعربيتي والشرطة وقفتني وطلبت أفتح شنطة عربيتي؟
    ج: مش من حق الشرطة تفتش شنطة عربيتك بدون إذن تفتيش وأرفض تفتح شنطة عربيتك لأي حد مفيش معاه إذن تفتيش ليك أو لسيارتك.

    س: من حق الشرطة تفتيش صالون سيارتي الخاصة؟
    ج: مش من حق الشرطة تفتيش السيارات الخاصة بغير إذن من النيابة العامة أو من المحكمة أو في غير أحوال التلبس بجريمة أو بدون رضا أصحابها، أو حتي فتح أبواب السيارة.

    س: لو كنت راكب داخل عربيتي من حقهم يفتشوها؟
    ج: مش من حقهم

    س: لـو كنـت راكـب قطر أو أتوبيس من حق حد يفتشني أو يفتش شنطتي؟
    ج: من حق الشرطة يفتشوا القطر أو الأتوبيس بس مش من حق حد يفتشك أو يفتش شنطتك إلا بإذن من النيابة طالما كانت شنطتك معاك، لكن لو الشنطة جانبك وسألك دي شنطتك وقلت له إنها مش شنطتك يبقي من حق الظابط أو الأمين يفتشها علي أساس أنها ملهاش صاحب.

    س: ليـه الشرطـة بينزلوا الناس من الأتوبيسات ويفتشوهم ويفتشوا شنطهم وهم مسافرين الغردقة أو شرم الشيخ مثلا؟
    ج: ده إجراء مش قانوني وفيه تجاوز شديد واعتداء علي حرية الناس وحرماتهم، ولازم ترفض التفتيش إلا بإذن من النيابة أو إذا كان فيه حالة تلبس أو كنت موافق علي التفتيش بمزاجك.

    س: لو عربيتي مقفولة وراكنها تحت البيت هل من حق حد يفتشها؟
    ج: مش من حق حد يفتشها إلا بإذن من القاضي أو من النيابة.

    س: ولو عربيتي كانت في جراج جوه بيتي؟
    ج: في الحالة دي لازم تفرق بين جراج تحت عمارة ممكن أي حد يدخله يبقي من حقهم يفتشوها، لكن لو كانت في جراج جوه بيتك يبقي لازم أمر تفتيش للبيت لأن الجراج الملحق للبيت يعتبر له نفس حرمة وشروط تفتيش البيوت.

    س: معقول حد في القسم هيوافق يعمل محضر هتك عرض ضد ظابط مباحث شغال فيه؟
    ج: لازم تتمسك بحقك، ولو رفضوا يعملولك محضر تطلع علي المديريـة وتقابـل مفتش الـداخلية وتروح تعمل له محضر في النيابة.

    حد يفتشك او يفتش بيتك

    الحرية الشخصية للناس حق طبيعي مصان لا يُمس، ولا يتم القبض ولا تفتيش ولا حبس ولا تقييد حرية الناس ومنعهم من التنقل من مكان لمكان إلا بأمر من القاضي المختص أو من النيابة العامة ماعدا في حالات التلبس.

    س: يعني إيه تفتيش؟
    ج: التفتيش إجراء من إجراءات التحقيق اللي

    س: أعمل إيه لو حد قاللي إن معاه إذن بتفتيشي؟
    ج: لازم تمسك أعصابك ومتترعبش وتتمالك نفسك لمدة خمس دقايق فقط، وتتأكد الأول من شخصيته، وتطلب تشوف إذن التفتيش اللي معاه ولازم تتأكد من حاجات أساسية جدا في الإذن.

    س: هوه الظابط هيرضي يوريني الإذن؟
    ج: من حقك تشوف كارنيه اللي بيفتشك والإذن اللي معاه ولازم تقراه كويس جدا، وده حقك ولازم تتمسك بيه، ومتخليش حد يفتشك إلا بعد ما تشوف الإذن وتتأكد إنه سليم وساري المفعول، وميكونش الإذن باطل أو منتهي المدة.

    س: من حق الشرطة تفتيش المقبوض عليه؟
    ج: في كل الأحوال اللي يجوز فيها القبض علي المتهم بيجوز فيها تفتيشه، لكن لو كان المقبوض عليه أنثي لايجوز تفتيشها إلا بمعرفة أنثي زيها.

