السلام عليكم :

من كام سنة كده و الدنيا كلها بتلف حولين نفسها و عماله تقول شهادات معتمدة من شركة مش عارف ايه

و كورسات عالمية من اللى هي و خد الكورس و انت تضمن شغل فى اى حتة نضيفة

و الشهادة دى بئى لو معاك تبئى انت واد ............... من الأخر

و تلائى يا عينى الواد الغلبان من دول أول ما يتخرج يروح على أى مركز دورات تدريبية

من اللى بيشوف اسمه كل يوم فى الجرايد و يدفع دم قلبه و يقعد كام شهر صاحى نايم بياخد كورس

و بيتعلم حاجات جامدة أوى عمره ما كان هيعرفها لوحده و يخلص الكورس و يمتحن الواد و ينجح

و بعد كام شهر يبعتوا له الشهادة فى طرد محترم مكتوب عليه كلام انجليزى كتير

و جواه شهادة و بطاقة زى بتاعة البنك و دبوس بأسم الشهادة علشان يعلقه على صدره

و ياخد الواد الشهادة و يكتب سيرة ذاتية محترمة مترتبه و متنظمة وفقاً لقواعد كتابة السى فى

المتعارف عليها عالمياً و ينزل يا حبة عينى للشركات المالتى ناشونالو حاطط فى دماغة

انهم أول ما يشوفوا الشهادة اللى معاهمش هيسبوه يخرج من باب الشركة و هيكتبوا معاه عقد عمل

و هو قاعد وهياخد له كام الف فى الشهر نظير الخدمات النادرة اللى هو هيقدمها لهم و يروح الواد

و يقدم السى فى ويقابله واد فى نفس سنة محترم كده ولابس بدلة " ماركو فيرى "

و على وشة ابتسامة باردة كده مافهاش اى احساس أو تقابله واحدة حلوة

من اللى بيطلعوا فى المسلسلات الأمريكانية و على وشها نفس الأبتسامة

و كأنهم دارسنها فى الجامعة أو واخدين كورس فيها

و ياخدوا منه السى فى ... وشرفتنا .... ابئى عدى ... و ماتقطعش الجوابات

الواد يسأل طب مافيش انترفيو !!

فجأة تلائى الأبتسامة الباردة اتغيرت لأبتسامة عطف و شفقة و حنيه

انترفيو ... !!

و تتحول الأبتسامة بتاعة الشفقة لنظرة " انت عبيط يا بنى " ان شاء الله لما نحتاج هنتصل بيك على طول


و يخرج الواد من أول شركة راح لها و هو مش فاهم حاجة و يصبر نفسه و يقول ماشى دول مش عايزين

حد خلاص ندور على الشركات اللى عايزة ناس تشتغل

و يبدأ رحلة حلوة مع جرنان الأهرام بتاع يوم الجمعة و مواقع التوظيف اللى النت بئت غرقانة بيها اليومين دول

و يروح لشركات عايزة ناس تشتغل و يقابل نفس الواد و نفس البنت اللى قابلهم فى الشركة الأولانية

و على وشهم نفس الأبتسامة اياها و يسمع نفس الكلام

و بعد كام شركة كده

يقرر الواد انه يتنازل و يخليها عليه المرة دى و يروح يدور فى الشركات العاديةو يبتدى يعرف حاجات جديدة

ماتعلمهاش فى الكورس اللى دفع فيه دم قلبه ؛يبتدى يعرف ان الموظف المبتدىء لازم يكون خبرة سنتين

يعنى لما تلائى اعلان طالبين ناس مبتدئين اعرف انهم عايزين خبرة سنتين

و طبعاً دى حاجة إحنا لازم نحفظها مش أكتر

لأن لو حاولنا نفهمها مش هتتفهم يعنى ايه مبتدىء و خبرة سنتين

انا عن نفسى مش عارف لغاية دلوئتى لو فى حد عملها قبل كده يا ريت يقولى

و يعرف كمان إن مواعيد الشغل " الطبيعية " من 10 الى 12 ساعة و ان موضوع 8 ساعات ده يعتبر " بارت تايم "

يعنى حاجة كده دلعو لازم كمان الواد يكون صايع و مقطعها لأنه لو هيتفق مع شركة على مرتب

ممكن ياخدوا منه فلوس أول كل شهر فلازم يبئى واد صايع و أرارى علشان يعرف يتفق على قرشين يعرف ياكل

بيهم ده غير انه لازم يجيد على الأقل أربع لغات حية و سبع لغات ميته

و يكون بيعرف يغسل ويمسح ويكنس و يعمل شاى و قهوة

و لو الشغل اللى هو هينزل فيه لازم يبئى فيه " تيم ورك "

لازم يكون بيعرف يشتغل كتيم ورك لواحده يعنى الواد لازم يبئى فى امكانيات فريق زى المارينز بتوع البحرية

الأمريكانية الواحد منهم ينزل على بلد يقفلها فانت لازم تنزل على الشغل تقفله

مافيش حاجة اسمها تخصصات انت يا باشا متخصص فى كل حاجة

و يرجع الواد يا حبة عينى " مهزوماً مكسور الوجدان " و ان كل اللى عملته له الشهادة

انها ادته فرصه انه يروح الشركات دى و يحط فيها السى فى بتاعته و كتر خير الدنيا على كده

و أكتر من كده يبئى طمع و افترا مهو الواحد مش هياخد كل حاجة من الدنيا كفاية عليه حاجة
واحدة

و انت خدت شهادة ... خلاص عايز ايه

عايز تشتغل كمان ...

انت عبيط يا بنى !!
-------------------------------------------------------------

الموضوع منقول للأمانة من بعض المنتديات

اسم الكاتب: python