السلام عليكم ورحمة الله وبركاته
ال ُEmbedded Systems هي كل جهاز يتوفر فيه صفتان اساسيتان هما:
1-Intelligence
Stand Alone-2
وهذتان الصفتان المقصود بهما هو انه يمكن برمجة هذه الاجهزة بحيث تعمل هذه الاجهزة بشكل تلقائي ودون تدخل من المستخدم,ولايضاح الفكرة ساعطي لك بعض الامثلة:
*الموبايل هو ايمبدد سيستم...لانك لما بتيجي تعمل اي مكالمة كل اللي بتعمله انك بتضغط علي زرار الاتصال وبس...هل انت تعرف ايه اللي بيحصل بمجرد ما دوست عالزرار؟هل تعرف ايه الخطوات اللي بتتم بعد كدة؟هل انت اللي بتدي امر للاشارة انها تخرج من موبايلك وتروح لابراج الارسال وبتتحكم في مسارها؟...اكيد طبعا لا...الموبايل هو اللي بيعمل كل ده من نفسه بدون ادني تدخل منك.
*الغسالة الفول اوتوماتيك ايضا ايمبدد سيستم...لانك بتحط فيها الملابس وبعدين تظبطها علي برنامج معين وتدوس علي زرار التشغيل وتسيبها تشتغل مع نفسها دون اي تدخل منك بردو...وهي اللي بتتحكم في درجة حرارة المية ومدة الدوران ومدة العصر والحاجات دي كلها...هل انت اللي ظبطت الكلام ده كله؟طبعا لا...انت بس ظبطت البرنامج اللي هي هتشتغل عليه وهي الي عملت كل الشغل ده تلقائيا من نفسها
*السمارت كارد...نري الان بعض الكروت الذكية والتي تكون مع الموظفين في الشركات الكبيرة حتي يستطيعو دخول الشركة وبمجرد ان يقوم حامل هذا الكارت بتعريض الكارت لمكنة معينة تقوم هذه المكنة بفتح الطريق امامه لدخول الشركة...الكارت ده بيبقي عليه microprocessor chip هو اللي بيعمل عملية البروسيسنج للداتا وهو اللي بيتعامل مع المكنة اللي انت بتعرض عليها الكارت...هل انت عارف ايه اللي بيحصل بين الميكرو بروسيسور والمكنة؟هل انت عارف عملية السيكيوريتي والاكسيس كونترول دي بتتم ازاي؟طبعا لا...ولذلك فهو ايمبدد سيستم
طيب اديلك مثال بقي علي حاجة مش ايمبدد سيستم عشان الموضوع يبقي واضح اكتر...عشان زي ما اخدنا في العربي زمان ان التضاد يبرز المعني ويوضحه:D
*جهاز الكمبيوتر اللي انا قاعد عليه دلوقتي وبكتبلك الريبلاي ده...هل انا اول ما افتحه بقوم سايبه كدة وهو يشتغل وينفذ حاجات لوحده؟طبعا لا...الكمبيوتر دايما بينتظر الاوامر من اليوزر عشان يقدر يشتغل وينفذ اللي اليوزر بيقوله عليه...يعني حضرتك عايز تشغل الريال بلاير بتروح علي ايكونة الريال بلاير وتدوس عليها وتشغله...بعد ما تفتح الريال بلاير لازم تدوس علي زرار البلاي عشان تشغل الملف الصوتي اللي عايز تشغله...وهكذا...لازم تديله امر بكل حاجة ينفذها.
ارجو اني اكون موفق في توضيح مفهوم الايمبدد سيستمز لك بشكل سهل وبسيط
بالنسبة بقي للشركات المتخصصة في الايمبدد سيستمز...الحقيقة انا معرفش شركات كتير في المجال ده ولكن اشهر واكبر شركة في مجال الايمبدد سيستمز في مصر هي شركة Valeo ودي ليها فرع في القرية الذكية
اتمني اني اكون افدتك
في رعاية الله
سلام عليكم
المفضلات