    س: والشرطة بتكلبش اللي بيتفتش؟
    ج: من حق الشرطة تسيطر علي الشخص اللي بيتفتش وتحد من حركته وحريته بالقدر اللازم فقط علشان تقدر تقوم بالتفتيش وميعطلش إجراءات التفتيش أو يرمي حاجة أو يهرب أو يعتدي علي حد من الشرطة أو الناس الموجودين في المكان.

    س: هل بيكون منصوص في إذن التفتيش علي القبض؟
    ج: مش شرط يكون إذن التفتيش فيه أمر صريح بالقبض علي المتهم المأذون بتفتيشه.

    س: وإيه الحاجات اللي لازم أتأكد منها في إذن التفتيش؟
    ج: لازم تتأكد من حاجات أساسية في إذن التفتيش وهي: > لازم يكون الإذن مكتوب مش شفوي ويكون مبني علي تحريات جدية. > الإذن يكـون عـن جنـايـة أو جنحة حصلت بالفعل مش لسه هتحصل في المستقبل، ويكون فيه دلايل كافية علي إن المتهم المأذون بتفتيشه هو اللي ارتكبها. > يكون الإذن صادر من النيابة المختصة أو من قاضي التحقيق المختص ويكون الإذن في دايرة اختصاصها. > يكون اللي بينفذ التفتيش معاه سلطة الضبطية وفي دايرة اختصاصه مش خارجها. > لو كان الإذن طالع لتفتيش بيت لازم يكون الإذن مكتوب فيه سبب التفتيش، وطبيعة الجريمة اللي بيتفتش البيت بسببها. > لازم وفـي أغـلب الأحـوال يـكون الإذن مكتوب مش شفوي ومتقبلش إنه يقولك إن الإذن نسيه في القسم أو هتشوفه بعد ما يفتشك. > لازم يـكون الإذن موقـع بخـط يد مصدره، وواضح فيه اسمه ووظيفته ولو كان الإذن مش موقع يبقي باطل وكأنه غير موجود من أساسه. > لازم يـكون الإذن واضـح وصريح إنه إذن تفتيش مش مجرد سؤال متهم أو استيفاء لمحضر. > لازم يـكون مـحدد في الإذن الاسـم الحقيقي أو اسم الشهرة للشخـص المطلـوب تفتيشـه أو للأشخاص والأماكن المأذون بتفتيشها، ومـبين فـيه نـوع الجريمـة المطلوب التفتيش لكشفها. > لازم يكون واضح في الإذن إيه اللي مطلوب تفتيشه بالظبط يعني مكتوب فيه لو كان مطلوب تفتيش المتهم فقط أو تفتيش المتـهم وعربيتـه، أو المتهـم ومكتبه، أو ا > لازم تشوف وقت صدور إذن التفتيش والمدة المذكورة فيه، ولازم تكون مدة الإذن محددة مش مفتوحة علي طول، ولو كان مش مذكور وقت ويوم صدورالإذن يبقي باطل. > ميكونش حد نفذ نفس الإذن عليك قبل كده، لأن إذن التفتيش ميصلحش للتفتيش غير لمرة واحدة فقط.

    س: مين اللي من حقه يقوم بالتفتيش؟
    ج: مـن حـق النيابـة وقاضي التحقيق والظباط والأمناء والصولات وشيـوخ الخفر، يعني من حق الشرطة اللي ليهم سلطة الضبطية فقط، لكن دايما اللي بيفتشوا بيكونوا من ظباط المباحث.

    س: هل بيكون مكتوب في الإذن اسم الظابط اللي بيفتش؟
    ج: مش لازم يكون مكتوب في الإذن اسم الظابط اللي بيفتش، ومن حق الظابط يستعين بزمايله لمساعدته في التفتيش حتي لو كان ملهمش سلطة ضبطية، لكن لو كان الإذن طالع باسم ظابط محدد بالاسم، فلا يجوز ليه ندب غيره لتنفيذ التفتيش مادام الإذن مش عاطيه الحق في ندب غيره.

    س: اللي بيقومـوا بتنفيـذ إذن التفتيـش من الشرطة بيكونوا لابسين ميري ولاّ ملكي؟
    ج: ممكن يكونوا لابسين ميري وممكن يكونو لابسين ملكي، وممكن يكون بعضهم لابس ملكي ومعاهم ناس لابسين ميري، ومتفرقش ميـري ولا ملكـي، المهـم تتأكد من شخصيتهم ويكونو شرطة ومعـاهم إذن تفتيـش سليـم مش نصابين وعاملين عليك ظباط وعاوزين يقشطوك ويقلبوك.

