اطلب ما تريد من دبي الى الاخوه السعودين !!

**DDesigns** · 07-01-2004, 04:52

السلام عليكم

كيف حالكم شباب ؟؟

الصراحه شباب انا روحاتي وجياتي الى دبي الصراحه كثرت وحبيت شوي اني استفيد منها شوي ..

فا قلت خليني اشوف الشباب في السعوديه عندنا شنو محتاجين مع كسب مبلغ بسيط على الاقل نستفيد بشيء ..

انا ان شاء الله عندي روحه بعد تقريبا 10 ايام يعني على تاريخ 17 تقريبا وراح اقعد هناك بين 3 الى 5 ايام .

فا لو واحد يبي اي شيء هناك يتعلق بالكمبيوتر او الالكترونيات مثل الجوالات انا حاضر ..

انا سبق واحضرت الكثير من الاغراض لشباب عندنا بس الظاهر ان الطلبات خلصت فا قلت خليني اشوف النيت يمكن فيه ناس محتاجين شيء ..

وعلشان اكون على بينه من اول شيء انا صراحه راح اخذ 100 ريال على كل طلبيه ( ما ادري اذا كان غالي ولا لا !!! وش رايكم ؟؟ )

ان شاء الله كل القطع متوفره هناك من كروت شاشه الى هاردديسكات الى سواقات كل شيء جديد ..

فا من يريد اي شيء انا حاضر ..

واذا كان يبي رقم جوالي يرسلي على المنتدى ..

تحياتي ......... :D :D

**ابونواف** · 07-01-2004, 18:14

والله فكره:cool:

بس بصراحه انت طماع:D 100 ريال يكون وصلت لنفس مستوى الاسعار في السعوديه

الا اذا كان قصدك 100 ريال على كل الشحنه :D

**Digital** · 07-01-2004, 20:20

ههههههههه 100 ريال و80 ريال لل dhl اشتري من هنا اصرف

**DDesigns** · 08-01-2004, 01:07

هههههههه لا انت فهمتني غلط .... يا اخ ديجيتال ..

اول شيء انا اعرف اجيب اسعار جيده ..

وثاني شيء ان اتكلم عن هذه الرحله فقط .. يعني انا راح اروح الى دبي مره وحده بعد 10 ايام تقريبا وبعدين اجلس 4 ايام تقريبا وبعدين ارجع .

فا ما راح يكون اي DHL او اي شيء ثاني يعني توصيل انا بنفسي ..

ولكن اذا كنت تقصد التوصيل الى الرياض فا ما شاء الله الشباب والمعارف كثيرين يروحون كل اربعاء هناك .

انا الصراحه اشوف ان مبلغ 100 زين ولا وش رايكم ..

خصوصا ان اسعار القطع في السعوديه ليست كما تقولون فرق 100 او 200 بل هي اكثر واكبر مثال كروت الشاشه .

حيث شريت كرت شاشه هيركوليز 9800 XT و 256 ميجا وكان فرق السعر اكثر من 500 ريال يمكن يوصل 700 ريال .

ها وش رايكم ؟؟

وايضا الكلام على الجوالات حدث ولا حرج الفرق بالمئات .

**GroupWar** · 08-01-2004, 12:25

يا جماعة الخير

انتم باخلين ربح 100 ريال على الرجال ليش؟ والله العظيم انه يستاهلها ولو كان ال DHL أرخص منه !!

ثاني حاجة ياريت كان فرق السعر 100 ريال بس!! ماكنش حد غلب مثل مايقولون اخوانا المصريين

وثالث حاجة .. هل تتوقع انك راح تكلم ال DHL وتقول لهم "روحوا المحل الفلاني واشتروا لي كرت الفيديو الي رقمة كذا من ماركة كذا وابعثوه لي البيت .. بس بسرعه الله يخليكم"
وآخر المطاف تعطيهم 100 ريال؟

معليش اسمحولي ان كنت اكتب بعصبية شوي .. بس والله كسر خاطري اخونا DDesigns !

**ابونواف** · 08-01-2004, 14:21

GroupWar
لا تعصب والله تستاهل انت وDDesigns كل خير بس نحتاج تفاصيل اكثر يعنى لو الطلبيه كبيره مثلا كميه من cpu

**DDesigns** · 08-01-2004, 14:42

مشكور اخوي GroupWar

انا الصراحه شفت ان مبلغ 100 هو افضل شيء لان اقل من كذا راح يكون علي تعب على مبلغ تافه ..

=========

ابببببب والله ما حسبت حساب الكميه الكبيره !!!

ولكن مو مشكله برضوا اقدر اجيبهم طبعا على حسب الكميه ..

يعني مو مشكله اجيب الدفعه كلها واخليها عند صديقي في البحرين وادخل نصها السعوديه وبعدين عندي واحد زميلي في الاسبوع يروح مرتين تقريبا للبحرين واخليه يجيب النصف الثاني .

