السلام عليكم ورحمة الله وبركاتة
اعرفكم بنفسي
انا اسمي يحيى حميده وبشتغل Network Admin في شركة خاصة
الحقيقة رغم اني مشترك في هذا المنتدى الرائع من فترة قصيرة الا اني استفدت منه استفادات كبيرة جدا ومن المجهودات الرائعه اللي الاعضاء والمشرفين يببذلوها لإفادة غيرهم برغم ان اغلب الناس اللي بتقدم الخدمات دي ميعرفوش المستفيدين ومفيش بينهم اي علاقة مصالح.
والحقيقة دي حاجة في حد ذاتها رائعه وقليلة الحدوث في الزمن ده, فشكرا جزيلا للقائمين على المنتدي ولكل حد بيساهم بأي مجهود لتعليم الناس وربنا يجعل هذا العمل في ميزان حسنات الجميع.
المهم علشان مطولش عليكم وتزهقوا مني في اول مشاركة ليا :D ندخل في الموضوع.
فكرة جامعة عرب هاردوير فكرة رائدة واذا ركزنا في تطويرها ممكن تكون فيما بعد مرجع لكل الناس اللي بيشتغلوا في مجال ال IT في العالم العربي مش في مصر بس, وانا بمجرد ما اشتركت في المنتدى وشوفت الفكرة فكرت اقدم فكرة جديدة لعل ربنا يكرمنا بيها ونكون سبب في تحسين احوال المسلمين ونشر العلم والخبرة بين ابنائهم , انا مشترك في جمعية خيريه بتخدم ابناء المنطقة اللي انا ساكن فيها وفيها انشطة خيرية واجتماعيه كتير (ربنا يبارك في القائمين عليها) ومن ضمن الحاجات اللي في الجمعيه معمل كمبيوتر فقلت اية المانع اننا نستغل المكان في التدريب ويبقى الشغل لايف بدل الفيديوهات اللي بيتم تحميلها من الاخوة الكرام - رغم انها مفيده جدا وشرحهم فيها رائع- لكن اكيد الشرح داخل معمل يفرق كتير .
المدربين كده كده بيفرغوا من وقتهم علشان يفيدوا الناس - ربنا يجزيهم خير
والمتدربين هيستفيدوا اكتر بالتأكيد
والجمعية طبعا هتستفاد لو كان الكورس بيتدرس بمبلغ بسيط مقارنه بالمبالغ اللي بتدفع في مراكز التدريب برة , وطبعا ممكن جزء من الاشتراك يتدفع للإنستراكتور نظير مجهودة وتفريغة جزء من وقتة.
وطبعا ممكن ربنا يكرمنا والمشروع ينجح والفكرة تتعمم على جمعيات تانية والخير يعم على الجميع
طبعا هيا فكرة لسة محتاجه تتبلور قلت ادردش مع اخواني فيها لعل وعسى ربنا ينفع بيها المسلمين ويجعلها خالصة لوجهه الكريم.
منتظر تعليقاتكم و رأي المشرفين الكرام على المنتدى وطبعا الموضوع مفتوح لأي اقتراحات او تعديلات.
وجزاكم الله خيرا