    س: هل من حق العساكر والمخبرين ومناديب الشرطة تفتيش الناس؟
    ج: العسـاكر والمخبريـن ومناديب الشرطة مش من حقهم التفتيش علشان ملهمش سلطة الضبطية.

    س: ولو كان اللي بيفتش البيت مندوب أو عسكري لكن معاهم ظابط وكانوا هما اللي بيفتشوا مش الظابط؟ ج: الظابط من حقه يستعين بالناس اللي شغالين معاه في التفتيش بشرط يتم التفتيش تحت رقابته وإشرافه، لكن لو تم التفتيش في غير حضور الظابط وبدون إشرافه يكون التفتيش باطل لأن مش من حق المناديب وعساكر الشرطة التفتيش لوحدهم.

    س: هل ممكن وكيل النيابة يقوم بالتفتيش بنفسه؟
    ج: مـن حـق وكيل النيابة يفتش بنفسه، لكن جرت العادة إن النيابة والمحكمة بيندبو ظباط المباحث للتفتيش، ولو نزلت النيابة تفتش بنفسها بيكون معاهم قوة من الشرطة علشان تأمن المأمورية وتأمن المكان.

    س: لو النيابة قامت بالتفتيش هل بيكون مع وكيل النيابة إذن التفتيش؟
    ج: ممكن وفي كتير من الأحوال بيكون معاه إذن التفتيش، لكن حتي لو قام وكيل النيابة بالتفتيش

    س: إيه شكل إذن التفتيش؟
    ج: إذن التفتيش بيكون مكتوب بخط اليد وموقَّع من وكيل النيابة أو من قاضي التحقيق وبيكون مختوم بختم النيابة وأحيانا بيكون بدون ختم، والقانون محددش له شكل معين.

    س: وفين بيتم تنفيذ الإذن بالتفتيش؟
    ج: بيتم تنفيذ إذن التفتيش في أي مكان، المهم يكون في دايرة اختصاص النيابة أو المحكمة اللي مطلعَّاه ودايرة اختصاص اللي بينفذه.

    س: أعمل إيه لو الإذن بالتفتيش كانت مدته منتهية؟
    ج: من حقك ترفض التفتيش عشان لا يجوز التفتيش بإذن تفتيش منتهي المدة، وأي دليل ينتج عنه ملهوش أي قيمة لو كان الإذن انتهي ومتجددش لمدة تانية من النيابة أو المحكمة.

    س: هل ممكن إذن التفتيش يتجدد لمدة تانية؟
    ج: إذن التفتيش ممكن يتجدد من النيابة أو المحكمة لمدة تانية، ولو تم تجديده يجوز التفتيش بيه.

    س: إزاي بتتحسب مدة الإذن بالتفتيش؟
    ج: يوم صدورالإذن غير محسوب من المدة، وبتتحسب مدة الإذن ابتداء من اليوم التالي لصدوره.

    س: هل ممكن أتفتش بإذن تفتيش واحد أكتر من مرة؟
    ج: الإذن بالتفتيش زي عود الكبريت ميصلحش للتفتيش غير لمرة واحد فقط.

    س: إزاي بيتم تنفيذ إذن التفتيش؟
    ج: القانون محددش طريقة معينة لتنفيذ إذن التفتيش، وترك طريقة التفتيش لتقدير المكلف بالتفتيش، وأعطي له الحق إنه يستعين برجالته ومعاونيه في عملية التفتيش بحيث يكونو علي مرآي منه وتحت إشرافه.

    س: لازم اللي بيفتش يدخل من الباب ولاَّ ممكن يدخل من أي مكان؟
    ج: من حق اللي بيفتش يدخل من أي مكان وممكن يدخل من الشباك أو من السطوح أو من البلكونة.

    س: من حق اللي بيفتش يستخدم القوة في التفتيش؟
    ج: من حق اللي بيفتش يستخدم القوة بالقدر المناسب علشان يسيطر علي المكان، ويقيد حرية الشخص اللي بيفتشه من غير ما يعرض حياته أو سلامته للخطر.

    س: من حق الظابط اللي بيفتش يخرج أي ممنوعات من أماكن عورة المتهم؟
    ج: يبقي ارتكب جريمة هتك عرض سواء كان المتهم اللي بيتفتش راجل أو أنثي.

