المشاركة الأصلية كتبت بواسطة mesho100200
انا خلصت كل المستويات من فترة وهذا هو رأيى فى الاكاديمية
أولا : المزايا
أول ميزة أن الكورس يبدأ معك من البداية وكأنك أول مرة تجلس أمام الكومبيوتر لدرجة انهم عاملين بعض اسطوانات تعليم ويندوز للناس اللى مبتعرفش تشتغل ويندوز يعنى مش مطلوب انك تكون كويس قوى فى الكومبيوتر عشان تتعلم برمجة
ثانى ميزة هى طريقة شرح الدكتور عمرو موسى بصراحة لن أجد وصف لطريقة شرح الدكتور عمرو موسى فعلا أكثر من رائع كفاية ان اقولك حتى لو مستوى ذكاءك منخفض لما تتفرج على شرح الدكتور عمرو موسى حتفهم حتفهم (جزاه الله خيرا)
طبعا ده بالاضافة الى اسطوانات الفيديو برايفت اللى بتتعرض لتركات معينة ممكن تواجهها وانت بتشتغل بصراحة رائعه
ثالث ميزة ان الكورس فعلا بيبدأ معاك عملى مباشرة يعنى مش نظرى خلاص فعلا بيعلمك ازاى تعمل برنامج عشان تسوقه وتبيعه مش مجرد كورس عشان تروح تمتحن .
رابع ميزة هى ان الشرح فيديو على اسطوانات ممكن تعيد الاسطوانه مرة واتنين وبعد فترة نسيت حته معينه ممكن تتفرج على الفيلم مرة تانية
خامس ميزة انه بيشرح لغات كتيرة زى الفيجوال بيسك 6 والفيجوال بيسك دوت نت والسى شارب وASp وكريستال ريبورت و قواعد البيانات اكسيس واس كيو ال سيرفر واوراكل وماى اس كيو ال .
سادس ميزة : ان الناس اللى بيشرحوا هم اساسا مبرمجين وليسوا اكاديميين ودى من اهم المزايا
ثانيا العيوب : وياريت لو فى حد من الاكاديمية بيقرأ هذا الكلام يا ريت ميزعلش انا حكتب ما يمليه على ضميرى
اول عيب انه اعطى الفيجوال بيسك 6 أكثر من حقه ولم يراعى انه خلاص راحت عليه يعنى ميكروسوفت الغت دعمه لذلك مبيشتغلش على الفيستا غير بعد حوارات , وجهة النظر المعاكسه ان الفيجوال بيسك 6 يقدر يعملك اللى انت عايزة
ارد على هؤلاء انكم مشتغلتوش على الدوت نت كويس ولو حتى اتعلمتوا مبادؤها فهذا لا يكفى فلن تستطيعوا معرفة الفرق الا بعد الاعتماد عليه اعتمادا فعليا وقتها ستشعروا ان الفيجوال بيسك 6 برنامج عقيم ولن اذكر هنا مزايا الدوت نت
لكن كفاية انى اقول ان ميكروسوفت اوقفت دعمه فخلاص حنتناقش فى ايه , خليك زى ما انت وابقى بص لنفسك كمبرمج كمان 10 او 15 سنه حيبقى وضعك ايه فى السوق
ثانى عيب هو انك بعد الكورس ما ينتهى مضطر تدفع كل شهر 25 جنيه عشان تقدر تتفرج على الاسطوانات لو حبيت تراجع اى موضوع , طبعا هذا عيب خطير جدا لأن المفروض الاسطوانات دى بتاعتى والمفروض اتفرج عليها فى اى وقت
ثالث عيب هو الاسئلة اللى بتبعتها ودى بتكون زى اميل بتبعته فيه سؤالك وبصراحة هذه هى أسوأ شئ فى الاكاديمية وده لان احيانا الرد بيتأخر واحيانا اللى بيرد ميفهمش السؤال وعلى بال ما توضح له السؤال يكون الموضوع طول
أكثر مما هو مستحق وممكن يقولك الموضوع ده خارج نطاق الكورس ومن الاخر اعتمد على المحاضرات والفيديو برايفت ولما تحب تسال على حاجة ابقى دور على النت افضل لأنك غالبا حتلاقى اجابة لسؤالك لأنك لسه مبتدئ
اما لو السؤال متعلق بمشكله فى مشروع من مشروعات الاكاديمية فالافضل يبقى عن طريق الاكاديمية بس تصبر شويه على السؤال , كمان سمعت انهم عملوا حاجة من شهر أو شهرين مش عارف حتبقى كويسه ولا لا وهى ان السؤال اللى بتبعته بيتم حجز
