السلام عليكم ياشباب ..
اولا لازم ارفع القبعة على المجهود والشغل العالى المبذول فى المنتدى .. ومحتاج بقى الخبراء وخصوصا المصريين يشدوا معايا فى مشوار بخصوص اختيار لاب محترم يسد قدام الشغل بتاعى، لانى فعلا محتار بين كام حتة كده جامدة وعاوز أخد و أدى معاكم لحد مااظبط الليلة دى وارسى على حاجة صح تجيب من الآخر .. فهمنى طبعا!
بصوا بقى يا اخوانى ..
علشان نبقى ناس بتفكر صح وابقى معاكم فلة شمعة منورة! هحددلكم بالظبط أنا محتاج ايه فى الجهاز؟ وهرسيكم على الدنيا كلها وكمان هديلكم مواصفات جهازين او تلاتة عينى عليهم وكمان أسعارهم فى السوق اليومين دول علشان تقولوا الخلاصة .. وهل ينفعوا ولا فى افضل عندكم؟! وكمان اسعارهم فى التحتانى ولا المفروض اكسر فى السعر وافاصل لحد كام .. وهكذا!
نبدأ بالأهم وهو الميزانية .. وعلشان اكون صريح وجايب من الآخر! انا عامل حسابى على لاب بحد اقصى 3500 جنيه وحاطط هامش 200 جنيه زيادة فوقيهم فى حالة الطوارىء يعنى لو كان فى حتة حلوة وتستاهل اشد فيها. يعنى بالميت خالص 3700 جنيه واقضيها بقى لآخر الشهر كلمنى شكرا ..
أما بالنسبة للإستخدام فهيكون بنسبة 90% استخدام يومى بإذن الله، واحتمال كبير يكون عليه سيستم فيستا او سفن وطبعا هيكون الشغل اللى عليه برامج التصميم وتحرير الفيديو والصوتيات بالاضافة لشغل الانترنت والابلود والدونلود واف تى بى. ده كله هيحتاج جهاز يشد معايا ببروسيسور وكاشات محترمة ورامات ماتقولشى لا .. واعيين طبعا للامر ده!
وبخصوص الماركات اللى عينى عليها واعتقد ان اغلبكم هيوافقنى فى الرأى HP أو Dell مواصفات جامدة وسعر فى اللذيذ ولكن لو وقع قدامى حتة Lenovo أو Acer تجيب من الآخر! مش بعيد أفكر .. خصوصا ان كتير اوى بيشكر فى اللينوفو بالنسبة لإمكانياته وأسعاره الكويسة فى السوق.
نيجى بقى للسؤال المهم! هو انا محتاج ايه بالظبط بالنسبة لمواصفات الجهاز .. هرسيكم على دماغى!
البروسيسور Intel Core2Duo لأنه الأفضل حاليا بصراحة، وياسلام لو كان Series T7xxx/T8xxx بكاشات 3 ميجا وباس FSB على العالى، برغم انى عارف ان الميزانية مش هتشد معايا فى الفئة دى! بس اهو برضه افترض معاكم .. جايز حد فيكم يقدر يدعك الفانوس ويجيبه ويحقق المعجرة لشعب مصر. ولكن لو مفيس السيريز ده .. فخلينا نلعب فى T5xxx/T6xxx بكاشات 2 ميجا وباس FSB عالى.
الرامات بكتيره 2 او 3 جيجا بس تكون DDR2 أو 1 جيجا بس DDR3 .. وظبطوا بقى فى الباسات من 800 لفوق يعنى 1066 او 1333 يبقى كتر خيركم اوى.
الهارديسك 250 او 320 جيجا مش هتفرق، بس الأهم ان يكون معدل اللفة فى الدقيقة RPM مابين 5400/7200 لفوق، يعنى لو قدامكم هارديسك 320 بس RPM عامل 5400 وهارديسك 250 والـ RPM بتاعه عامل 7200 .. فأكيد عينى هتكون على الهارديسك 250 جيجا أبو RPM أعلى.