    س: هل ضروري يكون الشخص اللي بيتم تفتيش بيته موجود وقت تنفيذ التفتيش؟
    ج: لا مش لازم يكون الشخص المتهم المأذون بتفتيشه موجود وقت إجراء التفتيش.

    س: لازم يكون إذن النيابة مع الظابط اللي بيفتش؟
    ج: في بعض الأحوال النادرة ممكن التفتيش بدون ما يكون مع الظابط اللي بيفتش الإذن في إيده وقت التفتيش لكن ده بيكون في أضيق نطاق ممكن، ولازم يكون الإذن مكتوب وله أصل في أوراق القضية اللي بيتحقق فيها.

    طلب الحضور للنيابة

    س: إيه هو طلب الحضور للنيابة؟
    ج: هو طلب شخص للحضور للنيابة في وقت محدد

    س: إيه الضرر لو جاني طلب حضور للنيابة ومروحتش؟
    ج: مفيش مسئولية عليك لكن لو مروحتش ومقدمتش عذر تقبله النيابة، يطلع لك أمر ضبط وإحضار وتنفذه عليك الشرطة أو تقبض عليك المباحث، وتوديك للنيابة مقبوض عليك.

    س: إيه شكل ورقة طلب الحضور للنيابة؟
    ج: دي ورقة طالعة من النيابة للحضور لمقر النيابة عضو من أعضاء النيابة لسؤال شخص في محضر أو الإدلاء بالشهادة.

    س: أعرف ازاي إذا كنت متهم ولا مطلوب للشهادة؟
    ج: بيكون مكتوب علي طلب الحضور إذا كنت متهم ولا شاهد

    فيه تفتيش اسمه باطل ومتجاوز للحدود.. تحب تعرفه؟

    س: يعني إيه تفتيش باطل؟
    ج: يعني تفتيش تم في غير الأحوال اللي صرح بيها القانون، وأي دليل ينتج من تفتيش باطل مالوش أي لازمة لأن ما ُبني علي إجراء باطل بيكون باطل، والمحكمة بتستبعد من أساسه أي شهادة للظابط اللي بيقوم بإجراء باطل ضد المتهم.

    س: إيه اللي يبطل التفتيش؟
    ج: إن التفتيش يتم بعد تاريخ الإذن بالتفتيش أو يكون وكيل النيابة مش موقع عليه، أو مفيش تاريخ مكتوب عليه، أو لو كان طالع إذن التفتيش باسم ظابط معين يبقي مينفعش غيره يعمله أو يتم التجاوز عن حدود الإذن أو كان فيه تعسف في تنفيذ التفتيش.

    س: لـو الظـابط لقي الحاجـة اللي حضر علشان يفتش عنها في إذن التفتيش هل من حقه يفتش عن حاجات ممنوعة تانية؟
    ج: لو الظابط لقي الحاجات اللي حضر علشان ينفذ الإذن بالتفتيش عليها مش من حقه يفتش عن حاجات تانية، مثلا لو كان الظابط حضر لتنفيذ إذن بالتفتيش عن سلاح أبيض ومسك الخنجر اللي ارتكـب بيـه المتهـم الجريم .

    الموضوع منقول من هذا المنتدى

    لان صاحب الموضوع الاصلى كاتب هذا السطر
    يسمح بنقل الموضوع فقط فى حاله وضع رابط للموضوع الاصلي( هنا ) عند النقل
    مع التوصيه باي شخص ينقل الموضوع باضافه نفس الرابط ( و الله رقيب )

    انتهى النقل .......g:

    اهم حاجة تعرف الحاجات دى كويس علشان ما تضربش على قفااااااااااااااك (z)

    رابط التحميل الكتاب كامل 40 ميجا هنا شكرا للاخ NaAZoOR على وصلة الكتاب الكاملة

    فقرات من الكتاب هنا حجم الكتاب مضغوط تقريبا 190 كيلوبايت
    الكتاب PDF وصورته نقية

  2. #2
    عضو برونزي الصورة الرمزية alsadinet
    تاريخ التسجيل
    Feb 2007
    المشاركات
    1,319
    الدولة: Netherlands
    معدل تقييم المستوى
    19

    رد: فقرات من كتاب " علشان ما تضربش على قفاك " معلومات مهمة يجب معرفتها جيدا !!!