هااااا وش رايكم ؟؟

وكم ناوين تدخلون معالجات يعني مثلا 20 معالج ؟؟

**DDesigns** · 08-01-2004, 14:48

يعني شوف انا عندي معارف في جمارك السعوديه في البحرين وعندي معارف في جمارك مطار الدمام بس المشكله اللي افكر فيها هي جمارك مطار البحرين هل يسون لي مشاكل على الكميه اللي بدخلها ؟؟

لاني انا اطير عن طريق البحرين ارخص .

**Om51** · 08-01-2004, 15:55

بشكل عام 100 ريال مقبولة , والرجال بيكسب وهذا من حقه
عموما , تقدر توصله لجدة ؟
أفكر في المبرد Zalman مادري ويش موديله , هذا الي دائما ينصح فيه استاذ التبريد HUMAN , يجي منه نحاسي وآخر ألمنيوم بقاعدة نحاس , (أظنك عرفته ؟ )

فلو تقدر توصلهم لجدة ( لا تقلي شحن ولا Aramex ) وحصلتهم بسعر يناسبني فراح آخذلي واحد ان شاء الله
(وطبعا في هذي الحالة راح اتفاوض معاك في ال100 ريال )

**DDesigns** · 08-01-2004, 17:08

هههههههه انت تامر امر اخوي ..

طيب لو تعطيني الموديل بالضبط او الشكل حتى اشوف لك كم سعرها ..

انا تذكرت الزيلمان وهي موجوده عندنا اللي يكون شكلها يشبه الورده صح !!

بس هي تشتغل على البانتيوم 4 و AMD 64 بس هذا اللي اذكره وكان سعرها بين 150 الى 250 ريال يعني ما اذكر بالضبط ناسي !!!!!!

**النسر2000** · 08-01-2004, 17:58

اخى Om51 موديل النحاس هو CNPS7000-CU
والالومنيوم هو CNPS7000A-ALCU

**ابونواف** · 08-01-2004, 17:58

DDesigns
شوف ياعم انا اول واحد ياخذ منك اى كميه من ال CPU طبعا البوكس اذا كان السعر طيب؟؟؟؟؟؟؟؟ هذا اولا

ثانيا جمارك البحرين وهذا خبر اكيد يستلمون منك اى قطعه خاصه الكميات الكبيره فى المطار ويدفعونك 100 ريال مقابل توصيل هذى القطع معك الى جمارك الجسر وبعدها انت تتصرف وسلامتك

**Mubarak** · 08-01-2004, 18:10

أخوي Ddesigns مبلغ 100 درهم على الطلبية في وجهة نظر شرعية ، لأنه يمكن يوصل إلى أن يكون (غبن) فالأصل أن تضع نسبة مؤوية على قيمة البضاعة ، فمثلا 10%. السبب هو أنك ستجد من سيطلب منك بضاعة قيمتها 50 درهم ، فهل ستجعلها بقيمة 100 ريال إضافي؟ بينما قطعة أخرى قد تشتريها بقيمة 1000 درهم وحجمها كبير يأخذ حيزا من الشحن بنفس القيمة.

**DDesigns** · 08-01-2004, 20:12

السلام عليكم

والله يا اخوي ابوا نواف انا حاضر مو مشكله ..

انا سألت واحد خويي وقالي نفس كلامك ادفع 100 علشان التوصيل ..

طيب بس انت كم ناوي تاخذ كميه ؟؟

وايش انواع المعالجات ؟؟ يعني كم اسعارهم التقريبيه ؟؟

طيب انا مثلا اقدر اخلي راعي المحل يسوي فاواتير وهميه بسعر اقل علشان ما ياخذون علي جمرك زياده لو مثلا ما كنت اعرف احد في الجمرك (صح ) ولا لا ؟؟

عموما انا بكلم خويي اللي يشتغل في الجمرك وبقوله اني بدخل كميه تجاريه وبشوف ايش يقول لي ..

بس انت لازم تقول لي كم ناوي تدخل يعني كم حبه ؟؟

===================

اخوي هاردوير ...

والله اللي انت تشوفه واللي الشباب يشوفونه انا اشوف النسبه جيده خصوصا في الكميات الكبيره هههههههه لووووول ( مثل اخوي ابو نواف )

والله يا شباب انا ما تهمني 100 ولا نسبه اهم شيء احس ان تعبي وطلعتي وفرفرتي على المحلات ووقتي اللي يروح يسوى شيء يعني ما تسوى مثلا اجيب معالج واحد واخذر عليه مثلا 50 ريال !!!! يعيني احس انها ما لها معنى .

طيب وش تقترحون يا شباب النسبه تكون ؟؟

تحياتي .......