السلام عليكم ورحمة الله وبركاته
أنا سبق واتكلمت قبل كدة عن موضوع التقييم وعن المجاملات
وأفتكر في ناس في المنتدى كانت متفقة معايا وكانت شايفة إن النظام لا يخلو من مجاملات واضحة ومستفزة في بعض الأحيان
أنا هوضح مثال صغير شوفته من شوية بصراحة حرق دمي شوية
بس الأول عاوز أوضح إني معرفش ولا شخص من إللي اشتركوا في الموضوع بالردود معرفة شخصية
ولا أعرف صاحب الموضوع إللي استلم التقييمات، وأنا مش ضده، وتقييمه بآلاف النجوم لن يضرني في أي شئ بل بالعكس أنا أتمنى الخير للجميع
اتفضلوا بصوا على الموضوع ده (تعديل: الموضوع ده شكله هيتغير خلال ساعات، عشان كدة عملت حسابي واحتفظت بنسخة منه -بدون إذن نيابة- هبقى أرفعها لما يتغير)
https://www.arabhardware.net/forum/s...d.php?t=192489
الراجل لسة بيقول هعمل مراجعة، وتم التقييم
أنا مش ضد تقييم واحد على مجهود عمله، إنما تقييم مقدم?
طب بلاش كدة، الراجل محل ثقة والناس مقدرة تعبه وبتشجعه عشان يعمل مراجعة كويسة معنديش مانع
بس الاعتراض على كلمة تم التقييم إللي بتتكتب في المشاركة
الكلام ده بيفتح مجال لمجاملات من نوع واحدة بواحدة
وحتى إللي بيدخل يرد بعد واحد من بتوع تم التقييم، ممكن يتعرض لإحراج (نظرا للعلاقة الطيبة إللي بتجمع معظم أعضاء المنتدى ببعض) ويضطر لإعطاءه تقييما بدوره
وربما يكون من حقه فعلا، ولكن طريقة التقييم تمت بنوع من ال... ال... مش عارف أسميها إيه
بس يعني الواحد بيلاقي نفسه بيقيم غصب عنه
أنا عارف إني هفتح على نفسي نار جهنم، وكل الناس إللي في الموضوع ده هيهاجموني وهيقولوا الراجل يستاهل التقييم وفي ناس هتقل أدبها وناس هتقوللي ملكش دعوة (وإن اتقال بأسلوب مهذب ولكن بنفس المعنى)
وأنا والله مش ضد صاحب الموضوع ده وعارف إنه هيتعب ويستاهل كل نجمة هياخدها، بس ده مجرد مثال عاوز أوضح بيه النظام ماشي إزاي (كلمة تم التقييم دي بتضايقني جدا)
أنا ببساطة أطالب بإلغاء هذا النظام من أساسه
وحفاظا على حقوق المتميزين من الأعضاء، واعترافا بفضلهم في بقاء هذا المنتدى على قيد الحياة إن صح التعبير لابد من إيجاد بديل لهذا النظام
ولدي بعض اقتراحات
1- أن يظل الوضع على ماهو عليه، ولكن يتعرض العضو الذي يجاهر بتقييمه لعقوبة مناسبة تراها الإدارة (وإن كان التحايل على هذا البديل سهل عن طريق الرسائل الخاصة)
أو ربما يكون هناك اتفاقات بين بعض أعضاء على التقييم (قيمني وأقيمك)
2- أن يلغى التقييم نهائيا ويتم استبداله بنقاط من الإدارة تحت بند رصيد المتفرقات أو كما ترى الإدارة
أو يمكن إنشاء بند جديد في النقاط خصيصا لهذا الغرض (نقاط للمواضيع متميزة مثلا)
تعديل: أنا شايف إن ده أنسب حل، خصوصا إنه مش هيحتاج مجهود كبير من الإدارة لأن عدد المواضيع الجديدة إللي بتتفتح كل يوم مش كبير
خصوصا إنه في أقسام هتهمل تماما من النظام ده، زي قسم طلبات ونصائح تجميع الأجهزة والقسم التجاري، لأنه ببساطة محدش هياخد تقييم أو نقط عشان بيسأل على حاجة أو عشان بيبيع ويشتري
ويا ريت النقط ياخدها العضو مش بس عشان أول مشاركة في الموضوع (الموضوع الأصلي)
لأ المفروض كمان الإدارة تراعي هل العضو بيتابع استفسارات بقية الأعضاء؟
أسلوبه في الرد
سرعة الرد، وهكذا ...
خلونا نتكلم بصفة عامة عن التقييم، ومدى جدواه وعدالته
وهل هو أفضل ولا البدائل إللي اقترحتها (أو هل توجد بدائل أفضل)؟
ويا ريت مننساش الهدف من التقييم أو من بديل التقييم (إحنا عاوزين نشجع الناس تعمل أحسن، وعاوزين نميز الناس إللي بتتعب ونكافئهم)
ويا ريت طبعا نلاقي حل نوصل بيه للهدف ده بشكل سليم وعادل عشان كل واحد ياخد حقه في المنتدى
في النهاية أرجو إن محدش يزعل مني والقرار في الأول وفي الآخر يرجع للإدارة وده مجرد اقتراح
وأرجو كمان إن الموضوع ميخرجش عن إطار المناقشة المهذبة بدون تعصب للآراء ولو الموضوع ده هيسبب مشكلة لحد الإدارة ممكن تقفله أو تمسحه
المفضلات