    والله من الطبيعي أن يهرب مؤلف الكتاب لخارج مصر !!!!
    [CENTER][SIGPIC][/SIGPIC][/CENTER]

    [CENTER][IMG]https://www.upload4arab.com//files/894/rapita5.gif[/IMG][/CENTER]

  3. #3
    عضو برونزي الصورة الرمزية AhmadAllRise
    تاريخ التسجيل
    Oct 2007
    المشاركات
    1,067
    الدولة: Jordan
    معدل تقييم المستوى
    0

    رد: فقرات من كتاب " علشان ما تضربش على قفاك " معلومات مهمة يجب معرفتها جيدا !!!

    شكراً على موضوعك ... أتسائل حالياً بعد قرائتي لموضوعك هل فعلاً يجب على المواطنين في مصر

    قراءة هذا الكتاب ؟

    أعني هل فعلاً أن حقوق المواطنين منتهكة و ضائعة من قبل الشرطة أو موظفي الأمن المصري ؟

    الذي فهمته من موضوعك و بعد قراءة مقتطفات من الكتاب وجود شيء من الهمجية و عدم الإحترام

    للمواطن المصري من قبل رجال الأمن ؟ ! صحيح ؟؟
    ________________________________________________
    [CENTER][SIZE="3"][COLOR="blue"]وما من كاتب إلا سيفنى - - - ويبقي الدهر ما كتبت يداه
    فلا تكتب بكفك غير شيء - - - يسرك في القيامة أن تراه
    [/COLOR][/SIZE][/CENTER]
    [CENTER][SIGPIC][/SIGPIC][/CENTER]
    [CENTER][thread=73199] [COLOR=seagreen][FONT=Comic Sans MS][SIZE=7][COLOR=red]مُحمَّد[/COLOR][/SIZE][/FONT]ْ [/COLOR]([FONT=Comic Sans MS][SIZE=5] [COLOR=black]صلى الله عليه و سلم[/COLOR][/SIZE][/FONT] ) [SIZE=4][COLOR=blue]كأنك [/COLOR][COLOR=blue]تراه[/COLOR] ...برنامج جميل - د.عائض القرني[/SIZE] [SIZE=4][COLOR=blue][/COLOR][/SIZE][/thread][/CENTER]

  4. #4
    I LOVE SA
    زائر

    رد: فقرات من كتاب " علشان ما تضربش على قفاك " معلومات مهمة يجب معرفتها جيدا !!!

    شكرا لك على الجريدة التي اتيت بها سوف افكر بقرائتها بعد عودتي من الكلية

  5. #5
    عضو محترف الصورة الرمزية NaAZoOR
    تاريخ التسجيل
    Feb 2003
    المشاركات
    8,698
    الدولة: Egypt
    معدل تقييم المستوى
    46

    رد: فقرات من كتاب " علشان ما تضربش على قفاك " معلومات مهمة يجب معرفتها جيدا !!!

    اقتباس المشاركة الأصلية كتبت بواسطة AhmadAllRise مشاهدة المشاركة
    شكراً على موضوعك ... أتسائل حالياً بعد قرائتي لموضوعك هل فعلاً يجب على المواطنين في مصر

    قراءة هذا الكتاب ؟

    أعني هل فعلاً أن حقوق المواطنين منتهكة و ضائعة من قبل الشرطة أو موظفي الأمن المصري ؟

    الذي فهمته من موضوعك و بعد قراءة مقتطفات من الكتاب وجود شيء من الهمجية و عدم الإحترام

    للمواطن المصري من قبل رجال الأمن ؟ ! صحيح ؟؟
    الوضع أصبح أسوأ من ذلك بكثير .....

    الكتاب الأصلي على ملف pdf وحجمه 40 ميجا .. سأقوم برفعه وإدراج الوصلة في أقرب فرصة ان شاء الله.

  6. #6
    عضو برونزي الصورة الرمزية AhmadAllRise
    تاريخ التسجيل
    Oct 2007
    المشاركات
    1,067
    الدولة: Jordan
    معدل تقييم المستوى
    0

    رد: فقرات من كتاب " علشان ما تضربش على قفاك " معلومات مهمة يجب معرفتها جيدا !!!

    الوضع أصبح أسوأ من ذلك بكثير .....

    الكتاب الأصلي على ملف pdf وحجمه 40 ميجا .. سأقوم برفعه وإدراج الوصلة في أقرب فرصة ان شاء الله.
    لا قوة الإ بالله ....