فيدو برايف خاص من خلال برنامج يقوم شخص من الاكاديمية بالدخول جهازك والشرح عليه كأنه قاعد قدامه بصراحة انا مجربتوش لكن لو كده اكيد حيبقى افضل كثير
رابع عيب : قبل ما اقول العيب الرابع احب اوضح حاجة ان فى شخص فى الاكاديمية قام بشرح السى شارب والاوبجكت اورينتد والدوت نت هذا الشرح هو الشرح الاساسى وكان هذا الشرح اكثر من رائع لكن مش عارف ليه
هذا الشخص لا يقوم بعمل فيديو برايفت لذلك مش حتلاقى غير 2 او 3 فيديو برايفت خاص بالسى شارب ولما تبعت سؤال فيها للاسف اللى بيجاوبك شخص متخصص فيجوال بيسك 6 عشان كده مستوى الاكاديمية منخفض فى السى شارب
والدوت نت خصوصا لو السؤال متقدم شويه لأن فعلا هم متخصصين فيجوال بيسك 6 وفى فرق كبير بين الاتنين
فى عيوب الناس بتقولها لكن انا مش شايفها عيوب وهى ان الناس بتقول ان الكورس بيعطيك قشور
لكن احب ارد عليهم ان ميزة هذا الكورس انه بيفتحلك ابواب لغات كتير انا معاك ان بعد ما تخلص الكورس وتبدأ تشتغل مع نفسك تحس ان اللى كنت بتأخذه فى الاكاديمية مجرد مبادئ
انا معاك لأن مينفعش يعطيك كل اللغات دى بكل تفاصيلها والا يبقى انت محتاج عشر سنوات فى الكورس .
قبل ما ابدأ برمجة حاولت كتير اذاكر مع نفسى لكن مكنتش بفهم لأن الشرح كان بيبقى اغلبه نظرى , يا اما بيكون صعب مثال ذلك كتاب استاذى العزيز تركى العسيرى حاولت أقرأه قبل أن آخذ الكورس لكن للأسف لقيته صعب
لكن بعد ما أخذت الكورس بصراحه حسيت انه سهل جدا (جزاه الله خيرا)
الخلاصة : مفيش كورس فى هذا العالم سوف يعلمك كل شئ لازم انت اللى تجتهد وتبحث وبرضه لو أخذت كورس برمجة كبير ومتخصص فى لغة معينه برضه لا يمكن تبقى مبرمج الا اذا اشتغلت بيدك وواجهت مشاكل
وسهرت عشان تحاول تحل هذه المشاكل هذه هى البرمجة ومتعتها البرمجة ليست كتابة أكواد ولكن البرمجة هى طريقة تفكير و دى اهم حاجة انا طلعت بها من الكورس
لو حابين تعرفوا بعد ما اخذت الكورس عملت ايه
اولا عكفت فترة طويله أقرأ كتب كثيرة أهما كتاب استاذى تركى العسيرى وكل لما تقع يدى على كتاب فى مجال البرمجة أو قواعد البيانات اقوم بقراءته وبدأت ادخل على المواقع الاجنبيه عشان اشوف مشاريع واعالج مشاكل واهمها موقع
https://www.codeproject.co m
وعملت برنامج فى الشغل عندى بالسى شارب هذا البرنامج عملتله شرح بالفيديو أخذ ثلاث ساعات شرح (طبعا لا اشرح اكواد ولكن اشرح شرح للمستخدم العادى) فلكم ان تتخيلوا حجم البرنامج
وحاليا عاكف على مذاكرة برمجة الشبكات وبدأت بقراءة مواضيع استاذى فادى عبدالقادر على موقع
https://www.arabteam2000-forum.co m
وده مرتبط كمان بمذاكرة شرح فيديو الشبكات هنا فى هذا الموقع الغالى عرب هاردوير ذاكرت n+ لأستاذى ياسر رمزى وccna لاستاذى محمد سمير وذاكرت dinamip لأستاذى لورمارك
واخر حاجة عملتها أول امبارح هى برنامج صغير لقراءة أى باكيت داخله على كارتة النت وورك واحلل الداتا اللى فيها بايت بايت .
سؤال هام هل لو رجع بى الزمان للخلف هل كنت سأدخل الكورس رغم عيوبه ؟؟؟ الاجابه هى نعم بلا تردد
اخيرا : اسماء الأشخاص والمواقع التى ذكرتها جميعا مفيش حاجة اقدر اقدمها توازى هذا المجهود اللى بيبذلوه غير الدعاء لهم فى صلاتى
(من علمنى حرفا صرت له عبداً)
المفضلات