السلام عليكم ورحمة الله وبركاته
اخواني واحبائي في المنتدى الحبيب تحية طيبة وبعد

والله يا اخوان انا مليت جدا واحترت واتشتت افكاري وحاسس اني تايه ومش عارف الطريق

انا اسمي عبدالرحمن من مصر 24 سنة و3 شهور ونص

عندي شوية خبرة على قدي في it وحصلت على شهادة icdl من فتره واشتغلت شغل حر في صيانة الكمبيوتر من ايام ويندوز 98 وحتى الان بس مشكلتي ان معرفتي لا تعتمد على اي اساس علمي
ونسيت اقولكم اني خريج 2007 من جامعة الفيوم كلية الخدمة الاجتماعية (محدش يتتريق) عادي يعني اصلى شبعت ترقيه من ورا الموضوع ده لدرجة اني ندمان اني دخلت الكلية دي

المهم يا اخواني انا لقيت الحمد لله شغل في شركة صغيرة اشتغلت it بس العملية هنا على قدها شويه واهم حاجه اني البي طلبات الناس هنا سواء ابناء اصحاب العمل او العاملين والموظفين بجديد الجيمز والام بي ثري رغم اني بطلت الحمد لله الاتنين بعد ماكنت مدمن وكنت بنام قدام ريد اليرت وبرو افلوشن وخصوصا في رمضان عشان انسى الجوع

بس وبعدين انا هفضل كدا لحد امته مريت والله يا اخوان بوعكة نفسية كنت هروح فيها لدرجة اني خسرت اصحابي واحبابي من كتر مانا متشائم وكئيب ومنطوي وكان ده بعد ما لقيت نفسي بخبي اني شغال it (بس عايز اقولكو ان it في شركتي نسميه جيمر احسن ) عشان محدش يحرجني ويسئلني ومعرفش ارد وترتب على كده اني كنت هسيب الشغل واقعد في البيت لاني من النوع الى يا اما يكون مثالي في الحاجه يا اما ميعملهاش وادي العيش لخبازه
المهم اني اخواتي في البيت واهلي اصروا على استمراري في الشغل واطور نفسي وكده

جينا لمشكلة اكبر بكتيييييييييييييير اني بعاني من ازمة ثقه بالنفس كبيرة جدا والسبب في ذلك اني عمري ما اعرف يعني ايه كلمة مذاكرة واجتهاد (بس مكنتش بغش في الامتحانات كان ربنا مسهلها معايه ) تخيلوا اني 24 سنه وعمري محطيط هدف ووصلتلوا وقاموس حياتي ميعرفش العزيمة والاصرار والتحدي يعرف بس الاحباط والانهزامية

مش عارف انا فقت متأخر ولا ايه المهم ان احد الاصدقاء الله يكرمه دلني على عرب هارد وير وحسيت انا ربنا بعتلى طوق النجاة والحمد لله ولحسن حضي وقعت اول ما وقعت في الاستاذ احمد جوده الله يبارك فيه

وحسيب بالامل وتابعت الايه بلس واستفدت كتير منه ومن المهندس ياسر رمزي والمهندس محمود صقر والله يا جماعة الناس دي ربنا يبارك فيهم ناس ممتازة جدا ربنا يقدرهم ويحميهم

بس دلوقتي رجعت مشتت تاني انا قدرتي على التحصيل ضعيفة ومتعلمتش من صغري انظم وقتي فالعمليه سلطه على الاخر ده غير احساسي المزمن بالغباء وضيق الافق والخيال العقيم والذاكرة الزهيمرية والله يا جماعة الحجات دي معطلاني عن انجاز اي شيء انا بنسي بطريقة مرضية

انا صدعتكوا معلش انا اسف بس بفضفض

المهم انا دلوقت سمعت عن mcitp وعجبني الموضوع

فهل

واحد زيي ممكن ياخد الشهادة دي ؟

انا سألت في يات قالوا 8000 جنيه ونيو هورايزن نفس الكلام (انا بتكلم على الانتربرايز )

ودي اسعار وهمية


وكمان سألت في الجامعة الامريكية قالولي كلام غريب ومفهمتش كويس


ابتديت ادور هنا في المنتدى لقيت مليون رأي واتشتت واتخنقت

فلوا تكرمتم يا اخوان تدلوني اعمل ايه؟؟

ابعد عن mcitp لان لانها كبيرة علي

ولا اخد سيسكو


ولا اقعد في بتنا


انا فعلا بتمنى اخد mcitp ونفسي ربنا يكرمني واعرف طعم النجاح واحسس اني مميز في حاجة ومخبيش اني it

بس اخدها فين وازاي وبكام

الي يساعدني هدعيله

سامحوني للاطالة والرغي

والسلام عليكم ورحمة الله وبركاته