    أعتقد في أحد من الأخوة رفع هذا الكتاب قبل هذه المرة , ناسي إسم الأخ حالياً ..

    لكني نزلت الكتاب عندي مع أني أردني , أكون صريح معك لم أجد في الكتاب أي شيء غير منطقي

    أو غير قانوني حتى يتصادر من الأسواق , هو كلام عادي و هو من حقوق أي مواطن في أي بلد ( المفروض ),

    لكنه إتصادر و خلص و للأسف يدل على تخلف العرب عن العالم المتحضر .. .

    ما المانع من أن يسأل المواطن مثلاً عن سبب تفتيش منزله و طلب ورقة رسمية !

    أنا عن نفسي معجب بقوانين و أنظمة الغرب ( Like usa ) , و بالمقابل معجب أيضاً بحرية الرأي و التعبير

    عندهم و بأسلوب النقد البناء و الهادف لحكوماتهم و رئاستهم , قل ما تريد و أفعل ما تريد لكن في حدود

    النظام و هذا أكبر دليل على تقدمهم .

    حدود النظام في غالبية الوطن العربي : قل ما نريد ( ما تريد الحكومة طبعاً ) و أفعل ما نريد !!
    ________________________________________________
    [CENTER][SIZE="3"][COLOR="blue"]وما من كاتب إلا سيفنى - - - ويبقي الدهر ما كتبت يداه
    فلا تكتب بكفك غير شيء - - - يسرك في القيامة أن تراه
    [/COLOR][/SIZE][/CENTER]
    [CENTER][SIGPIC][/SIGPIC][/CENTER]
    [CENTER][thread=73199] [COLOR=seagreen][FONT=Comic Sans MS][SIZE=7][COLOR=red]مُحمَّد[/COLOR][/SIZE][/FONT]ْ [/COLOR]([FONT=Comic Sans MS][SIZE=5] [COLOR=black]صلى الله عليه و سلم[/COLOR][/SIZE][/FONT] ) [SIZE=4][COLOR=blue]كأنك [/COLOR][COLOR=blue]تراه[/COLOR] ...برنامج جميل - د.عائض القرني[/SIZE] [SIZE=4][COLOR=blue][/COLOR][/SIZE][/thread][/CENTER]

  7. #7
    عضو فضي
    تاريخ التسجيل
    Sep 2007
    المشاركات
    754
    الدولة: Qatar
    معدل تقييم المستوى
    0

    رد: فقرات من كتاب " علشان ما تضربش على قفاك " معلومات مهمة يجب معرفتها جيدا !!!

    ياريت لو حد عنده الكتاب ده بى دى اف
    بس يكون كتابى لان اللى عندى كامل وبى دى اف بس الكتاب متصور فعرضه مش كويس

  8. #8
    عضو فضي الصورة الرمزية mohamed2121
    تاريخ التسجيل
    Apr 2005
    المشاركات
    2,317
    الدولة: Egypt
    معدل تقييم المستوى
    21

    رد: فقرات من كتاب " علشان ما تضربش على قفاك " معلومات مهمة يجب معرفتها جيدا !!!

    للأسف كل شىء منتهك فى مصر

  9. #9
    عضو محترف الصورة الرمزية NaAZoOR
    تاريخ التسجيل
    Feb 2003
    المشاركات
    8,698
    الدولة: Egypt
    معدل تقييم المستوى
    46

    رد: فقرات من كتاب " علشان ما تضربش على قفاك " معلومات مهمة يجب معرفتها جيدا !!!

    الوصلة التي وعدت بها للكتاب كامل ...

    هيئة pdf و حجم 40 ميجا تقريباً.

    علشان ماتضربش على قفاك

  10. #10
    Ya2oot Afandy
    زائر

    رد: فقرات من كتاب " علشان ما تضربش على قفاك " معلومات مهمة يجب معرفتها جيدا !!!

    شكرا استاذ عمر, وجارى التحميل ..........

  11. #11
    عضو
    Hardware Nerd

    تاريخ التسجيل
    May 2008
    المشاركات
    190
    الدولة: Egypt
    معدل تقييم المستوى
    0

    رد: فقرات من كتاب " علشان ما تضربش على قفاك " معلومات مهمة يجب معرفتها جيدا !!!

