بسم الله الرحمن الرحيم
دي أول مشاركة ليا في هذا المنتدي الجميل
الحمد لله جهازي السابق قضي نحبه بعد ثلاث سنوات بدون سبب واضح
فشل مهندس الصيانة اللي بتعامل معاه في تصليحه
و التوكيل (اسما جروب) فشل ايضا و وصل انه لازم تغيير البورده يعني ثمن جهاز جديد
و حاليا مرمي في محاولة يائسة عند محل صيانة في السخاوي للمحاولة مع رجاء و مناشدة أنهم يراعوا ربناا و ميخدوش حاجة منه
و اخر رد ليهم و اللي مش فاهمه اساسا ان البوردة قامت باور و لسه مقامتشي داتا و انهم سألوا مالقوش بوردته موجودة مستعملة يعني لازم يصلحوها و أنا اديتهم حد أقصي 500 جنية تكلفة صيانة
الجهاز كان سيمنس و مش فاكر موديله حاليا بس هوا كان 12 بوصة
السؤال الآن مين أفضل حد متخصص صيانة تنصحوا بيه بحيث أديهولو لو فشل يبقي كده مفيش أمل و أحاول ابيعه بأي سعر لبتوع الصيانة برده لأنهم بس اللي بيشتروا الأجهزة دي يستخدموها كقطع غيار
السؤال الثاني بعد اذنكم
ابتديت أدور علي جهاز جديد
و الحمد لله سمعت ان الفترة دي فيه عروض قوية و تخفيضات مغرية اخر السنة
الميزانية ،،، حد أقصي 4000 جنية
طبيعة الاستخدام ،، استخدام متنقل لطبيعة عملي من مصنع لمكتب لبيت لمعرض ، لعميل ،، و لوقت طويل و فتح اكثر من برنامج ، و تصفح انترنت طول الوقت و لا استخدام اغاني و لا اشاهد افلام و لا ألعب العاب
و البرنامج الرئيسي لعملي و استخدامي أوتوكاد
طلبات خاصة أن بعشق الأجهزة الصغيرة و لذلك ابحث عن حاجة متزيدشي عن 14 بوصة
و أنه يكون بيستحمل و قوي و صيانته متوفرة
و ده اللي ضايقني لأن السوق لقيته كله حاليا اجهزة 15.6 بوصة و مبقاش فيه 14
لقيت جهاز ماركة msi موديل cr400 مواصفاته حلوة و 14 بوصة و هارد 320 و رامات 3 و ب 3200 جنية بس و ضمان سنة
بس مهندس الصيانة قالي متجيبشي الماركة دي ،، مالهاش اسم في مصر و حسنني ان الفلوس اللي تدفع فيها حرام و قالي حتي لو مش هتجيب ماركة عالية يبقي الايسر و الاسوس انضف
أنا مالييش في حكاية الماركات بس مش هجيب سيمنس تاني ،، تعبني
فياريت ياريت تقوللي الأجهزة اللي تناسبني في السعر ده و متزيدشي عن 4000 جنية عشان ده اخري و اجهزة كويسة
و هل ممكن الاقي 14 بوصة و يقضي متطلباتي من الماركات الشهيرة المحبوبة في مصر زي توشيبا و اتش بي و ديل و ليونوفو في السعر ده ؟
أنا منتظر اجاباتكم في اسرع وقت
عشان تعبت من الكتابة عالموبايل
و السلام عليكم
أفضل الماركات من وجهة نظرى الشخصية هى السونى ثم التوشيبا ثم الديل ثم الإتش بي
و لأن أسعار السونى غالية أنصحك بالتوشيبا لجودتها
و مادام بتحب الشاشات الصغيرة يبقى شوف حاجة فى الفئة دى مع ملاحظة إن أغلب الشاشات الصغيرة تكون مرتفعة السعر عن الكبيرة
TOSHIBA SATELLITE U-SERIES
و مادام شغل حضرتك أوتوكاد يبقى تصميم و جرافيك على ما أعتقد صح؟
لو كان كدة يبقى لازم كارت الشاشة يكون عالى و منفصل مش مدمج من إنتل
المفضلات