الفيجا VGA سواء كارت مدمج او منفصل .. مش هتفرق! بس لا يقل عن 128 ويدعم الابعاد الثلاثية 3D.
بالنسبة للشاشة فخلينا نلعب فى مقاس 15 وكسر يعنى 15.4 او 15.6 وتكون عريضة Wide Screen وبدقة WXGA 1280x800 .. وياسلام لو حد فيكم يكمل جميله ويعطرلى على شاشة Glossy بتدعم المشاهدة بجودة فائقة الدقة HD .. ماهو برضه لو بطلنا نحلم نموت!
نيجى لحوار البطارية .. بتمنى تكون ليثوم Lithium أو أفضل! بـ 9 خلايا أو اعلى .. يعنى تشتغل لـ 5 أو 6 أو 8 ساعات حسب المتوفر قدامكم فى حدود الميزانية .. وماتنسوش يكون عمرها الافتراضى لا يقل عن 3 سنوات بالميت.
أما بخصوص الملحقات الأخرى اللى موجودة فى أغلب الأجهزة زى DVD-RW وكروت الشبكة والفاكس مودم والبلوتوث والكاميرا ومنافذ USB وقارىء البطاقات المتعددة Card Reader وما الى ذلك .. فطبعا هتكون فى الحسبان .. وهى عموما متوفرة فى أغلب الاجهزة .. بس بتختلف اوقات تلاقى نوع او موديل مسقط حاجة منهم.
أعتقد أنا كفيت ووفيت ورسيتكم على دماغى زى مابيقول الكتاب! عاوزكم بقى تمخمخوا كده وتوقعولى حتة صح تشد معايا تمام التمام من غير تسقيط ولا غيار زيت ههههههههه!
قدامى دلوقتى 3 حتت على جديده معروضين عند موزع مشهور لا داعى لذكر أسمه .. والحقيقة محتار مابينهم وقولت اخد و أدى معاكم علشان نشوف الاشد فيهم من حيث المواصفات والماركة ده من جهة والسعر نشوف آخره أيه فى السوق للتلت حتت دول .. علشان اقدر اكسر معاه فى السعر وما تحدفشى على سعر فى العالى ويقلبنى فى الفلوس ههههههههههه!
ماتنسوش برضه انى يهمنى الديزاين بتاع الجهاز وشكله الخارجى ويكون برستيج مع المواصفات القوية طبعا .. علشان كده عاوزكم تنصحونى بأنه الافضل بين 3 حتت دول من حيث الشكل الخارجى والمواصفات والماركة والضمان وقوة الاستحمال وهكذا .. مع انى عموما بحافظ واهتم جدا بالالكترونيات كأنها عيل من عيالى !
HP ProBook 4510s
Intel Core2Duo (2.2GHz, 2M Cash)
HDD 320GB, RAM 2G DDR2, 15.6 Wide Crystal
DVD-RW, WebCam, Lan/Fax, Wireless, Bluetooth, Mouse HP
الجهاز معروض بـ 3850 جنيه/جديد .. بضمان سنة
Dell Vostro 1015
Intel Core2Duo (2GHz, 2M Cash)
HDD 250GB, RAM 2G DDR2, 15.6 WXGA
DVD-RW, Camera, Lan/Fax, Wireless, Bluetooth, Reader
الجهاز معروض بـ 3550 جنيه/جديد .. بضمان سنتين
Lenovo G550
Intel Core2Duo (2.2GHz, 2M Cash)
HDD 320GB, RAM 4G DDR2, 15.6 WXGA
DVD-RW, Camera, Lan/Fax, Wireless, Bluetooth, Reader
الجهاز معروض بـ 3800 جنيه/جديد .. بضمان سنة
فى حتة Acer رابعة الحقيقة محتار ادخلها مع التلت حتت اللى فوق .. لان سعرها Over شوية وكمان البروسيسور AMD مع انى بحترم الماركة دى اوى .. بس الكل بيقولى انتل افضل وقطع غيارها مرمية فى السوق .. عموما هحطها برضه واشوف رأيكم؟!
Acer Aspire 5536G
AMD Turion X2 (2.2GHz, HDD 320GB
RAM 3G DDR3, 15.6 WXGA, DVD+/-RW, Fax/Lan
Wireless, Bluetooth, Webcam 1.3m, Reader 5in1, VGA ATI
الجهاز معروض بـ 3999 جنيه/جديد .. بضمان سنة
حاسس الصراحة ان الحتة الآيسر دى محترمة بس مقلق علشان البروسيسور مش لاقيله شعبية عندنا و فيد باك محترم اقدر احكم عليه .. لان الكل شغال على انتل كور2ديو دلوقتى!
عاوزكم بقى تقولولى رأيكم أيه؟! بينى وبينكم عينى على الحتة HP كبرستيج بزنس ومواصفات كويسة وفى نفس الوقت اللينوفو بيغرينى بامكانياته وسعره المنافس مقارنة بالماركات التانية .. لكن كبرستيج وعلامة تجارية اظن انه فى الضياع لان ناس كتير لا تفقه عنه شىء والاغلبية فاكرينه جهاز صينى صنع تحت بير السلم مش فاهمين ان لينوفو فى الاساس شركة صينى اه .. بس عملت صفقة مع IBM علشان تتولى خط انتاجها لاجهزة الكمبيوتر المحمول .. واما Dell فالكل الحقيقة بيشكر فيه سواء ماركة او مواصفات او سعر وكمان ضمان ويعتبر هو ارخصهم فى المجموعة اللى عارضها دى .. بس مش عارف مش بحب الديل ليه! جايز المشكلة فيا انا بس فعلا لما بشوف لاب ديل قدامى بحس انى قرفان هههههههه الظاهر محتاج اتعالج!
عموما! عاوز مشورتكم وتنصحونى بأيه؟! .. ومحتاجكم تفطمونى على اسعار الاربع حتت اللى فوق دول فى السوق وأيه السعر التحتانى اللى مقدرش افاصل فيه مع الموزع .. يعنى اقل سعر فى السوق حاليا لكل جهاز منهم! وياريت لو تقولولى فين الوكيل بتاع الضمان لكل ماركة منهم فى مصر وافضل وكيل وضمان لو فى اكتر من واحد زى Dell كده .. وكمان تقولولى ايه المفروض اشيك عليه لما اجى اشترى اللاب زى مثلا: اتأكد ان الشاحن والبطارية اصلى ولا لاء ازاى .. وأعرف منين ان اسطوانات التعريف والويندوز اصلية .. ولو طلع فى المقدر زى اللى شغالين فيه اليومين دول وقالى ان نسخة الويندوز والتعريفات كلها بوت وبيتعملها ريكفرى من الجهاز ومفيش اسطوانات علشان سعر اللاب يرخص .. سعتها اقوله ايه؟! ولا ده امر عادى مفروغ منه والكل شغال بيه.
بالنسبة كمان للفاتورة عند الشراء! هو المفروض يفنط فيها مواصفات الجهاز بالتفصيل ونوعه والسيريال بتاعه علشان اقدر اطالبه بحقوقى لو فى اى حاجة كده ولا كده بعدين .. ولا هو بيدينى الضمان ويقولى تمام على كده .. عاوزكم برضه تفطمونى اوى على حقوقى فى الجزئية دى لانها مهمة جدا. اهو الكل هنا يستفيد برضه من المعلومات دى!
فى انتظار ارائكم ونصائحكم .. وزى ما قولتلكم لو قدام حد فيكم حاجة اشد من الاربع حتت اللى عرضتهم عليكم دول فى حدود الميزانية والمواصفات اللى انا رسيتكم عليها .. قولولى عليها بسعرها التحتانى اللى اتكلم فيه مع الموزع.
فى انتظار خبراتكم ..
المفضلات