    شكرًا على الإفادة
    ولكن لى تساؤل...
    هل بعد قانون الإرهاب الجديد والحوارات الجديدة دى الكلام دا اتغير ولا ايه؟

  12. #12
    عضو برونزي
    تاريخ التسجيل
    Apr 2008
    المشاركات
    1,430
    معدل تقييم المستوى
    17

    رد: فقرات من كتاب " علشان ما تضربش على قفاك " معلومات مهمة يجب معرفتها جيدا !!!

    جزاك الله خيرا اخى الكريم وكل سنه وانت طيب

  13. #13
    عضو برونزي الصورة الرمزية one-zero
    تاريخ التسجيل
    Jul 2007
    المشاركات
    8,296
    معدل تقييم المستوى
    65

    رد: فقرات من كتاب " علشان ما تضربش على قفاك " معلومات مهمة يجب معرفتها جيدا !!!

    شكرا على كتاب يا جماعة
    [CENTER][SIZE=4]{[COLOR=red]وَإِذْ يَمْكُرُ بِكَ الَّذِينَ كَفَرُوا لِيُثْبِتُوكَ أَوْ يَقْتُلُوكَ أَوْ يُخْرِجُوكَ وَيَمْكُرُونَ وَيَمْكُرُ اللَّهُ وَاللَّهُ خَيْرُ الْمَاكِرِينَ[/COLOR]}[/SIZE][SIZE=4]…[/SIZE][SIZE=6][SIZE=4](الأنفال:30)
    [URL="https://www.facebook.com/pages/yasserauda/215036411882800"]للتواصل معي عبر الفيس بوك اضغط هنا
    [/URL][URL="https://www.youtube.com/watch?v=37LoZWjv1HE&feature=player_profilepage"][/URL][URL="https://www.facebook.com/pages/yasserauda/215036411882800"] صفحتي الخاصه على الفيس بوك
    [/URL][URL="https://www.facebook.com/pages/Mentored-Learning-New-Horizons-Dubai/234720379925819"]صفحة التعليم الارشادي على الفيس بوك
    [/URL][URL="https://www.youtube.com/user/yasserramzyauda"]قناتي على اليوتيوب
    [/URL][/SIZE][/SIZE][SIZE=3][URL="https://yasserauda.blogspot.com/"]مدونتي الخاصه[/URL][/SIZE][/CENTER]

  14. #14
    عضو فضي الصورة الرمزية saqr8000
    تاريخ التسجيل
    Feb 2008
    المشاركات
    847
    الدولة: Canada
    معدل تقييم المستوى
    0

    رد: فقرات من كتاب " علشان ما تضربش على قفاك " معلومات مهمة يجب معرفتها جيدا !!!

    كتاب فعلا كثير محتاجينه بس اعتقد بلا فائده

    Cisco:CCNA,CCNA sec,CCNP,CCSP,CCVP,CCIE-Sec in progress
    Nortel :NCSS Support Specialist,NCDS Design Specialist
    Juniper: JNCIA-ER,JNCIA-FWV
    MS:MCSE +Security

  15. #15
    عضو برونزي الصورة الرمزية 7amasa7
    تاريخ التسجيل
    Dec 2007
    المشاركات
    1,304
    معدل تقييم المستوى
    0

    رد: فقرات من كتاب " علشان ما تضربش على قفاك " معلومات مهمة يجب معرفتها جيدا !!!

    مشكور على الكتاب ياباشا وربنا يعدى المرحله دى على خير
    [CENTER][B][SIZE=5][COLOR=blue]لا اله الا انت سبحانك انى كنت من الظالمين[/COLOR][/SIZE][/B][/CENTER]

صفحة 1 من 2 1 2 الأخيرةالأخيرة

المواضيع المتشابهه

  1. مشاركات: 0
    آخر مشاركة: 21-03-2012, 12:28
  2. مشاركات: 5
    آخر مشاركة: 09-12-2009, 21:07
  3. حصريا كتاب ازاى ما تضربش على قفاك
    بواسطة memoragaa في المنتدى الأرشيف
    مشاركات: 7
    آخر مشاركة: 18-04-2008, 18:47
  4. معلومات مهمة "Red Hat Certified Engineer "
    بواسطة amrsalaam في المنتدى الأرشيف
    مشاركات: 2
    آخر مشاركة: 13-12-2006, 12:08

الكلمات الدلالية لهذا الموضوع

المفضلات

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •